Mpiin 9
9
Uwumbɔr aah nan puu tipuur ti tii Nowa na aabɔr
1Le Uwumbɔr nan ŋa tinyoor ŋa Nowa ni ujapɔtiib pu, ki bui ke, “Ni maa ki too pɔr kpee, aan niyaabitiib ga pɔr gbiin dulnyaa wee ni.” 2Uwumbɔr ki bui Nowa ni ujapɔtiib ke binib le ga li lik tiwakor, ni ipeel, ni inyoon, ni ijan, le tiwan ngbaan mɔmɔk ga li san unibɔn ijawaan pam. 3“Tiwan ngbaan mɔmɔk, ni tikpifar, ga li ye tijikaar, ni li ji. 4Taa ŋmɔ tinann ti nsin aa nyan ti ponn ni na, ni taa ji kina aawan; ba pu? limɔfal bi nsin ni la. 5Unii yaa ku unibɔn kan, m ga daa utafal. Upeel, bee kiwakork yaa ku unibɔn kan, bi ku ki. 6Min Uwumbɔr naan unibɔn, ki di naŋ mbaa la, nima pu na, unii yaa ku uken kan, biken mu ga ku u.
7“Ni maa ki too pɔr kpee, aan niyaabitiib ga pɔr gbiin dulnyaa wee ni.”
8Uwumbɔr nan ki bui Nowa ni ujapɔtiib ke: 9“M puu tii nimi, ni niyaabitiib bi ga paan ni nipuwɔb na, 10ni tiwan nimɔk fu ki nan bi ni chee na, inyoon mɔmɔk, ni ipeel, ni tiwakor mɔmɔk, ni tiwan nimɔk dii nimi ki nyan ni buŋɔb ponn ni na. 11Ŋimɔbon ŋee le m puu tii si: m puu ke maan ki di nnyun bii tiwan nimɔk fu na kina; m puu ke maan ki cha nnyun ji dulnyaa wee kina.” 12-13Uwumbɔr nan ki bui ke, “M ga di waapumanja lul kitaapaak. Waapumanja ngbaan le ye limɔkl ki tii nimi, ni dulnyaa aawan nimɔk fu na, maah puu tipuur ti kaa kpa ndoon na pu na. 14M yaa cha utaal yun bɔnbɔn, aan waapumanja lul kitaapaak kan, 15m ga teer ke maah nan puu pu tii nimi, ni tiwan nimɔk fu na, maan ki cha nwam bii dulnyaa aawan nimɔk fu na. 16M yaa ti kan waapumanja lul kitaapaak ni kan, m ga teer tipuur ti kaa kpa ndoon aan m puu tii dulnyaa aawan nimɔk fu na aabɔr.” 17Uwumbɔr nan ki bui Nowa ke, “Waapumanja le ye tipuur ngbaan aamɔkl, ki bi m ni dulnyaa aawan nimɔk fu na aakaasisik ni.”
Nowa ni ujapɔtiib aabɔr
18Nowa aajapɔtiib bi nan nyan ni buŋɔb ni na le nan ye Sem, ni Ham, ni Jafef. Ham le nan ye Kanaann yaab aate. 19Nowa aajapɔtiib bitaa bimina le ma dulnyaa wee ni aanib mɔmɔk.
20Nowa nan ye ukpaal la, uma le nan pue kon isui i lu ndaan aasubil na aasaak. 21Daalbaadaal le Nowa nan nyun ŋisubil aadaan, le ki gbii, ki dɔ uŋmeen waadiik ni. 22Ujapɔɔn u bi nan yin u ke Ham, u nan ye Kanaann aate na, nan ti kan ute dɔ uŋmeen, le u buen ti tuk una aabitiib bilee na. 23Le Sem ni Jafef yoor likekeln di paan bibɔgbin pu, le ki sur lisusur, ki ti di likekeln ngbaan biin bite pu, kaa lik kan bite aah dɔ uŋmeen pu na. 24N‑yoonn mu Nowa aanimbil nan woln na, le bi bui u Ham aah kan u pu na, 25le Nowa puun lii u pu le ki bui ke,
“M puun lii Kanaann pu.
U ga li ye una aabitiib aanaagbiija la.
26M pak Uwumbɔr u Sem dii u na.
Kanaann ga li ye Sem aanaagbiija la.
27Uwumbɔr cha Jafef aamaal pɔr, ki li kpa tinyoor,
ki cha waamaal, ni Sem yaab kpaan ki li bi tɔb chee.
Kanaann ga li ye Jafef aanaagbiija la.”
28Tɔ, nnyun aah jin dulnyaa ki jer na, Nowa nan ki bi, ki ti saa ŋibin ikui itaa ni piiŋmu; 29u nan saa ŋibin ikui iwae ni piiŋmu, le ki nin kpo.
Àwon tá yàn lọ́wọ́lọ́wọ́ báyìí:
Mpiin 9: xonB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1998, 2014 Wycliffe Bible Translators, Inc. All rights reserved.