San Mateo 9

Jesús omonguera peteĩ ijapávape

(Mc 2.1-12; Lc 5.17-26)

1Jesús ojupi peteĩ kanóape ha ohasa pe yguasu mboypýri ha oguahẽ pe táva ha'e oiko haguépe. 2Upépe, ojegueru chupe tupápe peteĩ ijapáva. Ha ohechávo Jesús mba'éichapa ha'e kuéra ojerovia hese, he'i pe hasývape:

—Néike che ra'y. Ne angaipa ojeheja reíma ndéve.

3Upépe, umi Moisés rembiapoukapy mbo'eha he'i ipy'apýpe: “He'i'ỹ vaerã niko he'i. Ojahéi niko Tupãre ku hendaguépe oĩrõ guáicha.” 4Ha Jesús ohecha kuaágui mba'épa he'i hína hikuái, he'i chupe kuéra:

—Mba'ére piko ivaíva pembojere peína pene akãme? 5Mba'épa ndahasyive ja'e ko kuimba'épe: “Ojeheja reíma ndéve ne angaipa”, térãpa “Epu'ã ha eguata”? 6Néi, ahechaukáta peẽme ko'ágã che, yvypóraicha aju vaekue, ikatuha aheja reívo iñangaipa oimeraẽvape ko yvy ári.

Ha upévo he'i pe ijapávape:

—Epu'ã. Ehupi nde rupa ha tereho nde rógape.

7Upépe pe ijapáva opu'ã, ha oho hógape. 8Ohechávo upéva, oñemondyipa opavave ha omomba'e guasu Tupãme ha'e ome'ẽ haguére yvypórape peichagua pu'aka.

Jesús ohenói Matéope

(Mc 2.13-17; Lc 5.27-32)

9Jesús oho upégui, ha ohasakuévo viru oñeme'ẽháme Roma peguarã ypy rupi, ohecha peteĩ kuimba'e hérava Mateo oguapýva hína upépe. He'i chupe:

—Eju che moirũ.

Mateo opu'ã ha oho hendive.

10Ha Jesús oguapy jave mesápe, Mateo rógape, ou oguapy Jesús ha hemimbo'e kuéra ndive umi viru ombyatýva Rómape guarã, ha heta herakuã vaíva avei. 11Fariséo kuéra ohechávo upéva he'i Jesús remimbo'e kuérape:

—Mba'éicha rupi piko pene mbo'ehára oguapy okaru viru mbyatyha ha iñangaipáva ndive?#Lc 15.1-2.

12Jesús ohendu upéva ha he'i chupe kuéra:

—Hesãiva noikotevẽi pohãnohárare, hasývante. 13Tapeho peikuaa mba'épa Tupã he'ise raka'e iñe'ẽme he'írõ: “Che aipota peiporiahurereko pende rapichápe, pemymbajuka*f** rangue chéve.”#Os 6.6; Mt 12.7. Che ndajúi ahenóivo heko jojávape, hembiapo vaívapente.

Tupãme ñamomba'e guasu haguã ndaja'úi jave mba'eve

(Mc 2.18-22; Lc 5.33-39)

14Upéi Juan Bautista remimbo'e kuéra oñemboja Jesús rendápe, ha oporandu chupe:

—Fariséo kuéra ha ore ave, niko rohasa jepi ára ro'u'ỹre mba'eve. Mba'ére piko ne remimbo'e kuéra ndaupéichai?

15Jesús he'i chupe kuéra:

—Peẽ piko peimo'ã peteĩ omenda ramóva irũ nguéra oñembyasytaha ha'e oĩ aja hendive kuéra imendahápe? Nahániri. Ágãnte oguahẽne ára ipore'ỹvo ha'e, ha upépe katu ohasáne ho'u'ỹre mba'eve.

16Avave niko nombovyvýi ao pehẽngue pyahu ao tujáre. Pe ipyahúva oñyñýine ha omondoro jeýne pe itujáva, ha upekuévo omondoro tuichave. 17Kaguy pyahu niko noñembohyrúi kaguy ryru*f** tujápe. Péicha ojejapórõ umi kaguy ryru osoróne ha oñehundíta pe kaguy ha umi hyru. Upévare, kaguy oñembohyru vaerã kaguy ryru pyahúpe, ha péicha mokõivéva oiko aréta oñembyai'ỹre.

Jairo rajy ha kuña opoko vaekue Jesús aóre

(Mc 5.21-43; Lc 8.40-50)

18Jesús oñe'ẽ aja chupe kuéra hína, oguahẽ hendápe peteĩ myakãhára judío kuérava. Oñesũ henondépe ha he'i chupe:

—Che rajy niko omano ramoite. Nde reho ramo remoĩ nde po hi'ári, oikove jeýta.

19Jesús opu'ã ha oho hendive, ha hemimbo'e kuéra ndive. 20Peteĩ kuña katu, hasýva ojapóma 12 áño ha huguy mantéva, oñemboja Jesús rehe hapykue guio ha opoko ijao ruguáire. 21Pe kuña niko he'i ipy'apýpe: “Ijao rehénte jepe apokórõ, akueráta.” 22Jesús katu oñembojere, ha ohechávo pe kuñáme he'i chupe:

—Néike, che rajy. Che rehe rejerovia haguére rekuera.

Ha upepete pe kuña okuera.

23Ha oguahẽvo Jesús pe myakãhára rógape, ohecha umi mimby mbopuha oñembosako'íva ñeñotỹrã ha hetápe ojahe'o joáva. 24He'i chupe kuéra:

—Pesẽmba ko'águi. Ko mitãkuña niko nomanói, okénte hína.

Ha opukapa hese hikuái. 25Omosẽmba rire opavavépe, Jesús oike pe mitãkuña oĩháme. Ipojái ipóre ha upévo pe mitãkuña opu'ã. 26Ha opa upe jerekuévo herakuã pe ojehu vaekue.

Jesús omonguera mokõi ohecha'ỹvape

27Jesús osẽvo upégui oho haguã, osẽ hapykuéri mokõi ohecha'ỹva, osapukáiva chupe:

—Ore poriahurerekomína, nde David ra'y!

28Ha oike rire Jesús hógape, oguahẽ hendápe umi ohecha'ỹva. Ha Jesús oporandu chupe kuéra:

—Peroviápa che ikatuha pomonguera?

Ha'e kuéra he'i chupe:

—Roguerovia, ore Jára.

29Upévo Jesús opoko umi hesáre, ha he'i:

—Toiko upe peẽ perovia haguéicha.

30Ha okuera umi hesa ha ohecha porã jey. Jesús he'i jey-jey chupe kuéra:

—Aníke avave oikuaa kóva.

31Ha'e kuéra katu, osẽmi vovénte upégui, opa rupi omoherakuã upe Jesús ojapo vaekue hese kuéra.

Jesús omoñe'ẽ iñe'ẽngúvape

32Umi ohecha'ỹa osẽ aja, ojegueru Jesús rendápe peteĩ kuimba'e iñe'ẽngúva, mba'epochy oguerekógui chupe ipoguýpe. 33Ha Jesús omosẽvo chugui pe mba'epochy, pe iñe'ẽngúva oñepyrũ oñe'ẽ. Ha opavave oñemondyipa ha he'i:

—Araka'eve ndajahecháiva mba'eve peichagua Israélpe.

34Umi fariséo katu he'i:

—Umi mba'epochy ruvicha voi niko hína pe ohejáva chupe omosẽ umi mba'epochýpe.#Mt 10.25; 12.24; Mc 3.22; Lc 11.15.

Jesús oiporiahurereko opavavépe

35Upéi Jesús ohasa oikóvo peteĩ távagui ambuépe. Ha mamo oĩháme itupao kuéra, upépe ha'e oporombo'e. Omoherakuã avei marandu porã Tupã sãmbyhyha ára rehegua, ha omonguera opaichagua hasývape.#Mt 4.23; Mc 1.39; Lc 4.44. 36Ha ohechávo hetaha umi ijatýva, tuicha oiporiahurereko chupe kuéra. Ohecha kuaa, ha'e kuéra ikane'õ ha ikangypaha ku ovecha herekua'ỹvaicha.#Nm 27.17; 1 R 22.17; 2 Cr 18.16; Jer 50.6-7; Ez 34.5; Zac 10.2; Mc 6.34. 37Ha he'i hemimbo'e kuérape:

—Ajépa tuicha pe kokue ha heta hi'a, omono'õ vaerãnte mbovy. 38Upévare, pejerure pe kóga járape tombou umi ou vaerãme omono'õ.#Lc 10.2.

موجودہ انتخاب:

San Mateo 9: GPC2006

سرخی

شئیر

کاپی