Madiu 23
23
Tonagona tafatafalolodiyao yadi ve'alololo fa'ina
Yesu givenuwa'ata.
Maki 12:38-39; Luke 11:43,46, 20:45-46
1-2Tu Yesu yo'oyo'o kadu ana tomuliya agaidiya gigahe gigayo, “Badi Mosese yana vehimeya ana tovehawala kadu tonagona tafatafalolodiyao adi egana Falisi au Mosese ana hilafa, yana vehimeya fa'ina kaliva hikikivetuvetunudi. 3Badi Mosese ana hilafa fa'ina gavadi gavadi hivehawala, medema wanavenogalena be wanamuliyena. Atu gavaimi hidewadewa medemi keke wanamuliyeni, fa'ina kebuladiya higahe yamumuna tu ase'asedi tulina fa'ina keke hidadewadewa yamumuna. 4Yadi vehawala tulina tulina au vitana, vaita vainuwana lakahina u'umiya hidaseni tu taudiyao mena vehimeya ana itave'avina againe keke ma'ita hidavelugami.
5 #
Md 6:1; Yem 13:9 Gavadi gavadi hififaisewadi, medemi hidewadewa be kaliva hina'ita-yo adi egana hinakilakahina. Wa'itadi, vehimeya sa'eyana himuliyena higa Yaubada yana vehimeya tufona hi'etoladini tu foseya hidodona be u'udiya o nimadiya hiluhifona. Tu badi adi fose ma lakahina hi'osena be kaliva hina'itadi. Kadu adi aikeva mata'olo'olona tunugi-mo'ena hisena be kaliva hinagayo, Velemodi. 6Nuwanuwadi avemwamwala againe kadu manuwa-abavehawala ana egana sinagogi agaidiya abavetoga kikaiwabuna againe hinavetoga. 7Kadu nuwanuwadi kaliva abakimokimone againe hinalusiuleyedi kadu yadi wawowomumu hinavewagadi kauveya.
8Tu omi'iyao ma moya'aimi yami yo'o sa'eyana ada Iya'eku yami Kaiwabu lakahina fa'ina keke wananuwanuwa be higa vaita hinahawavelakahiyemi. 9Kadu Tamami lobameya gimimiyami-ma sa'eyanaga fa'ina keke tamo hakwadi gava babiya wanahawavetamaneni. 10Kadu yami tovehawala sa'eyanaga higa Iya'eku Keliso fa'ina keke wananuwanuwa be higa vaita kaliva hinavewagami tovehawala. 11#Mk 9:35; Lu 22:26Gava kaliva agaimiya kikaiwabu-mo'ena, medema omi agaimiya anafaiweya gidave'agetoga. 12#Gah 29:23; Lu 18:14Hai kaliva tauna ana egana ginakilakahina, Yaubada mena kaliva ginakivewowomumuna. Hai kaliva tauna ginanuwahobu, medema ana egana Yaubada ginakilakahina.
Yesu Falisi meyadi luhei gihawavekoyoyedi.
Luke 11:39-42,44,52
13Hoiyoi Mosese yana vehimeya ana tovehawala kadu Falisimomo! Omi meyami luhei ma vita lakahina wananuhagana. Fa'ina badi nuwanuwadi Yaubada yana yo'ogaga agaidiya hinaluku be ase'asediya ginavehivehimeya-ma magigidi wanubodana. Omi taumiyao keke wadaluku kadu badi nuwanuwadi hinaluku-ma wahawatadi. [ 14Hoiyoi Mosese yana vehimeya ana tovehawala kadu Falisimomo! Omi meyami luhei ma vita lakahina wananuhagana. Fa'ina sikwasikwadiyao yadi lokoloko walemadi ada wave'ove'o'ola-fa'ila be higa kaliva hinahawaveyamumuyemi. Yami koyona ve'o'ola-fa'ila againe wakevana fa'ina ami vita gavatubuga wananuhagana.]
15Hoiyoi, Mosese yana vehimeya ana tovehawala kadu Falisimomo! Omi meyami luhei ma vita lakahina wananuhagana. Yamina avaleya kadu lehageya lauva lakahina wanunauwena be higa vaita kaliva sa'eyanaga wananuhagani-yo omi agaimiya ginavetomuliya ada yami dewa tuwaina gina'ita'itave'avina. Ada ahe wanavehawaleni-yo yana dewa koyona yami dewa koyona ginatubuhegena. Ai'ala'alata againe omi vita lakahina wananuhagana, tu bana ami tomuliya gikoyo-mo'a ma vita lakahi-mo'ena ginanuhagana.
16Hoiyoi omi tokivetuvetunu matami uyu'uyuyuna ma vita lakahina wananuhagana! Fa'ina omi wagahe wagayo, Gava kaliva manuwa-tafalolo lakahina ginayakahini-yo ginawonadabadaba, medema gahe-kawowo. Atu gava kaliva manuwa-tafalolo ana vaigau ginayakahini-yo ginawonadabadaba, medema gahe velemo'ena. Au gavaimi giwonadabadaba, medemi gidadewadewa. Hidedemi wagahe. 17Omi kaliva natuneyao. Gahe wananogalina kadu matami ginamahalina. Manuwa-tafalolo gaitoma sevesevehailana. Ka'i keke sevesevehailana digo, ana vaigau kadu gaitoma-kawowo. Hadema gaitoma lakahi-mo'ena, ka'i vaigau o ka'i manuwa-mo'ena? 18Kadu wagahe wagayo, Gava kaliva manuwa-tafalolo ana atudidiga ginayakahini-yo ginawonadabadaba, medema gahe-kawowo. Atu gava kaliva abaveyao manuwa-tafalolo ana atudidiga againe gidauda-ma ginayakahini-yo ginawonadabadaba, medema gahe velemo'ena. Au gavaimi giwonadabadaba, medemi gidadewadewa. Hidedemi wagahe. 19Omi kaliva matami abodana. Manuwa-tafalolo ana atudidiga gaitoma sevesevehailana. Ka'i keke sevesevehailana digo, abaveyao atudidiga againe gidauda-ma kadu gaitoma-kawowo. Hadema gaitoma lakahi-mo'ena, ka'i abaveyao o ka'i atudidiga-mo'ena? 20Au wanogali! Gava kaliva yana wonadabadaba againe manuwa-tafalolo ana atudidiga giyakahina, medema atudidiga-mo'ena tu kadu abaveyao atudidigeya gidauda-ma giyakahina. Wonadabadaba luhei tu adi nuwanuwa au sa'eyana. 21Ada gava kaliva yana wonadabadaba againe manuwa-tafalolo giyakahina, medema manuwa-tafalolo mo'ena tu kadu Bana'e manuwa-tafalolo againe gimimiyami-ma giyakahina. Wonadabadaba luhei tu adi nuwanuwa au sa'eyana. 22#Md 5:34Ada gava kaliva yana wonadabadaba againe lobama giyakahina, medema Yaubada yana abamiyami kikaiwabuna tu kadu Yaubada Tauna giyakahina. Wonadabadaba luhei tu ana nuwanuwa au sa'eyana.
23Hoiyoi Mosese yana vehimeya ana tovehawala kadu Falisimomo! Omi meyami luhei ma vita lakahina wananuhagana. Fa'ina vehimeya kabi'ona wa'itave'avina, higa gaitoma-kawowo naiya'au'a saikuku mawa gavadi gavadi wamagana ami kevakeva ana kivehivehimala fa'ine wavaivaina be Yaubada yana tufo waseusena, tu vehimeya lakahina keke wada'itave'avini. Omi keke wadanuwanuwa tunutunugina, kaliva keke wada'itanuwakabubuyedi kadu gavaimi gavaimi wagahegahe medema keke wadanuwa-nunauyeni. Mena vehimeyai-dina lakahina, nuwanuwa tunutunugina, itanuwakabubu, gahe ana nuwanunauya wada'itave'avina tu kadu vehimeya kabi'ona wana'itave'avina, higa Yaubada yana tufo wanaseusena. 24Omi tokivetuvetunu matami abodana. Dewa kabi'ona wa'ita'itave'avina tu dewa lakahina keke ma'i wadanuwenuweni. Omi keke nuwanuwami kevakeva koyodi wana'ani fa'ina, ka'i namokilikili ami bwaiya ginatowa, au wamaduvaihegena tu ka'i kevakeva ana egana kameli bwaiya ginatowa, kevakeva koyona nonogana watonona. Mena gahetalahobuhobu gayakahina-ma yami dewa gihawavemogatalena.
25Hoiyoi Mosese yana vehimeya ana tovehawala kadu Falisimomo! Omi meyami luhei ma vita lakahina wananuhagana. Fa'ina ami gowa ami nau'a kwauna wakolakolana tu hinagena bwanebwanenena gidadauda amine, meda wowomi wa'ihagihagiyena tu nuwahinagemi kai'afu mata'alalaka againe gimaga. 26O Falisi mata abodana. Nagona gowa nau'a hinagena unakolana ada au kadu kwauna yegayegana ginayemu.
27Hoiyoi Mosese yana vehimeya ana tovehawala kadu Falisimomo! Omi meyami luhei ma vita lakahina wananugahana. Fa'ina yami dewa vaita lahi kaliva hivevigauna amine. Getana ana ita yamumuna tu lahi hinagene to'alika luluna kadu magana koyona gidadauda. 28#Lu 16:15Meda anafaiweya omi ami ita vaita yegayegamiyao kaliva matadiya tu nuwahinagemiya ve'alololo dewa koyona tulina tulina gidadauda.
Yesu Falisi adi matahiwadi gilukahihiyena.
29-30Hoiyoi Mosese yana vehimeya ana tovehawala kadu Falisimomo! Omi meyami luhei ma vita lakahina wananuhagana. Yaubada bonana ana to'awatalatalaina tuwai-mo'ena hi'alika-ma adi tomohuyahuya wakidewedewena, kadu Yaubada yana kaliva yegayegadiyao adi lahi wavevigauna wagayo, Ka'i ide'eyao bwanenedeyao yadi toveya kadamiyami digo keke badi amine kadahuluva, au keke to'awatalatalaina kadaluve'alikadi. 31#Af 7:52Hidede amine wagahe fa'ina au taumiyao wahawavemogatala higa vaita omi badi to'awatalatalaina hiluve'alikadi-ma bwanenediyao. 32Bwanenemiyao hivebutu Yaubada yana to'awatalatalaina hiluve'alikadi. Au wamadu bwanenemiyao yadi faisewa wavaini be waluyabuni, to'awatalatalaina wanaluve'alika-'owodi.
33 #
Md 3:7
Omi vaita oloto amine. E, omi oloto koyodiyao adi yo'o. Wana'ota tu keke amifaiweya koyona ana laufata wana'otayabuyabuni, keke-mo'a. Au aimo abaga koyona againe wanaluku. 34#1Te 2:15Hidema fa'ina wanogali! Yaubada bonana ana to'awatalatalaina kadu tonuwahuya kadu yaku vehimeya ana tovehawala omi agaimiya gana'iveninisedi. Tufoidi aimo wanaluve'alikadi o ka'i kelose againe wanatutuvefosedi. Tufoidi yami manuwa-abavehawala ana egana sinagogi agaidiya bulava againe wanalaudi, kadu tufoidi melala tulina tulina agaidiya wanavenevenegadi. 35#Aba 4:8; Hi 11:4Ada au badi Yaubada yana kaliva yegayegadiyao moya'aidi hiluve'alikadi-ma adi matahiwadi omi miYuda agaimiya ginalakayemu. Boi tuwai-mo'ena Keni tobohiyana yana dewa yegayegana ana egana Ebeli giluve'alikana. Bana againe luve'alika give'inuba ada hinunauwena hinunauwena tu omi miYuda Sakalaiya Belekaiya natuna atudidiga liline manuwa-tafalolo ana eda'awaneya waluve'alikana. 36Wanogali! Mena luve'alika moya'aina ana laufata omi tova adamoya babiya watubuyemu-ma agaimiya ginalakayemu.” Hidedemi Yesu Falisi gigahedi.
Yesu miYelusalema yadi kilowa fa'ina gitagi'uvadi.
Luke 13:34-35
37 #
Af 7:59
Tu Yesu kadu gigayo, “Ho miYelusalema miYelusalema, omi Yaubada bonana ana to'awatalatalaina waluve'alikadi kadu yana tolaumamala omi agaimiya gi'iveninisedi-ma watutuve'alikadi. Kamukamu natudiyao hikokodi ofadiya hilutagodi amine, meda tova a gavaiyehi Iya nuwanuwaku vaita gadakovavaga'auhimi be gadalugolegolemi tu omi wakiloweku. 38Wa'ita, Yaubada ginanuyabuyabumi be amikaibe wanamiyami ami tolugolagola keke. 39#Sam 118:26Au gagahemi aimo keke-mo'a wana'ita-havagileku. Wanamiyami wananunauwena tu gana'ela-havagi yo wanagahe wanagayo, Bana Kaiwabu ana eganeya gi'ela-ma kanahawadavadavana.” Au hidedemi Yesu gigahe.
Àwon tá yàn lọ́wọ́lọ́wọ́ báyìí:
Madiu 23: viv
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2003, Wycliffe Bible Translators, Inc. All rights reserved.
