BOTHUBO 14
14
Abram no Lot Hakholu
1Shinar kükau Amraphel, Ellasar kükau Arioch, Elam kükau Khedorlaomer, eno Goiim kükau Tidal noqo ghuloki lo, 2kükami hipaqo no Sodom kükau Bera, Gomorrah kükau Birsha, Admah kükau Shinab, Zeboiim kükau Shemeber, eno Bela (ti ye, Zoar) kükau ishi sasü aghüshi. 3Hipaqo no Siddim Khila (ti ye, Amti Züghi) lono panongu küka kumghoe. 4Ampe chighikini panongu ye Khedorlaomer qe ighi, ikemu ampe chighiaküthüu lono hebide ipeghive. 5Ampe chighiabidiu lo Khedorlaomer ngo kükami khunoqo pa gholo akeno, panongu no ighi no Ashteroth-karnaim lo Rephaimmi, Ham lo Zuzimmi, eno Shaveh-kiriathaim lo Emimmi, 6Horimi, Seir toghi phu lono yenguyike-a ghuthu lo El-paran kutolo leluve. 7Tithiu panongu no En-mishpat (ti ye, Kadesh) lo idechile ighi no Amalekmi ghakhu kümtsü eno Amorimi khunoqo no Hazazon-tamar lo küghüna ache keno, panoqo leluve.
8Tithiu Sodom kükau, Gomorrah kükau, Admah kükau, Zeboiim kükau eno Bela (ti ye, Zoar) kükau noqo no wuno Siddim Khila lo aghü shiniye kumqo luve no 9Elam kükau Khedorlaomer, Goiim kükau Tidal, Shinar kükau Amraphel, eno Ellasar kükau Arioch sasü aghüshi, kükami bidi no pano pungu küpüghü. 10Siddim Khila ye tsübuta kuchhuki no chhitoi, eno Sodom ngo Gomorrah kükau noqo no poche kelo panongu khami ye tipaqo lo ikiqi ilove, eno kütamiqo ye naghuto lo aphu akeqo lo pokhave. 11Ikehu aghümi no Sodom ngo Gomorrah tinhemgha eno achuqupu kümtsü puwuve tsüno pano la lo wuve. 12Panongu no Abram thiküzüu nu Lot, khuu Sodom lo küghüna akeno, pa eno paw tinhemgha ghi luve tsüno cheve.
13Tishino milakhi pokalu keu no ighi no Hebrewmi Abram vilo pive. Tipa ghuloki lo Abram ye Mamre lo aphisübo phivilo ache, Mamre ye Amorimi eno Eshcol ngo Aner pama thiküzüu, panoqo ye Abram sasü visho shikemie. 14Kughou Abram no pa sholokumi küghape wuvae pi chilu keno, pa no paw timi qopheve kemi, pa ki lono punu kemi, aqolo 318 sasü Dan kutolo hawue. 15Eno putho lono pa no paw timi amqo kütüta shi kijeve, pa ngo pa qemi no panoqo leluve no Damascus ahuu Hobah kutolo hasü wue. 16Tishino pa no tinhemgha kümtsü pechile ighive, eno pa sholokumi Lot ghi paw tinhemgha, totimi eno timiqo gholono sachile ighive.
Melchizedek no Abram Kümghatsü
17Abram no Khedorlaomer eno kükami pa gholo akeqo leluve no idechile ighive kethiu, Sodom kükau no pa sholu niye Shaveh Khila (ti ye, Akükau Khila) lo wu. 18Eno Salem kükau Melchizedek no asho eno atsaizü peighi. (Pa ye Shishe Akiqheu Lhou chineu ke.) 19Pa no Abram kümghatsü no pi,
“Shishe Akiqheu Lhou, atsütsü
eno ayeghi pighiu no Abram kümghatsü lo;
20eno Shishe Akiqheu Lhou, Khuu no o ghümi pesü
o u lo sütsü keno, Pa sheqhelo!”
Eno Abram no thokha kümtsü lo chighi lo saje lakhi pa tsüe. 21Sodom kükau no Abram vilo pi, “Timiqo no I tsüve, ikemu tinhemghaqo no o sala qhiluve lo.” 22Ikemu Abram no Sodom kükau vilo pi, “Ampeu, Shishe Akiqheu Lhou, atsütsü eno ayeghi pighiu lau I no I u peqhevae, 23ike ni ye ayeho tachu momu apukhuqho kütsügha kighi momu kiu kiumu ow ye lumoe, tikumo aye nono, ‘I no Abram pelo kinimi shilu peke,’ ipi nosae. 24Apumiqo no kiu chuve akeno, eno timi khunoqo I gholo ighi keno panoqo saje kumo aye, ni ye kiumu lumoe. Aner, Eshcol, eno Mamre noqo pelo panoqo saje lu pelo.”
موجودہ انتخاب:
BOTHUBO 14: SUMRVBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The Bible Society of India
© 2023, Used by permission. All rights reserved. More