Luk, echî 17
17
Obhí
(Mat 18.6-7,21-22; Mak 9.42)
1Jisos a sə́re atóbhá abhê se, “Iyîm mbi í kí choe nne í kâk ka obhí í fôn ka ejoóm, kən tîk é bhîp é chîŋ na nne nnyo a kə́ bha na ḿbə́ne. 2Tîk é nôp é chîŋ sê á kó ekpatə́m í ntáé á sə̂t wâ ka ntuŋ á bhî ka aya, na nji ó yîm mmon ntʉ́ghi nnyó kpe yót a yim obhí. 3Nne a joé ka ibhábhé.
“Mmon-i-nnyen owa á yim obhí, nyán yê. Ebhú á səre se, yê a yîm obhí, a rô kpó yim, deê ó rî nsôn ó gyíni obhí obhê.#Mat 18.15. 4Kpe ájoé sê a yîm wâ obhí ntə̂m enígisá ka ofú, kən kpe bhaghé ntə̂m, a sə́re wâ se yê a yîm obhí, a rô kpó yim, o ri ó rî nsôn ó gyíni obhí obhê.”
Ḿbə́ŋé ekíím na Obhasi
5Ágbán í Ńtâ Jisos á sə́re yê sê, “Ńsé, yim okíghá-ḿbə́ŋé obhə́ré ó sôn nono.”
6Kən Ńtâ Jisos a táme ábho se, “Ebhú sê ḿbə́ŋé nnyi o kíi ên na Obhasi a ri kpe mkpât noŋ mməghe mósta eê, kə́n o kí səre ên étí eyúp njí se é yə̂p na arʉk-arʉk, é jí gyímí ka aya ayúp, étí áji é kí yuk wâ.”
Etûm í ḿgbán
7Jisos se, “É kó sê nne owəné yót a fôn ḿgbán nnyo á kpaŋá ekpaŋ, na kpe ebhú tat sê á bhabha obhúi. Ebhú ḿgbán nnyó á bha mbâ ebhin, ó tok yê nná se a yim babhap, a dí édî ejê kəne? 8Ó bhó səre yê áno. Ó səra yê se a tʉrí biji, a yám édî, a jighí wâ, ó dí ó gwó, kən á kot mân, a dî ejê, a gwô. 9Ńsé ḿgbán nnyó á bhó kup yê se, sáma! ka a ri etûm ejê. 10Nâ noŋ é rî fə́ne na ên. Ebhú ó yim ên etûm nji á tóe ên sê ó yîm, é mân, o kí to ên sê, ‘Êt a ri ágbán, nji tat cháŋ. Etûm nji e yimî nná, a ri nji e fonê ka eyimím.’ ”
Jisos a yîm amaŋá-ofunum ófó á son
11Nji Jisos á jak nnyi Jerusarem a sî ka ndini Samariya na Gariri, a kí jen a jak. 12Ebhú á gyek mmon eték yót, amaŋá-ofunum ófó á kpúghi yê, kən á gyími ńgô nyáŋé-nyáŋé, 13á kûk káŋ káŋ káŋ sê, “Jisos, Ńsé! Fon nsôn na êt.”
14Nji Jisos a yéne ábho, a sə́re ábho se, “Choŋ ên mbâ nkara-agore Obhasi a kép ên.”#Mbín 14.1-32.
Á kpó to á yə̂p á kí ji, ofunum ábho ó mân. 15Yót a yéná se emaŋé ejê é man, a chə́bhe njəm mbâ Jisos a kúghá a kará nkat mbâ Obhasi. 16A kpó si ka eji Jisos a ri, a gbô ka ochî obhê, a káre yê ekûp. Nne nnyó a ri nne Samariya. 17Kən Jisos a bhə̂p se, “Ane ófó nâ á yími ofunum ábho ó mân, mba ngá árôn-ánî, á rî fan? 18Jen kən njéné nnyó yê átíŋ nâ a chəbhé njəm a bhá karé Obhasi ekûp?”
19A sə́re mân nne nnyó se, “Duî ngyím choŋ, okíghá-ḿbə́ŋé obhâ ó yim wâ ó son.”
Ebháám nji otúi Obhasi
(Mat 24.23-28,37-41)
20Etû ane echəme Farasi á bhə̂p Jisos ebhú otúi Obhasi ó kə́ bha. A táme se, “Otúi Obhasi ó bhó bha ka ekpak nji nne a kí yen. 21Kpe nne nnyo tîk a tô se, ‘Yên ḿbə́ne ngá, yên ḿbə́ne ńgô’ cháŋ, ka otúi Obhasi ta ó bha ó si njû.”
22A sə́re mân atóbhá abhê se, “Ebhú tîk é bhak nji kpe énê owəné a kí goré se yê a yén kpe ofú bhə́t ka mfín nnyi Mmon-i-ntem-nne a kə́ bha, kən á bhó yen. 23Ane tîk á jóe mba á kí səre ên sê, ‘Kép ên yê ńgô, kép ên yê ngá.’ Ka yúk ên ábho. 24Ekpak nji nyaŋanya á fabha áno obhô-okáé a gbô obhô-orûm, a kará ebhát ka ngurobhú, nâ noŋ fə́ne Mmon-i-ntem-nne a kí fap ka ofú a kə́ bha. 25Kən tîk a yên kpá oseŋe kpe-eji. Abhon ebhú njí tîk á táŋe yê.
26“Ekpak é fábhe ka ebhú Nowa, nâ noŋ fə́ne é kí fap ka ebhú Mmon-i-ntem-nne a kə́ bha.#Eróghá 6.5-8. 27Kpe énê a ri a dík a wók, mba ebháé á kok ta ofú Nowa a kpo to a gbe okpi obhê, a gyê ka etím, ayép á bhâ móbhe ngun, á yúi ane chénchén.#Eróghá 7.6-24. 28Tîk é jóe fə́ne noŋ ebhú Lot. Kpe énê a ri a dík a wók, a gurá, a namá, a kpaŋá, a gbek. 29Ofú Lot a maghê eték í Sodom, ngûn na ákáré noŋ arə́m-atáé, ḿ bak nnyi ósô, ḿ bâ yúi ane chénchén.#Eróghá 18.20—19.25. 30Nâ noŋ tîk é jóe ka ofú mbi á kí toŋe ane Mmon-i-ntem-nne.
31“Ka ofú ábhi, we nnyo o kun ka ósô njû, ka yúí biji se ó bhə̂t ó jí kə́n iyîm ibhâ ka etím í njû. Ájoé o ri ka ebhin, ka tô se ó kʉ́rí, ó sí njû.#Mat 24.17-18; Mak 13.15-16. 32Tit ên nji é fábhe na nkáé Lot.#Eróghá 19.26. 33Kpe énê nnyo a kí nok se yê a kughí ekpin ejê, tîk a kə̂t ka mbá. Nne nnyo á tane ekpin ejê, tîk a chə́bhe njəm a fôn ńjə́ne.#Mat 10.39; 16.25; Mak 8.35; Luk 9.24; Jon 12.25. 34N kí səre ên bəre, ka atʉ́ áma, ane ábháe tîk á núŋi enuŋ jə́t, kən á kí ko yót á jak, nnyo yót a kə̂t. 35Ane-akáé ábháe tîk á goghá nkʉi ka eji jə́t, kən tîk á kô yót á jak, nnyo yót a kə̂t. [ 36Ane-arûm ábháe tîk á jóe ka ebhin, kən tîk á kô yót á jak, nnyo yót a kə̂t.]”#Mat 24.40.
37Nji atóbhá Jisos á yúghi, á bhə̂p yê sê, “Ńsé, iyîm mbí í kí fap ka fan?”
Jisos a táme ábho se, “Ékpoê nnyam kpe é rî fan, áfo nâ nnón mmi ń dîk ákpoê onyam, ń kí chəmé.”
موجودہ انتخاب:
Luk, echî 17: ETUNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ejagham New Testament © Bible Society of Nigeria and Bible Society of Cameroon, 1996.
