Matiu 13
13
Latilovosou itema mutapu'u uiti ngiaxu
1Ioxe, no voxo nesio la Iesua mula no tani ka mulai mutalupexa no pa'umolu kupa tatila ne. 2Xe tamitema latala mixali mipita noxou la anu tanixu uasi. Laso mutelo no pouti vile la mutalupexa no anu. Xe ane'i tamitema latala mitulu no tasii so ilomusou. 3La Iesua muvotone'i no anu latilovo tapiena. Mutilovo vile aloxo 'o, “Ngalomu. Itema vile mulai mupeinu uiti ngiaxu no xai so utapu'u. 4Mupeipeinu xe ulalai la uiti ngiaxu se'i mulapau no vote'i so xai. La tangiala mine'e mitokinu so mi'ou. 5-6Xe uiti ngiaxu se'i mulapau no lavolavo'o taitainu ia lialia ulu'elai malaxo uasi. Laso uiti anene muleme palea ia loxo aso tatila muiesou la muxalo xo lialia ulu'elai so uli'u umulinu uasi. 7Xe uiti ngiaxu se'i mulapau no taitainu lamota ana'anaxu xolanu. Xe uiti muleme ia lamota ana'anaxu muleme la mukuponusi. 8Ia uiti ngiaxu se'i mulapau no lia lailaixe xe munene'a la se'i nene'axu 100 xe se'i nene'axu 60 xe se'i nene'axu 30. 9Itema loxo sangalou la ulomuxu vaikala ano'o.”
Iesua mupela'a tamitema no latilovosi
10Xe ili'i la tatisaipeli mine'e mitali'i noxou Iesua lexe, “Axova so nini navikalane'i no anu latilovosi 'o?” 11La anu muvikalane'i aloxo 'o, “Vaikala so voxo ane Mosinge molu u'uli laxune'i tamitemaou no tualasou ne mutalume tatei. Ia vaimomo 'o Mosinge mupala'anixu noxingesi 'o. Mupala'anixu noxinge ia noxi'a levianila uasi. 12Xo itema ane mimi se'i muai noxou mukalu la Mosinge ulosou se'i no latanula. Xe loxo anu ane uxalisou mi vile uasi, la uxexenu mi se ane muai noxou. 13Laso maixene avikalane'i no anu latilovosi. Xo ane'i isasaxi ia itongonu mi vile uasi. Mo ilolomu ia ilomuxu so upala'a noxi'a uasi. 14La noxi'a tamitema ane xo ne la vaikalaou polopeti Aisaia uxalixu nene'axu. Xo muvikala lexe, “Alaxu tavu'alo ngingi ngalolomu ia upala'a noxinge so ngalavusou laxu to uasi. Mo ngingi ngasasaxi utotomu ia ngatongonu mi vile uasi. 15La opone'i tamitema ano'o pumuxusi. Xe sangalia muamuaxu so ilolomu. Mo ane'i mi'oxonu ie'i so muvuvu. Xo loxo 'o io ie'i utongonu xe sangali'a ulomuxu xe opone'i upalasiou laso ane'i ilivu ine'e noxilo so apaipoune'i.'
16Ia anu laixe noxinge xo iengi utongonu mo sangalinge ulomuxu. 17Xo avikalangengi manina lexe tatei tapolopeti oli'a tamitema talapu tapiena mimasaxau manina so imaisou mimi ane a ngasaxisou 'o, ia ane'i imaisou to uasi. Xe ane'i opone'i mutatama so ilomusou vaikala e a ngalolomusou 'o, ia ilomusou to uasi.”
Laxu latilovo so itema mutapu'u uiti ngiaxu
18La Iesua muvikala lexe, “Ioxe ngalomu, eni alulusou laxu latilovo so itema mutapu'u uiti ngiaxu. 19Aloxo 'o. Tamitema mose'i ilomusou vaikala laixe so Mosinge u'uli laxune'i tamitemaou no tualasou. Ilomusou ia upalasi noxi'a uasi laso Uluaou upalea utokinu vaikala ne uxexe. Anu loxo uiti ngiaxu ane mulapau no vote'i so xai. 20Xe tamitema se'i ne ane'i ilomusou vaikala ia anu ulapau no opone'i loxo uiti ngiaxu mulapau no lavolavo'o taitainu. Loxo ilomusou vaikala la ino'u mo i'osasou. 21Ia opone'i ukasou manina uasi. Anu loxo uiti ngiaxu ane uleme sevile ia uli'u so ulu'elai no lia uasi. Xo loxo tamitema isu'anu anaxa'a noxi'a mo ixililiie'i no anu vaikalaou Mosinge ne, la ane'i i'umesou palea. 22Xe se'i la ilomusou votovoto kalumo. Ia anu loxo uiti ngiaxu ane mulapau no taitainu lamota ana'anaxu. Xo tamitema ne opone'i ututulu no anu xoluxolu so vasime'a. Mo anu masaxa so lamoli ne u'oxo loloxa'a laso utanuxu vaikala aloxo lamota ana'anaxu mukuponu uiti xolanu mole unene'a uasi. 23Ia tamitema se'i ne opone'i uloxu Mosinge vaikalaou mo ikasou lexe manina. Anu loxo uiti ngiaxu ane mulapau no anu lialia laixe. Ikasou lexe manina laso xoluxolu noxi'a uxalixu nene'axu laixe loxo uiti ane muleme mo muxalixu nene'axu laixe. Se'i ne nene'axu 100 xe se'i nene'axu 60 xe se'i nene'axu 30.”
Latilovo so laxalasi masua muleme no xai
24Ioxe, anu mu'oxonu latilovo vilela noxi'a lexe, “Alulusou voxo so Mosinge molu u'uli laxune'i tamitemaou no tualasou aloxo 'o. Anu loxo itema vile mupeinu uiti ngiaxu laixe so utapu'u no xai. 25Ia no olovoxo loxo tamitema a miai mukalu la uluaou itema ne mutoke mune'e ka mupeinu laxalasi masua sesenu no taitainu uiti sika mulai. 26Ioxe, ili'i uiti ngiaxu muleme mo munene'a ia laxalasi masua a mupala'a no taitainu kalumo. 27Laso ane'i tauokuvoiou mosou xai milutu milai noxou mo mivikalanu lexe, 'Tilao, nexi telavu lexe netapu'u uiti ngiaxu laixesi no xaixene. Ia axova so laxalasi masua muleme kalumo 'o?' 28La anu muvikalane'i lexe, 'A uluaxeli vile masi mu'oxonu.' La ane'i tauokuvoi mitali'isou lexe, 'Nini nemasaxau lexe nexi talai taluvusou ka tasu'anu la'oluxu?' 29Ia anu mu'oxo lexe, 'Uasi. Xo loxo 'o io ngaluvusou laxalasi masua la ilou uiti ane. 30Ta'oxo aloxo 'o. Ngapilixinu uxolu mo ilou ileme xo mo uiti lingamo. Xe no anu voxo so tamitema so i'elesoui la eni avikalane'i lexe tei ane'i itaxusou laxalasi masua ka isakinu tavatavalanu so i'elaxu no navusi. Ukalu la i'elesou uiti temanu mo ita'olunu no tasou iauvaxe noxilo.'”
Latilovo so masiteti ngiaxu xe isiti
31Xe anu mulosi'a latilovo vile lexe, “Alulusou voxo so Mosinge molu u'uli laxune'i tamitemaou no tualasou aloxo 'ola. Anu loxo ovu masiteti ngiaxu ane itema vile muno'u la mutapu'u no xaixu. 32Ngiaxu ne anu loxo ovu ngiangiaxu se'i uasi, anu isusu'a e isusu'a manina. Ia loxo mutapu'u no lia xe muleme la anu mulai tatila e tatila manina mo muua'ulixu toutou no xaixai mukalusi. Laso ane'i tangiala mine'e mitulusou tasi'a no avo'avolu.”
33Xe muvikalala lexe, “Voxo so Mosinge molu u'uli laxune'i tamitemaou no tualasou la anu aloxo 'ola. Sema vile mino'u isiti se ka miilanu ilou palaua latalamusou. Miilanu mukalu xe muai sevile sila palaua loloni ne musoxo kena.”
Iesua mulanu vaikala ne no anu latilovosi
34La Iesua mulanu vaikala ano'o mukalusi noxi'a tamitema latala ne no anu latilovosi. Ulemolu mi vile lamana avile uasi, anu mutokalasou no anu latilotilovosi. 35Laso anene muxalixu nene'axu vaikalaou polopeti vile mulemolu tatei aloxo 'o, “Eni alanu vaikalaxeli no anu latilovosi. Mimi iouiou e mutalume tatei musoko'u no tava'u lialia xo mo muxali vaimomo 'o, ne eni alemolusi.”
Iesua mupala'anixu laxu latilovo so laxalasi masua
36Mukalu la Iesua muxexesi'a tamitema latala ka mu'unalai no tani. La tatisaipeliou mine'e noxou mo mivikalanu lexe, “Nalulusou laxu latilovo e so laxalasi masua muleme no xai.” 37La anu muvikalane'i lexe, “Itema mutapu'u uiti ngiaxu laixe ne anu Itema ane molu noxou Mosinge. 38Xe xai ne a lialia 'o. Xe loxo uiti ngiaxu laixe ne a tamitema ane ixolu nonano no voxo loxo Mosinge molu u'uli laxune'i tamitemaou. Xe laxalasi masua ne a tamitemaou Uluaou. 39Xe itema uluaou ane mupeinu laxalasi masua sesenu no xai ne a Mosinge Uluaou. Xe voxo so mi'elesou uiti lingamo ne a kaluxusou lialia. Xe tamitema so mi'elesou ne a ta'angelo talaixe 'osi. 40Laso loxo tamitema mitaxusou laxalasi masua ka mi'elaxu la anu uxali axonesi no anu kaluxusou lialia. 41Xo Itema ane molu noxou Mosinge upalusi'a ta'angelou no taine'i tamitema ane so anu molu u'uli laxune'i ne. Upalusi'a so itaxusi'a ane'i ane iolexa'a tamenexi'a no anu susu xe ane'i ane ilixone'i upolo va'axu. Itaxusi'a so ixexene'i ne avile. 42Mukalu la ipeine'i no navu toxoxu. Mo no navu toxoxu ne la itatama tatilasi xo mole anaxa'a ukalakikisi. 43Xe noxi'a ane'i ane ixolu nonano so Mami'a molu u'uli laxune'i la lamanaxa'a a loxo aso 'osi. Itema loxo sangalou la ulomuxu vaikala ano'o.”
Latilovo so kesi so lamoli a muai mutalume no lia
44Xe muvikalala lexe, “Voxo so Mosinge molu u'uli laxune'i tamitemaou no tualasou la aloxo kesi so lamoli e mi'asixu so mitalumeu no xai vile. Xe itema vilela loxo uxalisou la utalumeula. Mukalu la anu u'osasou misevile mo ulai usalimunu mimiou mukalusi so lamolisou la ulotonu xai ne.”
Latilovo so xapo peli lamolisou tatila musuku
45Xe muvikalala lexe, “Voxo so Mosinge molu u'uli laxune'i tamitemaou no tualasou la aloxo 'ola. Anu loxo itema so lailoto ane ukakamulinu xapo e ilemolu lexe peli lailaixe so ulotonu. 46Ukakamulinu xo xe umaisou vile ane lamolisou mutiatila musuku laso ane. Anu ulai usalimunu mimiou mukalusi so lamolisou la ulotonu xapo peli lailaixe ne.”
Latilovo so kae
47Xe muvikala aloxo 'ola, “Voxo so Mosinge molu u'uli laxune'i tamitemaou no tualasou la aloxo 'o kalumo. Anu loxo kae ane tamitema isu'anu ulu'elai no luaki so ilapune'i tasinana iouiou. 48Ioxe, kae uana'anae laso ane'i ilai isu'a no tasii so ikaline'i tasinana. Ikaline'i xe ane'i ane talaixe la ipitanu no anu lisi xe ane'i ane tamasua la ipeine'i isu'asi. 49La anu uxali iou vilesisi axone no anu kaluxusou lialia 'o. Xo ta'angelo talaixe ine'e ikaline'i tamitema tamasua e ixolu no taine'i tamitema talapu. 50Mukalu la ipeine'i no navu toxoxu. Mo no navu toxoxu ne la itatama tatilasi xo mole anaxa'a ukalakikisi.”
51Mukalu la Iesua mutali'isi'a tatisaipeli lexe, “Axova, vaivaikala ano'o mukalusi mupalasi noxinge?” La ane'i mikolinu lexe, “Ani, mupalasisi.” 52Laso anu muvikalane'i lexe, “Tamitema so lavulavu no anu lo se'i mixalisou lavulavu no anu voxo so Mosinge molu u'uli laxune'i tamitemaou no tualasou. La ane'i ne loxo mosou tani tatila vile. Anu ulai no tasou iauvaxe noxou so uliulixu mimi lailiaxe e teiteinu xe alavua ula.”
Tatemanu tualasou Iesua mixiunu tumali'a noxou
53Ioxe, Iesua mu'oxonu latilotilovo axone mukalu ka mulutu no tuala ne so mulai. 54Mulai la muxali avile no nunisou mo musoko'u so uvotovoto no anu tasou lavuloto noxi'a. Xe ane'i milomusou vaikalaou la mikulukemolu mo mi'oxo lexe, “Iu, itema ano'o muno'u lavulavuou a ne'eio? Xe sosovo so xavi u'oxonu axova? 55Ano'o ne telavusou. Anu kapenita olusi to! Anu nenu ne Malia. Xe tavimovimou a Tiemisi xe Iosepu xe Saimoni xe Iutasi, ne? 56Xe tavimovimou tasema a nenge'a taxoxolu 'o. Laso umomomo no anu mimi 'o xo muno'u axova?” 57La ane'i opone'i muxililiou. Laso Iesua muvikalane'i lexe, “Loxo polopeti vile uxixao xe uxali no tuala ne'ei la tamitema itaxanu ane. Ia loxo uxali no anu nunisou mo no tasou u'isalili la ane'i itaxanu to uasi!” 58Laso anu u'oxonu sosovo so xavi tavu'alo no tuala ne uasi xo ane'i ilopalanu uasi.
موجودہ انتخاب:
Matiu 13: ATA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright 1999 New Tribes Mission, Sanford, FL 32771-1487
