ܒܪܝܬܐ 11
11
ܒܘܼܪܓ̰ܵܐ ܕܒܵܒܹܠ
1ܗܘܹܐ ܠܵܗ̇ ܟܠܵܗ̇ ܐܲܪܥܵܐ ܚܲܕ ܠܸܫܵܢܵܐ ܘܚܲܕ ܡܲܡܠܠܵܐ. 2ܘܗܘܹܐ ܠܵܗ̇ ܟܲܕ ܫܘܼܢܹܐ ܠܗܘܿܢ ܐ݇ܢܵܫܹ̈ܐ ܡ̣ܢ ܡܲܕܢܚܵܐ، ܡܘܼܫ݇ܟ̰ܸܚ ܠܗܘܿܢ ܕܸܫܬܵܐ ܒܐܲܪܥܵܐ ܕܣܸܢܥܵܪ، ܘܝ݇ܬܝܼܒ݂ ܠܗܘܿܢ ܬܵܡܵܐ. 3ܘܐ݇ܡܝܼܪܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܬܹܝܡܘܼܢ، ܕܵܪܲܚ ܠܸܒ݂ܢܹ̈ܐ ܘܡܲܩܕܲܚ ܠܗܘܿܢ ܨܦܵܝܝܼ.“ ܗܘܹܐ ܠܹܗ ܐܸܠܲܝܗܝ ܠܸܒ݂ܢܵܐ ܠܟܹܐܦܵܐ، ܘܩܝܼܪ ܠܛܝܼܢܵܐ. 4ܘܐ݇ܡܝܼܪܗܘܿܢ، ”ܬܹܝܡܘܼܢ ܒܵܢܲܚ ܠܲܢ ܡܕܝܼܢ݇ܬܵܐ، ܘܒܘܼܪܓ̰ܵܐ ܕܪܹܫܹܗ ܡܵܛܹܐ ܠܫܡܲܝܵܐ، ܘܥܵܒ݂ܕܲܚ ܠܲܢ ܫܸܡܵܐ، ܕܠܵܐ ܗܵܘܝܵܐ ܕܦܵܝܫܲܚ ܒܙܝܼܩܹܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ.“ 5ܘܨܠܹܐ ܠܹܗ ܡܵܪܝܵܐ ܠܸܚܙܵܝܵܐ ܠܡܕܝܼܢ݇ܬܵܐ ܘܠܒܘܼܪܓ̰ܵܐ ܕܒܢܹܐ ܠܗܘܿܢ ܒܢܲܝ̈ܢܵܫܵܐ. 6ܘܐ݇ܡܝܼܪܹܗ ܡܵܪܝܵܐ، ”ܗܵܐ ܟܠܲܝܗܝ ܗܘܹܐ ܠܗܘܿܢ ܚܲܕ ܥܲܡܵܐ، ܘܟܠܲܝܗܝ ܐܝܼܬ ܠܗܘܿܢ ܚܲܕ ܠܸܫܵܢܵܐ، ܘܐܵܗܵܐ ܝܠܹܗ ܡܘܿܕܝܼ ܕܒܫܘܼܪܵܝܵܐ ܥܒ݂ܝܼܕ ܠܗܘܿܢ؛ ܘܐܵܕܝܼܵܐ، ܠܹܐ ܡܵܨܝܵܐ ܕܦܵܝܫܝܼ ܡܘܼܟܠܝܼܹܐ ܡ̣ܢ ܗ̇ܘ ܕܬܲܚܡܘܼܢܹܐ ܝܢܵܐ ܠܸܥܒ݂ܵܕܵܐ. 7ܬܹܝܡܘܼܢ ܨܵܠܲܚ ܘܦܲܠܥܲܚ ܬܵܡܵܐ ܠܸܫܵܢܲܝܗܝ، ܕܠܵܐ ܦܲܪܡܝܼ ܠܸܫܵܢܵܐ ܕܚܲܕ ܕܗ̇ܘ ܐ݇ܚܹܪ݇ܢܵܐ.“ 8ܘܒܙܝܼܩܲܝ ܠܹܗ ܡܵܪܝܵܐ ܡ̣ܢ ܬܵܡܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ، ܘܫܠܹܐ ܠܗܘܿܢ ܡ̣ܢ ܠܸܒܢܵܝܵܐ ܠܡܕܝܼܢ݇ܬܵܐ. 9ܒܘܼܬ ܐܵܗܵܐ، ܦܝܼܫ ܠܹܗ ܩܸܪܝܵܐ ܫܸܡܘܼܗ̇ ܒܵܒܹܠ،#11:9 ܚܲܒܪܵܐ ܕܒܵܒܹܠ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܒܲܠܒܲܠܬܵܐ ܒܠܸܫܵܢܵܐ ܥܸܒ݂ܪܵܝܵܐ ܣܵܒܵܒ ܬܵܡܵܐ ܒܘܼܠܒܸܠ ܠܹܗ ܡܵܪܝܵܐ ܠܸܫܵܢܵܐ ܕܟܠܵܗ̇ ܐܲܪܥܵܐ، ܘܡ̣ܢ ܬܵܡܵܐ ܒܙܝܼܩܲܝ ܠܹܗ ܡܵܪܝܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ.
ܬܵܘܠܕܵܬܹ̈ܐ ܕܫܹܝܡ
10ܐܲܢܹܐ ܝܢܵܐ ܬܵܘܠܕܵܬܹ̈ܐ ܕܫܹܝܡ: ܫܹܝܡ ܒܲܪ ܐܸܡܵܐܐ ܫܸܢܹ̈ܐ ܝܗ݇ܘܵܐ ܟܲܕ ܡܘܼܠܸܕ ܠܹܗ ܠܐܲܪܦܲܟ݂ܫܵܕ، ܬܪܹܝ ܫܸܢܹ̈ܐ ܡ̣ܢ ܒܵܬ݇ܪ ܛܵܘܦܵܢܵܐ. 11ܚܝܹܐ ܠܹܗ ܫܹܝܡ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܐܲܪܦܲܟ݂ܫܵܕ، ܚܲܡܸܫܡܵܐܐ ܫܸܢܹ̈ܐ، ܘܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ. 12ܘܚܝܹܐ ܠܹܗ ܐܲܪܦܲܟ݂ܫܵܕ ܬܠܵܬܝܼ ܘܚܲܡܸܫ ܫܸܢܹ̈ܐ، ܡܘܼܠܸܕ ܠܹܗ ܠܫܵܠܵܚ. 13ܚܝܹܐ ܠܹܗ ܐܲܪܦܲܟ݂ܫܵܕ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܫܵܠܵܚ، ܐܲܪܒܲܥܡܵܐܐ ܘܬܠܵܬ ܫܸܢܹ̈ܐ، ܘܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ ܐ݇ܚܹܪ̈݇ܢܹܐ. 14ܘܚܝܹܐ ܠܹܗ ܫܵܠܵܚ ܬܠܵܬܝܼ ܫܸܢܹ̈ܐ، ܘܡܘܼܠܸܕ ܠܹܗ ܠܥܵܒ݂ܵܪ. 15ܚܝܹܐ ܠܹܗ ܫܵܠܵܚ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܥܵܒ݂ܵܪ، ܐܲܪܒܲܥܡܵܐܐ ܘܬܠܵܬ ܫܸܢܹ̈ܐ، ܘܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ ܐ݇ܚܹܪ̈݇ܢܹܐ 16ܘܚܝܹܐ ܠܹܗ ܥܵܒ݂ܵܪ ܬܠܵܬܝܼ ܘܐܲܪܒܥܵܐ ܫܸܢܹ̈ܐ، ܘܡܘܼܠܸܕ ܠܹܗ ܠܦܵܠܵܓ݂. 17ܚܝܹܐ ܠܹܗ ܥܵܒ݂ܵܪ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܦܵܠܵܓ݂، ܐܲܪܒܲܥܡܵܐܐ ܘܬܠܵܬܝܼ ܫܸܢܹ̈ܐ، ܘܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ ܐ݇ܚܹܪ̈݇ܢܹܐ. 18ܘܚܝܹܐ ܠܹܗ ܦܵܠܵܓ݂ ܬܠܵܬܝܼ ܫܸܢܹ̈ܐ، ܘܡܘܼܠܸܕ ܠܹܗ ܠܪܥܘܼ. 19ܚܝܹܐ ܠܹܗ ܦܵܠܵܓ݂ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܪܥܘܼ، ܬܪܲܝܡܵܐܐ ܘܬܫܲܥ ܫܸܢܹ̈ܐ، ܘܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ ܐ݇ܚܹܪ̈݇ܢܹܐ. 20ܘܚܝܹܐ ܠܹܗ ܪܥܘܼ ܬܠܵܬܝܼ ܘܬܲܪܬܹܝ ܫܸܢܹ̈ܐ، ܘܡܘܼܠܸܕ ܠܹܗ ܠܣܵܪܘܿܓ݂؛ 21ܚܝܹܐ ܠܹܗ ܪܥܘܼ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܣܵܪܘܿܓ݂ ܬܪܲܝܡܵܐܐ ܘܫܒܲܥ ܫܸܢܹ̈ܐ، ܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ ܐ݇ܚܹܪ̈݇ܢܹܐ. 22ܘܚܝܹܐ ܠܹܗ ܣܵܪܘܿܓ݂ ܬܠܵܬܝܼ ܫܸܢܹ̈ܐ، ܘܡܘܼܠܸܕ ܠܹܗ ܠܢܵܚܘܿܪ. 23ܚܝܹܐ ܠܹܗ ܣܵܪܘܿܓ݂ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܢܵܚܘܿܪ ܬܪܲܝܡܵܐܐ ܫܸܢܹ̈ܐ، ܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ ܐ݇ܚܹܪ̈݇ܢܹܐ. 24ܘܚܝܹܐ ܠܹܗ ܢܵܚܘܿܪ ܥܸܣܪܝܼ ܘܬܫܲܥ ܫܸܢܹ̈ܐ، ܘܡܘܼܠܸܕ ܠܹܗ ܠܬܲܪܚ. 25ܚܝܹܐ ܠܹܗ ܢܵܚܘܿܪ ܡ̣ܢ ܒܵܬ݇ܪ ܕܡܘܼܠܸܕ ܠܹܗ ܠܬܲܪܚ، ܐܸܡܵܐܐ ܘܬܫܲܥܣܲܪ ܫܸܢܹ̈ܐ، ܘܡܘܼܠܸܕ ܠܹܗ ܒܢܘܿܢܹ̈ܐ ܘܒܢܵܬܹ̈ܐ ܐ݇ܚܹܪ̈݇ܢܹܐ. 26ܘܚܝܹܐ ܠܹܗ ܬܲܪܚ ܫܲܒ݂ܥܝܼ ܫܸܢܹ̈ܐ، ܘܡܘܼܠܸܕ ܠܹܗ ܠܐܲܒ݂ܪܵܡ، ܠܢܵܚܘܿܪ، ܘܠܗܵܪܵܢ.
ܬܵܘܠܕܵܬܹ̈ܐ ܕܬܲܪܚ ܒܵܒܵܐ ܕܐܲܒ݂ܪܵܗܵܡ
27ܐܲܢܹܐ ܝܢܵܐ ܬܵܘܠܕܵܬܹ̈ܐ ܕܬܲܪܚ: ܬܲܪܚ ܡܘܼܠܸܕ ܠܹܗ ܠܐܲܒ݂ܪܵܡ، ܠܢܵܚܘܿܪ، ܘܠܗܵܪܵܢ؛ ܘܗܵܪܵܢ ܡܘܼܠܸܕ ܠܹܗ ܠܠܘܿܛ. 28ܘܡܝܼܬ ܠܹܗ ܗܵܪܵܢ ܡ̣ܢ ܩܵܕ݇ܡ ܒܵܒܘܼܗܝ ܬܲܪܚ، ܒܐܲܪܥܵܐ ܕܝܼܠܝܼܕܘܼܬܹܗ، ܒܐܘܿܪ ܕܟܲܠܕܵܝܹ̈ܐ. 29ܓܒ݂ܝܼܪܗܘܿܢ ܐܲܒ݂ܪܵܡ ܘܢܵܚܘܿܪ. ܫܸܡܵܐ ܕܒܲܟ݂ܬܵܐ ܕܐܲܒ݂ܪܵܡ، ܣܲܪܲܝ؛ ܘܫܸܡܵܐ ܕܒܲܟ݂ܬܵܐ ܕܢܵܚܘܿܪ، ܡܸܠܟܵܐ، ܒܪܵܬܵܐ ܕܗܵܪܵܢ، ܒܵܒܵܐ ܕܡܸܠܟܵܐ ܘܕܐܲܣܟܵܐ. 30ܘܣܲܪܲܝ ܥܩܲܪܬܵܐ ܝܗ݇ܘܵܐ؛ ܠܲܝܬ ܗ݇ܘܵܐ ܠܵܗ̇ ܝܵܠܵܕ݇ܐ. 31ܘܫܩܝܼܠ ܠܹܗ ܬܲܪܚ ܠܐܲܒ݂ܪܵܡ ܒܪܘܿܢܹܗ، ܘܠܠܘܿܛ ܒܪܘܿܢܵܐ ܕܗܵܪܵܢ، ܒܪܘܿܢܵܐ ܕܒܪܘܿܢܹܗ، ܘܠܣܲܪܲܝ ܟܲܠܬܹܗ، ܒܲܟ݂ܬܵܐ ܕܐܲܒ݂ܪܵܡ ܒܪܘܿܢܹܗ؛ ܘܦܠܝܼܛ ܠܗܘܿܢ ܡܸܚܕܵܕܹ̈ܐ ܡ̣ܢ ܐܘܿܪ ܕܟܲܠܕܵܝܹ̈ܐ، ܠܹܐܙܵܠܵܐ ܠܐܲܪܥܵܐ ܕܟܢܲܥܢ؛ ܘܐ݇ܙܝܼܠ ܠܗܘܿܢ ܗܲܠ ܚܵܪܵܢ، ܘܝ݇ܬܝܼܒ݂ ܠܗܘܿܢ ܬܵܡܵܐ. 32ܘܚܝܹܐ ܠܹܗ ܬܲܪܚ ܬܪܲܝܡܵܐܐ ܘܚܲܡܸܫ ܫܸܢܹ̈ܐ، ܘܡܝܼܬ ܠܹܗ ܒܚܵܪܵܢ.
Àwon tá yàn lọ́wọ́lọ́wọ́ báyìí:
ܒܪܝܬܐ 11: ABTAB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Aramaic Bible Translation Assyrian Bible © 2025 Aramaic Bible Translation