Lukas 21
21
Okuyamba kwomuhepe
(Mark. 12:41-44)
1 Jesus hiaa yumbu omeho, wa mona ovahona himava twaa mo motjikasa mumu tuwa mbimavi yambwa. 2Iya wa mona wo omuhepe omuthona ngwaa twaa mo oumbongo uvali. 3Iya we ve heela ha tyaa: “Me mu heele otjatjili: Omuhepe hengu omuthona wa twaa mo otjin̯ingi okupon̯a ovantu avehe. 4Iya ovantu avehe va twaa mo mbyoka ovyomovihupe vyawo, iya ye mouthona we, wa twaa mo atjihe hiaa li natjo.”
Jesus ma popi ehan̯auno lyotempeli
(Mat. 24:1-2; Mark. 13:1-2)
5Ovantu vamo va popya ouhunga notempeli hiya undwa nomawe ngee thewa novipuka mbyaa yandjwa otjali kuKalunga. Jesus we ve heela ha tyaa: 6“Omatango ngamae ya, ovipuka hembi mbimamu tala, kaape ke thiwa ewe ndyaa tendekwa kekwawo, háli kumuninwe po.”
Jesus ma popi omatangan̯eko ehulilo lyouye
(Mat. 24:3-14; Mark. 13:3-13)
7Iya wo ve mu pula hava tyaa: “Mulongethi, ovipuka hembi mavi ka ningwa nalun̯i? Iya etangan̯eko mali ka kala olyatji okutya hembi mavi ka ningwa?”
8 Jesus we ve heela ha tyaa: “Lungamen̯i, ahamamu pukithwa, iya ovantu ovengi mave ke ya nena lyandje, wo have lityaa: ‘Aame,’ vamo hava tyaa: ‘Otembu ye thiki.’ Iya hámu ve landula. 9Iya andaa mwa ka tyaa ovita nodhondjaya, hámu tila, mena lyokutya hembi vi tha okutenga, atjaa ehulilo kaliye ya.”
10Iya we ve heela ha tyaa: “Otjiwan̯a matji ka lwitha otjiwan̯a otjikwawo, notjilongo matji ka lwitha otjilongo otjikwawo. 11Pomaluvedhe nomaluvedhe ohi mai ka teketa unene, maku ke ya ondjala nomitjithi vyovintimba. Keulu maku ka kala omatangan̯eko omanene ngamaa tilitha. 12Iya ovipuka mbyoka tainkolo háviya ningwa, mave ke mu kambula, have mu taata. Mave ke mu twala modhosinagoga, have ke mu yedhilila mouliwoso, have mu twala kovipala vyodhohamba novyovatumini mena lyandje. 13Hehi matji mu pa oluvedhe mu ninge odhombangi dhokuntjipulula kuwo. 14Iya omitima vyen̯i hávi kala notjiho okutya mamu ke lipopila vi.#Luk. 12:11-12 15Iya ame me ke mu pa himamu ka popya, nounongo mboka mbuhamau ulu okutethwa ombata, odhondjedhi dhen̯i adhihe madhi ka anyenwa oku mu yaka ne oku mu tetha ombata. 16Mamu ka welelekwa kovanene ven̯i, kovakulwen̯i, kovanitjen̯i, koven̯i nokomapanga en̯i, mu ka kambulwe, navamo owomun̯e mave ke mu dhipaetha. 17Ovantu avehe mava ka kala ave mu yele mena lyandje. 18Komitwe vyen̯i kaaku ka keka ondjutji noimo. 19Amamu likambulithile, mamu ka nganyana omwenyo.
Jesus ma popi ehan̯auno lyaJerusalem
(Mat. 24:15-21; Mark. 13:14-19)
20“Iya himamu ka mona Jerusalem atja kondolokwa kovilombo vyovakwavita, iya tji iwen̯i okutya ehan̯auno lyatjo lye thiki. 21Iya mboka mbave li moJudea ngava inkolele kodhondundu. Mboka mbave li moJerusalem, ngava dhe mo, namboka mbave li kotjila tjaJerusalem, háva hiti mo, 22iya omatango ngoka ooluyuma okuhwithila po omisonekwa avihe.#Hos. 9:7 23Utatyei ovat̯imba novamwali pomatango ngoka! Oudheu ounene mau kala kombanda yohi, noluyuma kotjiwan̯a hehi. 24Iya mava ka dhipawa nomukonda, wo hava ka kambulwa, hava ka twalwa moupika koviwan̯a avihe, noviwan̯a mavi ka lyata Jerusalem, katee omatango oviwan̯a mbyoka maa hulu.
Okuya kwOmuna wOmuntu
(Mat. 24:29-31; Mark. 13:24-27)
25“Omatangan̯eko maa ka moneka metango, momwedhi nomodhonyothi. Ovantu avehe kombanda yohi mava ka kala nomahundjuwoma, wo hava ka tilithwa kokupopya kwelunga nokomakuthikuthi alyo.#Jes. 13:10; Hes. 32:7; Joel 2:31; Ehol. 6:12-13 26Ovantu mokukevelela ovipuka mbyoka mbimavi vadha ohi, mava ka t̯a omukanku kowoma, mena lyokutya odhonkono dhomeulu madhi ka teketethwa. 27Iya mava ka mona Omuna wOmuntu ame ya mekaka, ae na odhonkono netumbalo enene.#Dan. 7:13; Ehol. 1:7 28Iya hembi himavi ka uta okuningwa talen̯i peulu, mu yele omitwe vyen̯i, mena lyokutya ehupitho lyen̯i lya hweene popedhi.”
Eeli lyomukuyu
(Mat. 24:32-35; Mark. 13:28-31)
29 Jesus we ve heela eeli hendi ha tyaa: “Talen̯i omukuyu nomiti avihe. 30Iya ovitho avya eta oluhapo, mu tji i okutya ovintola vi li popedhi. 31Iya nan̯e wo amamu mono ovipuka hembi amavi ya, iwen̯i okutya otjilongo tjaKalunga tje ya popedhi.
32“Me mu heele otjatjili, ekula hendi kaali hulu, tainkolo ovipuka hembi avihe háviya ningwa. 33Eulu nohi mavi hulu, iya odhondaka dhandje kaadhi hulu.
Kalen̯i amwa pathumuka
34“Iya liyungen̯i, omienyo vyen̯i hávi ulithwa komalyaalyo nokepyalu nokounkolwe nokotjiho tjovikulya, etango ndyoka ahamali mu vadha ontukuluka ngomoo. 35Iya mali ka vadha ovantu avehe kombanda yohi aihe. 36Iya apehe kalen̯i amwa pathumuka n̯e mu kumbe, opo mu mona odhonkono okuyepa ovipuka mbyoka avihe mbimavi ka ningwa, nokukulama ontali kotjipala tjOmuna wOmuntu.”
37 Jesus komutenya u longa ovantu motempeli, iya out̯iku u ya kondundu ndjii tiwa oyOmiholivi.#Luk. 19:47 38Ovantu avehe va li ava pita omuhuka, hava i kotempeli oku mu teelela.
موجودہ انتخاب:
Lukas 21: DBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Dhimba New Testament © Bible Society in Namibia, 2010.
