Markus 5
5
Yesus musir orong roh jahat ingkan dulun nyan kota Gerasa
5:1-20
(Mat. 8:28-34; Luk. 8:26-39)
1Opaiyoh Yesus hintang kawan murid-Eh dapot nyan pohoi danau Galilea, nyan derah Gerasa. 2Punai leh Yesus toka ingkan jukung, dombut boh hia Yesus ico dulun co tonguasa kawan roh jahat co nukui nyan kawan guha ika kolowong. 3-4Ocop derek dulun cioh tomonjaga, paan siluieh tomowot ma rantai umat. Tapi are tenden boraoi matot rantai cioh. Jadi, arelu oko dulun co hegah mowot eh bat. Arelu oko dulun co cukup kobangkah ika monahan eh. 5Hondo homalom are husah hesoh nyan kawan lungkuh hintang nyan kawan guha ika kolowong taiyoh, noriak-noloung hintang mongkup betieh ma batu.
6Kotika ingkan ocu are kito Yesus, are tongkoru-koru paluh nyohukup nyan paan Yesus. 7-8Yesus mantun, “Heh, roh jahat! Pusit ingkan dulun cotuh!” Jadi, roh jahat cioh noriak muhat, “Hei Yesus, Anak Mohotara Co Poko bokuasa! Iko nyau umpi ome ma akuh? Akuh nyawot asi aroh monyiksa akuh!”
9Yesus ngisok ma dulun cioh, “Ome arammu?”
Useh eh, “Arangkuh Legion awi kaih orong lau!” 10Roh jahat cioh nyawot ma Yesus ina aroh ngomuho iroh ingkan derah cioh.
11Nyan ika cioh oko orong lau bulo co rahat nganyap kanon doh nyan bengke lungkuh. 12Jadi, kawan roh jahat nyawot ma Yesus, “Nyuhu leh kaih muntam kawan bulo tanon!” 13Yesus kuhan iroh. Jadi, kawan roh jahat pusit ingkan dulun cioh, muntam kawan bulo taiyoh. Kawan bulo taiyoh tongkoru nosuloh bengke lungkuh hia ponah danau, matoi pusong. Kuhat eh bulo taiyoh kira-kira duo ribu kontuluh!
14Kawan ponjaga bulo taiyoh tongkoru, ngesah poristiwa cioh hia kota Gerasa hintang derah sokitar eh. Jadi, kawan dulun pusit ika noto ome co tojadi. 15Iroh dombut hia Yesus paluh noto dulun co niin eh tonguasa orong roh jahat, co tonisi Legion yoh. Are ocop holembon, ocop waras. Maka, iroh nongkomo nyook.#5:15 Iroh jarin takut awi iroh sadar Yesus korinah bokuasa. 16Kawan dulun co ocop noto tarop poristiwa cioh mara ma kawan dulun co dombut ome co tojadi ma dulun cioh co niin eh tonguasa roh jahat hintang tintun kawan bulo taiyoh. 17Paluh, kokon dulun ingkan derah cioh mondasak Yesus ina Are naat derah doh.
18Jadi, Yesus cakat hia ponah jukung homboh kawan murid-Eh ika tulak. Nyan waktu iyoh, dulun co ocop tongolampas ingkan kawan roh jahat taiyoh nyawot ina are boraoi umba. 19Tapi, Yesus aroko kuhan are. Hie-Eh, “Buli hia lopomu hintang kawan dulun nyan lowummu. Narung eh ma kokon doh uras co tongompian Tuhan indam-mu. Narung eh cara Tuhan porahan komasi ma iko!” 20Maka, dulun cioh tulak ngoliling derah Dekapolis yoh. Are momborita kokon aranaang co tongompian Yesus indai-eh. Kokon dulun jarin hurong.
Yesus umpi anak Yairus bolum hopuli hintang pomambuh ico bawe
5:21-43
(Mat. 9:18-26; Luk. 8:40-56)
21Yesus hintang kawan murid-Eh hopuli kole hia pohoi danau. Nyan saran danau cioh, orong dulun dombut bokorumbung toliut Yesus. 22Dombut boh ico beti kopala lopo ika sombayang co araieh Yairus. Kotika are noto Yesus, are bolutut nyan paan Yesus. 23Are nyawot asi lau ma-Eh. Hieeh, “Bapa, anak kuh co bawe jungin, jonyo matoi. Dohop dombut, ngoncamak eh ina are mambuh hintang aroko matoi.” 24Maka, Yesus tulak homboh Yairus.
Orong dulun ngonulu Are. Iroh hotorenye nyan toliut Yesus. 25Nyan haloeh oko bawe co joon ngonaha. Ocop duo balas toun kotahieh are noro toro cioh. 26Are korinah mondorita hintang ocop derek tulak botawah. Tapi koadaan eh aroko pio, dapot kokon koponatoueh punah ina botawah. Are aroko ka pio, tapi toroeh malah meleh parah. 27-28Are ocop ngoneh tintun Yesus. Jadi, are mantun ponah atoieh, “Asar leh akuh ngoncimai jubah Yesus, mositi akuh angar mambuh!” Jadi, nyan halo dulun orong yoh, are ngoroni Yesus ingkan uwoilikut#5:27-28 Mungkin bawe cioh takut awi ocop sadar Yesus bokuasa. Monurut kawan hukum agama Yahudi, are tomangap aroko borasih tului bodaha. Jadi, mungkin ka are takut tonopoh atawa tomohukum. paluh ngoncimai tontanan jubah-Eh. 29Lansung candak kongonahaeh. Are nongkomo betieh ocop pio ingkan toroeh.
30Hiah hanyih iyoh ka, Yesus monau oko kuasa co pusit ingkan arop-Eh. Are ngolet hia dulun ngarun paluh ngisok, “Ome co ngoncimai jubah-Kuh?”
31Kawan murid-Eh museh, “Bapa noto leh oko orong lau dulun co norenye-norenye ngoroni Iko. Kura Iko incah ngisok, ‘Ome co ngoncimai Akuh?’ ” 32Tapi Yesus horoholuh leh noto hia toliut-Eh ika nganyap dulun co ocop umpi iyoh.
33Bawe cioh monau ome co tojadi ma arop eh. Are dombut, nukup bolutut nyan toharep Yesus, hororiki tului takut. Are mongaku kokoi eh ma Yesus. 34Hien Yesus maeh, “Anak-Kuh, iko mambuh awi ocop porocaya ma-Akuh. Tulakbat ma kongolandah kongolami. Iko ocop pio ingkan toromu.”
35Lambak Yesus incah hopander, dombutbat dulun co tonyuhu ingkan lopo Yairus, kopala lopo ika sombayang cioh niin. Hieeh ma Yairus, “Anakmu ocop matoi. Aroko usah ngomboo Bapa Guru bat.”
36Yesus ngoneh antun cioh, tapi aroko mohiraueh. Hie-Eh ma Yairus, “Aroh takut, tenden porocaya leh.”
37Yesus aroko kuhan indan ome bewe ngonulu-Eh, kocuali Petrus, Yokobus hintang konduang eh, Yohanes. 38Opah iroh dapot nyan lopo Yairus, Yesus noto kawan dulun kicuh, nangih muhat, nohuang pompatoi daja cioh. 39Opah Are muntam lopo, Are mantun ma iroh, “Aroh kicuh hintang aroh nangih. Daja conon aroko matoi. Are baya tirui.”
40Iroh ngontao Are, tapi Are nyuhu kokon dulun taiyoh pusit. Paluh, Are mehen tinan taman daja cioh homboh tolu murid-Eh muntam bukung daja cioh. 41Yesus nantot silun daja cioh. Hie-Eh, “Talita kum!” (Artieh, “Hai dajan bawe, Akuh mantun ma iko, ‘Kokatbat!’ ”)
42Lansung daja cioh tonjok hintang nyalan. (Umur eh duo balas toun.) Kokon dulun nyan intin korinah kagum, 43tapi Yesus korinah ngosiit iroh mara poristiwa cioh ma ome bewe. Paluh, Yesus nyuhu iroh mihi kanon indan daja cioh.
موجودہ انتخاب:
Markus 5: TBSS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
