Markus 6
6
Kawan dulun nyan lowun tukui Yesus nongkuloi Are
6:1-6
(Mat. 13:53-58; Luk. 4:16-30)
1Opaiyoh, Yesus tulak ingkan intin hintang buli hia lowu tukui ika asar-Eh. Kawan murid-Eh umba ka. 2-3Nyan ondo Sabat, Yesus majar mara nyan lopo ika sombayang. Hiah waktu kawan dulun ngoneh ajaran-Eh, iroh hurong lau. Hien doh, “Ingkan omoh Dulun cotuh ngohaba akar pikir ika majar mara isan onon? Ingkan omoh Are ngohaba kuasa ika umpi kawan aang co mosotahir? Podahar, Are baya dulun biasa leh. Are tuh iyohco anak ingkan tukang kaju. Tinai-Eh araieh Maria. Kawan konduang-Eh iyohco Yokobus, Yoses, Yudas hintang Simon. Kawan konduang-Eh co bawe oko halo ito ka. Jadi, ingkan omoh Are ngohaba kokon akar pikir hintang kuasa conon?” Jadi, iroh nongkuloi Are.
4Paluh, Yesus mantun ma iroh, “Ico beti nabi tomohormat nyan omoh-omoh, tapi aroh nyan lowun tukui asar eh leh, nyan halo sotatun ewang eh hintang koluarga eh leh.” 5Maka, Yesus aroko umpi aang co mosotahir nyan idi, bokon ma otuh: Are mandak silui-Eh nyan pira-pira dulun hotoro hintang pomambuh iroh. 6Are hurong nongkomo bahawa kawan dulun nyan lowui-Eh aroko porocaya ma-Eh. Holuh, Are nyalan ngoliling ingkan desa hia desa, majar mara kawan dulun nyan intin.
Yesus nyoruhan duo balas murid
6:7-13
(Mat. 10:5-15; Luk. 9:1-6)
7Yesus naah duo balas murid-Eh paluh nyoruhan iroh boduo-duo. Are mihi kuasa ma iroh ika musir kawan roh jahat. 8Are nyuhu iroh ina aroh mehen ome-ome ponah solana, baya tuntu leh. Iroh aroko kuhan mehen rute, kantung ika nyawot sodakah, duit ponah owot kahang. 9Iroh boraoi hapo sandal, tapi aroko kuhan mehen lembon sali. 10Are mahi mantun ma iroh, “Hiah waktu ikan muntam hia lopo dulun, nukuiboh nyan intin dapot ikan naat kota cioh. 11Tapi amun ikan aroko tonorima pian kawan dulun nyan ico lowu, amun iroh aroko kolu ngoneh ikan, pusitbat ingkan lowu cioh. Nontokoh dabu ingkan paam me ika momporingat iroh.”#6:11 Amun dulun Yahudi nyolana nyan derah dulun bokon ma Yahudi, iroh nontokoh dabu ingkan paa sobagai ciri portentangan. Dapot dabu mahi, arelu oko hubungan ma iroh. Kawan rasul momporingat kawan dulun co aroko kolu porocaya Tarung Pio tintun Korojaan Mohotara, iyohonon Laca Yesus ocop dombut. Amun iroh nongkuloi Yesus, iroh angar tomohukum Mohotara.
12Jadi, koduo balas murid Yesus tulak momborita bahawa dulun sobulih naat dosan doh hintang ngonyorih atoi Mohotara. 13Iroh musir orong roh jahat. Iroh mahi masut orong dulun hotoro ma minyak jaitun hintang pomambuh iroh.
Yohanes Pombaptis tongompatoi
6:14-29
(Mat. 14:1-12; Luk. 9:7-9)
14Hiah waktu iyoh, Laca Herodes momorintah nyan propinsi Galilea. Are ngoneh kawan borita tintun Yesus awi aran Yesus jarin botisi nyan ngolauh derah cioh. Oko dulun co mantun, “Yesus iyohco Yohanes Pombaptis co ocop bolum hopuli. Iyohboh tuluieh Are oko kuasa ika umpi aang co mosotahir.” 15Oko ka dulun co mantun, “Yesus iyohco nabi Elia co dombut hopuli!” Tonga dulun mantun, “Are iyohco nabi samah isan kawan nabi ingkan jaman sinan!” 16Kotika Herodes ngoneh iyoh, are mantun, “Mositi otuh Yohanes Pombaptis co batuh ocop cuhungkuh dulun mungkong kuhung eh, makitu are ocop bolum hopuli!”
17-18 Cukup kotahi soun ma iyoh, Herodes kawin ma Herodias, tapi batuh Herodias yoh iyohco oruh konduang Herodes, araieh Pilipus. Jadi, Yohanes derek nopoh Herodes. Hieeh, “Iko aroko boraoi kawin ma Herodias!” Tului iyoh, Herodes nyuhu ina Yohanes tonawan, holuh tomowot ma rantai umat nyan ponah seper. 19Tului topoh Yohanes, Herodias mika dendam maeh, nyau ngompatoieh. Tapi are aroko boraoi 20awi Herodes nyolindung Yohanes. Herodes takut ma Yohanes tului tomonaueh Yohanes iyohco dulun co husus tohapan Mohotara hintang Yohanes bolum bujur nyan tohimo Mohotara. Sotiap kali Herodes ngoneh Yohanes, atoieh horoholuh golisah, tapi are nongkomo jorih ngoneh Yohanes.
21Kojekaieh, Herodias ngohaba kosempatan nyan ondo ulang tahun Herodes. Herodes umpi pesta indan kokon pojabat tingi, kawan kopala pasukan, hintang kawan tokoh mosorakat Galilea. 22Hiah waktu cioh, anak Herodias co bawe ngarang indan pesta cioh. Karang eh yoh ngonyorih atoi Herodes hintang kokon tamueh. Jadi, Laca Herodes mantun ma bawe lehoi cioh, “Nyawotleh ome bewe co tonyau mu, holuh akuh angar mihi iyoh indammu!” 23Herodes ngonohon janji cioh ma bosumpah. Hieeh, “Ome bewe co tonyawot mu, angar ihing kuh indammu, malah soparu ingkan korojaankuh!”
24Daja cioh tulak hintang ngisok ma Herodias, tinaieh, “Pioeh, akuh sobulih nyawot ome?”
Useh eh, “Kuhung Yohanes Pombaptis!”
25Bawe lehoi cioh jion hopuli hia Laca Herodes paluh nyawot, “Akuh nyawot ina makitu ka kuhung Yohanes Pombaptis tomungkong, tomandak nyan ponah loong pinjan tapak paluh mihi indang kuh!” 26Ngoneh iyoh Laca Herodes jarin jorung hintang loson. Tapi are aroko kolu kuloieh awi are ocop umpi janji cioh nyan muka kokon tamueh. 27Are lansung nyuhu tontara monu kuhung Yohanes. Maka, tontara cioh mungkong kuhung Yohanes nyan seper, 28holuh mehen kuhung eh nyan ponah loong pinjan tapak hintang mihieh hia bawe lehoi cioh. Bawe lehoi cioh mihieh hia tinaieh. 29Waktu kawan pongikut Yohanes ngoneh kojadian cioh, iroh tulak monu ontun Yohanes hintang ngolowong eh.
Yesus umpi aang co mosotahir mihi kanon indan limo ribu dulun#6:30-44 Judul Oko orong bawe hintang daja ka, tapi aroko muntam hitungan.
6:30-44
(Mat. 14:13-21; Luk. 9:10-17; Yoh. 6:1-13)
30Kawan rasul Yesus hopuli hokumpur ma Are. Iroh bokesah ma-Eh kokon co ocop doh umpi hintang tomajar kotika nyolana hia kawan lowu taiyoh niin. 31Tapi, hiah waktu iyoh, orong dulun dombut hintang tulak. Yesus hintang kawan rasul-Eh arelu oko waktu ika sotorahat, malah iroh aroko kojuan kuman! Awi iyoh, Yesus mantun ma iroh, “Haas ito tulak hia ika co ngolohiui, baya kitan leh, ika to sotorahat sonyulu.” 32Jadi kokon doh cakat hia jukung ina tulak hia ika co ngolohiui.
33Tapi, orong dulun kito iroh tulak. Kawan dulun taiyoh monau tujuan doh. Jadi, kawan dulun ingkan kokon kota nyan derah cioh jion tongkoru buah calan tana dapot tocak nyan ika cioh soun ma Yesus hintang kawan rasul-Eh. 34Waktu Yesus toka ingkan jukung, Are noto orong dulun nyan intin. Are nongkomo masi ma iroh awi iroh arelu oko dulun co mombimbing iroh. Iroh samah isan kawan domba co aroko empun gombala. Jadi, Are majar mara orong aang indan doh.
35Kotika ondo molai pindong, kawan murid Yesus ngohia Are. Hien doh, “Ondo molai pindong hintang ika cotuh ocu ingkan lowu. 36Jadi, nyuhu dulun orong tuh tulak hia kawan lowu dokin intoi ina doh lian moli kanon indan arop doh.”
37Tapi Yesus mantun, “Ikan sobulih mihi iroh kanon!” Useh doh, “Mainboh Iko nyau kaih tulak moli rute ika mihi kanon indan kokon dulun tatuh? Co lekaieh kira-kira duo latuh dilat perak?”
38Tapi Yesus mantun ma iroh, “Oko pira kuhat rute nyan ikan? Nyuwah morisaeh!”
Opah iroh morisaeh, iroh maraeh ma Are. Hien doh, “Oko limo rute hintang duo kontuluh ocin.”
39Paluh Yesus nyuhu dulun orong yoh tuot bokolompok nyan tungkui pulou uru co sorang bohijau. 40Kawan dulun taiyoh mahi tuot ponah orong kolompok. Oko kolompok co liman pulu beti. Oko ka kolompok co solatuh beti. 41Yesus monu limo rute hintang duo kontuluh ocin cioh, Are nolangon hia langit, mucap sukur ma Mohotara. Paluh Are hosila-sila rute cioh, mihieh ma kawan murid-Eh ina tomagi-magi indan dulun orong taiyoh. Ma cara co samah, Are magi duo kontuluh ocin indan kokon doh. 42Kokon doh kuman dapot bosuh. 43Opah iyoh, kawan murid-Eh ngumpur lowin rute hintang ocin cioh hapo koranjang. Duo balas koranjang kuntop! 44Kawan dulun co kuman rute cioh sokitar limo ribu beti bakah co ngongko.
Yesus nyalan nyan tungkui danum
6:45-52
(Mat. 14:22-33; Yoh. 6:16-21)
45Opah iyoh, Yesus jion nyuhu kawan murid-Eh cakat jukung meleh houn hia kota Betsaida nyan pohoi danau. Soponehan iyoh, Are nyuhu dulun orong taiyoh buli. 46Opah dulun orong yoh tulak, Yesus nukat hia tungkui lungkuh ika bodoa. 47Kotika ondo sasar pindong, jukung co tongoncakat kawan murid-Eh ocop nyan tohun danau, tapi Yesus incah nyan tana tarop. 48Are noto iroh boo poca nonju awi oko bahi muhat co bolawanan arah ma jukung doh yoh. Jadi, kotika iyoh, kira-kira jam tolu mamalom, Are dombut hia iroh, nyalan nyan tungkui danum. Are nyalan tarus soolah-olah angar nyihin iroh. 49-50Hiah kokon doh kito Are nyalan nyan tungkui danum, iroh bopikir Are ontu. Jadi, iroh tokocit hintang noriak-riak.
Tapi lansung Yesus mantun ma iroh, “Tenangleh! Akuhboh otuh. Aroh takut!” 51Are cakat hia jukung homboh iroh hintang bahi cioh ranai. Kawan murid Yesus korinah hurong 52awi iroh arinai paham omeboh Are sobujur eh. Oluco iroh kito Are umpi kawan aang co mosotahir ma rute cioh niin, atoi doh incah lambat paham.
Yesus pomambuh kawan dulun hotoro nyan Genesaret
6:53-56
(Mat. 14:34-36)
53Opah Yesus hintang kawan murid-Eh mitah danau, iroh dapot nyan Genesaret. Iroh nangkin jukung doh nyan intin. 54Kotika iroh toka ingkan jukung, kawan dulun noto bahawa co dombut yoh Yesus. 55Iroh tongkoru-koru hia ngolauh derah cioh paluh mehen kawan dulun hotoro nyan tungkui ihap hia Yesus. Nyan omoh bewe iroh ngoneh Yesus oko, iroh mehen kawan dulun hotoro hia-Eh. 56Amun Are tulak hia kota atawa lowu atawa lowu kolik, kawan dulun hotoro ehen hia ika co rami. Iroh nyawot asi hia Yesus ina kawan dulun hotoro taiyoh boraoi ngoncimai jubah-Eh, olu baya tontanaieh leh. Uras co ngoncimai jubah-Eh jarin mambuh.
موجودہ انتخاب:
Markus 6: TBSS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
