LUKA 21

Hmeithai thilpêk

(Mk. 12:41-44)

1Thawhlâwm bâwma mi hausate thawhlâwm thlâk chu a thlîr reng a. 2Hmeithai rethei tak pakhatin dâr pawisa#21:2 Grik ‘lepta’ dâr pawisa a ni, chutiang 96 chuan duli a tluk. pahnih a rawn thlâk ve chu a hmu a. 3Tichuan, “Thu dik ka hrilh a che u, he hmeithai rethei tak hian mi dang zawng ai khân a thlâk tam a ni. 4Mi dangte hi chuan an neih liama mi an rawn thlâk a, ani erawh hi chuan tlachham chungin, intunnunna tûra a neih chhun chu a rawn thlâk a nih hi,” a ti a.

Tempul chhiat tûr thu

(Mt. 24:1,2; Mk. 13:1,2)

5Lung mawi tak tak leh thilpêk khâwma Tempul an chei mawizia thu mi ṭhenkhatin an sawi laiin Isuan, 6“Hêng in thil hmuhte hi, lung intiang rêng rêng hi pakhat mah tihchim lohva hnutchhiah a awm loh hun a lo thleng dâwn,” a ti a. #Lk. 19:43,44.

Manganna leh tihduhdahna

(Mt. 24:3-14; Mk. 13:3-13)

7Anni chuan a hnênah, “Zirtîrtu, chûng chu engtikah nge a lo awm ang? Chûng lo thlen dâwn hun chhinchhiahna thil mak eng eng nge awm ang?” tiin an zâwt a. 8Ani chuan, “Hruai bo in nih loh nân fîmkhur rawh u. Ka hming chhâlin, ‘Keimah hi ka ni,’ ‘a hun a thleng dâwn ta,’ tiin mi tam tak an lo chhuak ang; an hnung zui suh ang che u. #Lk. 17:23; Mk. 13:21. 9Indo ri te leh hel vânga buai thâwmte in hriat hunin, hlauvin mangang suh ang che u; chûng chu thleng hmasa tûr rêng a ni, hun tâwp erawh chu a ni nghâl mai lo vang,” a ti a.

10Tin, an hnênah, “Hnam hrang hrang an indo vang a, sawrkâr hrang leh sawrkâr hrang an indo bawk ang. #2 Chr. 15:6; Isa. 19:2. 11Lîr a nghîng vak vak ang a, hmun hrang hrangah ṭâm a tla ang a, hrite a lêng bawk ang; vân ata hlauhawmte leh chhinchhiahna mak tak tak a lo awm ang. 12Nimahsela, chûng thilte chu a lo thlen hmain an man ang che u a, sunagog-ah te hruaiin tân inah te an khung ang che u a, an tiduhdah dâwn che u a ni. Ka hming avângin lalte leh Ramawptute hmaah an hruai ang che u. #Mt. 10:17-21. #Tirh. 25:24. 13Ka thuhretute in nih târlanna remchâng a ni hlauh dâwn. #Fil. 1:12. 14Chhânna tûr ngaihtuah lâwk a ngai lo tih hre sa rawh u; #Lk. 12:11,12. 15in khingpuite tluk loh tûr leh hnial theih loh tûr finna leh mi chhân thiamna keiin ka pe dâwn si che u a. 16In nu leh pate, in unaute, in laichînte leh in ṭhiante hial pawhin an mantîr ang che u a; a ṭhen phei chu an tihlum ang che u. #Lk. 12:52,53. 17Ka hming avângin mi tinin an hua ang che u.#Mt. 10:22; Jn. 15:18-25. 18Nimahsela, in samzai pakhat pawh a boral lo vang.#Lk. 12:7; Mt. 10:20; Tirh. 27:34; 1 Samu. 14:45. 19Chhel takin ding tlat ula; tichuan, in him ang. #Mt. 10:22; Rom. 11:25; Thup. 11:2.

Jerusalem chhiat tûr thu hrilhlâwkna

(Mt. 24:15-21; Mk. 13:14-19)

20“Sipaihoten Jerusalem an hual in hmuh hun chuan, a chhiat a hnai ta tih hria ang che u. 21Chutih hunah chuan Judai rama awmte chu tlângramahte tlân se; khawpui chhûnga awmte chuan chhuahsan sela, thingtlânga awmte chu a chhûngah lût suh se. 22Chûng nite chu hremna ni chu a ni e, thu ziak zawng zawng a thlen kim nân. 23Chûng huna nau paite leh nauno pawmte chu an va khawngaihthlâk dâwn êm! He ramah hian hrehawm nasa tak a thleng dâwn si a, he chite chungah hian thinurna a lo thleng dâwn a ni. 24Khandaiha sâm an ni ang a, Jentail ram tinah sala hruai darhin an awm ang; tin, Jentail-te hun a tâwp hma zawng Jerusalem hi Jentail-te rah beh a ni ang.

Mihring Fapa lo kal

(Mt. 24:29-31; Mk. 13:24-27)

25“Tin, ni-ah te, thlaah te, arsi-ah te khian chhinchhiahna mak tak tak a lo awm ang a; leiah pawh tuifinriat fâwn leh rûm hum hum an hriatin hnam tin tihngaihna hre lovin an mangang ang a; #Isa. 13:10; Joel. 2:31; Thup. 6:12,13. 26Vân thiltihtheihnate chu tihnghîn a ni ang a, khawvêla thil hlauhawm lo thleng tûr an suangtuahin, hlauva thlabârin mite an thidang ang. 27Chutih hunah chuan Mihring Fapa hi thiltihtheihna leh ropuina nasa tak nên chhûm zînga lo kal an hmu ang. #Dan. 7:13; Lk. 9:27; Thup. 1:7. 28Chûng thil chu a lo thlen chuan en chho ula, dâk chhuak ang che u; in tlanna chu a lo hnai ta a ni,” a ti a.

Theipui kûng aṭanga zir tûr

(Mt. 24:32-35; Mk. 13:28-31)

29An hnênah tehkhin thu a sawi bawk a, “Theipui kûng leh thing dangte pawh hi en teh u. 30A lo chawr no in hmuhin nipui a lo thaw ṭan ta tih in hre mai ṭhîn. 31Chutiang bawkin nangni pawhin chûng zawng zawng lo thleng in hmuh hun chuan, Pathian ram chu a lo hnai ta tih hre mai ang che u. 32Thu dik ka hrilh a che u, chûng thil zawng zawng chu a lo thlen hma loh chuan tûnlai mite hi an ral hman lo vang. #Lk. 8:27. 33Lei leh vân a ral ang a, ka thu erawh chu a ral tawp lo vang. #Lk. 16:17.

Inring tûra fuihna

34“Tichuan, nawmsak bâwl te, zu ruih te, ni tin khawsak engtona te in rilrua a khah lutuk loh nân fîmkhur rawh u.#Mk. 4:19; Lk. 12:25; 1 Thes. 5:6,7. 35Thanga âwk phut ang maiin a rawn nang dah ang che u. Lei pum pui chunga chêngte chungah chutiangin a lo thleng dâwn si a. 36Chûng thil lo thleng tûrte tuar chhuaka, Mihring Fapa hmaa in din theih nân eng lai pawhin ngaihvenin ṭawngṭai rawh u,” a ti a.

37Chhûnah chuan Tempulah a zirtîr a, zânah erawh chuan a chhuak a, Oliv tlâng an tihah chuan a riak ṭhîn. #Lk. 19:47; Mk. 11:19. 38Mi zawng zawng pawh a thu ngaithla tûrin zîngah Tempulah an lo kal ṭhîn.

Àwon tá yàn lọ́wọ́lọ́wọ́ báyìí:

LUKA 21: MIZCLBSI

Ìsàmì-sí

Pín

Daako