BOTHUBO 15
15
Abram lau Alhouw Puloshoqhi
1Hipaqo shive kethiu, kungunhetsü lono Ampeu tsa Abram lau ighi: “Msa kevilo, Abram, Ni ye o züto ke; o saxü ye shishe kije shi nani.” 2Ikemu Abram no pi, “O Ampeu Alhou, ni ye anuhami shi achephi, eno I mheghi kiyighiu ye Damascusmi Eliezer ke No ye kiu I tsüni kea?” 3Eno Abram no pi, “Julo, No ye atianuli I tsümphie, eno I kilo punusü kemi aqemi no I mheghi kiyighiu shinani.” 4Eno julo, Ampeu tsa pa lau ighi: “Timi hipau ye o mheghi kiyighiu shimo nani; no ampi nu no o mheghi kiyighiu shi nani.” 5Pa no khalacheu pa saipe no pi, “Atsütsü küdau julo, eno tsala nono ayepuqo kihilu kepu shi aye kihiju lo.” Tishino Pa no pa vilo pi, “O tikughuko ye hitoi nani.” 6Abram no Ampeu pülüve, eno Pa no Abram pesü amikucho kepi kihiluve.
7 Ampeu no pa vilo pi, “Ni ye Ampeu, Chaldea ghakhu Ur lono ayeghi hipau o tsüno ti ighilu peniye o saighi keu ke.” 8Ikemu pa no pi, “O Ampeu Alhou, I no ti ighilu nanie pi ni ye kishino ithini kea?” 9Ampeu no pa vilo pi, “Amshili, aneli, ambetsü lakhikhi ampe küthüthü shi akeu, eno aqhewo ngo miqhedu lakhikhi I lau süghilo.” 10Pa no hipaqo kümtsü Pa lau süghi, tipaqo amta lono xaphave no lakhino lakhiu shou küqape qhi. Ikemu pa no aghauqo ye xapha moe. 11Kughou ashikuchu ghauqo no chuniye ashi shou ikughi keno, Abram no hapupove.
12Khetsünhe iloche kelo, Abram ye ingufufui ighive no julo, akümsapu eno züchiyi keu kije pa shou ikughive. 13Tileno Ampeu no Abram vilo pi, “Mtsüqheino ithilo, o tikughuko ye inaghami yeghi lo kupokichemi shiuve nani eno tilau aqemi shive nani, eno ampe 400 kutolo panongu kijipüsa ghimeqhi nani. 14Ikemu panongu no qeche keu shiye shou I no küghakütha süghi nani, eno tithiuno panongu no küakini kutomo pesü ipeghive nani. 15O ghengu ye, no ye aloino keu lono o punoqo gholo wuve nani; no ye ighono kitemi shive kethiuno shiqho nani. 16Eno panongu ye tiqheli abidiu lono hile ideighi nani, kughengu Amorimi xine ye kupu mphike.”
17Kughou khetsünhe ilove no zümoive keno, julo, amchhi kupho li lakhi eno akuluqhe iqü akeu no ashi xapha püakeu heche ighi. 18Tipa tsalani Ampeu no Abram sasü puloshoqhi lakhi shino pike, “O tikughuko lau I no ayeghi hipau tsü ani, Egypt ghoki lono aghoki kije, Euphrates ghoki kuto, 19Kenimi yeghi, Kenizimi, Kadmonmi, 20Hittimi, Perizimi, Rephaimmi, 21Amorimi, Canaanmi, Girgashimi eno Jebusimi yeghi hipau tsü ani.”
موجودہ انتخاب:
BOTHUBO 15: SUMRVBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The Bible Society of India
© 2023, Used by permission. All rights reserved. More