Thãgbaa Thɔ̃thɔnaa Thɔ̃ 3
3
Gbãgbarʋʋkɛ Jejuu i kpɛɛnɩ da‐n sa
1Dɩ Pɩɛr na Jã kɔɔ jʋʋnɛ Thãgba fʋɔr cɔ kɔ̃tɩɩna; Thãgba fʋɔr bɔɔ gɩ kɔɔ do wi ga bɔɔ. 2Dɩ kũu bɩɛl kɔɔ hale wɩ kɔnɩ na gbãgbarɛ; dɩ tɩbɩla n gbaa dɩ wɩ pɔna na too wire fɛʋ Thãgba fʋɔr cɔ kɔ̃tɩ̃ lõfonʋɔraakɛ wɩ‐n wenɩ Daɓʋ̃ɔ, a na‐n bɩɛl wɩrɛraakɛ n lonanɩ Thãgba fʋɔr cɔ kɔ̃tɩɩna thɩ̃ɛ. 3Dɩ mɔ̃ a yɩnɩ Pɩɛr na Jã dɩ wa‐n lõ Thãgba fʋɔr cɔ kɔ̃tɩɩna, a bɩɛl warɛ thɩ̃ɛ, 4dɩ wɩ hɩɩnʋʋnɛ kirkirkir sɩ dɩ Pɩɛr sʋʋraa: Hɩnɛ sɩ. 5Dɩ ga war yire sɩ da‐n kpɩɛr thɩ̃ɛ wa ha nɩ. 6Sɩ Pɩɛr sʋʋraa: Ma hana war dɩ dɛ ga, sɩ gɩrɛ mɩ hananɩ gɛr ma ha fɩ; na Najarɛtɩ Jeju Kirisitii i, ɩrɛ jala. 7Dɩ mɔ̃ Pɩɛr fʋʋnɩ nyɔ̃bɔɔ a khəi dɩ pal ɩɩr jɩɩl, dɩɩ do dapaara ɔɔ nɛ na ɔɔ yɔpayi bire ˈlɛ fãga 8da‐n sana; dɩ wɩ lʋʋn kha Thãgba fʋɔr cɔ kɔ̃tɩɩna da‐n sa, da‐n ubirina, da‐n khɩɩna Thãgba. 9Dɩ tɩbɩla fɛʋ yɩɩrɛ da‐n sana, da‐n khɩɩna Thãgba. 10Dɩ wɩ kɔɔ jɩɩrɛ dɩ ɔr dɔ ʋrɛ n kɔɔ tɔɔnɩ Thãgba fʋɔr cɔ kɔ̃tɩ̃ lõfonɔ Ɓʋɔna, da‐n bɩɛl thɩ̃ɛ; dɩ jẽu fʋlɛ tɩbɩla a kpaana wɩ nʋɔ gɩrɛraakɛ kɔɔ danaanɩ. 11Mɔ̃kɛ a‐n bonɩ dɩ ma Pɩɛr na Jã, nʋɔ kpaarɛ tɩbɩla fɛʋ dɩ wɩ ca pɔ war le paarraakɛ hɔnɩ jɛ̃bɛrɛ̃ɛkɛ wɩ‐n wenɩ Salomɔ̃ɔda.
Thɩmɩɩrɩkɛ Pɩɛr mɩɩnɩ tɩbɩla
12Mɔ̃kɛ Pɩɛr yɩnɩ thɩ̃ɛ thale a sor tɩbɩlala: Nɛr Ɩjɩrayɛldara, mɔ̃gɩdo dɩ nʋɔ kpaa nɩ gekɛra? Mɔ̃gɩdo dɩ nɩ ga sar yire thakɛ dɩɩ ho sɛrɛ na asɩ dɩbara fãga, agɩbo na asɩ Thãgba so cʋʋ kpɛ, sɩ cʋʋna kuunikɛ dɩ ɩɩr? 13Abɩrahamɩ Thãgba, na Ɩjakɩɩ Thãgba, na Jakɔbɩɩ Thãgba, kɛ dɔnɩ asɩ mama thɩ kɔ̃tɩ̃sɔɔ Thãgba kɔɔ cʋʋrɛ ɔɔ thɔ̃daar Jeju dɩ ˈlɛ i dʋbɩrɛ; ɔr dɔ ʋrɛra nɩ kɔɔ fʋnɩ ha Pɩlatɩ dɩ kɩɩlnaa sa yɩ ɩna fagʋʋrɛra, sɩ nɩ kɔɔ bor kpei.#Thɩɩ 3:15 14Sɩ nɛrɛ nɩ kɔɔ bor Tɩɩ phuu na Tɩɩ sarʋ, sa ka bɩɛl wɩ jɛ tɩɩ kʋdaar bʋɔra a fagaa a ha nɩ.#Mat 27:15–23; Mar 15:6–14; Lu 23:13–23; Jã 19:12–15 15Sɩ nɩ kɔɔ kʋrɛ yi ˈlaadaar, dɩ Thãgba kɔɔ cʋgʋʋrɛ dɩ ɩɩr a the khirera, sɛr dɔ wɩrɛ tɔ garnɩ yire. 16Ha pɛrɛ ɔɔ irə gɩ, ɔɔ i cʋɛ kuunikɛ nɩ yɩnɩ gɩrɛ a jɩɩ dɩɩ do a bire ˈlɛ fãga; ha pɛrɛ Jejura kpɛɛnɛ kuunikɛra gɩrɛ cacaca mɔ̃kɛ nɛrɛ fɛʋ yɩɩnɩ anɩ ƴɛra.
17Dɩ nɛnɛ̃ omɩna, mɩ jɩrɛ dɩɩ do jɩ ɓɔrɛra nɛrɛ na anɩ kɔ̃tɩ̃sɔ kɔɔ cʋʋ thɩ̃ɛɛlera Jejura; 18dɩ mɛ̃ gɩrɛ Thãgba kɔɔ maanɩ pɛrɛ ɔɔ bobonasɔ fɛʋʋ nɔra dɩ wa‐n mɩɩ dã oti, a thɩɛna gaa ɔɔ Kirisitii bɔɔkɛ a na gaarnɩ gɩ mɩɩ.
19A mɛ̃ gɩ, nɩ deba haar sa kɛra birə Thãgbara, dɩ mɛ̃ anɩ sopugosɔ na hɛl; 20dɩ ƴeu na ther Kɔ̃tɩnɩ pa na dã nɩ, dɩ a na thɔna narɛ Kirisitiikɛ wɩ kɔɔ thɩɩn narnɩ, kɛ dɔnɩ Jeju. 21Ɔr dɔ ʋrɛɛkɛ gɩ teenanɩ a tɔɔ Thãgbaa dʋɔ, gɩ dana bɔɔkɛ Thãgba na birni na gbɛbɩ thɩ̃ɛ fɛʋ, gɛr dʋɔn gɩrɛ a kɔɔ pɛrnɩ ɔɔ bobon phusɔɔ nɔra kɛkɛkɛ dɩ wa‐n mɩɩ. 22Mʋɩjɩ kɔɔ sor ayɩ: “Kɔ̃tɩn anɩ Thãgba na tire bɩɛl anɩ omisɔra dɩ na do Thãgbaa bobon ɩ̃ kha dɩ na ha nɩ; ɔr na‐n pɛ nũu thɩ̃ɛ fɛʋraakɛ a na‐n so narnɩ.#Dət 18:15, 18 23Dɩ tibil wo tibilikɛ na pɛnɩ Thãgbaa bobonɩle nũəˈ, wa hɛlʋʋlɛ tɩbɩlaa thɩ̃thɩɩn a na bũburõo.”#Dət 18:19 24Dɩ Thãgbaa bobonasɔɔkɛ kɔɔ mɩanɩ dɩɩ fʋna Samʋɛl a gbana wɩrɛ kɔɔ kpaaraanɩ, wɩ mɩɩnanɛ ga Widaalera dakha. 25Nɛr dɔ Thãgbaa bobonasɔɔlee bɩsãsɔ, dɩ nɩ hɩnɛ dakha nɔ bɩɛl ʋlfɛrɛɛkɛ Thãgba kɔɔ ʋlfɛnanɩ anɩ mama thɩ kɔ̃tɩ̃sɔ a mɩɩna Abɩraham ayɩ: “Afɩ məllə tibil caar fɛʋ thɩɩra na ˈlɛr bɔnanɛ.”#Jən 22:18 26Nɛrra Thãgba kɔɔ ɩɩr ɔɔ thɔ̃daar cacaca, a thʋɔn a bɔna nɩ, a cʋɛ nɛrɛ fɛʋ bɩɛlbɩɛl nɩ kɛr sɩ nɩ faa kpallɛ.
موجودہ انتخاب:
Thãgbaa Thɔ̃thɔnaa Thɔ̃ 3: LOBIRI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Burkino Faso 1985.