Matiu 12
12
Iesua muvikalasou Voxo so Ma'ila
1Ioxe, no Voxo so Ma'ila vile la Iesua oli'a tatisaipeliou mimuamua'i mo mipolo no xai so uiti vile. Mipolo la ane'i tatisaipeliou misolixa'a laso mipitisou uiti ngiaxu se'i ka mi'ou. 2La Tapalisi se'i mimaisi'a la mivikalanu Iesua lexe, “Namalei, ane'i mi'oxonu mi ane mamu so ta'oxonu no anu Voxo so Ma'ila.” 3La Iesua mukoline'i lexe, “Xo ngingi nga'itisou a'alosou mi e Tevitiena mi'oxonu tatei uasi? No anu voxo vile anu oli'a tamenexu misolixa'a. 4Misolixa'a laso anu mu'unalai no tasou Mosinge mo muno'u pileti ane tapilisiti mikalipalanu lexe noxou Mosingesi. No anu lo la uvikala lexe mamu so tamitema vitanisi i'ou pileti ne, anene noxi'a tapilisitisi. Ia Tevitiena mi'ou la Mosinge la'iaxui'a uasi. 5Mo aloxo 'ola. No anu lo la uvikala lexe tapilisiti ixaxai no tasou Mosinge no anu Voxo so Ma'ila la ane'i ixola'u lo so voxo ne, ia isusu no anu uasi. Ngingi masi nga'itisou anene uasi kalumo, ne? 6Ia avikalangengi lexe mi ane mutiatila no anu tasou Mosinge a uxolu 'o. 7Xe Mosinge vaikalaou vile aloxo 'o, 'Tami ane ngalavusou ngave'a lexe noxilo la amasaxau to uasi. Mi ane a'osasousi a so tangengixa'a tamenexinge.' Ioxe, tamitema ano'o isusu uasi, laso loxo vaikalaou Mosinge ne laxu mupalasi noxinge la umomomo so ngato'ome'a vitanisi axo'o uasi. 8Xo Itema ane molu noxou Mosinge anu Tatananu Voxo so Ma'ila ne.”
No Voxo so Ma'ila vile la Iesua mupaipounu itema vile avolu musoli
9Ioxe, Iesua muxexesou apu ne xo la mulai muxali no taoni vile mo mu'unalai no tasi'a so lavulavu no anu lavuloto. 10Mu'unalai la itema vile avolu musoli a muxoxolu ne. Laso tamitema se'i mimaititiou Iesua lexe, “Loxo nini napaipounu itema vile no anu Voxo so Ma'ila la naxola'u lo o uasi?” Mitali'i axone xo imasaxau ixalisou susu vile noxou so ikotixu no anu. 11La Iesua mukoline'i lexe, “Loxo nini vile sipisipmeni upatolo no taxa no anu Voxo so Ma'ila la nini masi nanava? Nini nakasou nalapunu utelo no voxo nesi, ne? 12Ia sipisipi ne mi loxo utiatila uasi, Mosinge tanuxu itema uua'ulixu sipisipi avile. Laso loxo nenge ta'oxo laixe noxou itema no anu Voxo so Ma'ila la nenge taxola'u lo noxou Mosinge uasi ane.” 13Mukalu la Iesua muvikalanu itema ne lexe, “Namexinu avone.” Xe itema ne mumexinu avolu sila avolu muxali laixe aloxo ane xalevile. 14Ia Tapalisi milala mo milai mipita so ikamulinu vote'i so ivau Iesua usoli.
Iesua anu itema so xaixai noxou Mosinge ane musosovosou
15Ia Iesua mulavusou xavutalai'a Tapalisi ne laso anu muxexesou tuala ne. Xe tamitema latala mimulimulinu la anu mupaipoune'i tapipiena noxi'a mukalusi. 16La mu'apixa'a lexe ipala'anixu noxi'a tamitema uasi. 17Mu'oxo axone mo so vaikalaou polopeti Aisaia uxalixu nene'axu. Mulemolu aloxo 'o, 18“Ngamalei, ano'o itema so xaixai noxilo e eni melo eilounu. Eni asexelaxu misevile mo taleli u'osasou manina. Eni apilixinu Uleleli noxou mo so anu ulanu vaikala so ilixo ulapu noxi'a tamitema noale'ale. 19La anu u'oto no anu vaikala uasi mo anaxu utautau uasi. Tamitema ilomusou xolinu ula no votevote'i uasi. 20Loxo lele'i so ukoa la anu uxola'u avile uasi. Xe lalamo kaxu so usita la anu usitanoxu avile uasi. Anu uxolu uxaxaisou xo mo ilixo ulapu uua'uli avile. 21La ane'i tamitema noale'ale ilopalanu ualasou mo ixomaiou.”
Tamitema mikalavoi lexe Iesua muxaxai no anu xavinu Uluaou
22La no voxo anene ane'i mine'enu itema vile ane angelo masua mukasou. Angelo masua mu'oxonu itema ne iou ilou anaxu mutomu. Mine'enu noxou Iesua xe mupaipounu laso muvivikala mo mumaleila. 23Sila tamitema latala mikulukemolu mo tane'ilili lexe, “Itema ano'o masi Teviti Ilusunu, ne?” 24Ia loxo Tapalisi milomusi'a la mi'oxo lexe, “Uasi, itema anene ukusai'a ta'angelo tamasua no anu xavi noxou tila noxi'a ta'angelo tamasua e Velisevuli tosi!”
25Ia anu mulavusou xavutalai'a la muvikalane'i lexe, “Loxo tatemanu tuala vile ikalipalane'i so i'otoxa'a ngato'o la anu tuala anene umamulosi. O loxo tatemanu tani o taoni vile ixililiie'i ngato'o la ane'i ixolu opone'i vilesisi? Uasi, ane'i ipaxelele ane. 26La anu axonesi. Loxo Uluaou molu ukusai'a se'i no anu laili noxou la anu oli'a ikalipala ane. Mo axone la laili e anu u'uli laxunu ne, utulu pumuxu axova? 27Mo loxo vaikalamengi lexe akusai'a ta'angelo tamasua no anu xaviou Velisevuli ne manina, laso ane'i tanoxinge ane ikusai'a la ino'u xavi noxou ei? Laso ane, ane'i laili noxinge ne me'a imaxa'u vaikalamengi lexe manina uasi. 28Ia loxo Mosinge avolu uxolu noxilo so akusai'a ta'angelo tamasua la masi ngalavu lexe voxo so Mosinge molu u'uli laxune'i tamitemaou a mune'e alai noxinge 'oe.
29Aloxo 'o. Loxo mosou tani vile xavinu musuku uxolu la evile u'unalai so u'umenu mimiou axova? A uno'u mosou tani ne ka uloilokisou teio. Mukalu laso ane, anu umomomo so utaxusou mimi no tasou itema olele.”
30Xe Iesua muvikala aloxo 'ola, “Itema ane menexilo uasi la anu vile noxi'a tauluaxeli ane. Xe itema ane usu'ulileli so upitane'i tamitemaxeli uasi, la anu so upaxelelene'isi.
31Laso avikalangengi aloxo 'o. Loxo susu ma'ia o vaikala masua ma'ia tamitema ilemolu, la anu vote'i uxolu so Mosinge uiasou susu anene. Ia loxo tamitema ivikala masua so ixililiou Ulenu Laixe la anu vote'i so Mosinge uiasou susu noxi'a uasi manina. 32Mo itema loxo uvikala masuaou Itema ane molu noxou Mosinge la vote'i uxolusio so susu noxou ne uiasi. Ia itema ane upupuiou Ulenu Laixe la vote'i so susu anene uiasi uasisi. Tina'u so susu anene uxolu vaimomo 'o mo ulai avile no anu voxovoxo ili'i.”
Ovu masua uxalixu nene'axu masuasi
33Ioxe, Iesua mu'oxonu latilovo aloxo 'o, “Loxo ovu laixe la uxalixu nene'axu laixesi. Xe ovu ane masua la uxalixu nene'axu masuasi. Laso vote'i so tatongonu ovu lexe anu laixe o masua a no anu nene'axusi. 34Ngingi loxo tasineke tamasua ane lamalasini masua uxolu no anaxa'a to! Ngingi tamitema so sususi laso vote'i so ngalemolu vaikala laixe axova? Xo mi ma'ia uana'ananixu itema oponu la ula no anaxusi ane. 35Itema ane laixe la oponu ututuluou mimi lailaixe ane uxolu no oponu, laso maixene uxalixu nene'axu laixe. Xe itema ane masua la oponu ututuluou mimi masumasua, laso maixene uxalixu nene'axu masua to ne.
36Ia eni avikalangengi lexe vaikala vuluvulusi kitukitu se ma'ia ngalemolu la Mosinge utali'isinge no anu mo utulusingexu no voxo so lakoti olele. 37Xo no anu vote'i e so vaikalamengisi la anu upalasinoxu ilixo noxinge mo so umoxo'inge lexe ngingi tamitema tamalemalenga o tamitema tamasua.”
Iesua mulemolu sosovo e muxali noxou Iona
38Xe ili'i la tamitema se'i so lavulavu no anu lavuloto oli'a Tapalisi mivikalanu Iesua lexe, “Tisa, nexi tamasaxau lexe nini na'oxonu sosovo so xavi vile so upala'anixene noxixe.” 39Ia anu muvikala lexe, “Ai, tamitema ane laili so vaimomo 'o ne ilixo noxi'a masua xe ane'i ixililiou ilixou Mosingemo. Ane'i opone'i ututuluou sosovo vile, ia avikala lamana lexe sosovo vilesisi ane imaisou a sosovo ane muxali noxou Iona. 40Xo Iona ne anu muxolu no anu sinana tanu aso tatalu xe olovoxo tatalu. La anu axone kalumo noxou Itema ane molu noxou Mosinge, xo anu uxolu no anu lialia tanu aso tatalu xe olovoxo tatalu. 41No voxo so lakoti tatila ili'i la Tanenive itulu ipala'anixu susu noxi'a tamitema so laili vaimomo 'o. Xo ane'i milomuxu votovoto noxou Iona la mixiunu mo mi'isalilinoxu opone'i. Ia ngalomu, vile uxolu no taingengi 'o ne uua'ulixu Iona avile. 42Xe no anu voxo so lakoti ne la kuini so xale lia no anu sauti itulu ito'ome'a laili so vaimomo'o kalumo. La vaikalaie upala'anixu susu noxi'a xo ane mele no lia telexu so mine'e milomusou lavulavu u'asi'asi noxou Solomoni. Ia ngalomu, vile uxolu no taingengi 'o uua'ulixu Solomoni avile kalumo.”
Angelo masua anu umomomo so ulivu uxolu no tanixula
43La Iesua musolonu aloxo 'ola, “Loxo angelo masua uxexesou itema vile ukalu la ulai uxixaoxao no xale lia esi'esi so ukamulinu tanixu vile so uma'ila no anu. Ukamulinu ukamulinu ia uxalisou tanixu vile uasi la unava? 44Anu u'oxo lexe, 'E masi alivu no anu tasilo e exolu ka exexe no anu 'o.' Xe loxo ulivu la umaisou tasou lexe xalusousi ia misilapanu mo mipaipounu laixe. 45Laso anu uno'a ta'angelo tamasua 7-la e ilixo masua noxi'a uua'ulixu noxou. Uno'a ukalu la oli'a i'unalai ixolu noxou itema, mole xoluxoluxu mumasua manina no anu ane tei. La anu uxali axonesi noxi'a tamitema so laili masua e so vaimomo kalumo.”
Iesua nenu oli'a tavimovimou mine'e noxou
46La Iesua a uvikalane'i tamitema latala axonesio. Sila nenu oli'a tavimou a mine'e mitulu noale xo imasaxa ivikala noxou. 47La itema vile muvikalanu lexe, “Ai nalomu. Nenine oli'a tavivine a ixolu noale mo imasaxa ivikala noxine.”#12.47 Tamitema so lavulavu se'i ixavutala lexe Matiu molu ukaukavunu vaikala ane uxolu no anu 12:47 uasi, itema vilemo masi mukaukavunu. 48Ia Iesua mukolinu itema e muvikala noxou ne lexe, “Xo nenilo ena'ei? Mo tavivilo a ta'eio?” 49La anu mulosi noxi'a tatisaipeliou ka muvikala lexe, “Namalei, ane'i ano'o tanenilo xe tavivilo a! 50Xo tamitema ta'ei ane imulinu masaxa noxou Mosinge, la ane'i tavivilo mo tanenilo ane.”
موجودہ انتخاب:
Matiu 12: ATA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright 1999 New Tribes Mission, Sanford, FL 32771-1487
