ܒܪܝܬܐ 4
4
ܗ݇ܘܵܝܬܵܐ ܕܩܵܐܹܝܢ ܘܗܵܒܹܝܠ
1ܙܘܼܘܸܓ ܠܹܗ ܐܵܕܵܡ ܥܲܡ ܚܵܘܵܐ ܒܲܟ݂ܬܹܗ، ܘܒܛܝܼܢܵܗ̇، ܘܝ݇ܠܝܼܕ ܠܵܗ̇ ܠܩܵܐܹܝܢ،#4:1 ܫܸܡܵܐ ܕܩܵܐܹܝܢ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܩܢܵܝܬܵܐ ܒܠܸܫܵܢܵܐ ܥܸܒ݂ܪܵܝܵܐ ܘܐ݇ܡܝܼܪܵܗ̇، ”ܩܢܹܐ ܠܝܼ ܐ݇ܢܵܫܵܐ ܡ̣ܢ ܡܵܪܝܵܐ.“ 2ܒܵܬ݇ܪ ܗܵܕܵܐ ܝ݇ܠܝܼܕ ܠܵܗ̇ ܠܐܲܚܘܿܢܘܼܗܝ ܗܵܒܹܝܠ. ܗܘܹܐ ܠܹܗ ܗܵܒܹܝܠ ܡܲܪܥܝܵܢܵܐ ܕܥܸܪ̈ܒܹܐ، ܘܩܵܐܹܝܢ ܗܘܹܐ ܠܹܗ ܦܲܠܵܚܵܐ ܕܐܲܪܥܵܐ.
3ܘܗܘܹܐ ܠܵܗ̇ ܟܲܕ ܡܛܹܐ ܠܗܘܿܢ ܝܵܘܡܵܢܹ̈ܐ، ܡܘܼܐܬܹܐ ܠܹܗ ܩܵܐܹܝܢ ܡ̣ܢ ܛܥܘܼܢܬܵܐ ܕܐܲܪܥܵܐ ܩܘܼܪܒܵܢܵܐ ܠܡܵܪܝܵܐ. 4ܘܐܘܼܦ ܗܵܒܹܝܠ ܡܘܼܐܬܹܐ ܠܹܗ ܡ̣ܢ ܒܘܼܟ݂ܪܹ̈ܐ ܕܥܸܪ̈ܒܘܼܗܝ ܘܡ̣ܢ ܛܪ̈ܝܼܨܲܝܗܝ. ܘܒܣܝܼܡ ܠܵܗ̇ ܠܹܗ ܡܵܪܝܵܐ ܒܗܵܒܹܝܠ ܘܒܩܘܼܪܒܵܢܹܗ، 5ܐܝܼܢܵܐ ܒܩܵܐܹܝܢ ܘܒܩܘܼܪܒܵܢܹܗ ܠܵܐ ܒܣܝܼܡ ܠܵܗ̇ ܠܹܗ. ܘܟܪܝܼܒ ܠܹܗ ܩܵܐܹܝܢ ܪܵܒܵܐ، ܘܣܪܹܐ ܠܹܗ ܚܘܼܠܩܹܗ.
6ܐ݇ܡܝܼܪܹܗ ܡܵܪܝܵܐ ܠܩܵܐܹܝܢ، ”ܩܵܡܘܿܕܝܼ ܟܪܝܼܒ ܠܘܼܟ݂، ܘܩܵܡܘܿܕܝܼ ܣܪܹܐ ܠܹܗ ܚܘܼܠܩܘܼܟ݂؟ 7ܠܹܐ ܦܵܝܫܹܬ ܩܘܼܒܠܵܐ ܐܸܢ ܥܵܒ݂ܕܹܬ ܨܦܵܝܝܼ؟ ܐܝܼܢܵܐ ܐܸܢ ܠܵܐ ܥܵܒ݂ܕܹܬ ܨܦܵܝܝܼ، ܚܛܝܼܬܵܐ ܒܸܣܦܵܪܵܐ ܝܠܵܗ̇ ܐܸܠܘܼܟ݂ ܩܵܕ݇ܡ ܬܲܪܥܵܐ، ܘܥܲܠܘܼܟ݂ ܝܼܠܵܗ̇ ܫܲܗܘܲܬܬܘܼܗ̇، ܐܝܼܢܵܐ ܘܵܠܹܐ ܝܠܵܗ̇ ܕܥܵܒ݂ܕܹܬ ܫܘܼܠܛܵܢܵܐ ܥܲܠܘܼܗ̇.“
ܩܸܛܠܵܐ ܕܗܵܒܹܝܠ
8ܗܘܼܡܙܸܡ ܠܹܗ ܩܵܐܹܝܢ ܥܲܡ ܗܵܒܹܝܠ ܐܲܚܘܿܢܘܼܗܝ. ܘܗܘܹܐ ܠܵܗ̇ ܟܲܕ ܐܵܢܝܼ ܓܵܘ ܚܲܩܠܵܐ ܝܗ݇ܘܵܘ، ܩܝܼܡ ܠܹܗ ܩܵܐܹܝܢ ܥܲܠ ܐܲܚܘܿܢܘܼܗܝ، ܘܩܛܝܼܠ ܠܹܗ ܐܸܠܹܗ. 9ܐ݇ܡܝܼܪܹܗ ܡܵܪܝܵܐ ܠܩܵܐܹܝܢ، ”ܐܲܝܟܵܐ ܝܠܹܗ ܗܵܒܹܝܠ ܐܲܚܘܿܢܘܼܟ݂؟“ ܐ݇ܡܝܼܪܹܗ، ”ܠܹܐ ܝܵܕܥܹܢ؛ ܩܵܡܘܿ، ܢܵܛܘܿܪܵܐ ܕܐܲܚܘܿܢܝܼ ܝܘܸܢ؟“
ܠܵܘܛܬܵܐ ܕܩܵܐܹܝܢ
10ܘܐ݇ܡܝܼܪܹܗ ܡܵܪܝܵܐ، ”ܡܘܿܕܝܼ ܥܒ݂ܝܼܕ ܠܘܼܟ݂؟ ܩܵܠܵܐ ܕܕܸܡܵܐ ܕܐܲܚܘܿܢܘܼܟ݂ ܡܲܩܘܘܼܚܹܐ ܝܠܹܗ ܐܸܠܝܼ ܡ̣ܢ ܐܲܪܥܵܐ. 11ܘܐܵܕܝܼܵܐ، ܠܝܼܛܵܐ ܝܘܸܬ ܡ̣ܢ ܐܲܪܥܵܐ ܕܦܬܝܼܚ ܠܵܗ̇ ܦܘܼܡܘܼܗ̇ ܠܩܲܒܘܼܠܹܐ ܠܕܸܡܵܐ ܕܐܲܚܘܿܢܘܼܟ݂ ܡ̣ܢ ܐܝܼܕܘܼܟ݂. 12ܟܲܕ ܦܵܠܚܹܬ ܠܐܲܪܥܵܐ، ܠܹܐ ܡܲܙܝܸܕܵܐ ܠܝܼܵܗܒ݂ܵܐ ܚܲܝܠܘܼܗ̇ ܐܸܠܘܼܟ݂. ܒܸܬ ܗܵܘܹܝܬ ܣܵܚܘܿܪܵܐ ܘܚܵܕܘܿܪܵܐ ܒܐܲܪܥܵܐ.“
13ܐ݇ܡܝܼܪܹܗ ܩܵܐܹܝܢ ܠܡܵܪܝܵܐ، ”ܒܘܼܫ ܓܘܼܪܬܵܐ ܝܠܵܗ̇ ܬܲܥܠܲܡܬܝܼ ܡ̣ܢ ܕܡܵܨܹܝܢ ܛܵܥܢܹܢ. 14ܗܵܐ ܩܲܡ ܛܵܪܕܹܬ ܠܝܼ ܐܸܕܝܘܿܡ ܡ̣ܢ ܥܲܠ ܦܵܬܵܐ ܕܐܲܪܥܵܐ، ܘܒܸܬ ܦܵܝܫܹܢ ܛܸܫܝܵܐ ܡ̣ܢ ܦܵܬܘܼܟ݂. ܒܸܬ ܗܵܘܹܝܢ ܣܵܚܘܿܪܵܐ ܘܚܵܕܘܿܪܵܐ ܥܲܠ ܦܵܬܵܐ ܕܐܲܪܥܵܐ، ܘܟܠ ܕܡܲܫ݇ܟ̰ܸܚ ܠܝܼ ܒܸܬ ܩܵܛܹܠ ܠܝܼ.“
15ܗ̇ܝܓܵܗ ܐ݇ܡܝܼܪܹܗ ܐܸܠܹܗ ܡܵܪܝܵܐ، ”ܠܵܐ. ܟܠ ܕܩܵܛܹܠ ܠܩܵܐܹܝܢ، ܫܲܒ݂ܥܵܐ ܬܵܩܹ̈ܐ ܬܘܼܥܠܵܐ ܒܸܬ ܦܵܝܫܵܐ ܫܩܝܼܠܬܵܐ ܡܸܢܹܗ.“ ܘܡܘܼܬܸܒ݂ ܠܹܗ ܡܵܪܝܵܐ ܢܝܼܫܲܢܩܵܐ ܠܩܵܐܹܝܢ، ܕܠܵܐ ܩܵܛܹܠ ܠܹܗ ܟܠ ܕܡܲܫ݇ܟ̰ܸܚ ܠܹܗ. 16ܘܦܠܝܼܛ ܠܹܗ ܩܵܐܹܝܢ ܡ̣ܢ ܩܵܕ݇ܡ ܡܵܪܝܵܐ، ܘܝ݇ܬܝܼܒ݂ ܠܹܗ ܒܐܲܪܥܵܐ ܕܢܘܿܕ#4:16 ܫܸܡܵܐ ܕܢܘܿܕ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܚܕܵܪܬܵܐ ܒܠܸܫܵܢܵܐ ܥܸܒ݂ܪܵܝܵܐ ܠܡܲܕܢܚܵܐ ܕܥܕܸܢ.
ܬܵܘܠܕܵܬܹ̈ܐ ܕܩܵܐܹܝܢ
17ܘܙܘܼܘܸܓ ܠܹܗ ܩܵܐܹܝܢ ܥܲܡ ܒܲܟ݂ܬܹܗ، ܘܒܛܝܼܢܵܗ̇، ܘܝ݇ܠܝܼܕ ܠܵܗ̇ ܠܚܢܘܿܟ݂. ܒܢܹܐ ܠܹܗ ܡܕܝܼܢ݇ܬܵܐ ܘܩܪܹܐ ܠܹܗ ܫܸܡܘܼܗ̇ ܒܫܸܡܵܐ ܕܒܪܘܿܢܹܗ، ܚܢܘܿܟ݂. 18ܘܚܢܘܿܟ݂ ܡܘܼܠܸܕ ܠܹܗ ܠܥܝܼܪܲܕ، ܘܥܝܼܪܲܕ ܡܘܼܠܸܕ ܠܹܗ ܠܡܲܚܘܼܐܹܝܠ، ܘܡܲܚܘܼܐܹܝܠ ܡܘܼܠܸܕ ܠܹܗ ܠܡܲܬܘܼܫܐܹܝܠ، ܘܡܲܬܘܼܫܐܹܝܠ ܡܘܼܠܸܕ ܠܹܗ ܠܠܲܡܟ. 19ܘܫܩܝܼܠ ܠܹܗ ܠܲܡܟ ܐܸܠܹܗ ܬܲܪܬܹܝ ܒܲܟ݂ܬܵܬܹ̈ܐ، ܫܸܡܵܐ ܕܚܕܵܐ ܥܲܕܵܐ، ܘܫܸܡܵܐ ܕܗ̇ܝ ܐ݇ܚܹܪ݇ܬܵܐ ܨܲܠܵܐ. 20ܝ݇ܠܝܼܕ ܠܵܗ̇ ܥܲܕܵܐ ܠܝܵܒ݂ܵܠ، ܘܗ̇ܘ ܗܘܹܐ ܠܹܗ ܒܵܒܵܐ ܕܥܵܡܪ̈ܵܢܹܐ ܒܡܲܫܟܢܹ̈ܐ ܘܡܵܪ̈ܵܘܵܬܹܐ ܕܩܸܢܝܵܢܹ̈ܐ. 21ܫܸܡܵܐ ܕܐܲܚܘܿܢܘܼܗܝ ܝܘܼܒܵܠ ܝܼܗ݇ܘܵܐ. ܗ̇ܘ ܗܘܹܐ ܠܹܗ ܒܵܒܵܐ ܕܟܠܲܝܗܝ ܡܵܚܝܵܢܹ̈ܐ ܕܩܝܼܬܵܪܵܐ ܘܫܲܒܝܼܒܵܐ. 22ܐܘܼܦ ܨܲܠܵܐ ܝ݇ܠܝܼܕ ܠܵܗ̇ ܠܬܘܼܒܲܠ ܩܵܐܹܝܢ. ܗ̇ܘ ܝܼܗ݇ܘܵܐ ܚܵܫܠܵܢܵܐ ܕܟܠ ܙܲܝܢܵܐ، ܦܵܪܘܿܡܵܐ ܕܢܚܵܫܵܐ ܘܕܦܪܸܙܠܵܐ. ܘܫܸܡܵܐ ܕܚܵܬܵܐ ܕܬܘܼܒܲܠ ܩܵܐܹܝܢ ܢܲܥܡܵܐ ܝܗ݇ܘܵܐ. 23ܐ݇ܡܝܼܪܹܗ ܠܲܡܟ ܠܒܲܟ݂ܬܵܬܹ̈ܗ،
”ܥܲܕܵܐ ܘܨܲܠܵܐ، ܫܡܸܥܡܘܼܢ ܠܩܵܠܝܼ؛
ܝܵܐ ܒܲܟ݂ܬܵܬܹ̈ܐ ܕܠܲܡܟ، ܕܒ݂ܘܿܩܘܼܢ ܢܵܬܵܐ ܠܚܲܒܪܝܼ.
ܩܛܝܼܠ ܠܝܼ ܐ݇ܢܵܫܵܐ ܣܵܒܵܒ ܕܘܼܪܒܸܢܹܗ ܐܸܠܝܼ؛
ܥܠܲܝܡܵܐ ܣܵܒܵܒ ܡܚܹܐ ܠܹܗ ܐܸܠܝܼ.
24ܐܸܢ ܬܘܼܥܠܵܐ ܕܡ̣ܢ ܩܵܐܹܝܢ ܗܵܘܹܐ ܫܲܒ݂ܥܵܐ ܬܵܩܹ̈ܐ،
ܡ̣ܢ ܠܲܡܟ ܒܸܬ ܗܵܘܹܐ ܫܲܒ݂ܥܝܼ ܘܫܲܒ݂ܥܵܐ ܬܵܩܹ̈ܐ.“
ܗ݇ܘܵܝܬܵܐ ܕܫܹܝܬ ܘܐܵܢܘܿܫ
25ܡܸܢܕܪܸܫ ܙܘܼܘܸܓ ܠܹܗ ܐܵܕܵܡ ܥܲܡ ܒܲܟ݂ܬܹܗ، ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܩܪܹܐ ܠܵܗ̇ ܫܸܡܹܗ ܫܹܝܬ#4:25 ܫܸܡܵܐ ܕܫܹܝܬ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܡܲܩܘܼܡܹܐ ܒܠܸܫܵܢܵܐ ܥܸܒ݂ܪܵܝܵܐ ܣܵܒܵܒ ܐ݇ܡܝܼܪܵܗ̇، ”ܡܘܼܩܸܡ ܠܹܗ ܐܸܠܝܼ ܐܲܠܵܗܵܐ ܙܲܪܥܵܐ ܐ݇ܚܹܪ݇ܢܵܐ ܡܒܵܕܵܠ ܕܗܵܒܹܝܠ، ܗ̇ܘ ܕܩܵܐܹܝܢ ܩܛܝܼܠ ܠܹܗ.“
26ܐܘܼܦ ܠܫܹܝܬ ܦܝܼܫ ܠܹܗ ܝ݇ܠܝܼܕܵܐ ܒܪܘܿܢܵܐ، ܘܩܪܹܐ ܠܹܗ ܫܸܡܹܗ ܐܵܢܘܿܫ. ܒܗ̇ܝ ܥܕܵܢܵܐ ܐ݇ܢܵܫܹ̈ܐ ܫܘܼܪܹܐ ܠܗܘܿܢ ܠܸܩܪܵܝܵܐ ܒܫܸܡܵܐ ܕܡܵܪܝܵܐ.
Àwon tá yàn lọ́wọ́lọ́wọ́ báyìí:
ܒܪܝܬܐ 4: ABTAB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Aramaic Bible Translation Assyrian Bible © 2025 Aramaic Bible Translation