San Mateo 8

Jesús omonguera peteĩ ijaipávape

(Mc 1.40-45; Lc 5.12-16)

1Jesús oguejy yvytymígui ha heta umi ohóva hapykuéri. 2Oñemboja hendápe peteĩ kuimba'e ijaipáva, ha oñesũ henondépe ha he'i chupe:

—Che Jára, nde reipotárõ che mongueráne che mba'asýgui.

3Jesús opoko hese ha he'i chupe:

—Aipota. Ekuera!

Ha upepete, ojei chugui ikuru vai, ha okuera. 4Ha Jesús he'i chupe:

—Aníke emombe'u avavépe. Tereho uvei ejehechauka pa'ípe, ha eikuave'ẽ Ñandejárape umi mba'e Moisés he'i vaekue oñekuave'ẽ vaerãha,#Lv 14.1-32. ojehecha haguã rekueramaha.

Jesús omonguera Roma ñorãirõhára ruvicha rembiguáipe

(Lc 7.1-10)

5Jesús oikévo táva Cafarnaúmpe, peteĩ mburuvicha Romagua oñemboja hendápe. Ojerure Jesúspe oipytyvõ haguã chupe 6he'ívo:

—Karai, che rembiguái niko oime ógape. Ijapapaite ha oñeno hasyete.

7Jesús he'i chupe:

—Aháta amonguera chupe.

8Pe ñorãirõhára ruvicha katu he'i:

—Karai, máva piko che, nde reike haguã che rógape? Eréntena okuerataha, ha che rembiguái okueráta. 9Che niko aĩ mburuvicha poguýpe, ha areko avei che po guypegua. Ha peteĩme ha'érõ oho haguã, upéva oho. Ambuépe ha'érõ ou haguã, upéva ou. Ha ha'érõ che rembiguáipe ojapo haguã ha'éva, ojapo.

10Jesús ohendúvo upéva tuicha oguerohory, ha he'i umi hendive oĩvape:

—Añetehápe ha'e peẽme, Israelgua kuéra apytépe jepe ndajuhúiva peichaite peve ojeroviáva Tupãre. 11Ha ha'eve peẽme: Heta oĩ oútava kuarahy resẽ guio ha kuarahy reike guio ha oguapýtava mesápe Abraham, Isaac ha Jacob ndive pe karu guasúpe oikótava Tupã oporosãmbyhy vove yvágape.#Lc 13.29. 12Umi oĩ vaerã mo'ã vaekue upépe katu, oñemosẽta okápe pytũmbýpe. Ha upépe ojahe'o soróta ha hãi mante omopururũta.#Mt 22.13; 25.30; Lc 13.28.

13Upéi Jesús he'i pe ñorãirõhára ruvichápe:

—Tereho nde rógape, ha upe rerovia haguéicha toiko ndéve.

Ha upepete okuera pe hembiguái.

Jesús omonguera Pedro rembireko sýpe

(Mc 1.29-31; Lc 4.38-39)

14Jesús oho Pedro rógape ha upépe ojuhu Pedro rembireko sýpe oñenóva tupápe, iñakãnundúgui. 15Ha opokóvo ipóre, pe akãnundu opi chugui. Upépe ha'e opu'ã ha oñemoĩ ohecha mba'épa Jesús oikotevẽ.

Jesús omonguera heta hasývape

(Mc 1.32-34; Lc 4.40-41)

16Ha oguahẽvo pyhare, ojereraha Jesús rendápe heta oĩva mba'e pochy poguýpe. Iñe'ẽmente Jesús omosẽ umi mba'epochy ha omonguera avei opa hasývape. 17Kóicha ojehu, oiko haguã hekoitépe maranduhára Isaías kuatiañe'ẽ he'íva: “Ha'e oipe'apa ñande hegui ñane mba'asy ha ogueraha opa mba'e hasýva ñandéve.”#Is 53.4.

Umi omoirũsẽva Jesúspe

(Lc 9.57-62)

18Jesús ohechávo ojerepaha hese opavave, he'i hemimbo'e kuérape ombohasa haguã chupe yguasu mboypýri. 19Ha peteĩ Moisés rembiapoukapy mbo'eha oñemboja Jesús rendápe ha he'i chupe:

—Mbo'ehára, che romoirũta mamo rehohápe.

20Jesús he'i chupe:

—Aguara'i niko oguereko ikeha, ha guyra kuéra hupa. Che, yvypóraicha aju vaekue katu, ndarekói mamo ambojeko haguã che akã.

21Peteĩ hemimbo'e kuérava katu he'i chupe:

—Che Jára, che rejána taha raẽ tañotỹmi che ru.#Tob 4.3-4.

22Jesús katu he'i chupe:

—Eju katu che moirũ. Eheja umi omanómava toñotỹ umi omanóvape.

Jesús omombi yvytu ratã

(Mc 4.35-41; Lc 8.22-25)

23Jesús ojupi peteĩ kanóape ha hemimbo'e kuéra oho hendive. 24Ha peichaháguinte, oipeju pe yguasúpe peteĩ yvytu ne ratãva, ha pe y pochy oikepa pe kanóape. Jesús katu oke hína. 25Upépe hemimbo'e kuéra omombáy Jesúspe ha he'i chupe:

—Ore Jára, ore pytyvõmína. Ja'yguy niko ñaína. 26Jesús katu he'i chupe kuéra:

—Mba'ére piko peichaite peve pekyhyje? Pejerovia'i eterei niko Tupãre.

Upépe Jesús opu'ã ha oñembo'y. Oja'o pochy pe yvytu ha pe ýpe, ha opi pe yvytu ha oguapy pe y. 27Hemimbo'e kuéra katu oñemondyipa ha oporandu ojupe:

—Mávatepa kóva, ko yvytu ha yguasu jepe iñe'ẽ rendúva chupe?

Gadaragua oikóva mba'epochy poguýpe

(Mc 5.1-20; Lc 8.26-29)

28Jesús oguahẽvo yvy hérava Gadárape, oĩva yguasu mboypýri, mokõi kuimba'e osẽ umi tyvy pa'ũgui ha ohuguãitĩ chupe. Umi mokõi oĩ mba'epochy poguýpe, ha ndaipóri upe rupi ohasáva chugui kuéra. 29Hatã osapukái hikuái ha he'i:

—Aníke rejapo ore rehe mba'eve, Tupã Ra'y. Reju piko ore mbohasa asývo ára paha oguahẽ mboyve?

30Namombyrýi upégui oĩ heta kure okarúva hína, 31ha umi mba'epochy he'i Jesúspe:

—Ore mosẽtarõ, eheja oréve toroike umi kure retepýpe.

32Ha Jesús he'i chupe kuéra:

—Tapeho.

Ha umi mba'epochy osẽ umi kuimba'égui ha oho oike umi kure retepýpe. Upepete, hetakue umi kure oho ojepoi ýpe, ha upépe omanomba.

33Umi kure rerekua katu pya'e oho ha omombe'u opa mba'e itávape, ha mba'épa ojehu umi kuimba'épe, mba'epochy poguýpe oiko vaekuépe. 34Ha tavagua maymáva osẽ oho Jesús rendápe. Ha oguahẽvo ha'e oĩháme, ojerure asy hikuái chupe oho haguã upégui.

موجودہ انتخاب:

San Mateo 8: GPC2006

سرخی

شئیر

کاپی