Madiu 22
22
Nagi ana avemwamwala ana gahetalahobuhobu.
Luke 14:15-24
1-2Tu Yesu gahetalahobuhobu amine kadu givehawaledi gigayo, “Kaliva yadi luku Yaubada yana yo'ogaga agaidiya hidede amine. Tokaiwabu sa'eyana natuna kaliva ginanagi ada ana avemwamwala gikidewedewena. 3Gikidewedewena gihavaina, yana tomaduyowayowana gi'iveninisedi be badi boi avemwamwala fa'ina givenuwa'atadi-ma hina'ela tu hidibutoyoga.
4Au yana tomaduyowayowana kadu velugadiyao gi'iveninisedi be badi boi avemwamwala againe giyowanidi-ma hinavenuwa'atadi hinagayo, Yaku avemwamwala ahe gakidewedewena. Bulumakau lakahidi kadu bulumakau natudiyao gaveve'ahiyauwadi-ma ahe himunudi be hivekamoga. Gaitoma moya'aina ahe hikidewedewena. Au natuku yana nagi ana avemwamwala againe wana'ela.
5Hidedemi hivenuwa'atadi tu yadi gahe keke hidavenogaleni, au yadi faiseweya hi'abinauna. Kaliva sa'eyana gina yana faheya, kadu sa'eyana gina yana sitoweya. 6Kadu kaliva tufoidi tokaiwabu ana agetoga hikive'avidi-yo himunukoyokoyodi be hiluve'alikadi. 7Bana tokaiwabu valeyadi ginogalini-yo gi'ila'a. Au yana tolugaviya gi'iveninisedi be mena toluve'alika hiluve'alikadi ada yadi melala hikabuna.
8Badi tolugaviya hina tu ana agetoga kadu giyowanidi be gigahedi gigayo, Yaku avemwamwala ahe gakidewedewena tu badi gayowanidi-ma hidibutoyoga fa'ina iya kadu gadibutoyogedi, keke adifaiweya hina'ela. 9Au eda lakahina melala hinafane wanana be gaveyao moya'aidi wananuhagadi, medema yaku avemwamwala againe wanayowanidi. 10Hidedemi gigahedi tu badi tomaduyowayowana hilowoga be eda lakahina againe hina kaliva moya'aidi yamumudiyao kadu koyodiyao hivega'auledi be avemwamwala ana manuwa-abavaga'auta hivemagana.
11Atu bana tokaiwabu giluku be yana wakawaka gida'itadi ma kaliva sa'eyana gi'itana nagi ana vaigau keke gida'oseni. 12Au gigayo, Tobohiyaku, gavadi-yo nagi ana vaigau keke uda'oseni tu yaku avemwamwala againe uluku? Kaliva meyana gibou.
13 #
Lu 13:28
Au tokaiwabu ana agetoga gigahedi gigayo, Nimana agena wanayogona be melaleya umalovana againe wanahegena. Medede againe ginatagitagi lakahina, kumina ginahobe'uwana be nuwana ginavekubokubo.”
14Kadu Yesu yana gahe giluyabuna gigayo, “Yaubada moya'aidi giyowanidi tu tufoidi moya'aidi keke hidavenogaleni fa'ina tufoidiga giluwafadi be yana yo'ogaga agaidiya hinaluku.”
Yesu takesi ana sewadi fa'ina hitoliluveluvena.
Maki 12:13-17; Luke 20:20-26
15Tu badi Falisi Yesu yana gahe hinogalini-yo hilowoga hina hivevai be yadi toliluvaluva againe hinavebauna be higa tamo gavadi koyona ginagaheyena. 16Adi tomuliya kadu Helodi yana yo'o kalivadi tufoidi hi'iveninisedi be Yesu againe hi'ela higayo, “Tovehawala, ime ahalamanena O ya gahe velemo'ena, keke udave'alololo. Yaubada yana eda fa'ina uvehavehawala velemo'ena. Ada keke kaliva udamatausedi fa'ina kaliva yadi kikaiwabu keke udanuwenuweni, au ugahe-mo'edi. 17Au anatoliye be ya nuwanuwa sa'eyana anahalamanena. KwanaLoma yada tokaiwabu lakahina Sisa againe takesi kanasena, ka'i medema gilubodana o ka'i keke?”
18Tu Yesu yadi ve'alololo ase'asediya gi'ita-yo gigayo, “Omi kaliva meyami luhei, gavadi-yo wanuwanuwa vaita wanavebauku? 19Kabala yami takesi fa'ina wanasena-ma wanavehawaleku.” Au kabalai-nadi hivehawalena. 20Au gitoliluveluvedi gigayo, “Hida hakwadi magigina? Kadu hakwadi ana egana mene kabala againe hikilumini?”
21 #
Lo 13:7
Badi higayo, “Bana Sisa.” Au Yesu gigahedi gigayo, “Hadema Sisa yana lokoloko, medema Sisa againe wanasena. Kadu hadema Yaubada yana lokoloko, medema Yaubada againe wanasena.”
22Ada au yana bonalaufata hinogalini-yo hiyaulowoga. Au hihegena be hina.
To'alika yadi mididi-havagi fa'ina Yesu hitoliyena.
Maki 12:18-27; Luke 20:27-40
23 #
Af 23:8
Tu medema aiyetai-nadi tonagona tafatafalolodiyao adi egana Sadusi tufoidi Yesu againe hi'ela be hinatoliluveluvena. Badi'iyao ma higahe vaita aimo tova mulina to'alika keke hinamididi-havagi. 24#2Veh 25:5Badi higayo, “Tovehawala, Mosese yana buki-vehimeya againe hidede amine gi'etoladi. Ka'i kaliva sa'eyana natuna keke tu gina'alika, au tobohiyana yana vayasi anafaiweya gidanagina be tobohiyana ana hilafa fa'ina natuneyao gina'ivetubugidi. Au hidede amine Mosese givehimeya. 25Au kaliva tobohiyaneyao adi yo'o seveni ime agaimeya himiyami. Tomo'ainagona ginagi tu gi'alika ada natuna keke fa'ina, taina yana vayasi ginagina. 26Meda anafaiweya taina natuna keke tu gi'alika ada hinunauwena hinunauwena tu taina kaliva anaveseveni natuna keke tu gi'alika. 27Muliya-mo'ane kwamayoku gi'alika. 28Au kaliva adiveseveni kwamayoku sa'eyana hinagina fa'ina, aimo tova mulina kaliva hinamididi-havagi ana toveya bana kwamayoku-nadi ma gava kaliva vavinena?”
29Atu Bana Yesu gigayo, “Yaubada bonana ana vehawala kadu Yaubada yana faiwala keke wadahalamaneni fa'ina, omi keke wadanuwanuwa tunutunugina. 30Tova mulina to'alika yadi mididi-havagi ana toveya, lobama ana tovenuwa'ata himimiyami amine meda kaliva hinamiyami. Kaliva vevine keke hinanaginagi keke hinavenavenagi. 31Tu to'alika yadi mididi-havagi fa'ina ganagahe. Yaubada omi agaimiya gavaimi gigahe ma ma'i wahawahawana o ka'i keke? 32#Yem 3:6Gigayo, Iya'eku Abelahamo yana Yaubada gamimiyami, kadu Aisake yana Yaubada gamimiyami, kadu Yakobu yana Yaubada gamimiyami. Hidedemi Yaubada gigahe. Badi kaliva wavewagadi ali'alikadiyao ma Yaubada yawayawadiyao gi'ita'itadi. Au Bana'e kaliva alu'aluwadi yawayawana yadi Yaubada, keke ali'alikadiyao yadi Yaubada.”
33Ada au yo'o hivanevanenega-ma mena yana vehawala hinogalini-yo hiyaulowoga.
Hadema vehimeya wai ginago?
Maki 12:28-34; Luke 10:25-28
34Tu Falisi Yesu yana bonalaufata hagihagina againe badi Sadusi yadi gahe givetufagolohina ma hinogalina againe buye hivaga'auta. 35Bana Falisi sa'eyana buki-vehimeya ana tonuwahuya ma yana toliluvaluva sa'eyana giyakahina be higa Yesu ginavebauna. 36Gigayo, “Tovehawala, yada buki-vehimeya againe hadema vehimeya wai ginago?”
37 #
2Veh 6:5
Yesu gigayo, “Ase'ase matatabuna, kadu alu'aluwa matatabuna kadu nuwa matatabuna Yaubada ya Kaiwabu againe unahawahege-'owona be Bana againe unanuwanuwa lakahina. 38Mena vehimeyai-nadi wai ginagona kadu vehimeya lakahi-mo'ena. 39#1Veh 19:18; Lo 13:9-10; Ga 5:14Kadu vehimeya lakahina anavelu ma vehimeya nagona ana nuwanuwa amine, higa tauni unuwakabubuye amine tobohiyamomo unanuwakabubuyedi. 40Mena vehimeyai-dina luhei au vehimeya lakahina. Mosese kadu Yaubada bonana ana to'awatalatalaina yadi vehawala matatabuna againe vehimeyai-dina matana matana fa'ina hikivetuvetunuda.”
Keliso inubana fa'ina.
Maki 12:35-37; Luke 20:41-44
41-42Tu badi Falisi aimo se'eyaine hivaga'auta tu Yesu gitoliluveluvedi gigayo, “Yaubada yana Tovegida ana egana Keliso fa'ina gavaimi wanuwanuwa? Bana'e hakwadi bwanenena?” Badi higayo, “Bana'e Devida bwanenena.”
43Yesu gigayo, “Ka'i Bana'e Devida bwanenena au gavadi-yo tauna bwanenena aimo ginatubuyemu-ma givewagani Kaiwabu? Fa'ina tuwai-mo'ena Alu'aluwa Mahalina yana kivetuvetunu againe Devida gigahe gigayo,
44 #
Sam 110:1; Af 2:34-35 Bana Yaubada Kaiwabu iya yaku Kaiwabu gigahena gigayo,
Nima i'atagikuya unahiyoto. O unamiyami tu
nibaimomo ageyafayafaniya ganasedi.
45Au hidede amine Devida Keliso givewagana yaku Kaiwabu, tu gavaiya'amine yana Kaiwabu kadu bana bwanenena muliya gitubuga amanadi?” 46Hidedemi Yesu gigahe tu keke tamo hakwadi anafaiweya bonana gidafatani, au hive'amata. Ada medema aiyetai-nadi toliluvaluva kadu keke velugana hidaseni, au himatauta fa'ina hi'ilova.
Àwon tá yàn lọ́wọ́lọ́wọ́ báyìí:
Madiu 22: viv
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2003, Wycliffe Bible Translators, Inc. All rights reserved.
