Luk, echî 16
16
Aron mma ḿgbán etat a tóŋe
1Jisos a sə́re mân atóbhá abhê egan jə́t se, “Ofú bhə́t, nne nyúp yót a ri. A fôn ḿgbán yót nnyo á bhabha iyîm ibhê. Ane á sə́re yê sê ḿgbán owe a kí bhibhi ntí énə́mé-énə́me. 2Kən nne-efaŋ nnyó a bhîŋ ḿgbán owe a bhə̂p se, ‘Ń yugha nná jen m kpek na ekpak nji ó fik iyîm ibhámé? Choŋ osêŋ jə́t na jə́t ekpak nji ó chiŋa na iyîm ibhámé ka obhô, bhá karé ə̂m, ka tîk ó ro kpó yim etûm na mme.’
3“Ḿgbán nnyó a kére ka ḿbə́ŋé se, ‘Nâ á kə́ bha nná oyighí ə̂m ka etûm, tîk n yîm nan eé? Ifámé ikom ebhin cháŋ, egyéŋé ngá a ri ejûm ísonê kpe-eji. 4Ḿ məŋe ejûm nji n kí yim kən é nyáŋé ə̂m m fôn atem mba á kí ki ə̂m ka ojû ábho ebhú á yighí ə̂m ka etûm.’
5“Ḿgbán nnyó a bhâ bhîŋ mân ane chénchén mba á fíi ńsé owe arə́m, se á bhá yén yê. A bhə̂p nnyo ndaŋa-mbá se, ‘O fiî nná ńsé omé nan?’
6“Nne nnyó se, ‘M fiî nsam i ńkên akʉ́ órif énî.’
“Ḿgbán nnyó se, ‘Ńgyê nwet arə́m eya, kó sêŋ se o fiî nsam i ńkên ébháe na ófó.’ Nne nnyó a kô a sêŋ.
7“Ḿgbán nnyó a bhə̂p enyeré nne se, ‘We o fiî nan?’
“Nne nnyó se, ‘M fiî nsam i ntâk i nkʉi érôn.’
“Ḿgbán nnyó se, ‘Ńgyê nwet arə́m eya, kó sêŋ se o fiî nsam énî.’
8“Nji ńsé owe a yúghi nchot nnyí, a kâm se nkora-amoe ḿgbán nnyó a fôn aron kpe-eji. Echî aŋ? Ane ejírim, mba iyîm í ngun í fáŋe ábho í chîŋ, á yíma iyîm na aron á chiŋa mba á rî ka ebhát.”
9Jisos a kpô sə́ré se, “Deê ń sə́ré ên bəre nne a kó efaŋ í ngun nnyí a fon atem. Á yim áno, ebhú ngun nnyí na efaŋ ejê í chiŋ, Obhasi a kí tabhé yê abhô ábháe ka ekpin ótúm-ótúm. 10Nne nnyo á bhó chaghé ache na ejûm ejê kpe é rî chiîŋ, kpe á káre yê nji é fáŋe ofaŋ, ache fə́ne á bhó chaghé. Nne nnyo á yimá fúbhá-fubha-fúbhá ka abhon iyîm, kpe ka iyîm iyúp, a kí yim. 11Ájoé mân ó ka məŋé ên ofi efaŋ í ngun nji kpe é ká joé mfoné efaŋ, o kí yim ên nan ó fî mfoné efaŋ? 12Ájoé mfá-mfá o kí chaghé ache na ejûm nji cháŋ ejâ, kən ebhú mân á karé wâ ejâ we ḿfoné aŋ?
13“Ḿgbán nnyo a kí tʉk ásé ábháe cháŋ. A kí kot yót, a mághe yót. A kí karé ḿbə́ŋé eye mbâ yót, a kêp yót fóŋ. Ó bhó joé ḿgbán o káre Obhasi o jóe o káre iyîm í ngun ka ebhú jə́t.”#Mat 6.24.
Obhasi a mə́ŋe ḿbə́ŋé eyəré
(Mat 11.12-13; 5.31-32; Mak 10.11-12)
14Nji Jisos a chorê achot mmá ane echəme Farasi á kə̂t á kaghá yê ntuŋ ka á kóre ntí kpe-eji. 15Kən Jisos a sə́re ábho se, “Ên áfoné nâ ó toŋa ên biji sê ane á yén ên sê ó chiŋi ên obhô, kən Obhasi a mə́ŋe ḿbə́ŋé eyəné. Ejûm nji ane á kere sê é chiŋi obhô, Obhasi a kí kep se echâk.
16“Ebhín í Mosis na achot fép mma akará-otîp Obhasi á séŋe, á fóne ikom ta é sî ebhú Jon i mfúgha-ane-ayép. Éróghé ta ka ebhú áji, á kí səre otîp ogyebhá-ḿbə́ŋé otúi Obhasi. Kpe énê a kí nok a gyé otúi mbí ka ikom.#Mat 11.12-13. 17Sê ósô na nsi í chíŋ, a ri mkpât ejûm, kən sê á yíghi kpe mmon ikóé ebhín yót, a ri ejûm nji é yúŋi é chîŋ ochíŋ.”#Mat 5.18.
18“Kpe énê nnyo á bhim nkáé, a kô nnyo tat, a gbô ekun. Nne fə́ne nnyo á ko nne-nkáé nnyo a fâp ebháé, a gbô ekun.”#Mat 5.32; 1 Korin 7.10-11.
Egan í Lasaros na nne-ntí yót
19Jisos a bhâ tûp mân egan se, “Ofú bhə́t, nne-ntí yót a ri mfá. Oguŋi obhê mbi á kaghá, ó kpóe ntí. Ekpin nji á kpiná chénchén ofú, a ri ogyep-ógyêp. 20Mkpák yót fə́ne a ri a kamá se Lasaros, arôk-árôk ka biji. Á kok Lasaros á bhak á kik ka mkpe itə̂m í njû nne-ntí nnyó kpe bhaghé ebhú, 21sê a bhá, kpe a tíi abhon akpât édî mma á gbóe ka nsi nji nne-ntí nnyó a kí di édî, kə́n a nyáŋe biji ibhê. Ojô ó rə́bha arôk í Lasaros ka mkpe njû nne nnyó.
22“Mkpák nnyó a kpô kpó, baénjel á kô yê a jî kúmi ka mkpe Abraham. Nne-ntí nnyó a kpô fə́ne, á kə̂n yê. 23A jî gyê a ri ka eték akə́bha-nsi, a ri ka ekpatə́m oseŋe. A yûŋ amə̂t, a yên Abraham ta ńgô, Lasaros a ri yê ka mkpe biji. 24A bhîŋ se, ‘Ńsé omé, Abraham! Ri ə̂m nsôn, túm Lasaros a bhi kpe indəré ka ayép a bhá təp ə̂m ka erə́bhe, a naré ə̂m ntuŋ, oseŋe ngûn mbí ó ti ó chiŋ.’
25“Kən Abraham a táme se, ‘Mmon omé, məŋê se ebhú o ri ên ka ekpin, we o fôn chénchén ogyep ekpin kən ekpin é sôn na Lasaros kpe-eji. Mfá-mfá Lasaros a kí di ekpin ngá, kən we ó kət ka oseŋe. 26É jeghe okpe ngá fə́ne, ndûm ébhírí etat a kíri êt na we, nne nnyo a kí məŋé oyaŋé a sí ntem cháŋ, kpe a wóme kə́n a yaŋé.’
27“Nne-ntí nnyó a chôt mân se, ‘Kpe nchot cháŋ, kən ńsé, n kí goré bəre ó túm Lasaros a ji ka njû ńsé omé. 28Abhon-í-nnyen abhámé á rî ágo árôn, deê a jí tʉ ábho obhô ka otûŋ á kó ebhú á kâ yîm á bhá fə́ne ka ntʉ́ghi eji oseŋe nji n di nná.’
29“Kən Abraham a táme se, ‘Ta abhon-í-nnyen abhâ á fon achot Obhasi mma Mosis na akará-otîp Obhasi á séŋe. Deê mân á yúk ḿmáne.’
30“Nne-ntí nnyó a táme se, ‘Ńsé omé, Abraham, áji é bhó bhik. Ebhú nne nnyo a kpóe okpó a yên, á nyəmé a sə́re ábho, tîk á mághe obhí ábho.’
31“Kən Abraham a kpô támé se, ‘Ájoé á bhó yuk achot Obhasi mma Mosis na akará-otîp, nâ fə́ne kpe nne a nyəmê ka ekʉ̂ a sə́re ábho, á bhó yuk.’ ”
موجودہ انتخاب:
Luk, echî 16: ETUNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ejagham New Testament © Bible Society of Nigeria and Bible Society of Cameroon, 1996.
