Luk 18

Wabikɛa

1Yesu yãlɛ̀ɛũnɛ́ kɛ́ aaↄ Lua wabikɛ kↄ̃sↄ̃kↄ̃sↄ̃, aasu kpasao yã́i. 2À mɛ̀: Yã́kpalɛkɛnae mɛ́ kú wɛ̃́lɛeu, a Lua vĩa vĩo, mɛ́ ìli gbɛ̃e yãdao. 3Gyaae ku wɛ̃́lɛpi guu, ìↄ mↄ aà kĩ́i mↄ̀ↄmↄↄ ì mɛ: Zɛmanↄ ma ibɛɛ yã́ musu. 4I weio e gↄↄpla. Bee kpɛ a ò azĩawa: Baa tó má Lua vĩa vĩo, mɛ́ mili gbɛ̃e yãdao, 5lá gyaapi lɛ́ ma súu zↄ̃, má zɛaànↄɛ. Tó mi kɛ màao, aà zɛamala láasaiɛ a ma dɛɛ.

6Ɔ̃ Dii mɛ̀: À yã́kpalɛkɛn vãi yã'oa ma. 7Lua a zɛ ń a gbɛ̃́ pↄ́ aalɛ wiilɛwa fãanɛ ń gwãasĩnaoↄo lé? A zígbiakɛ ń dↄańlɛo yã̀? 8Málɛ oɛ́, a zɛńnↄ kpakpaɛ. Ń beeo tó Gbɛ̃nazĩn Nɛ́ mↄ̀, a a náaikɛna e dṹniaua?

9Ɔ̃ à ɛ̀a yã́ɛ bee lɛ̀ɛũ gbɛ̃́ pↄ́ aalɛ ńzĩa dilɛ gbɛ̃maa ũ mɛ́ aaìↄ saka gbɛ̃́ kĩniↄguↄnɛ à mɛ̀: 10Gbɛ̃ↄn plaeↄ mɛ́ gɛ̀ wabikɛi Lua ua, gbɛ̃doá Falisiɛ, gbɛ̃do sↄ̃ ↄsinaɛ. 11Falisipi zɛa, àlɛ wabikɛ. A ò a sↄ̃ guu à mɛ̀: Lua, ma n sáaukɛ̀ kɛ́ má dɛ lán dãↄwao, dìidiindeↄ, náaisaideↄ, gbãsĩkɛnaↄ ge ↄsinaɛ bee. 12Miↄ lɛye gↄↄ plapla ãsↄ̃a ń ãsↄ̃aoɛ. Pↄ́ pↄ́ má è píi mi a kwide bↄnɛ. 13Ɔsinapi sↄ̃ a zɛ kãaa, i fↄ̃ wɛsɛ̀ musu gwà seo. Àlɛ azĩa gbɛ̃gbɛ̃ à mɛ̀: Lua, sùuukɛmanↄ, duunkɛnan ma ũ. 14Málɛ oɛ́, gↄ̃ɛpi tà a bɛ Lua siaaànↄ guu, i kɛ Falisipi no. Asa gbɛ̃́ pↄ́ ì azĩa kã́fĩ Lua a aà busaɛ, mɛ́ gbɛ̃́ pↄ́ ì azĩa busa Lua a aà kã́fĩ.#18.14 Luk 14.11

Báaadaa nɛ́ↄgu

(Mat 19.13-15, Maa 10.13-16)

15Wà mↄ̀ɛ̀ ń ń nɛ́fɛ̃nɛnaↄ aà ↄnamá. Kɛ́ aà ìwaↄ è, ↄ̃ aa gìnɛ́. 16Ɔ̃ Yesu nɛ́ↄ sìsi à mɛ̀: À to nɛ́ↄ mↄ ma kĩ́i, ásu kpánɛ́o, asa kpala pↄ́ bↄ̀ Lua kĩ́i dɛ gbɛ̃́ bee taaↄ pↄ́ ũɛ. 17Sĩana málɛ oɛ́, gbɛ̃́ pↄ́ i kpala pↄ́ bↄ̀ Lua kĩ́i yã́ sí lán nɛ́wao, a gɛ̃uo.

Ɔde

(Mat 19.16-30, Maa 10.17-31)

18Yudaↄ kíabuie mↄ̀ Yesu là à mɛ̀: Mɛtulu maa, kpelewa má kɛ mà àizãna ei? 19Yesu òɛ̀: Àkɛa n mɛ̀ má maai? Gbɛ̃e maao, sé Lua ado. 20Ń yã́ pↄ́ Lua dìlɛↄ dↄ̃: Ńsuli wúlɛ ń gbɛ̃pãle nↄo. Ńsuli gbɛ̃dɛo. Ńsuli kpã́i'oo. Ńsuli yãdↄ n gbɛ̃́deewao. Nìli n de ń n dao kpɛla.#18.20 Bↄa 20.12-16 21Ɔ̃ a òɛ̀: Zaa ma kɛ ɛ̀waaso ũ, má yã́ beeↄ kũa píiɛ. 22Kɛ́ Yesu bee mà, a òɛ̀: Yã́ gↄ̃̀nɛ mɛ̀ndo. Pↄ́ pↄ́ ń vĩ yía píi, ní a ↄ̃a biilɛ taasideↄnɛ, ńyↄ̃ↄ àizɛɛ vĩ luabɛ. Bee gbɛa ní mↄ tɛmazi. 23Kɛ́ à yã́pi mà, aà pↄ siakũ̀, asa ↄde sà gbãngbooɛ. 24Kɛ́ Yesu è aà pↄ siakũ̀, à mɛ̀: Gɛ̃a kpala pↄ́ bↄ̀ Lua kĩ́i guu zĩ'ũ gbɛ̃́ pↄ́ aa àizɛɛ vĩↄnɛ. 25Yiongo gɛ̃a abaawɛu àa dɛ ↄde gɛ̃a kpala pↄ́ bↄ̀ Lua kĩ́i guula. 26Gbɛ̃́ pↄ́ aa yã́pi màↄ mɛ̀: Dé mɛ́ a àizãna e lↄi? 27Yesu wèmá à mɛ̀: Yã́ pↄ́ gbɛ̃nazĩnaↄ fùa kɛ, Lua ì fↄ̃́.

28Ɔ̃ Piɛɛ mɛ̀: Wa wá pↄ́pii tò weɛ, ↄ̃ wá tɛ́nzi fá. 29Ɔ̃ Yesu ònɛ́: Sĩana málɛ oɛ́, gbɛ̃́ pↄ́ a bɛ tò ge a na ge a vĩ̀iↄ ń a dãunaↄ ge a de ń a dao ge a nɛ́ↄ kpala pↄ́ bↄ̀ Lua kĩ́i yã́i 30a ɛa bee taa e dɛ beea maamaa dṹniaɛ bee guu, mɛ́ a àizãna e dṹnia pↄ́ lɛ́ mↄ́ guu.

Vĩ̀a baakɛna gbã́gbãa

(Mat 20.29-34, Maa 10.46-52)

31Yesu a gbɛ̃ↄn kuɛplaↄ kã̀aaàzi, ↄ̃ a ònɛ́: Wálɛ gɛ́ Yelusalɛũɛ. Wekĩi Gbɛ̃nazĩn Nɛ́ yã́ pↄ́ ãnabiↄ kɛ̃̀ Lua yã́u a pau píi sa. 32Wa aà kpa buipãleↄwa, aai aà kɛ pↄ́ↄpↄↄ, aai aà sↄ̃́sↄ̃, aai lɛ́'ikakawà, 33aai aà gbɛ̃ ń flàalao, aai aà dɛ, a gↄↄ àaↄ̃de zĩ́ i ɛa vu. 34Ãma aà ìwapiↄ a kee gbáɛo, asa yã́pi mi ulɛanɛ́ɛ, aa dↄ̃ yã́ pↄ́ àlɛ oo.

35Kɛ́ Yesu kà kãi ń Yelikoo, vĩ̀ae zↄ̃lɛa zɛ́ lɛ́, àlɛ baakɛ. 36Kɛ́ a mà bíla lɛ́ gɛ̃, ↄ̃ a ń lá bↄ́ mɛ́ kɛ̀i. 37Ɔ̃ wa òɛ̀, Yesu Nazalɛti mɛ́ lɛ́ gɛ̃ we. 38Ɔ̃ à lɛzù à mɛ̀: Yesu, Davidi Bui, ma wɛ̃nagwa. 39Gbɛ̃́ pↄ́ dↄaaaↄ gìɛ̀ aa mɛ̀ aà nílɛ, ↄ̃ aà wiilɛa gbãakũ̀, àlɛ mɛ: Davidi Bui, ma wɛ̃nagwa. 40Yesu zɛ̀ à mɛ̀ wà mↄaànↄ. Kɛ́ à mↄ̀, ↄ̃ Yesu aà là à mɛ̀: 41Bↄ́ ń ye mà kɛnɛi? A wèwà à mɛ̀: Dii, má ye màↄ gu'eɛ. 42Ɔ̃ Yesu òɛ̀: Gu e. Ma náai pↄ́ ń kɛ̀ mɛ́ tò n gbãgbã. 43Wegↄ̃ↄ à gu'è, ↄ̃ à bↄ̀ tɛaàzi, àlɛ Lua sáaukpa. Kɛ́ gbɛ̃́pii è màa, aa Lua sáaukpà.

Àwon tá yàn lọ́wọ́lọ́wọ́ báyìí:

Luk 18: BBL2010

Ìsàmì-sí

Pín

Daako