ܒܪܝܬܐ 13
13
ܐܲܒ݂ܪܵܡ ܘܠܘܿܛ ܒܸܦܪܵܫܵܐ
1ܐ݇ܣܝܼܩ ܠܹܗ ܐܲܒ݂ܪܵܡ ܡ̣ܢ ܡܸܨܪܹܝܢ ܠܬܲܝܡܢܵܐ، ܗ̇ܘ ܘܒܲܟ݂ܬܹܗ، ܘܠܘܿܛ ܥܲܡܹܗ، ܘܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ. 2ܘܐܲܒ݂ܪܵܡ ܗܘܹܐ ܠܹܗ ܥܲܬܝܼܪܵܐ ܪܵܒܵܐ، ܒܩܸܢܝܵܢܵܐ، ܒܣܹܐܡܵܐ، ܘܒܕܲܗܒ݂ܵܐ. 3ܘܐ݇ܙܝܼܠ ܠܹܗ ܒܐܘܼܪܚܹܗ ܡ̣ܢ ܬܲܝܡܢܵܐ ܗܲܠ ܒܹܝܬ ܐܹܝܠ، ܗܲܠ ܕܘܼܟܵܐ ܕܝܼܗ݇ܘܵܐ ܡܲܫܟܢܹܗ ܩܵܕ݇ܡܵܝܬܵܐ، ܒܹܝܠ ܒܹܝܬ ܐܹܝܠ ܘܥܵܝ، 4ܠܕܘܼܟܵܐ ܕܒܢܹܐ ܠܹܗ ܡܲܕܒܚܵܐ ܬܵܡܵܐ ܩܵܕ݇ܡܵܝܬܵܐ؛ ܘܩܪܹܐ ܠܹܗ ܬܵܡܵܐ ܐܲܒ݂ܪܵܡ ܒܫܸܡܵܐ ܕܡܵܪܝܵܐ.
5ܘܐܘܼܦ ܠܘܿܛ ܕܐ݇ܙܝܼܠ ܠܹܗ ܥܲܡ ܐܲܒ݂ܪܵܡ، ܗܘܹܐ ܠܗܘܿܢ ܐܸܠܹܗ ܦܸܣܩܹ̈ܐ، ܘܒܸܩܪ̈ܵܬܹܐ، ܘܡܲܫܟܢܹ̈ܐ. 6ܐܝܼܢܵܐ ܐܲܪܥܵܐ ܠܹܐ ܝܗ݇ܘܵܐ ܡܵܠܝܵܢܬܵܐ ܩܵܐ ܬܸܪܘܲܝܗܝ ܠܸܥܡܵܪܵܐ ܡܸܚܕܵܕܹ̈ܐ؛ ܣܵܒܵܒ ܩܸܢܝܵܢܲܝܗܝ ܪܵܒܵܐ ܝܗ݇ܘܵܐ، ܘܠܵܐ ܡܨܹܐ ܠܗܘܿܢ ܠܸܚܵܝܵܐ ܥܲܡ ܚܕܵܕܹ̈ܐ. 7ܘܗܘܹܐ ܠܵܗ̇ ܡܲܩܲܪܵܨܘܼܬܵܐ ܒܹܝܠ ܪ̈ܵܥܝܹܐ ܕܩܸܢܝܵܢܹ̈ܐ ܕܐܲܒ݂ܪܵܡ ܘܒܹܝܠ ܪ̈ܵܥܝܹܐ ܕܩܸܢܝܵܢܹ̈ܐ ܕܠܘܿܛ. ܒܗ̇ܝ ܥܕܵܢܵܐ ܟܢܲܥܢܵܝܹ̈ܐ ܘܦܲܪ̈ܙܵܝܹܐ ܒܸܥܡܵܪܵܐ ܝܗ݇ܘܵܘ ܒܐܲܪܥܵܐ. 8ܐ݇ܡܝܼܪܹܗ ܐܲܒ݂ܪܵܡ ܠܠܘܿܛ، ”ܦܲܪܦܘܼܠܹܐ ܝܘܸܢ، ܠܵܐ ܗܵܘܝܵܐ ܡܲܩܲܪܵܨܘܼܬܵܐ ܒܹܝܠܝܼ ܘܒܹܝܠܘܼܟ݂، ܘܒܹܝܠ ܪ̈ܵܥܝܝܼ ܘܒܹܝܠ ܪ̈ܵܥܝܘܼܟ݂، ܣܵܒܵܒ ܐܲܚܘܿܢܘܵܬܹ̈ܐ ܝܘܲܚ. 9ܗܵܐ ܠܹܐ ܝܠܵܗ̇ ܟܠܵܗ̇ ܐܲܪܥܵܐ ܩܵܕ݇ܡܘܼܟ݂؟ ܦܪܘܿܫ ܡܸܢܝܼ، ܦܲܪܦܘܼܠܹܐ ܝܘܸܢ. ܐܸܢ ܐܵܙܹܠ݇ܬ ܠܣܸܡܵܠܵܐ، ܐܵܢܵܐ ܒܸܬ ܐܵܙܹܠ݇ܢ ܠܝܲܡܝܼܢܵܐ؛ ܘܐܸܢ ܐܲܢ݇ܬ ܐܵܙܹܠ݇ܬ ܠܝܲܡܝܼܢܵܐ، ܐܵܢܵܐ ܒܸܬ ܐܵܙܹܠ݇ܢ ܠܣܸܡܵܠܵܐ.“
ܠܘܿܛ ܒܹܐܙܵܠܵܐ ܠܣܕܘܿܡ
10ܘܡܘܼܪܸܡ ܠܹܗ ܠܘܿܛ ܥܲܝܢܘܼ̈ܗܝ، ܘܚܙܹܐ ܠܹܗ ܟܠܵܗ̇ ܕܸܫܬܵܐ ܕܝܘܿܪܕܢܵܢ ܡܵܪܹܐ ܡ̈ܝܼܵܐ ܝܗ݇ܘܵܐ، ܐܲܝܟ݂ ܓܲܢܬܵܐ ܕܡܵܪܝܵܐ، ܐܲܝܟ݂ ܐܲܪܥܵܐ ܕܡܸܨܪܹܝܢ، ܒܐܘܼܪܚܘܼܟ݂ ܠܨܘܿܥܵܪ. ܐܵܗܵܐ ܝܗ݇ܘܵܐ ܡ̣ܢ ܩܵܕ݇ܡ ܕܡܘܼܚܪܸܒ݂ ܠܹܗ ܡܵܪܝܵܐ ܠܣܕܘܿܡ ܘܠܥܵܡܘܿܪܵܐ. 11ܘܓܘܼܒܹܐ ܠܹܗ ܠܘܿܛ ܩܵܐ ܓܵܢܹܗ ܟܠܵܗ̇ ܕܸܫܬܵܐ ܕܝܘܿܪܕܢܵܢ، ܘܫܘܼܢܹܐ ܠܹܗ ܠܘܿܛ ܠܡܲܕܢܚܵܐ. ܘܗܲܕܟ݂ܵܐ ܦܪܝܼܫ ܠܗܘܿܢ ܡ̣ܢ ܚܕܵܕܹ̈ܐ. 12ܐܲܒ݂ܪܵܡ ܝ݇ܬܝܼܒ݂ ܠܹܗ ܒܐܲܪܥܵܐ ܕܟܢܲܥܢ، ܘܠܘܿܛ ܝ݇ܬܝܼܒ݂ ܠܹܗ ܒܡܕܝܼܢܵܬܹ̈ܐ ܕܕܸܫܬܵܐ، ܘܦܪܝܼܣ ܠܹܗ ܡܲܫܟܢܹܗ ܗܲܠ ܣܕܘܿܡ. 13ܘܐ݇ܢܵܫܹ̈ܐ ܕܣܕܘܿܡ ܒܝܼܫܹ̈ܐ ܝܗ݇ܘܵܘ ܘܚܲܛܵܝܹ̈ܐ ܪܵܒܵܐ ܩܵܕ݇ܡ ܡܵܪܝܵܐ.
14ܐ݇ܡܝܼܪܹܗ ܡܵܪܝܵܐ ܠܐܲܒ݂ܪܵܡ، ܡ̣ܢ ܒܵܬ݇ܪ ܕܦܪܝܼܫ ܠܹܗ ܠܘܿܛ ܡܸܢܹܗ، ”ܡܲܪܸܡ ܥܲܝܢܘܼ̈ܟ݂ ܘܚܘܼܪ ܡ̣ܢ ܕܘܼܟܵܐ ܕܓܵܘܘܼܗ̇ ܝܘܸܬ، ܠܓܲܪܒܝܵܐ، ܘܠܬܲܝܡܢܵܐ، ܠܡܲܕܢܚܵܐ ܘܠܡܲܥܪܒ݂ܵܐ؛ 15ܣܵܒܵܒ ܟܠܵܗ̇ ܐܲܪܥܵܐ ܕܒܸܚܙܵܝܘܼܗ̇ ܝܘܸܬ ܒܸܬ ܝܵܗ݇ܒܹܢܵܗ̇ ܐܸܠܘܼܟ݂ ܘܠܙܲܪܥܘܼܟ݂ ܗܲܠ ܥܵܠܲܡ. 16ܘܒܸܬ ܡܲܦܪܸܝܢܹܗ ܙܲܪܥܘܼܟ݂ ܐܲܝܟ݂ ܥܲܦܪܵܐ ܕܐܲܪܥܵܐ، ܕܐܸܢ ܐ݇ܢܵܫܵܐ ܡܵܨܹܐ ܠܸܡܢܵܝܵܐ ܠܥܲܦܪܵܐ ܕܐܲܪܥܵܐ، ܐܘܼܦ ܙܲܪܥܘܼܟ݂ ܒܸܬ ܦܵܐܹܫ ܡܸܢܝܵܐ. 17ܩܘܼܡ ܘܚܕܘܿܪ ܒܐܲܪܥܵܐ، ܠܝܘܼܪܟ݂ܘܼܗ̇ ܘܦܸܬܘܘܼܗ̇، ܣܵܒܵܒ ܐܸܠܘܼܟ݂ ܒܸܬ ܝܵܗ݇ܒܹܢܵܗ̇.“ 18ܘܫܘܼܢܹܐ ܠܹܗ ܐܲܒ݂ܪܵܡ ܡܲܫܟܢܹܗ، ܘܐ݇ܬܹܐ ܠܹܗ ܘܝ݇ܬܝܼܒ݂ ܠܹܗ ܒܒܲܠܘܼܛܹ̈ܐ ܕܡܲܡܪܹܐ، ܒܚܸܒ݂ܪܘܿܢ؛ ܘܬܵܡܵܐ ܒܢܹܐ ܠܹܗ ܡܲܕܒܚܵܐ ܠܡܵܪܝܵܐ.
Àwon tá yàn lọ́wọ́lọ́wọ́ báyìí:
ܒܪܝܬܐ 13: ABTAB
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Aramaic Bible Translation Assyrian Bible © 2025 Aramaic Bible Translation