Thãgbaa Thɔ̃thɔnaa Thɔ̃ 2
2
Pãtɩkotɩ
1Ɔbɔɔkɛ Pãtɩkotɩ wire n danɩ, wɩ kɔɔ gbɛbɩrɛ kha fɛʋ pa bɩɛl.#Lev 23:15–21; Dət 16:9–11 2Dapaara helu the ƴũ a ho jɛkhu kɔ̃tɩ̃ helle, a hi cʋɔrra fɛʋʋkɛ wɩ tooronɩ. 3Dɩ thɩ̃ɛ ther a ho dɔ delẽbe, a tɩnɛ dɩɩdɩɩ dɩ ga‐n dɛ̃ɛ war bɩɛlbɩɛl. 4Dɩ wɛr fɛʋ kɔɔ hinəne Thu Phuu a ma dɩ wa‐n mɩɩ ca kpal thɩmɩa, mɔ̃kɛ Thu Phuu cʋʋ wɩnɩ dɩ wa‐n mɩɩ.
5Sɩ Juifisɔ wɛ a ha Jerujalɛm, a do wɩrɛ n cʋɔnnɩ Thãgba, ballɔ ballɔ wɩ the thɩɩra fɛʋ. 6Ɔbɔɔkɛ tibil jɔ nɩɛnɩ tutugoreele wɩ car pɔ, dɩ awɩ kpɩɛr nyanyaanɛ, gɩdonɩ wɛr fɛʋ bɩɛlbɩɛl nɩɛrɛ dɩ wa‐n mɩɩ awɩ ca thɩmɩɩsɔ. 7Dɩ nʋɔ kɔɔ kpaa wɛr dɩ wa‐n kpise sɩ dɩ wa‐n so: Nɩ yɛ tibil ca yɩrɛ n mɩanɩ, ga do Galiledara wɩ do fɛʋaa? 8Sɩ mɔ̃ gɩ fʋ sɩ sɩ nɩɛ dɩ wɛr fɛʋ bɩɛlbɩɛl na‐n mɩɩ thɩmɩaakɛ wɩ kɔna sɩnɩ dɩɩdɩɩdɩɩ? 9Sɛrɛɛkɛ dɔnɩ Partɩsɔ, na Mɛɛdɩsɔ, na Elamɩtɩdara, na wɩrɛ hanɩ Mejopotamɩ, na Jude, na Kapadɔsɩ, na Pɔ̃, na Ajɩ, 10na Firiji, na Pãfɩlɩ, na Ejipiti, na Libi khʋraakɛ wɔrɔnɛnɩ Sɩrɛn, na wɩrɛɛkɛ thɛnɩ Rɔm, kɛ dɔnɩ Juifisɔ na kpakpalaakɛ fenɩ ho Juifisɔ, 11na Kɩrɛtɩdara, na Arabɩdara, sɩ nɩɛrɛ dɩ wa‐n mɩɩ Thãgbaa nɔ kpaa thɩ̃ na asɩ casɔɔ thɩmɩɩ. 12Dɩ nʋɔ kɔɔ kpaa wɛr fɛʋ dɩ wa jɩ mɔ̃ wa kpɩɛrnɩ bã, sɩ dɩ wa‐n bule khasɔ bɩɛlbɩɛl aa: Anye gɩrɛra n nɩna? 13Sɩ ɩkhasɔ n maan wɛr dɩ wa‐n sona: Taan n kɔ wɩ.
Thɩmɩɩrɩkɛ Pɩɛr mɩɩnɩ tɩbɩla
14Le Pɩɛr ɩɩr jɩɩl na yʋɔr bɩɛl, a gba thɩmɩɩr a so war thakɛ ayɩwɔɔ: Nɛr Juifisɔ na nɛrɛɛkɛ fɛʋ hanɩ Jerujalɛm, dɔ nɩ jɩɩ jɩ gɩrɛɛkɛ dɩ nɩ pɛ nũu gɩrɛraakɛ ma so narnɩ; 15ga do taan n kɔ tɩbɩlaale mɔ̃kɛ nɩ‐n kpɩɛrnɩ gɩraˈ, gɩdonɩ khɛ yɔ kpãa bɔɔ gɩ dɩbara, 16sɩ gɩrɛɛkɛ Thãgbaa bobon Jowɛl kɔɔ sonɩ, gɛr dana:
17“Thãgba sor ayɩwɔɔ: Pɩpɩɩ wirera,
ma cʋʋrɛ dɩ tibil caar fɛʋ na ˈlɛ ɩ̃ Thu,
dɩ anɩ bikuunsɔ na anɩ bikhɛrsɔ na tire Thãgba tukɩrʋ;
anɩ daɓolsɔ na‐n yɩrɛ Thãgbaa thɩ̃ yɩr,
dɩ anɩ kɔ̃tɩ̃sɔ na‐n dəəle dəəlesɔ.#Jow 2:28–32
18Dɩ ɩ̃ thɔ̃daar kuunsɔ na ɩ̃ thɔ̃daar khɛrsɔ,
ga wirəəlera ma cʋʋrɛ dɩ wa ˈlɛ ɩ̃ Thu,
wa‐n ti Thãgba tukɩrʋ.
19Ma cʋʋrɛ ma kʋ thɩ̃ɛsɔ thãgbara ƴũ,
na nɔ kpaa thɩ̃ɛsɔ kɛ thɩɩra tɩɛr;
tɔmɩn, na dɔɔ, na isi baan na hale;
20wire na debire na do dabirə,
por n debi a sɩɛrɔ a ho tɔmɩn,
sɩ Kɔ̃tɩnɩ wiikɛ dɔnɩ wi ɓɔ̃ kɔ̃tɩ̃ɩ ka n dã.
21Le tibil wo tibilikɛ na wɛnɩ Kɔ̃tɩnɩ i na ˈlɛ taarɛ.”
Pɩɛr n nɩnanɛ dɩ Jeju dʋɔn Kɔ̃tɩn na Kirisiti
22Nɛr Ɩjɩrayɛldara, na‐n pɛ thɩmɩrɩkɛ nũu: Najarɛtɩ Jeju dɔ ʋrɛ Thãgba tuni ɔɔda anɩ ƴɛra nɔ kpaa thɩ̃ cʋʋrɛra, na ma kʋ thɩ̃ cʋʋrɛra, na jẽ thɩ̃ɛsɔra anɩ thɩ̃thɩɩn, mɔ̃kɛ nɩ jɩ gɩnɩ anɩbara. 23Tibilile Thãgba kɔɔ gba faa nar, mɔ̃kɛ ɔɔ thɛthɛɛ ƴaal yɩnɩ waa foo ga har, na mɔ̃ ɔɔ thɩ̃ mãa jɩ hanɩ; dɩ mɔ̃ nɩ kɔɔ cʋʋnɩ puu cʋʋdara dɩ wɩ gbaa kpa kʋkʋ thɩrʋra, nɛr kɔɔ kʋɔ.#Mat 27:35; Mar 15:24; Lu 23:33; Jã 19:18 24Sɩ Thãgba kɔɔ tagʋʋrɛ khi nyɔ̃kɔɔ sa cʋgʋʋ dɩ ɩɩr a the khirera, gɩdonɩ hʋɛ na hale dɩ khir na puno na fʋʋ na ɩɩrɔaˈ.#Mat 28:5–6; Mar 16:6; Lu 24:5 25Gɩdonɩ ɔɔda Davɩdɩ mɩɩ gɩrɛ ayɩ:
“Kɔ̃tɩn mɩ‐n hɩɩn bɔɔ fɛʋ ɩ̃ ƴɛra,
gɩdonɩ a‐n hale ɩ̃ nyɔ̃bɔra, gɛr gɩ ma‐n jãˈ.#Khɩ 16:8–11
26Gɛrra dɔ kɩrʋ dɩ daʋ na‐n ha ɩ̃ hara,
dɩ mãthɩ̃ɩ hi mi nɔɔ;
ado mɩ khirakɛ sɩ ma‐n hɩɩrɛ na nũ pɛrɛ.
27Gɩdonɩ fa faa ɩ̃ thu da jal khĩdi dʋɔaˈ,
fa tu dɩ afɩ Tɩɩ phu na yɩ kʋɛraˈ.
28Fɩ cʋʋ mɛr dɩ ɩ̃ jɩ yi hʋɛ,
afɩ ƴɛ thɩ̃thɩɩn ha na hi mer daʋ.”
29Omɩna, nɩ dɔ ɩ̃ mɩɩ nar casɩ asɩ mama thɩ kɔ̃tɩ̃ Davɩdɩɩdaakɛ kɔɔ khenɩ dɩ wɩ dʋ, dɩ ɔɔ ka hakɛrakɛ nĩ gɩrɛ asɩ pa. 30Mɔ̃ a kɔɔ donɩ Thãgbaa bobon dɩ mɔ̃ a jɩnɩ dakha Thãgba kɔɔ ʋlfɛnaanɛ thakɛ ayɩ, ɩna cʋʋrɛ tibil bɩɛl ɔɔ məlsɔra dɩ na gba ɔɔ fãga too pa,#Khɩ 132:11; 2 Sam 7:12–13 31gɛr a kɔɔ ˈlaa yɩrɔ Kirisitii khi ɩɩr, mɔ̃kɛ a kɔɔ sonɩ ayɩ:
“Thãgba na kɔɔ faa khɩ̃di dʋɔaˈ,
dɩ ɔɔ tomɩ dakha wo na kɔɔ yɩ kʋɛraˈ.”
32Jejuukɛra Thãgba kɔɔ ɩɩr khirera, dɩ sɛrɛ fɛʋ kɔɔ torre yire. 33Thãgba kɔɔ ɩɩrʋʋrɛ a pɛ ɔɔ nyɔ̃bɔra dɩ ˈlɛ ɔr Thɩrɛra Thu Phuukɛ a kɔɔ ʋlfɛnanɩ, dɩ a kɔɔ cʋʋrɛ dɩ sɩ ˈlɛ mɔ̃ nɩ yɩ gɩnɩ gɩrɛ a nɩna gɩ. 34Gɩdonɩ Davɩdɩ na kɔɔ jʋʋn Thãgbaa dʋɔaˈ, sɩ ɔɔ thɛthɛ sɔ ayɩ:
“Thãgba sor ɩ̃ Kɔ̃tɩna ayɩ:
Tɔɔ ɩ̃ nyɔ̃bɔra,#Khɩ 110:1
35phaphapha ɩ̃ cʋʋ afɩ lãlaardara wɩ do afɩ nɛ jəəda.”
36Dɔ Ɩjɩrayɛl ca fɛʋ n jɩ tue gel, dɩ Thãgba kɔɔ cʋʋrɛ Jejuukɛra nɩ kɔɔ kpanɩ kʋkʋ thɩrʋra dɩ do Kɔ̃tɩn na Kirisiti.
Pɩɛr yɩrnanɛ tɩbɩla dɩ wa debi haar
37Ɔbɔɔkɛ tɩbɩlaale nɩɛnɩ gele, gɩ kɔɔ thʋ wɛr haar, dɩ wɩ so Pɩɛrra na wɩ̃ thɔ̃thɔnasɔra ayɩ: Omɩna, dɩ mɔ̃ sa do? 38Dɩ Pɩɛr so war: Nɩ deba haar, sɩ wɩ gba Jeju Kirisitii i wɩ kpɛɛna nɛrɛ fɛʋ bɩɛlbɩɛl nyʋɔnɔ anɩ sopugosɔ faara, dɩ na ˈlɛr dakha khaardaakɛ dɔnɩ Thu Phuu; 39gɩdonɩ nɛr hɩna ʋlfɛrɛra, na anɩ bɩsãsɔ, na wɩrɛ fɛʋʋkɛ hanɩ ƴɔɔ, a wɩ jɔrakɛ a ha mɔ̃, dɩ Kɔ̃tɩn asɩ Thãgba na we. 40Yɛ̃ thɩmɩɩsɔ hale wo Pɩɛr n mɩɩ wɩnɩ da‐n kpãkpãa war wɩ to da‐n sona war dɩ yɩ: Nɩ fuo nɩ̃ gõgolõdararaakɛ.
Caca ha pɛdara
41Mɛ̃ wɩrɛ kɔɔ tuonni Pɩɛrɩ thɩmɩɩ kɔɔ ˈlɛ yɔ kpɛɛrɛ, dɩɩ do ga wiilera tɩbɩlaakɛ kɔɔ ɓananɔnɩ thɔɔrɛ gbɩlanɩ yẽther.
42Dɩ wɩ‐n yɩrrɛ thɔ̃thɔnasɔɔ dɩɩrra, na bɩ̃ kuune kha, na mɔ̃ wɩ‐n khonɩ Kɔ̃tɩnɩ dɩko, na Thãgba bɩɛlɛla dakha. 43Dɩ maar kɔɔ fʋlɛlɛ wɛr fɛʋ bɩɛlbɩɛl, dɩ thɔ̃thɔna n kɔɔ cʋʋrɛ ma kʋ thɩ̃ɛsɔ na nɔ kpaa thɩ̃ɛsɔ jɔɔjɔɔ. 44Dɩ ha pɛdara fɛʋ n har kha dɩ wɩ bulle thɩ̃ɛ fɛʋ hɩ̃.#Th t t 4:32–35 45Dɩ wɩ dolõ awɩ thɩ̃sɔ fɛʋʋkɛ wɩ‐n hɩnɩ, a na tɩnɛ khasɔ fɛʋ mɔ̃kɛ thɩ̃ɛ na‐n ɓɔrnɩ ntɛ. 46Wire fɛʋ wɩ‐n yɩrrɛ dɩ wɩ ha Thãgba fʋɔr cɔ kɔ̃tɩɩna na bɩ̃ bɩɛl; sɩ mɔ̃ wɩ‐n hanɩ cɔnanɔ wɩ‐n khor kha Kɔ̃tɩnɩ dɩko dɩ wa‐n khona awɩ thɛthɛɛ dɩko na daʋ na ha bʋɔ; 47dɩ wɩ‐n khɩɩrɛ Thãgba, dɩ wɩ dar dakha tɩbɩlala fɛʋ, dɩ wire fɛʋ Kɔ̃tɩn n taarɛ tɩbɩla da‐n ɓã war.
موجودہ انتخاب:
Thãgbaa Thɔ̃thɔnaa Thɔ̃ 2: LOBIRI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Burkino Faso 1985.