Zaŋ 4
4
Yesu a kar maɗay ava ŋgwa Samariya
1Yesu a cəna Farisa hay ac ka cəna, aŋga ava ndah masasəraka jene tata gaa, e ŋgec beetem kad ndana hay gaa, ka fəna ta Zaŋ. 2Eve metehwe ana sə, Yesu ava yaŋ tata, ke ŋgə beetem kad ndana kwa amta aabay, amaa maŋgana beetem kad ndana hay sə, ndah masasəraka jene tata. 3Masa Yesu a cəna ma ta Farisa hay ac ta gwaɗiya ara nesey sə, pərtakaɗ! E zleftek dapa vavara te Zudey, ka vahata kad pa vavara te Gelile. 4A da husa arŋga sə, a lada e zleŋgə jaka pa vavara ta Samariya. 5Ara nesey, a husa pe berne ta Sikar dapa vavara ta Samariya, aŋga zef ava ley masa Zakwab ta van zleezle kad wudiya Zezef. 6Ɓaandaw ta Zakwab ana mazləla faŋga ɓa. Yesu e yəv te medey, ka sasakaɓa vaw dama ta ɓaandaw ana. Mbala pas pa taɓa ta yaŋ. 7Ŋgwa Samariya ana ɓa, ke dekey ka ta təɗ yam dapa ɓaandaw ana. Yesu ka gwaɗa, gege: «Mbahw viyey yam ka say.» 8Dapa ŋgesey ana, ndah masasəraka jene ec sem pe berne ke te husemek jə ta manday. 9Amaa ŋgwa Samariya sə, ka gwaɗa, gege: «Kaa sə, ka nda Zuwef ana, yey sə, ya ŋgwa Samariya ana, naa ke nəkefiyey yam ka say sə, a ŋgana gwagumaw?» Ŋgwaz ana e gweɗ ara nesey sə, afa Zuwef hay aca dərazl yaŋ fa slam ana ava Samariya hay aabay. 10Yesu ka vahan, gege: «Daha ka sən jə masa Zlav a viya kad ndana. Asaya, daha ka sən nda magwaɗakaa: “Viyey yam ka say”, efes ma ta nəkafa sə, sesəker kaa. Ara nesey, a ta vakaa yam masa a və mesfeney.» 11Ŋgwaz ana, ka gwaɗa, gege: «Bay Mazlakava, jə ta mataɗ yam ana varakaa aabay, ɓaandaw ana maa, kweleleŋleŋ. Naa, ke te ŋgetek yam masa a və mesfeney sə, dama? 12Ka ka fəna papaŋ ta papaŋ tandakwa Zakwab masa aŋga ta vandakwa ɓaandaw ana na geyey? Aŋga, wudiya hay va gənaw tata hay ac kaa sə yam ana nesey.» 13Yesu ka vahan, gege: «Kwa waawa masa ka sə yam ana nesey, yam a ta kəɗa saya. 14Amaa nda masana yam masa ya ta vana sə, kwa yam a ta kəɗa ɓasabay, sesəker yam masa ya ta vana sə, daha ka saw, a ta tərata ke təker dapa vaw tata, təker ana, e te pelek mesfen katar ka midakw.» 15Ŋgwaz sə, ka gwaɗa, gege: «Bay Mazlakava, mbahw viyey yam ana, afa yam ana de kəɗiyey sabay, ye de vehek ka ta təɗ yam fana sabay!» 16Yesu ka gwaɗa, gege: «Daɗay, te zelek mawulak, medek kad fana.» 17Ŋgwaz ana, ka vahan, gege: «Ya ava mawal aabay.» Yesu ka gwaɗa, gege: «Megweɗ takaa təɗe: “Ya ava mawal aabay”, 18afa ka ka kəs mawulah zlam. Nda masa akwar ava aŋga təlam nesey sə, mawulak bay. Ke ke gweɗek tehwe.» 19Ŋgwaz ana, ka gwaɗa, gege: «Bay Mazlakava, ya səniya cay, kaa sə, ka nda mehwedek ma. 20Papaŋ ta papaŋ taciya hay ece kekəred ka ta cə mbahw kad Zlavay sə, dapa wudam nesey, amaa takwar Zuwef hay sə, akwa gwaɗa slam te mekekəred ka ta cə mbahw kad Zlavay sə, say de Zeruzelem.» 21Yesu ka gwaɗa, gege: «Madəmay kəs ma aɗaw. Pas ana e dekey, masa kwa akwar te kekəred ka ta cə mbahw kad Zlav Papaŋ sə, say dapa wudam nesey, daha aabay de Zeruzelem sə, ɓasabay. 22Akwar Samariya hay, akwa kekəred ka ta cə mbahw sə, kad nda masa akwa səniya bay, amaa taciya Zuwef hay, anda kekəred ka ta cə mbahw sə, kad nda masa anda səniya, afa membəl sə, e dek jaka vara Zuwef hay. 23Amaa pas ana e dekey, pas ana maa ka husakata cay, masa ndah mekekəred metehwe ana ka ta cə mbahw kad Zlav Papaŋ sə, ac ta kakəradana ava gədaŋ te Mesfen tata va eve metehwe ana, afa Zlav Papaŋ, a yah ndah masa aca kakəradana ka ta cana mbahw sə, ara nesey. 24Zlavay sə, aŋga Mesfeney, a lada ndah ma ta kakəradana ka ta cə mbahw sə, aca ra kakəradana ava gədaŋ te Mesfeney va eve metehwe ana.» 25Ŋgwaz ana, ka gwaɗa, gege: «Ya səniya, Mesi sə, e te dekey, nda masa aca zaliya Kəristi. Daha ka dakata cay sə, a ta ŋguzdandan jene hay fakwanay.» 26Yesu ka gwaɗa, gege: «Kəristi sə, yey nda magwaɗakaa nesey.»
27Dapa ŋgesey ana, ndah masasəraka jene ec ke husekeceŋ, ec ke rəzleceŋ, afa Yesu a kar maɗay ava ŋgwaz. Amaa kwa nda amta ka gwaɗa masa: «Ka wal vara vaw mey?» Daha aabay, ka kar maɗay ava ŋgwaz ana na mafay te mey sə, aabay. 28Ŋgwaz sə, haɓ! A gərda yes tata faŋga, mahway kad pe berne ke te zelekec ndana hay, gege: 29«Medekey, mawala! Ya ka ŋgat ndana ɓa masa ke gweɗiyey da yaŋ jene hay masa ya ta ŋgiya fakwanay. Gəla aŋga Kəristi sə, kwa!» 30Ndana hay, ec ke hwekey dapa berne, ec ke dekey kad vara Yesu. 31Dapa ŋgesey ana, ndah masasəraka jene aca vasiya, gege: «Raabi, ndaɓa jene.» 32Amaa gege: «Yey sə, ya ava jə ta mandə ɓa masa akwa səniya bay.» 33Ndah masasəraka jene ec ke gweɗ dapa taɓa teceŋ, gege: «Ndana mekele ka hwadana jene ta mandə ɓa geyey?» 34Yesu gege: «Jə ta manday aɗaw sə, meŋgə jə masa nda mezlərekiyey ta waya va mamaɗan mezlər masa aŋga ta vuwa. 35Akwar sə, akwa gwaɗa: “Magəra kiya faɗ heley ke te ŋgek jene hay de ley kad a wunam”, amaa yey, ya gwaɗakwar: Mabaŋgaɗa ndey, menjerey, jene hay de ley ka ŋgata cay, magəra ke ŋgek kad a wunam. 36Nda me te ŋgek jene de ley ana sə, ka ŋgat mepel meyev te mezler tata cay, aŋga dapa mecemec jeŋ ana hay ka ta njah katar ka midakw. Ara nesey, nda masləka jene va nda meŋgek jeŋ ana kad a wunam sə, ec te wesl cuweeney fa slam ana. 37Ma maɗəva ɓa ke gweɗ, gege: “Ndana a sləkiya, nda leŋgeɗ e ŋgek kad wunam”. Ma ana na tehwe. 38Ya ka zlardakwar ke te ŋgek jene hay de ley masa akwar ta həviya bay. Mahəviya sə, ndah mekele, amaa akwar sə, akwar ka tala sek avəda pe mezlər teceŋ masa ac ka sə marga dapa mabay.» 39Ndah Samariya gaa dapa berne ana ac ka kəs ma te Yesu, afa ŋgwaz ana ke gweɗec tehwe, gege: «Nda ana ka gwaɗawa jene hay masa ya ta ŋgiya fakwanay.» 40Mafay ana, mehusek tec vara vaw, Samariya hay, ac ka ŋgana mbahw a da njah vereceŋ. Yesu ka njah vereceŋ manah ecew. 41Ndana hay gaa ac ka kəs ma te Yesu mafay ta ma masa aŋga ta gwaɗiya. 42Ac ka gwaɗa ŋgwaz ana, gege: «Anda kəs ma tata nesey sə, mafay ta masa ka ta gwaɗandaw sabay, amaa mafay ta masa andaw ava yaŋ taciya ana andə ka cəna ma tata, anda səniya eve metehwe ana, aŋga sə, aŋga nda mambəla ndana hay dapa vavara.»
Yesu a mbəl wut ta mazlakava ta kafaraŋ hay ta bay
(Mat 8.5-13; Luk 7.1-10)
43Manah ecew ava dəɓa ana, Yesu ke zleftek dapa wunam ana, ka data e Gelile. 44Yesu ava yaŋ tata ana ke gweɗ, gege: «Nda mehwedek ma sə, aca hahəmiya dapa vavara tata aabay.» 45Dapa ŋgesey ana, mahusa tata e Gelile sə, ndana hay dərŋga ac ka kəsaw eve mewesley, afa eceŋ ana may ec ke dey a pa macunam te Zuwef hay de Zeruzelem, ac ka wala cah hay fakwanay masa aŋga ta ŋgiya dərŋga.
46Yesu ke veh kad gəva ta Kana dapa vavara te Gelile masa aŋga te ŋgwedek yam ka wuzam dərŋga. Faŋga, mazlakava ta kafaraŋ hay ta bay ɓa masa wudiya aŋga gwabay da Kafarnahum. 47Masa a cəna Yesu ke zleftek dapa vavara te Zudey te medə kad pa vavara te Gelile sə, aŋga may, ke zleftek, ka ŋgatafa, ka ŋgana mbahw de də way tata, a da mbəlan wudiya masa a ta məc sə, avəda. 48Yesu ka gwaɗa, gege: «Daha akwar ka wala cah hay va jene hay marəzla nda masa ye te ŋgec na aabay sə, anjəkar akwa kəs ma aɗaw aabay geyey?» 49Mazlakava ta kafaraŋ hay ta bay sə, ka gwaɗa, gege: «Bay Mazlakava, dek ke zef wagaa wat aɗaw a ta məcay!» 50Yesu ka gwaɗa, gege: «Daɗ kad wunam, wudiyak ana aŋga eve ndey.» Nda ana ka kəs ma te Yesu, ka vahata kad wunam. 51Masa aŋga dapa cəv heley sə, ndah maŋga mezlər tata hay ac ka cə yaŋ ava aŋga dapa cəvey, ac ka gwaɗa, gege: «Wudiyak ana aŋga eve ndey.» 52Ke nəkefec, gege: «Wat ana a ŋgana afəcaka sə, pas cacəkumaw?» Ac ka vahan, gege: «Taavanay, fe ler amta ta pas, kwakwaw ka həlafa fa vaw.» 53Papaŋ ta wat sə, a sənafa ler ana masa Yesu ta gwaɗa fətiya, gege: «Wudiyak ana aŋga eve ndey.» Dapa ŋgesey ana, aŋga ava ndah da hwaɗ ta way tata fakwanay ac ka kəs ma te Yesu. 54Nesey ana sə, cah meecew ana masa Yesu ta ŋgiya ava dəɓa ta masa a daɓa dapa vavara te Zudey kad pa vavara te Gelile.
موجودہ انتخاب:
Zaŋ 4: CUVnt
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL
