متا ۶
۶
آمؤختٚن در موردٚ صدقه فأدأن
1 «شیمی حواس بمأنه، شیمی خورومٚ کأرأنَ مردومٚ ورجأ، اَ قصد و نیّتٚ اَمرأ انجأم ندید کی شٚمٚره بیدینٚد و آفرین بٚگد، چونکی اَطؤیی شیمی آسمأنی پئرٚ ورجأ پأدأش نأریدی. 2 هر زمأت کی ایتأ فِقِرَ یاور دیهی، ریأکأرأنٚ مأنستَن انجأم نٚوأدأن، اوشأنی مأنستَن کی کنیسه و کوچه و بأزأر دورون جأر زنٚده کی مردوم اوشأنَ آفرین بٚگد. رأس‌رأسِی شٚمٚره گم کی اَشأن خوشأنٚ اوجرٚتَ تومأم و کمأل مردوم جَا فأگیفتده. 3 ولی هروخت کی اینفرَ صدقه فأدی، ولأن حتّا تی چپٚ دٚس او کأرٚ جَا کی تی رأستٚ دٚس کونه، وأخٚوٚرَ به، 4 کی تی خُبی خلوتی میأن بمأنه. بأزون تی آسمأنی پئر کی خلوتی کأرأنَ دینه، تٚرَه پأدأش فأدِه.
آمؤختن دروأره‌یٚ مسیحی روزه و دوعأ
5 «اَسه دوعأ کودنٚ رِه. هر وخت دوعأ کودأندری، ریأکأرأنٚ مأنستَن نوأبوستن کی دوس دأرٚده مردومٚ ورجأ، خیأبأنأنٚ کنأر گوشٚه و کنیسه‌یأنٚ میأن دوعأ بوکونٚد، کی همٚتأ آدمأن اَشأنَ بیدینٚد. حِئقت گم، اَشأن خوشأنٚ پأدأشَ تومأم و کمأل مردومٚ جَا فأگیفتده. 6 ولی هر وخت کی دوعأ کودأندری، تی اوتاقٚ دورون بوشؤ و دٚرَ دٚوٚد، و دیلٚ خلوتی دورون، پئرٚ حوضور دوعأ بوکون. بأزون تی آسمأنی پئر کی خلوتی کأرأنٚ دینه، تٚرَه پأدأش فأدِه.
7 «او وخت کی دوعأ کودأندریدی، اوشأنٚ مأنستَن کی رأس‌رأسِی خودایَ نشنأسٚده، بیخودی ویردأنَ تکرار نوکونید. اَشأن خیأل کونٚده کی خٚیلی تکرار کودنٚ اَمرأ، اَشأنٚ دوعأ قوبیل به. 8 شومأن اوشأنی مأنستَن نیبید، چٚره کی شیمی آسمأنی پئر خُب وأخٚوٚره کی چی ایحتیأج دأریدی، حتّا پیشتر جٚه اَنکی جٚه اونٚ بٚخأیید.
9 «پس شومأن اَطؤیی دوعأ بوکونید:
«"اَی اَمی پئر کی آسمأنٚ دورون ایسأیی،
تی نأم موقدس بٚبه.
10 تی پأدیشأیی بأیِه.
تی ایرأده هوطؤیی کی آسمأنٚ دورون انجأم بِه، زیمینٚ سٚرم انجأم بٚبه.
11 اَمی هر روجٚ نأنَ اَمٚرَه فأدٚن.
12 اَمی گونأیأنَ بٚبٚخش، هوطؤیی کی اَمأن اوشأنَ کی اَمی حق گونأ کونٚده، بٚخشیمی.
13 و ولأن کی وسوسه جَا تسلیم بیبیم، بلکی اَمٚرَه او شریرٚ جَا نیجأت بٚدٚن.
چونکی پأدیشأیی و قودرت و جلال تأ اَبد تی شین ایسه. آمین!"
14 «اگه اوشأنَ کی شیمی حق گونأ کونٚده بٚبٚخشید، شیمی آسمأنی پئرم شٚمٚره بخشه. 15 ولی اگه البأقیأنٚ گونأیأنَ نٚبٚخشید، شیمی پئرم شیمی گونأیأنَ نٚبٚخشه.
16 «هروخت روزه دأریدی، ریأکأرأنٚ مأنستَن شٚمٚره به نما نأوٚرید، چونکی سعی کونٚده خوشأنٚ سرٚکله‌یَ پریشأن و دورشین وأرشین نیشأن بٚدٚد کی مردوم اوشأنی روزه دأشتٚنٚ وأسی اوشأنَ تِشویق بوکوند. رأس‌رأسِی شٚمٚره گم کی اَشأن خوشأنی پأدأشَ تومأم و کمأل فأگیفتده. 17 ولی او وخت کی تو روزه دأری، تی سٚر و دیمَ تیمیزٚ و مورتبَ کون، 18 کی هیکس تی روزه دأشتنٚ جَا وأخٚوٚرَ نٚبه جغرز تی پئر کی نشأ اونَ دِئن؛ و اون جٚه اوچی کی تی خلوتی دورون کونی وأخٚوٚر ایسه، و تٚرَه پأدأش فأدِه.»
آمؤختن دروأره‌یٚ مأل و مینألٚ
19 «شیمی گنجَ اَ زیمینٚ دورون تیلنبأرَ نوکونید، او جیگأ کی کلم و زنگأل اونَ صدمه زٚنِه، و دوزدأن نقب زنٚده و اونَ دوزدأنٚده. 20 شیمی گنجَ آسمأنٚ دورون تیلنبأرَ کونید، او جیگأ کی نه کلمَ کونه و نه زنگأل تأنه اونَ خرأبَ کونه، و دوزدأنٚم نقب نٚزٚنده و اونَ نودوزدأنٚد. 21 تی گنج هر جیگأ بمأنه، تی دیلٚم هویه نٚهأ.
22 «تی چوم ایتأ چرأغ ایسه کی تی جأنٚ سویَ فرأهم کونه. اگه تی چوم سألیم بٚبه، تومأمٚ تی جأن سوسو زٚنِه. 23 ولی اگه تی چوم نأخوش بٚبه، تومأمٚ تی جأن تأریکی دورون غولطه خوره. پس اگه او نورٚ سو کی گومأن کونی تی دورون نٚهأ، رأس‌رأسِی تأریکی بٚبه، چی جولفٚ تأریکی‌یی ایسٚه!
24 «هیکس نتأنِه دو تأ اربابَ خیدمت بوکونه، چونکی یا جٚه ایتأ نیفرت دأره و اویتأیَ مهرٚوأنی کونه، و یا ایتأ رِه خو جأنَ فأدِه و اویتأیَ خأر و خفیف دأنِه. هطؤیٚم نتأنیدی هم خودا رِه بنده بیبید و هم مأل و مینألٚ بنده.»
آمؤختن دروأره‌یٚ زٚندیگی نیگرأنیأنٚ
25 «پس می اَندرز، اَنه کی شیمی دونیأ دو روجٚ رِه نیگرأن نیبید، کی بوخور وأخور و لیوأس شٚمٚره وٚسته یا نه. زٚندیگی جٚه خوردن و جأن جٚه لیوأس دوکودن ینی ویشتر نی‌اَرزِه؟ 26 پرنده‌یأن فأندٚرید، نه کأرٚده، نه دیبینٚده، و نه تیلنبأرٚ دورون جمَ کونٚد، چونکی شیمی آسمأنی پئر اوشأنٚ روزی‌یَ فأرٚسأنه. ینی شومأن اوشأنی جَا ویشتر نی‌اَرزیدی؟ 27 ینی تومأمٚ شیمی نیگرأنیأن تأنه ایتأ لحظه شیمی عمرَ زیأدَ کونه؟
28 «چٚره شیمی رخت و لیوأسٚ رِه نیگرأنیدی؟ صأرأ گولأنَ فأندٚرید کی چوطؤ روشد کونٚده. اوشأن نه کأر کونٚده و نه خوشأنٚ رِه لیوأس دوجٚده. 29 شٚمٚره گم کی سولیمأن تومأمٚ خو شوکو و جلالٚ اَمرأیم، هیوخت اوشأنٚ مأنستَن قشنگٚ لیوأس خو جأن دونکوده. 30 پس اگه خودا صأرأ گولأنَ کی ایمرو ایسأده و فردأ آتش کومه میأن تأوٚدأ بٚده فیکرَ کونه، چندر ویشتر، اَی کم ایمأنأن، شیمی فیکر ایسه.
31 «پس اَجور چیأنٚ رِه نیگرأن نیبید و نیگید چی بوخوریم یا چی وأخوریم یا چی دوکونیم. 32 چونکی بی‌ایمأنأن اَ چیأنٚ وأسی غورصه خورٚده، ولی شیمی آسمأنی پئر جٚه قبل دأنِه کی اَشأنَ ایحتیأج دأریدی. 33 پس اوّل شومأن، خودا پأدیشأیی و عیدألتٚ دونبأل بیبید، و اون همٚتأ دأنه شیمی ایحتیأجأنَ شٚمٚره موهیأ کونِه.
34 «پس، فردأ رِه نیگرأن نیبید، چونکی فردأ خو نیگرأنیأنَ خو اَمرأ دأره. ایمرو گریفتأریأن ایمرو رِه وٚست ایسه.»
موجودہ انتخاب:
متا ۶: GLK_NT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2024 Transform Iran