LUKA 21
21
Lumhmai Nongpui Ih Hmuenpaek
(Mrk 12:41-44)
1Jesuh loa taenghaek to khet takui moa angraeng kanangnawk mah tempal ih tangka tabu thungah phoisa ka pacaeng to a hnuk; 2Kamtang nget lumhmai longto mah rahumngan phoisa hnetto ta ka pacaeng toengh to a hnuk bae. 3Anih mah, “Loktang ta-ah kang thuih o: Mi kalahnawk boih pongdoeh hi lumhmai kamtang mah hae ka pop ah pacaengh boah. 4Kawmawtiah mi kalahnawk loa hmuenmae a tawnh thungih kamhlai to a paek o; to-e hi lumhmai loa amtang nget e angkokhaih hanah aken ih to a paek kik,” tiah a naa.
Tempal Amrohaih Han Kawng A Thuih
(Mat 24:1-2; Mrk 13:1-2)
5Hnukbang thoemto mah hlung kahoih hoiah Tempal sak ih hoi Sithaw khaeah hmuenpaek tahlang ih kawng to aram o. Jesuh mah, 6“Hinawk hae na hnuk o king, to-e hi hlungnawk hae a ohhaih ih ahmuenh khaeah om aiah vah king hanih atue to na pha tih,” tih a naa.
Raihaih hoi Pacaekhlaekhaih
(Mat 24:3-14; Mrk 13:3-13)
7Anihcae mah Jesuh khaeah, “Angraeng, ahi hae natuekah maw om tih? Atue phak boah tito amtuengsak hanah amathaih ih timaw om tih?” tiah a naa.
8Jesuh mah, “Acoe oah; amimah doeh na ling o hmah na soe. Kami ka pop mah kai hmin hoiah angzo o ueloa, ‘Kai hae anih boah ni! Atue loa phak boah!’ tiah na naa o tih. To-e bang o hmah. 9Misa angtukhaih ih hoi misa angthawkhaih kawng to na thaih o na-ah zi o hmah; ato batih hmuennawk to loa ka om hmaloe roe han ni, to-e aboenghaih a hnaih boah tihaih ih na ai ni,” tiah a naa.
10Anih mah a lokthuih to patom moa, “Prae maeto hoi maeto misa angkat o tih; caeng maeto hoi maeto angtuh o tih. 11Zitman kaom talihnawhhaih, takangthohhaih, hoi nathaih congca to hmuenh kruekah om tih; van bang hoitoah dawnrai hmuen kalah kaang hoi amathaih ihnawk to amtueng tih. 12Hi hmuennawk boih hae pha ai nahlanah na naeh o ueloa pacaekhlaek o tih; sinakok ah lokcaek han hoi thongim ah pakhrak hanah minawk ban ah na paek o tih; kai tuenh pongah sangpahrang hoi ukkung angraengnawk ih hma-ah nahoi o tih. 13Ato loa nang hanah Tamthang Kahoih thuihhaih ih atue kahoih ah om tih. 14Nangmahcae hoi nangmahcae to kawbangmaw kang dungh hanah lok ka thuih han tiah mawnhhaih palungthin to tawn o hmah.#Luk 12:11-12 15Kawmawtiah loklaang kophaih hoi palunghahaih to na paek ueloa lok na paeh ih to ami kawbatih misa mah doeh ahmaan ai tiah na aek pazawk thaih mak ai. 16Nam no hoi nam pa, nam nauknawk, na sanauknawk, nampuinawk mah minawk ban ah paek o ueloa nangcae thungih thoemto loa paduek ah om tih. 17Kai ih kawng pongah mi boih mah na hnumaa tih. 18To-e nangcae lu nui ih sammaeh maeto mataeng anghma mak ai. 19Kacak ah angdoe oah, totibaloa nangmahcae hoi nangmahcae to pahlong o tih.
Jerusalem Amrohaih Kawng A Thuih
(Mat 24:15-21; Mrk 13:14-19)
20Jesuh mah, “Risanawk mah Jerusalem to padum o khoep ih na hnuk o na-ah amro ngaepacae tih tito na panoek o tih. 21Tona-ah Judae prae ah kaom kaminawk to maenui ah cawn o na soeloa; vangpui thungah kaom kaminawk to loa vangpui to tacawt o tak na soeloa, vangpui tasabang taw thungih kaom kaminawk to loa vangpui thungah akun o hmah na soe. 22Kawmawtiah ahi ni loa ‘Danpaekhaih ih Ni’ ah om tih pongah Cabu Kacai mah a thuih ih boiboih to akoephaih ih ni ah om tih.#Hos 9:7 23Ato ni loa nongpui zokbumnawk han hoi naukta kamoe amnonawk hanah loa natanmaw a rai o tih. Hi prae thungah zitman kaom raihaih to na pha ueloa Sithaw raekhaih ih loa ahi kaminawk nuiah pha tih. 24Thoemto loa songsen hoiah dueh o tih moa thoemto kami loa longnui prae kruekah misong ah nahoi o tih; Sithaw ka panoek ai Gentel kami mah Jerusalem vang to atue boeng airoek loa khok hoiah atii o tih.
Kami Capa Angzohhaih
(Mat 24:29-31; Mrk 13:24-27)
25“Ni hoi khra hoi sakaenawk nuiah amathaih kalah kaangnawk to om tih. Longnui prae bum boih ah tuiculi kamphui hlukbuk tuen hoi tuisamba kangthawk tuenh to om ueloa zit mawnh tasoeh takuen hoiah om o tih.#Isa 13:10; Ezk 32:7; Jol 2:31; Lph 6:12-13 26Longnui prae bum boih ah hmuen ka thok hankoi to dawn o na-ah zit loiah kuenh o sut tih, kawmawtiah van ih kaom thaohhaih ihnawk boih to loa a ohhaih ih ahmuenh hoitoah lam angkhraeng o dung tih. 27Topacoengah Kami Capa to hmuensak thaihaih hoi, phungaeng lensawkhaih hoiah tamai thungah kangzo to hnuh o tih.#Dan 7:13; Lph 1:7 28Ahi hmuennawk hae ang phak na-ah angdoe oloa ranui bangah khen oah, kawmawtiah nangcae pahlonghaih loa a hnaih boah,” tiah a naa.
Thaiduet Kung Hoitoah Amtukhaih
(Mat 24:32-35; Mrk 13:28-31)
29Topacoengah Jesuh mah anihcae khaeah ahi patahhaih hae a thuih pae: “Thaiduet kung hoi thingkung kalahnawk to dawn o noek ah. 30Aqam kanauk tacawt to na hnuk o na-ah nipui tue a hnaih boah tito na panoek o. 31Tobatih toengah hi hmuennawk ka om to na hnuk o na-ah Sithaw Poenghaih loa angzoh tom boah tito na panoek o tih.
32“Vaihi ih kahing kaminawk a duek o king ai nahlanah hi hmuennawk boih hae om tih, tito pahnet o hmah. 33Van hoi long loa amro tih, to-e ka lok loa natuekah doeh amro mak ai.
Acoe Hanah Oh
34“Acoe hoiah om oah! Poi cak hoi, mu antha naek hoi, hing khosak mawnhaih hoiah om o hmah; tiaibaloa ato Ni mah to dawn ai puiah 35thaang kaman batiah a mansak tih. Kawmawtiah ato Ni loa longnui hmuenh kruekah kaom kami boiboih nuiah pha tih. 36Ato hmuen boiboih kangzo han to kasueng ta-ah loih thaih hanah thazung na tawnh o thaih han hoi Kami Capa hma-ah nangdoet o thaih hanah, acoe hoiah om o aloa khophoeh o toemoe ah,” tiah a naa.
37 #
Luk 19:47
Jesuh loa Tempal ah patukhaih hoiah ato tue ninawk to a patoh, a duembang phak na-ah tacawt moa Oliv Mae ah aqum ah iih toemtoem. 38A khawn kruek khawnthaw ah a lok tahngai hanah mi boiboih mah Tempal ah angzoh o.
موجودہ انتخاب:
LUKA 21: AKNT2023
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Asang Khongso New Testament in Eastern Khumi © Bible Society of Myanmar, 2023.
