Mpiin 4
4
Kainn ni Abel aabɔr
1Adam nan doon upuu chee, le u dek lipuul, ki ma ubijabo, le ki bui ke u kan ubo, Uwumbɔr aaterm pu, nima pu na, u ga yin u ke Kainn.#4.1: Kainn aatataa le ye ke “Kan.” 2Ki joo cha, le Adam aapuu ki dek, le ki ki ma ubijabo, bi yi u ke Abel.#4.2: Abel aatataa le ye ke “yooli.” Kainn nan ye ukpaal, le Abel mu nan ye upihdaan. 3Le n‑yoonn mubaa, Kainn nan chee waajikaar, ki joo ni waajikaar ngem, ki nan tii Uwumbɔr ipiin. 4Le Abel mu nan lik waapiih ponn ni waapihninkpel aah pue ma njan aapihbo u na, ki di toor kitork, ki di tinann ti kpa nkpan na ki tii Uwumbɔr. Le Uwumbɔr pak Abel ni waapiin, 5le ki yii Kainn ni waapiin. Le Kainn gee liŋuul pam, le unimbil wɔb bii. 6Le Uwumbɔr baa u ke, “Ba ŋa aa gee liŋuul? Ba ŋa aanimbil wɔb bii? 7Aa yaa kaa ba tun titunwanbir kan, maan pak saapiin aa? Tɔ, saah tun taani na, titunwanbir si gbɔk si, ki ban ti di si ŋa taanaagbiija, see aa nyaŋ ti.”
8Le ni bi cha, le Kainn nan bui unaal Abel ke, [“Cha ti buen timoor ni.”] N‑yoonn mu bi bi timoor ni na, le u ti ku unaal Abel.
9Nee aapuwɔb le Uwumbɔr baa Kainn ke, “Aanaal Abel bi la?”
Le Kainn bui ke, “Maa nyi. Min le ye u lik u na aa?”
10Le Uwumbɔr ki baa u ke, “Ba ŋa aa ŋa kina? Aanaal aasin bi kitiŋ ki wii, ki mɔk ke sin le ku u.#4.10: Lik Hiibru Yaab 12.24. 11M ga daa aatafal. Saan ki ŋmaa ko kitiŋ. Saah ku aanaal na, waasin bii kitiŋ tii si a. 12Le aa yaa ki ko kan, kitiŋ aan ŋa tijikaar mbamɔm ki tii si, le aa ga li gonni, ni kookoo, ki ga li ye uchayiin dulnyaa wee ni.”
13Le Kainn bui Uwumbɔr ke, “Aa daa ntafal ki ti chaar jer a. 14Aa nyan mi kitiŋ kee pu a, le ki chuu paar aaŋaal m pu. Maan ki li kpa maah ga koo nin chee na. Le maah ga li ye uchayiin pu na, unii umɔk kan mi na ga ku mi.”
15Le Uwumbɔr daan Kainn kidaan, ubaa taa ku u, le ki bui ke unii umɔk yaa ku u na kan, bi ga ku binib bilole le ki teen lipɔln. 16Le Kainn siir Uwumbɔr chee, ki buen kitiŋ kibaa ni, bi yin ki ke “Chuun Gonni,” ki bi Edenn aawipuul wɔb la.
Kainn aamaal
17Kainn aapuu nan dek, ki ma ubijabo, ki yin u ke Enok, le Kainn aah nan bi nin chee na nan ŋa kitiŋ, le u di ujapɔɔn ngbaan aayimbil, ki di yin kitiŋ ngbaan. 18Le Enok mu ma Irad, Irad mu ma Mehujael, Mehujael mu ma Metusael, Metusael mu ma Lamek. 19Lamek nan kpa bipiib bilee, bi nan yin ubaa ke Ada, ki yin uken na ke Sila. 20Ada nan dek le ki ma Jabal, uyaabitiib le ye binib bi kpaa tiwakor ki chuun yiini na. 21Jabal aanaal le bi nan yin u ke Jubal, uyaabitiib le ye binib bi pii ki gbaa tiwan ki joo gaa ilahn na. 22Sila mu nan dek ki ma Tubal‑Kainn, uma le nan ye uchaa. Naama le nan ye Tubal‑Kainn aaninkpan.
23N‑yoonn mubaa le Lamek bui upuutiib ke,
“Sin Ada ni Sila, li pel maah len pu na man,
unachipɔɔn ubaa faa mi, le m ku u.
24Unii yaa ku Kainn aan binib bilole yaa ga kpo
ki pa lipɔln ngbaan kan,
unii yaa ku m mu kan,
binib imonko itaa ni kipiik ni bilole le ga kpo ki pa maapɔln.”
Sef ni Enos aabɔr
25Adam ni upuu nan ki ma ubijabo uken. Le upii ngbaan bui ke, “Uwumbɔr ki tii mi ubijabo u leŋ Abel u Kainn nan ku na aaleleŋ.” Nima pu le u yin u ke Sef.#4.25: Baaliin ni, “Sef” ni “tii” naan la. 26Le Sef mu ma ubijabo le ki yin u ke Enos. N‑yoonn ngbaan le binib piin ki dooni Uwumbɔr aayimbil li bi chain na.
Àwon tá yàn lọ́wọ́lọ́wọ́ báyìí:
Mpiin 4: xonB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1998, 2014 Wycliffe Bible Translators, Inc. All rights reserved.