Tongo nda ti aye 2
2
1Tongaso laa Nzapa ahunzi ti sara yayu, na sese na aye ti ala so kue ayeke mingi mingi. 2Na lango mbarambara ni, Nzapa ahunzi kua ti lo. Na lango mbarambara ni, Nzapa awu tere ti lo na peko ti kua so kue lo sara. 3 Nzapa asara tufa na ndö ti lango mbarambara ni si lo zia ni nde ndali ti lo, ngbanga ti so na lango so laa lo wu tere ti lo na peko ti kua so kue lo wani, lo sara. 4Lege so a sara yayu na sese laa.
Yaka so ayeke na Eden
Na ndembe so KOTA GBIA Nzapa asara sese na yayu, 5mbeni kete keke wala pere ade ti sigigi pepe, ngbanga ti so lo de ti sara titene ngu-Nzapa apika na ndö ti sese pepe si mbeni zo titene afâ yaka ayeke daa pepe. 6Gi mbeni ngu laa alondo na gbe ti sese asigigi si amu le ti sese ni kue.
7 KOTA GBIA Nzapa amu fuku ti sese, lo sara na zo. Na pekoni, lo huru pupu so ayeke sara titene zo aduti na fini na ya ti hon ti zo ni si zo ni aga zo so ayeke na fini. 8KOTA GBIA Nzapa aleke mbeni yaka na sese ti Eden, na mbage ti To si lo zia zo so lo sara lo so daa. 9KOTA GBIA Nzapa asara titene mara ti akeke nde nde kue asigigi na ya ti yaka ni; akeke ni ayeke pendere ti baa, ale ni anzere ti te. Na be ti yaka ni, Nzapa azia keke so ayeke mu fini na zo, na keke so ayeke sara titene zo ahinga ye so ayeke nzoni na ye so ayeke sioni.
10Mbeni *bale alondo na sese ti Eden, asigigi si asara titene yaka ni awara ngu. Ti londo na ndo so, ngu ni akangbi ya ti lo na amaboko osio. 11Mbeni maboko ni oko ayeke ngu ti Pishon; ngu ti Pishon laa angoro tere ti kodro ti Havila. Lôro ayeke kâ; 12lôro ti kodro ni ayeke lôro ti nzoni ni; bedelium na têne ti kornaline ayeke nga daa. 13Use maboko ti ngu ni, iri ni Gihon; ngu ti Gihon laa angoro tere ti kodro ti Kush. 14Ota maboko ti ngu ni, iri ni Tigre; ngu ti Tigre laa ayeke sua na mbage ti To ti kodro ti Asur. Osio maboko ti ngu ni, iri ni Efrate.
15KOTA GBIA Nzapa amu zo, azia lo na ya ti yaka ti Eden titene lo fâ yaka ni, lo bata ni. 16KOTA GBIA amu yanga na zo, atene: “Mo lingbi ti te ale ti keke so kue ayeke na ya ti yaka ni. 17Me le ti keke ti hingango nzoni na sioni so, mo te ni pepe, ngbanga ti so na lango so mo yeke te ni, mo yeke kui biani.”
18KOTA GBIA Nzapa atene: “Ayeke nzoni pepe titene zo aduti gi lo oko. Mbi yeke sara mbeni zo so alingbi na lo, ti mu maboko na lo.” 19KOTA GBIA Nzapa amu sese, lo sara na anyama kue ti ngonda, na andeke kue ti nduzu. Lo ga na ala na zo ti baa lege so zo ayeke mu iri na ala. Nyama oko oko ayeke bata gi iri so zo amu na lo. 20Zo amu iri na anyama ti kodro kue, na andeke ti nduzu kue, na anyama ti ngonda kue. Me ti lo wani, lo wara mbeni zo oko so alingbi na lo, ti mu maboko na lo pepe. 21KOTA GBIA Nzapa asara si zo ni ati na ya ti kota lango. Lo zi mbeni bio oko ti kate ti zo si lo kanga kasa ti tere ti zo na plase ni. 22 KOTA GBIA amu bio ti kate ti zo, lo sara na wali si lo ga na wali ni na mbage ti zo ni. 23Zo ni adekongo, atene:
“Ti fadeso, so zo laa, lo yeke tongana mbi!
Fade a yeke di iri ti lo wali ti koli,
ngbanga ti so a mu lo na ya ti koli.”
24 Ndani laa koli ayeke zia ande babâ na mama ti lo titene lo na wali ti lo abongbi oko si ala ga gi tere oko.
25Koli ni na wali ti lo, ala use kue, tere ti ala ayeke senge. Me na popo ti ala, kamene asara ala oko pepe.
Àwon tá yàn lọ́wọ́lọ́wọ́ báyìí:
Tongo nda ti aye 2: MNF2010
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© La Société Biblique de Centrafrique 2010