Mateo 7
7
Ke Penurù ni Hisus Mekeatag te Kedsawey ta te Menge Ruma Ta
(Lucas 6:37-38, 41-42)
1Ne migkahi pà maa si Hisus te, “Kenà kew edsawey te ruma ne etew apey kenà kew edsewayan te Eleteala. 2Su edtimbangtimbangen kew te Eleteala iring te kedtimbangtimbang niyu te ruma ne etew. Ne iyan din meana ne taman ne kerekelà te kedtimbangtimbang niyu te ruma ne etew, ne arà en dema ke kerekelà ne kedtimbangtimbang te Eleteala keniyu.
3“Engketà be,” ke si Hisus, “ne meambe ke edturikan nu ke salà te ruma nu ne iring te pesek, ugaid ne warà ma te hinawa nu te ruen salà nu ne iring te gedgeran kerekelà din? 4Engkey se kedtikà nu te egkahi riyà te ruma nu te id-awà nu ke pesek din, ugaid ne ruen ma nekepesek kenikew ne iring te gedgeran kerekelà din ne kenà nu egketuusan? 5Engkey en ayan ne kedtarùtarù nu! Unai nu pà te ed-awà ke nekepesek kenikew ne iring te gedgeran, ne an pà ne ebpekekita ke en ne ebpengawà te pesek te ruma nu.”
Ke Sempità ni Hisus Mekeatag te Menge Etew ne Warà Adat din te Eleteala wey ke Lalag din
6“Kayi te kebpenurù niyu ne kenà niyu ibpehes te ebpepemineg dut te menge etew ne warà adat din. Su ebpekeiring kew te idtimbag niyu riyà te asu ke kearen ne egkeedatan te Eleteala, ne eberiyung dan ne ebuntalen kew. Ne kenà niyu idtimbag ke pirlas niyu riyà te menge bavuy su egiekan dan dà ini.”
Mekeatag te Ebpemuyù diyà te Eleteala
(Lucas 11:9-13)
7Migkahi si Hisus te, “Embiya ebpengeningeni kew riyà te Eleteala ne buyù kew ne ebehayan kew rin. Pemengà kew ne ruen arà egketuen niyu. Penehetiat kew ne ebpuwasan kew rin. 8Su langun ne ebuyù diyà te Eleteala ne ebehayan, ne ke etew ne ebpemengà ne ebpeketuen, ne ke etew ne ebpenehetiat ne ebpuwasan ke lekeb kandin.
9“Menu sikiyu ne menge lukes, embiya ebuyuan ka te anak nu te pan, maa batu se ibehey nu? 10Etawa ebuyuan ka rin te serà, maa uled se ibehey nu? 11Sikiyu ne menusiyà ne kenà metidtu ne metau kew ne ebehey te meupiya riyà te anak niyu, na iyan pè be ke Amey niyu ne Eleteala ne riyà te langit kenà mebehey keykew te meupiya embiya ebuyù kew riyà te kandin.
12“Ne misan engkey ne egkiyuhan niyu ne ibped-ulaula te menge etew keniyu, ne iring ketà dema se ul-ulaa niyu riyà te kandan. Su ini se meana dut te penduan ne intelau ni Moises wey ke menge penurù dut te menge ebpelamabas te Lalag te Eleteala rengan.”
Ke Melihet wey ke Meluag ne Gumawan
(Lucas 13:24)
13“Lusud kew riyà te melihet ne gumawan,” ke si Hisus, “ne ebpependiyà te umur ne kenà edtaman. Su meluag ke gumawan ne merayun ke dalan ne ebpependiyà te apuy nerakà, ne merakel ke edtuntul ketà. 14Ugaid ne melihet ke gumawan wey mepasang ne ibayà ke dalan ne ebpependiyà te umur ne kenà edtaman, ne merelag dà se ebpeketuen ketà.”
Ke Sempità ni Hisus Mekeatag te menge Etew ne Kenà Benar ne Ebpelambas te Lalag te Eleteala
(Lucas 6:43-44)
15“Uram kew dut te menge etew ne engkungkun ne ebpelambas te Lalag te Eleteala. Su ebpendiyà dan te keniyu ne iring te paras te bilibili ne meamuk, ugaid ne riyà te hinawa ran ne iring dan te mewalew ne asu ne ebpekekaid. 16Egkekilala niyu ke kenà benar ne ebpelambas te Lalag te Eleteala kayi te ulaula ran. Su iring te kayu, kenà ebahas ke sepinit te paras ne kenà ebahas ke degiyangas te igira. 17Iring din ded dema ke kayu ne meupiya se kegueyhuey rin ne iyan din dà bahas ne meupiya. Ugaid ne ke kayu ne ruen sakit din ne iyan din bahas ne meraat. 18Su ke kayu ne meupiya se kegueyhuey rin ne kenà ebehas te mereatey, ne ke kayu ne ruen sakit din ne kenà ebahas te meupiya. 19Ne langun ne menge kayu ne kenà ebahas te meupiya ne ebpilayen ne idrapug su ebinsulan. 20Tembù be igkahi ku keniyu te egkekilala niyu ke kenà benar ne ebpelambas te Lalag te Eleteala kayi te ed-ul-ulaan dan.”
Mekeatag te Menge Etew ne Kenà Ebpekelusud dut te Menge Etew ne Edetuan te Eleteala
(Lucas 13:25-27)
21Ne migkahi si Hisus te, “Kenà langun te menge etew ne edtawag kedì te ‘Is Kerenan, Kerenan’ ne ebpekelusud dut te menge etew ne Edetuan te Eleteala ke kenà sikandan dà arà se edtuman dut te kiyug te Amey ku ne Eleteala ne riyà te langit. 22Su embiya egkeuma arà se hewii te kegkukum te Eleteala ne merakel se ebpeyiruwiru kedì se egkahi te, ‘Is Kerenan, Kerenan, mibpesabut key te Lalag te Eleteala impepevayà te gehem te ngaran nu, ne mibpenegseg dey ke vusew ne ed-amung-amung te menge etew, ne merakel pà se mekegeyip ne neveelan dey!’ 23Ugaid ne iyan ku igkahi kandan te, ‘Sikiyu ne meraat se ulaula, kenà ku egketuenan sikiyu. Awà kew kayi!’ ”
Ke Deruwa ne Etew ne Ebevaley
(Lucas 6:47-49)
24“Tembù be,” ke si Hisus, “langun dut te nekerineg te lalag ku ne mibperumaruma, ne ebpekeiring dan te bereitungan ne etew ne riyà mebevaley te meresen. 25Ne midadsang ke uran ne midalem ke wayig ne nesuhat te keramag ini se valey, ugaid ne warà ini mepiley su riyà mekeitindeg te meresen.
26“Ugaid ne langun ne menge etew,” ke si Hisus, “ne nekerineg te lalag ku ne kenà dan ebperumaruma, ne iring dan te etew ne warà itungan din ne mebevaley riyà te pantad. 27Ne midadsang ke uran ne midalem ke wayig ne nesuhat te keramag ini se valey, ne arà dà ne nerundus en su neawet dà dut te keramag.”
Ruen Gehem te Kebpenurù ni Hisus
28Nekeipus si Hisus se ebpenurù te menge etew ne neinuinu ran nevenar, 29su kenà iring dut te kebpenurù te menge etew ne ebpenurù te penduan te menge Hudiyanen su ruen gehem din ini se penurù din.
Àwon tá yàn lọ́wọ́lọ́wọ́ báyìí:
Mateo 7: mbi
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1989, Wycliffe Bible Translators, Inc. All rights reserved.
