LUKA 22
22
Jesuh Hum Han Angcaenghaih
(Mat 26:1-5; Mrk 14:1-2; Jhn 11:45-53)
1Takantak Poi tiah kawk o ih Tae thuh ai Takaw poi to a phak tom boah.#Exo 12:1-27 2Qaihma kacoetanawk hoi Tawklok patukkungnawk loa mipui to a zit o pongah Jesuh to tamqu lamah hum thaih hanah loklam to pakrong o.
Paipi Alae Hanah Judas Naakrak
(Mat 26:14-16; Mrk 14:10-11)
3Tona-ah hnukbang hlaihnetto thungih longto Iskariot tiah kawk o ih Judas thungah Setan to akun. 4Topongah Judas loa tacawt moa Jesuh to anihcae khaeah kawbangmaw a zawh thaih han tito qaihma kacoetanawk hoi tempal toepkung angraengnawk hoiah aram o. 5Anihcae doeh palunghoih o moa tangka to paek hanah a thuih o. 6Judas mah doeh ato to naakrak toengh moa mipui panoek aiah Jesuh to anihcae ban ah paek hanah atue kahoih to a pakrong.
Takantak Poi Buh Jesuh Mah Paroep
(Mat 26:17-25; Mrk 14:12-21; Jhn 13:21-30)
7Tae thuh ai Takaw Poi nathungah Takantak Poi buh hanah tuuca thethaih ni to a phak. 8Jesuh mah Piter hoi Johan to patoeh moa, “Caeh hoi aloa Takantak buh to cak o nawn hanah paroep o coek ah,” tiah a naa pae hoi.
9Anih hnit mah, “Naamaw kang sak pae hoi hanah na koeh?” tiah a duengh pae hoi.
10Anih mah, “Vangpui thungah na kun hoi na-ah tuilaom hoiah tui tapom nongpa longto nangqum hoi tih. Ato kami akunhaih im khoekto a hnukah baang hoi aloa, 11im tawnkung khaeah, ‘Kai hoi ka hnukbangnawk Takantak duembuh kacak o haih hanih akhaan loa naamaw a oh tiah kaicae Patukkung mah a thuih,’ tiah naa pae hoi ah. 12Ranui ih akhaan kalen parai, anghnuthaih ih hoi caboinawk kacung ta-ah suek coek ih to na patuek hoi ueloa toah tiboih to paroep hoi ah,” tiah a naa pae.
13A caeh o moa Jesuh mah a thuih pae hoi ih batiah tiboih to a hnuk hoi moa toah Takantak duembuh to paroep hoi.
Angraeng Duembuh
(Mat 26:26-30; Mrk 14:22-26; 1 Kor 11:23-25)
14Atue to a phak na-ah Jesuh loa a hnukbangnawk hoiah caboi ah to anghnut. 15Anihcae khaeah, “Hi Takantak duembuh hae patanghaih pauep ai nahlanah nangcae hoiah cak hanah ka koeh parai. 16Kawmawtiah kang thuih o: Sithaw Poenghaih thungah hi duembuh mah thuihkoehhaih tangtang to amtuengsak airoek loa ka caa let mak ai boah,” tiah a naa.
17Topacoengah Jesuh loa boengloeng to a lak moa Sithaw khaeah kawn lok a thuih pacoengah, “Hi hae la oloa longto hoi longto pazet oah. 18Loktang kang thuih o: Vaihi hoikamtong Sithaw Poenghaih phak airoek loa hi misurtui hae ka nae let mak ai boah,” tiah a naa.
19Topacoengah takaw to a lak moa Sithaw khaeah kawn lok a thuih pacoengah a aeh moa anihcae to a paek. “Hi hae ka takbum ni, nangcae hanah kang paek ih ni. Kai na panoek o han sah oah,” tiah a naa. 20Tobatih toengah duembuh to cak o pacoengah boengloeng to anihcae khaeah a paek moa, “Hi boengloeng loa nangcae hanah kalong ka thii hoiah caksak ih Sithaw paipi kangtha ni,” tiah a naa.#Jer 31:31-34
21“To-e, khen oah! Kai nuiah paipi alaekung loa kai hoiah nawnto caboi taengah oh.#Sam 41:9 22Sithaw mah lok takroek tangcae batiah Kami Capa loa dueh tih, to-e kai nuiah paipi alaekung hanah loa khosak bingh!” tiah a naa.
23Tona-ah hibatih hmuen hae amimah maw ka sah han, tiah longto hoi longto angduengh o.
Mimaw Kalen Koek?
24Hnukbangnawk salak thungah mimaw kalen koek ah dawn han ka om, tiah angaekhaih ih to a oh.#Mat 18:1; Mrk 9:34; Luk 9:46 25#Mat 20:25-27; Mrk 10:42-44Jesuh mah anihcae khaeah, “Sithaw panoek ai kaminawk ih sangpahrangnawk loa mipui nuiah hmuen sakthaihaih ih akaa hoiah a uk o moa ato ukkungnawk loa ‘Mipui ih Ampuinawk’ tiah a thuih o. 26#Mat 23:11; Mrk 9:35To-e nangcae loa totiah oh han om ai; nangcae thungih kalen koek loa naukta kanauk koek batiah oh han a oh moa pahoikung loa tamtoeh batiah oh han a oh.#Mat 23:11; Mrk 9:35 27Amito maw kalen kue? Buh cak hanah kanghnu to maw, tiaibaloa buh ka paekkung to maw? Kanghnu to ni loa kalen kue. To-e kai loa nangcae salak thungah buh ka paekkung batiah ni ka oh.
28“Zaepacunghaih ihnawk ka tongh nathung boih ah nang oh o haih; 29kam Pa mah ukhaih akaa ang paek batiah kaimah doeh ukhaih thaih ih akaa to kang paek o toengh han. 30Ka Poenghaih thungah ka caboi ah na caa na nae o ueloa Israel caeng hlaihnetto nuiah uk hanah tangkhang nuiah nanghnu o tih.#Mat 19:28
Piter Mah Angphattak Han Kawng
(Mat 26:31-35; Mrk 14:27-31; Jhn 13:36-38)
31“Simon, Simon! Tahngai ah! Lawk tawnkung mah cangtak hoi ahii to tapraek batih toengah kahoih ai thung hoitoah kahoih to tapraek han hoi nangcae boih to tanoekcak hanah Setan loa sakthaihaih ih akaa to a hak boah. 32To-e Simon, na taanghaih to zok ving han aiah nang hanah kho ka phoeh. Topacoengah kai khaeah nam laem let na-ah nam naukamzanawk to tha na rahsak han oh,” tiah a naa.
33Piter mah, “Angraeng, nang hoiah thongim ah krak nawn han hoi duek nawn hanah ka oh coek boah,” tiah a naa.
34Jesuh mah, “Piter, loktang ta-ah kang thuih: Vaiduem roeroe ah anih loa ka panoek ai, tiah vai thumto na thui airoek loa aa takhong mak ai,” tiah a naa.
Phoisa Tabu, Pasah hoi Songsen
35Topacoengah Jesuh mah a hnukbangnawk khaeah, “Phoisa tabu, pasah hoi khokbuen sin aiah kang patoeh o na-ah timaw maemaeto na vawt o ih to a oh maw?” tiah a duengh.#Mat 10:9-10; Mrk 6:8-9; Luk 9:3; 10:4
Anihcae mah, “Tita doeh a vawthaih ih om ai,” tiah pathim pae o.
36Jesuh mah, “To-e, vaihi loa ami doeh phoisa tabu doeh, pasah doeh ka tawn loa sin na soe; ami doeh songsen ka tawn ai loa laihaw kathuk to zaw na soeloa songsen maeto qan na soe. 37Kawmawtiah loktang ta-ah kang thuih o: Cabu Kacai mah, ‘Anih loa kami kazaenawk thungah kroek o maek boah,’ tiah kai ih kawng a tarik ih to akoep han a oh, kawmawtiah kai ih kawng tarik ihnawk boih to acung dudu boah,” tiah a naa.#Isa 53:12
38Hnukbangnawk mah, “Angraeng, khen e! Hiah songsen hnetto a oh,” tiah a naa o.
Anih mah, “To roek mah khawt boah,” tiah a naa.
Oliv Mae Ah Jesuh Khophoeh
(Mat 26:36-46; Mrk 14:32-42)
39Jesuh loa vangpui to tacawt tak moa a sak toemtoem ih batiah Oliv Mae ah to a caeh; moa hnukbangnawk doeh anih hoiah nawnto caeh o toengh. 40Ato hmuenh ah a phak na-ah anihcae khaeah, “Zaepacunghaih thungah amtim moeng han aiah khophoe oah,” tiah a naa pae.
41Topacoengah anihcae khae hoitoah hlung vah phak roekto kahla ah a caeh moa khokkhu samkrawn moa kho a phoeh. 42“Pa, naa na krak nahaeloa hi patang khanghaih boengloeng hae kai khae hoitoah na la pae ving rae ah. To-e loa kai koehhaih ih om aiah na koehhaih batiah oh na soe,” tiah a naa. 43Van ih vanmi longto anih khaeah amtueng thuih moa tha a paek. 44Palungbet phi moa thalak aep aep hoiah kho a phoeh; angsatui loa thikae batiah long ah a krak.
45Khophoehhaih ih hoitoah angthawk moa a hnukbangnawk khaeah a caeh let bae, palungset phi pongah angphosak o moa ka iip o khruep to a hnuk. 46Anihcae khaeah, “Tipongkhoe maw na iih o? Angthawk oloa zaepacunghaih thungah amtim han aiah khophoe oah,” tiah a naa.
Jesuh Naehhaih
(Mat 26:59-66; Mrk 14:55-64; Jhn 18:19-24)
47Jesuh loa lok a thuih li na-ah hnukbang hlaihnetto thungih longto, Judas mah ahoih ih mipui to ang phak o. Jesuh to mok hanah a caehthuih. 48To-e Jesuh mah, “Judas, na mokhaih hoiah maw Kami Capa hae na naehsak han?” tiah a naa.
49Jesuh hoiah nawnto kaom hnukbangnawk mah timaw om tih, tito a hnuk o na-ah anihcae mah, “Angraeng, songsen hae ka patoh o han maw?” tiah a duengh o. 50Moa anihcae thungih longto mah Qaihma Kalen ih misong to a tuk moa bantang bang a naa to tuk pae pat.
51To-e Jesuh mah, “Zetto mah khawt boah!” tiah a naa. Ato kami ih a naa to a sui pae moa a hoihsak pae.
52Topacoengah Jesuh mah angmah ka naeh hanah kangzo qaihma kacoetanawk hoi tempal toepkung angraengnawk hoi kacoetanawk khaeah, “Kai hae kamqu kamca batih toengah songsen hoi thingboengnawk hoiah nangzoh o thuih loa? 53Nithokkruek Tempal thungah nangcae khaeah ka oh eloa kai naeh han nang patoem o ai. To-e vaihi hae vinghaih ih thaohhaih mah ukhaih tue ah a oh moa nangcae angtawt angqoe tue ni,” tiah a naa.#Luk 19:47; 21:37
Piter Mah Jesuh Angphattak
(Mat 26:57-58,69-75; Mrk 14:53-54,66-72; Jhn 18:12-18,25-27)
54Jesuh to a naeh o moa Qaihma Kalen ih im ah a caeh o haih; moa Piter mah kahla parai hoiah a baang. 55Salong um ah hmai a cenh o, hmai kang-aw kanghnu kaminawk khaeah Piter doeh anghnut bo toeng. 56Tamtoeh nongpui longto mah hmai taengah kanghnu to a hnuk na-ah a khet daptap moa, “Hi kami hae doeh Jesuh hoiah ka om nawn ni,” tiah a naa.
57To-e Piter mah, “Nongpui, anih loa panoek doeh ka panoek vaih ai!” tiah angphat.
58Nawnetta akraa pacoengah nongpa longto mah Piter to a mat moa, “Nang doehsoe anihcae thungah ka paa kami toeng ni,” tiah a naa.
To-e Piter mah, “Nongpa, kai ka paa ai,” tiah a pathim.
59Topacoeng nitue maeto thuemtham akraa pacoengah nongpa kalah longto mah, “Hi kami hae Jesuh hoiah nawnto ka om ni tihae oepvawt han om ai, kawmawtiah anih doeh Galili kami toeng ni,” tiah kana dakah a naa pae.
60To-e Piter mah, “Nongpa, timaw na thuih tito ka panoek ai,” tiah a naa toengtoeng bae.
Totiah a thuih li na-ah aa khong roep. 61Tona-ah Angraeng loa angqoi moa Piter to a khet het, tona-ah Angraeng mah, “Vaiduem aa khong ai nahlanah, anih loa ka panoek ai, tiah vai thumto roek nangphat tak tih,” tiah a naa ih to a dawn let. 62Piter loa tacawt moa palung kasae ah a qah homhom.
Jesuh Pacaekhlaek Moa A Boh O
(Mat 26:67-68; Mrk 14:65)
63Jesuh ka toepkungnawk mah angmah to pacaekhlaek moa a boh o. 64A mik to komh pae o khoep moa, “Mimah maw na tabaeng? Na thui noek e!” tiah a naa o. 65Topacoengah padaenghaih ih lok to doeh zetpui apaeh thuih o.
Kawngsi Hma-ah Jesuh Ahoih O
(Mat 26:59-66; Mrk 14:55-64; Jhn 18:19-24)
66Khodai na-ah kacoetanawk, qaihma kacoetanawk hoi Tawklok patukkungnawk to angqum o cu moa Jesuh to lokcaekkung kawngsi hma-ah ahoih o. 67Anihcae mah, “Nang loa Messiah maw? Na thui ah,” tiah a duengh o.
Jesuh mah, “Kang thuih langla cadoeh na taang o mak ai; 68moa lok kang duengh o langla cadoeh na pathim o mak ai. 69To-e vaihi kazit hoiloa Kami Capa loa Tha karah Sithaw bantang bangah anghnu tih boah,” tiah a naa.
70Anihcae boih mah, “Totibaloa nang hae Sithaw Capa maw?” tiah a naa o.
Anih mah, “Sithaw Capa ni tito nangmahcae mah na thuih o,” tiah a pathim.
71Topacoengah anihcae mah, “Saksi kalah doeh aloe ai boah. Angmah ih lokthuih roeroe to aicae mah thaih o boih boah,” tiah a ti o.
موجودہ انتخاب:
LUKA 22: AKNT2023
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Asang Khongso New Testament in Eastern Khumi © Bible Society of Myanmar, 2023.
