Mpiin 8
8
Nwam ngbaan aah nan foor pu na
1Uwumbɔr aa nan suln Nowa, ni ipeel, ni tiwakor timɔk bi u chee buŋɔb ni na aabɔr, le ki cha libuln daar, le nnyun nin piin ki foor. 2Le utaal sil kaa ki nu, le nnyun aa ki nya ni paacham, ni kitiŋ. 3Le libuln mu aah daar pu na, le nnyun foor siisii cha, ki ti saa iwiin nkub ni piiŋmu ngbaan. 4Nnyun aah foor na, le buŋɔb ngbaan buen ki ti sil lijool libaa aapaacham, ŋmalole aawiin kipiik ni ilole daal, Ararat aajoo ni. 5Nnyun ngbaan nan foor siisii, le ŋijoo aapaacham kpiir, ŋmapiik aajan aawiin daal.
6Iwiin imonko ilee aah jer na, le Nowa piir takolu, 7le ki nyan ni likakaal libaa, ki di lii ni lipaal, ke li ti lik ke nnyun foor aan mu aa foor. Le laa ki gir ni. Li nan bi laani paacham le nnyun ngbaan ti foor pel pel.
8Le Nowa ki nyan ni linanjel, ki di lii ni lipaal, ke li ti lik ke nnyun foor aan mu aa foor, le li fii, ki laani ni kookoo, 9le nnyun aah nan beenin dɔ kitiŋ, ni kookoo na, laa nan kan laah ga lir nin chee na, le ki ki gir ni buŋɔb chee, le Nowa laan chuu li ŋa bu ni. 10Iwiin ilole aah jer na, le Nowa ki tun linanjel, 11le linanjel ngbaan buen ki ti kab ni olif aasub aafasɔŋ kibaa, ki joo ni Nowa chee kijook wɔb, le Nowa bee ke nnyun ngbaan foor cha. 12Iwiin ilole ki jer, le Nowa ki tun linanjel ngbaan, n‑yoonn mumina ma, linanjel ngbaan aa nan ki gir ni.
13Nowa aah nan ti saa ŋibin ikui iloob ni libaa, njan aawiin, njan aaŋmal ni na, le nnyun foor. Le Nowa chuu piir buŋɔb ngbaan, le ki lik mann goln, ki kan ke kitiŋ bi kuur. 14Ŋmalee aawiin moninko ni ilole daal, le kitiŋ kuur ni kookoo.
15Le Uwumbɔr bui Nowa ke, 16“Aa ni aapuu, ni aajapɔtiib, ni aabipuutiib mɔmɔk nyan ni buŋɔb ponn ni.” 17Uwumbɔr nan ki bui Nowa ke u nyan tiwakor, ni ipeel, ni inyoon mɔmɔk, ni tiwan nimɔk fu na bu ponn ni, aan ni pɔr gbiin dulnyaa wee ni. 18Le Nowa nan nyan upuu, ni ujapɔtiib, ni ubipuutiib bu ponn ni. 19Le tiwakor, ni ipeel, ni inyoon mɔmɔk aabɔŋ nyan ki dii tɔb.
Nowa aah nan pak Uwumbɔr, ki toor kitork tii u pu na
20Nowa nan maa libimbiln tii Uwumbɔr le ki di tiwakor, ni inyoon i bi chain na ibaabaa, ki di i toor kitork, ki see i mmii ni, libimbiln ngbaan paab, tii Uwumbɔr. 21Uwumbɔr aah ŋun kitork ngbaan aanun na, le ni piir usui, le u bui ubaa ke, “Maan ki puun lii kitiŋ pu kina daalbaadaal, ki joo cha unibɔn aah ŋa pu na. M nyi ke unibɔn aah laa diin ki joo cha na, waalandak ye titunwanbir la. Din ki joo cha, maan ki bii tiwanfuurkaan mɔmɔk, ke maah ŋa pu n‑yoonn mue na. 22Dulnyaa aah ga li bi cha na, liwanbuul ni liwancheel aayoonn ga li bi la. Le tiwoor, ni kitotoŋ, ni unaalan, ni kitakuuk, ni nwiin pu, ni kinyeek ga li bi.”
Àwon tá yàn lọ́wọ́lọ́wọ́ báyìí:
Mpiin 8: xonB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1998, 2014 Wycliffe Bible Translators, Inc. All rights reserved.