متا ۷
۷
دیگرأنَ قیضأوت کودن
1 «البأقی آدمأنَ قیضأوت نوکونید، کی شٚمٚره قیضأوت نوکونٚد. 2 چونکی هر جور دیگرأنَ قیضأوت بوکونید و اوشأنٚ رِه رأی بدید، هوطؤیی شٚمٚره قیضأوت بِه و هو میلاکٚ اَمرأ کی البأقی آدمأنَ قیضأوت بوکونید، شٚمٚره‌یٚم قیضأوت بِه. 3 چٚره کولوشَ تی برأرٚ چومٚ دورون دینی، ولی روبارخألَ تی چومٚ دورون نیدینی؟ 4 چوطؤ جورأت کونی تی برأرَ بیگی: "وئأل کولوشَ، تی چومٚ جَا بیرون بأوٚرٚم"، ولی تی چومٚ دورون روبارخأل دأری؟ 5 اَی ریأکأر، اوّل روبارخألَ تی چومٚ جَا بیرون بأوٚر، بأزین تأنی بِیتر بیدینی و تأنی کولوشَ تی برأرٚ چومٚ جَا بیرون بأوری.
6 «اونچی کی موقدسه، سٚکأنَ فأندید، و شیمی مولواریدأنَ خوکأنٚ ور تأنوٚدید، چونکی اوشأن مولواریدأنَ لقد دٚمٚج کونٚده و وأگردٚده، شٚمٚره فوتورکٚده.»
وأموجید کی بیأفید
7 «بٚخأیید کی شٚمٚره فأدأ بٚبه؛ وأموجید کی بیأفید؛ بوکؤبید کی در شیمی رو وأزَ به. 8 چونکی هرکی بٚخأیٚه، بٚدٚس اَوٚره، و هر کی وأموجه، یأفٚه و هرکی بوکؤبه، در اونی رو وأزَ بِه. 9 شومأن کویتأ اگه اونٚ زأی اونٚ جَا نأن بٚخأیٚه، اونَ سنگ فأدِه؟ 10 یا اگه مائی بٚخأیٚه، اونَ لأنتی فأدِه؟ 11 بأزین کی شومأن، گونأکأرٚ آدمأن، دأنید کی وأستی خورومٚ چیأن شیمی زأکأنَ فأدید، چندر ویشتر شیمی آسمأنی پئر اوشأنٚ رِه کی اونٚ جَا بخأیٚد، خورومٚ چیأن بٚخشه. 12 پس مردومٚ اَمرأ هوطؤ رفتأر بوکونید کی خأییدی شیمی اَمرأ رفتأر بوکونٚد. اَن تورأت و پیغمبرأنٚ کیتأبأنٚ حِئقت ایسه.»
همیشٚکی زٚندیگی‌یَ بٚدٚس اَوٚردٚنٚ رأ
13 «فقد او کوجٚه دٚرٚ جَا دٚوأرٚستنٚ اَمرأ تأنید خودا پأدیشأیی‌یَ بٚدٚس بأوٚرید. او رأ کی هلأکَ بوستنٚ ور شِه خٚیلی پت و پأنه و پیله دروأزه دأره و خٚیلیأن ایسأیید کی اونَ اینتخأب کونٚده. 14 ولی او دٚر کی همیشٚکی زٚندیگی رو وأزَ بِه، خٚیلی تنگ ایسه و اونی رأیٚم بأریک و فقد بعضیتأ آدمأن اونٚ دورون رأ یأفده.»
دأر و اونی مِیوه
15 «شیمی حواس دورُغی پیغمبرأنَ بمأنه، اوشأن آرأمٚ گوسوٚندٚ لیوأسٚ دورون شیمی ور اَیٚده، ولی رأس‌رأسِی درنده گُرگٚدٚه. 16 اَشأنَ تأنیدی اَشأنٚ مِیوه جَا بٚشنأسید، ینی اَشأن کردکأرأنٚ جَا. ینی انگورَ شأ تٚمٚشٚ جَا یا اَنجیلَ وأشٚ جَا چِئن؟ 17 خورومٚ دأر، خورومٚ مِیوه دِهه و نأجورٚ دأر، نأجورٚ مِیوه. 18 خورومٚ دأر نتأنِه نأجورٚ مِیوه بأوٚره؛ نأجورٚ دأرم نتأنِه خورومٚ مِیوه بأوٚره. 19 پس هرتأ دأر کی نأجورٚ مِیوه اَوٚره، وأوِه بِه، تأوٚدأ بِه آتش دورون. 20 هطؤیه، هوطؤ کی دأرَ اونی مِیوه جَا شنأسٚده، شومأنم تأنیدی مردومَ اوشأنٚ کردکأرأنٚ جَا بٚشنأسید.»
مسیحٚ رأس‌رأسِی شأگردأن
21 «گومأن نوکونید هرکی مٚرَه "خوداوندا! خوداوندا!"دؤخأنه، آسمأنٚ پأدیشأیی دورون شِه. فقد اوشأنی بودورون شٚده کی می آسمأنی پئرٚ ایرأده‌یَ خوشأنٚ کأرأنٚ میأن انجأم دٚهٚده. 22 دأوری روجٚ رِه، خٚیلیأن مٚرَه گده: "خوداوندا! خوداوندا! اَمأن تی نأمٚ اَمرأ نوبوّت بوکودیم و تی پیغأمَ مردومَ فأرٚسأنِییم، تی نأمٚ اَمرأ، دیوأنَ بیرونَ کودیم، و تی نأمٚ اَمرأ خٚیلی موجیزه انجأم بٚدأییم." 23 ولی من بی‌رودروأسی جوأب دٚهٚم: "هیوخت شٚمٚره نٚشنأختم. می جَا دورَ بید، اَی گونأکأرأن."»
قأیمٚ پأکأر
24 «هرکی می آموجه‌یأنَ بشتأوه و اوشأنَ انجأم بٚده، عأقیلٚ آدمه. اون هو آدمَ مأنِه کی خو خأنٚه‌یَ ایتأ قأیم صخره رو چأکوده. 25 هرچی وأرٚش بٚوأرٚست و سیل بأمؤ، و بأد و توفأن او خأنٚه رو بأمؤ، فونگوردٚستٚه، چونکی صخره رو چأکوده بوبوسته بو. 26 ولی هرکی می آموجه‌یأنَ بشتأوه و اوشأنٚ جَا ایطأعت نوکونٚه، بی‌عقله. اون هو آدمَ مأنِه کی خو خأنٚه‌یَ فورشٚ سٚر چأکوده. 27 او وخت کی وأرٚش و سیل و بأد و توفأن او خأنٚه رو بأمؤ، ایجور فوگوردٚسته کی جٚه اون هیچی نمأنسته.»
28 او وخت کی عیسا اَ گبأنَ تومأنَ کود، مردوم اونی آموجه‌یأنَ جَا قأقَ بوستٚد، 29 چونکی قوّت و ایقتدأرٚ اَمرأ اوشأنَ آمؤختأندوبو، نه یوهودٚ دینٚ عألیمأنٚ مأنستَن.
موجودہ انتخاب:
متا ۷: GLK_NT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2024 Transform Iran