Mateu 3
3
Ioni Tau Bapitaiso Ya Nau‑wahe
(Marika 1:1‐8; Luke 3:1‐18; Ioni 1:19‐28)
1Ka tuta tanoi wayahina Ioni Tau Bapitaiso vin'‑omo, ka papani Iudea anata nihenina naunau‑wahe, vonavona, 2“Yami dewa goyona wayahi unua‑vinana, iuna Yaubada ya pai veimea vi‑maupwani.”#Mat 4:17; Mar 1:15. 3Nonova tau apa‑taputapu Isaia Ioni‑nana wayahina apa‑taputapuei, ivona,
“Tau vi‑hone aitam meagai anata nihenina
movina ananina wayahina si‑vin'‑omanei
ka vonavona,
‘Kauvea yana etawana uvo‑vi‑aiaia!
Kadu uvo‑vi‑tunutunuhi!’”#Isa 40:3.
4Ka Ioni‑nana ana kwama moimoiana a nau‑vevewana vahitau kameliV vutuvutuna wayahina deina, ka a haiona bulumakauV wagana, ka ana ma' digwai kadu mamau a daudau.#2Ki 1:8. 5Ka Ioni‑nana meagai anata naunau‑wahe. Ka meagai Ierusalem a tau ma', kadu papani Iudea a tau ma', kadue Daudau Ioridani baimina a tau ma' habuhabui iomomo Ioni‑nana wayahina. 6Ka avaha yai dewa goyona ihaeyei, akanai tauna vi‑bapitaisoei Daudau Ioridani nihenina.
7Ka taui Parisi yai yoko wayahia kadu taui Sadusi yai yoko wayahia habuhabui aveta tauna bapitaiso wayahina iomomoi. Ka tutana Ioni dueyei ivona,
“Itomi tau vitupu, mwata deina. Unuanua apaina Yaubada ya nua‑goyo wayahimia una‑novo ami bapitaiso ana heta wayahina, ika?#Mat 12:34; 23:33. 8Kate avonemi eha. Nau‑wawanimi yami nua‑vinana tunuhina uviwaveneka yami dewa ahiahina wayahina. 9Abaraham vivane Yaubada a niam, ka aituhu itomi unuanua taumi Abaraham a tupua‑nenenehi, ka aituhu unuanua kadu itomi Yaubada yaiana deina, yami nuanua taina eha tunuhina. Itomi eha ami pata una‑novo dewa‑yaiyai Yaubada wayahina deinake. Udueyei. Yaubada ya bagibagi ani‑vainena, ka tauna ana pata hanu taina wayahina Abaraham a tupua‑nenenehi vevewane‑neiei. Wayahina, yaka dede eha aitam aviani Yaubada matana.#Ioni 8:33, 39; Rom 4:12. 10Unononi avonemi. Aituhu yami dewa eha ahiahina, akanai yawaimi aitam ai deina, ka eha uana ahiahina. Wayahina, tomotau ai‑nana iguhani, ihaponei n'‑anai. Wayahina, apaina Yaubada na‑dewa‑yaiyaiemi, na‑haponemi ai ananata nihenina deina.#Mat 7:19; Luk 13:6-9.
11Tuta ataina yau paisewa taina. Aituhu aviyaivia inua‑vinana, taui avi‑bapitaisoei daudaua. Ka aitam onoto muniua omomo, ka tauna vane‑tawaneu. Eha nau‑wawaniu tauna an' ae‑yapayapana ayavuhi, iuna tauna ananina ka yauke kikitu. Ka onoto‑nana ya paisewa vin'‑omo Nuana Ahihinata wayahina. Ka aituhu aviyaivia ivitumahanei, taui Nuana Ahihinata ivaniahei onoto‑nana wayahina, kate aituhu aviyaivia ivihahaiei, taui ai ananata ivaniahei onoto‑nana wayahina.#Ioni 1:26-27, 33; Dew 1:5.
12Ka onoto‑nana ya paisewa aitam tau baguna deina. Ka tauna na pai tana‑vewana nimana omomo. Ka apaina aituhu aviyaivia yai dewa ahiahina, taui aniani ahiahina deina. Ka aituhu aviyaivia yai dewa goyona, taui aniani mavununa deina. Ka tauna aniani ahiahina ka aniani mavununa na‑tana‑vewani, e ahiahina yan' anana nihenina na‑totohi, kate goyona ai ananata‑vavaha nihenina na‑haponei.”
Iesu Ya Nuanua A Bapitaiso Vaniahei
(Marika 1:9‐11; Luke 3:21‐22)
13Ka munia, Iesu papani Galili ni‑tawanei, e omo Daudau Ioridani wayahina, ka tauna nuanua deina, “Yau nuanua vivane Ioni daudau wayahina vi‑bapitaisoeu.”
14Kate Ioni, avaha Iesu ya nuanuana nononi, nuanuana vihahaiei. Wayahina, Ioni ivona, “Nau‑wawaniu wamke evi‑bapitaisoeu, iuna evane‑tawaneu. Ka aviani wayahina eomo wayahiua, e yauke avi‑bapitaisoem?”
15Ka Iesu Ioni ya vonana vi‑mavinei, ivona, “Tuta ataina wayahina yau nuanua akanai. Iuna aviani Yaubada ya nuanua aitamoata aitamoata, nau‑wawanika kadedewei deina.”
16Wayahina, Ioni awaehei, e tauna Iesu vi‑bapitaisoei daudaua. Ka tutana Iesu daudaua igayo omo, wahuma am‑waei, e Iesu Nuana Ahihinata dueyei, ana dune bunebune deina, e opu‑me hetana itoha.#Ioni 1:32. 17Ka aitam movi wahuma wayahina tomotau‑naia vonei, ivona, “Aina Natu‑hoiu, e tauna adune‑nuanuaiei ananina, kadu tauna wayahina adewa‑haiawa ananina.”#Sam 2:7; Isa 42:1; Mat 12:18; 17:5; Luk 9:35.
Àwon tá yàn lọ́wọ́lọ́wọ́ báyìí:
Mateu 3: MVN
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2008, Wycliffe Bible Translators, Inc. All rights reserved.
