Lukas 20
20
Jesus ma pulwa etumino lye
(Mat. 21:23-27; Mark. 11:27-33)
1Etango limo Jesus hiaa li motempeli ama longo ovantu nokuteetha ondaka ombwa, ovayambethi ovanene novalongiveta pamo novanene wotjiwan̯a ve ya mo, 2have mu pula hava tyaa: “Tu heela okutya ovipuka hembi u vi ninga ketumino patji? Ne aan̯i ngwee ku pa etumino okutya u ninge ovipuka hembi?”
3Jesus we ve yaka ha tyaa: “Naame wo me mu pula epulo limo, ntjeela ndjen̯i okutya 4etjatjo lyaJohannes lya dha meulu ne omovantu?”
5Wo va tompola puwo ovene hava tyaa: “Nditwa tyaa: ‘Omeulu,’ mpe me tu pula okutyaa: ‘Omena lyatji hihamu mu itavelele?’ 6Iya nditwa tyaa: ‘Lya dha movantu,’ ovantu avehe mave tu dhipaa nomawe, mena lyokutya wo va itavela okutya Johannes wa li omuprofeti.” 7Iya wo va yaka Jesus hava tyaa: “Katu tji i.”
8Jesus we ve yaka ha tyaa: “Naame híme mu heele okutya ovipuka hembi ndji vi ninga ketumino patji.”
Omaeli otjuundo tjomivinyu
(Mat. 21:33-46; Mark. 12:1-12)
9 Jesus wa uta okuheela ovantu eeli hendi ha tyaa: “Kwa li omulumentu umo ngwaa twikile omivinyu motjuundo tje, ha undike mo ovantu, tjau ye ha ka valula olule kovilongo vyokokule.#Jes. 5:1 10Otembu yokupya hiye thiki, omwene wotjuundo wa tuma omupika we kumbava undikwa otjuundo, ve mu pe ovinyango mbyaa thele okupewa. Iya ovaundikwa ve mu tona, have mu tjun̯a ae li omawoko anyahinya. 11Iya omwene wotjuundo wa tuma ko uke omupika umo, iya ngoka ve mu tona, have mu t̯itha ohon̯i navi, have mu tjun̯a ae li omawoko anyahinya. 12Wa tuma ko uke omutyatatu. Nguka ve mu tona, have mu topola oviwalo, have mu yundulile pondje. 13Omwene wotjuundo tjomivinyu wa popya ha tyaa: ‘Me ningi vi? Me tumu ko omunwandje omuhivilikwa, pamo mave ke mu tumbaleka.’ 14Ovaundikwa hive mu mono, va tompola hava tyaa: ‘Hengu oye e li ompinga, tu mu dhipaen̯i, epingo li ninge po olyetu.’ 15Wo ve mu yumba kotjila tjotjuundo, have mu dhipaa.
“Iya omwene wotjuundo me ve ningi vi? 16Me ke ya, ha han̯auna po ovaundikwa mboka, notjuundo tjomivinyu he tji pa po vamo.”
Ovantu hive tji tee, hava tyaa: “Aai, kaatji ningwa.”
17Jesus we ve tala ha tyaa: “Iya atjaa odhondaka hendhi madhi tya vi, ndhimadhi tyaa:
‘Ewe ndyoka ovatungi ndiva yekelahi,
lya ninga ewe ndyaa tumbala okupon̯a omawe aehe’?#Eps. 118:22
18Auhe ngoka nguma putala mewe ndyoka, ma teka, nangoka nguma li wile, mali mu nyanyauna.”
Okuyandja elilimo komukesari
(Mat. 22:15-22; Mark. 12:13-17)
19 Ovalongiveta novayambethi ovanene va li amava hala okukambula Jesus powola yatjo tuu ndjoka, mena lyokutya va iwa okutya owo a li ama popi meeli hendi, atjaa va tila ovantu. 20Ve mu vandela, hava tumu ko ovatjungili, mbave lininga ovavyuuki, opo ve mu tele mondhondaka dhe, wo ve tjiiwe oku mu yandja modhonkono nometumino lyomutumini. 21Ovatjungili va heela Jesus hava tyaa: “Mulongethi, tu tji i okutya u popya, ove u longa otjatjili, ove ku tala otjipala tjomuntu, u longa ondjila yaKalunga otjatjili. 22Tja vyuuka tuu okuyandja elilimo komukesari ne hatjo?”
23Jesus hiaa nongonoka okuliningitha kwawo, we ve heela ha tyaa: 24“Ndjulikila ndjen̯i ondenari. Ethano nesoneko ndii li ko, olyaan̯i?”
Wo hava tyaa: “Olyomukesari.”
25Iya we ve heela ha tyaa: “Iya ovipuka vyomukesari vi pen̯i omukesari, ovyaKalunga vi pen̯i Kalunga.”
26Iya wo kave tjiivilwe oku mu tela modhondaka dhe movipathi vyovantu. Ve kuminwa okuyaka kwe, wo hava nyimi vala.
Okwiimuka kout̯e
(Mat. 22:23-33; Mark. 12:18-27)
27 Ovasadukai vamo, mbava tya kaku na tja eimuko kout̯e, ve ya kuJesus, have mu pula#Ovil. 23:8 28hava tyaa: “Mulongethi, Moses we tu sonekela hinyahi okutyaa: ‘Andaa pe na omulumentu, ngwee thiwa po komukulwe omulumentu ne komunitje omulumentu, ha thii po omuhepe, atjaa omulumentu hengu ahama thii po odhondele, okutya nga kupe omuhepe womukulwe ne womunitje, a yumukile omukulwe ne omunitje oluyumuko.’#Deut. 25:5 29Iya kwa li ovalumentu ovalilanduli epanduvali. Owolutenga wa kupile omukadhintu, hiaa t̯i, ka thiile po odhondele. 30Iya omutyavali wa kupa omuhepe, hiaa t̯i, ka thiile po odhondele. 31Iya omutyatatu naye wo wa kupa omuhepe, hiaa t̯i, ka thiile po odhondele. Iya avehe epanduvali mbave mu kupile va ka t̯a, ahamava thiile po odhondele. 32Omuhepe kon̯ima naye wo wa ka t̯a. 33Iya peimuko kout̯e, ma ka kala omukadhintu waan̯i, mena lyokutya avehe epanduvali ve mu kupile?”
34Jesus we ve heela ha tyaa: “Ovantu womouye hembu va kupa, wo hava kupwa. 35Iya mboka mbave thevelwa okwiimunwa kout̯e nokuya mouye mbumau ya, kaava ka kupa, wo kaava ka kupwa. 36Iya kaava ka t̯a uke, mena lyokutya va ngala ovaengeli, wo odhondele dhaKalunga, mena lyokutya va imunwa kout̯e. 37Iya Moses we tji yulika okutya ovat̯e mava ka imunwa kout̯e, mena lyokutya motjihipululo tjeno me mu ithana ama tyaa: ‘Muhona oye e li Kalunga kaAbraham naKalunga kaIsak naKalunga kaJakob.’#Eks. 3:6 38Ye haKalunga kovat̯e,#20:38 ovat̯e: Ovat̯e mboka mbahave thi ovaKalunga, owomboka vala mbahave mu itavelele. iya okovanamwenyo, mena lyokutya avehe ve na omwenyo muye.”
39Vamo owomovalongiveta va yaka hava tyaa: “Mulongethi, wa popi nawa.” 40Kapa li noumo ngwaa li ama hala oku mu pula uke omapulo.
Messias, omunwaan̯i?
(Mat. 22:41-46; Mark. 12:35-37)
41 Jesus wa pula ovalongiveta ha tyaa: “Mava tile tji Messias omunwaDavid? 42David omwene momisonekwa vyOmapisalomi ma tyaa:
‘Muhona wa heela Muhona wandje ha tyaa:
Kala pohi kokulyo kwandje#Eps. 110:1
43katee me ningi odhondjedhi dhoye otjilyatelo tjodhompadhi dhoye.’
44David u mu ithana ‘Muhona,’ ma ile vi uke omuna?”
Lungamenen̯i ovalongiveta
(Mat. 23:1-36; Mark. 12:38-40)
45Tainkolo ovantu avehe va li amava teelele, Jesus wa heela ovalongwa ve ha tyaa: 46“Lungamenen̯i ovalongiveta, mbave hole okudhala omidhalo omile, wo ve hole okupopithilwa pomalandethelo. Ve hole kovipundi vyokomeho modhosinagoga nopomalukalo ngaa tumbala movipito. 47Va nyeka ovahepe odhonganda dhawo, wo hava ningi omaalikano omale okulimoneketha vala. Ovantu mbave li nyahoka mava ka pewa onkali onene.”
موجودہ انتخاب:
Lukas 20: DBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Dhimba New Testament © Bible Society in Namibia, 2010.
