Zaŋ 5
5
Yesu a mbəl nda masa gəva ta vaw makula
1Ava dəɓa ana, Yesu a daɓa kad Zeruzelem mafay ta macunam te Zuwef hay. 2Anjəkar de Zeruzelem ana, zef ava ma ta way ta Təmak hay, təker mezel ava ma te Ebəre «Betzata», aŋga ava zəmbek hay zlam da cakiya ɓa, 3da dara zəmbek ana hay, ndah gwabay hay gaa manaha: Mahazlaw hay, ndah mahahalɓa va ndah masa gəva ta vaw tec maməca. [Aca ɓal yam ana da ɓəla vaw, 4afa pas mekele maskəla ta Bay Zlavay e bəreŋgek kad pe təker ana, a ɓəla yam, nda mekezl kamma pa yam ana sə, a mbəlata kwa aŋga eve mehecey hay wula wula fakwanay.] 5Faŋga ana, nda masa gəva ta vaw tata maməca ɓa, aŋga gwabay mavay kwakwar mahkar dapa yaŋ ana cahkar. 6Masa Yesu a wala aŋga manaha sə, a səniya nda ana ka njah gaa dapa mehecey tata ana. Ka gwaɗa, gege: «Ka wal membəl geyey?» 7Nda ana, ka vahan, gege: «Bay Mazlakava, ndana te mecəɓehweɗiyey pe təker ana na dapa masa ɓəla vaw sə, aabay. Amba ya cak medə kad pa sə, ndana mekele a ŋgəlawa ma.» 8Yesu ka gwaɗa, gege: «Zleftek, kəs gədegəde takaa, daɗay.» 9Faŋga faŋga ana, nda ana aŋga wewer cay, ka kəs gədegəde tata, ke dey.
Anjəkar pəsaŋga ana ŋgesey, pas ta masasak vaw. 10Mazlakava hay te Zuwef hay ac ka gwaɗa nda membəlek dapa mehecey sə, gege: «Ta pəsna sə, pas ta masasak vaw, cəv mava kad kaa ka da zaɓ gədegəde takaa aabay.» 11Amaa ke vehecen, gege: «Nda membəlekiyey sə, te gweɗiyey, gege: “Kəs gədegəde takaa, daɗay.”» 12Ac ka nəkafa, gege: «Ndana wa, masa a gwaɗakaa: “Kəs gədegəde takaa, daɗay.”» 13Amaa nda sə, a sən nda mambəliya sə, bay, afa Yesu ka data pa slam mekele, mafay ta ndana hay gaa elehey faŋga.
14Ava dəɓa ana, Yesu ka ŋgatafa nda ana dapa Way ta kwakwas, ka gwaɗa, gege: «Wala, təlam nesey, ka mambəla cay. Ka ta ŋgə mebər sabay, daha aabay sə, jə mafəna nesey ana, a ta ŋgatafakaa.» 15Nda sə, ke dey vara ndah mazlakava te Zuwef hay, gege: «Membəlekiyey sə, anjəkar Yesu.» 16E zler ta pəsaŋga ana ŋgesey, mazlakava hay te Zuwef hay ac ka zlar mayahafa ma Yesu, afa aŋga ta mbəl ndana pas ta masasak vaw. 17Amaa Yesu, ke vehecen, gege: «Kasl pəsna sə, Papa aŋga dapa mezlərey, yey may, ya dapa mezlərey.» 18Mafay ana, mazlakava hay te Zuwef hay ac ka yah cəvey ava gədaŋ ta makəɗ Yesu cukw cukw ka macəhwandaw, ac ta kəɗiya sə, mafay ta masa aŋga te ŋgə mezlər pas ta masasak vaw babəla bay, amaa mafay ta masa a zal Zlavay Papaŋ saya, ara nesey, ka cacalaɗ yaŋ tata ava Zlavay.
Matimaazlaɓ ta Wut ta Zlavay
19Yesu ka kəs ma saya, gege: «Eve metehwe ana ya gwaɗakwar Wat a zlafa meŋgə jene kwa wula wula ava yaŋ tata sə, aabay, say masa aŋga ta wala Papaŋ a ŋgiya, afa jə masa Papaŋ a ŋgiya sə, Wat a ŋgiya ara aŋga ana may. 20Papaŋ sə, a wal Wudiya, a ŋguzdan jene hay fakwanay masa aŋga ava yaŋ tata ana, a ŋgiya. A ta ŋguzdan mezlər hay mazlakava mafəna ana saya. Ara nesey, akwar ta rəzlata. 21Ara masa Papaŋ te pərekek ndana hay dapa maməcay, ke vec mesfeney. Ara aŋga ana, Wudiya may, e te və mesfeney kad nda masa a waya. 22Yaw, Papaŋ sə, a təɗ ma a yaŋ ndana aabay, amaa ka van matəɗ ma a yaŋ ndana hay sə, kad Wudiya, 23afa kwa waawa a da nahan yaŋ Wat ara ac ta nahan yaŋ kad Papaŋ. Nda masa a nahan yaŋ kad Wudiya aabay sə, a nahan yaŋ kad Papaŋ, nda mezlərekey sə, aabay may. 24Ya gwaɗakwar, nda masa a cak zləmay fa ma aɗaw, a kəs ma ta nda masa aŋga te zlərekiyey, aŋga eve mesfen katar ka midakw. Ac ta təɗana ma yaŋ aabay, amaa ka data dapa maməcay kad pe mesfeney. 25Ya gwaɗakwar, pas ana e te dekey, ka husakata təlam na cay, masa ndah maməca ac ta cəna uway ta Wut ta Zlavay, ndah macəna uway ana sə, ac ta ŋgat manjah eve ndey saya. 26Ara masa Papaŋ aŋga eve mesfeney, ara nesey, ka vana kad Wudiya a da ŋgat mesfen dapa aŋga ana. 27Ka vana matimaazlaɓ te metəɗec ma yaŋ ndana hay, afa aŋga sə, aŋga Wut ta Nda. 28Akwar te rəzl bay, afa pas ana e dekey, masa ndah maməca fakwanay ac ta cəna uway tata. 29Ndah masa ac ka ŋgə jene mambəla ana, ac ta pərakata ka ta ŋgat mesfeney. Amaa ndah masa ac ka ŋgə jene mambəla ana aabay sə, ac ta pərakata dapa maməcay kad pa matəɗ ma ta Zlavay. 30Yey sə, ya zlafa meŋgə jene ava yaŋ taaɗaw ana bay, ya təɗ ma yaŋ ndana sə, ara masa ya cəna, matəɗ ma ana sə, aŋga eve cəvey ana, afa ya yah meŋgə jə masa ya ta waya sə, aabay, amaa mawulak yaŋ ta nda masa aŋga te zlərekiyey.»
Matə yaw da yaŋ Yesu
31Yesu ke gweɗ saya, gege: «Daha ya ta tə yaw da yaŋ yaŋ taaɗaw ana sə, matə yaw ana ŋgesey, tehwe bay 32Amaa ndana mekele ta tə yaw da yaŋ yey, ya səniya, matə yaw tata da yaŋ yey ŋgesey sə, metehwe ana. 33Akwar ka zlar ndana hay kad vara Zaŋ Baatis, aŋga sə, ka tə yaw da yaŋ ma metehwe ana. 34Taaɗaw sə, ya wal makəs matə yaw ta ndana da yaŋ yey bay, amaa ye gweɗ ara nesey sə, afa akwar da ŋgat membəley. 35Zaŋ sə, aŋga ara petərla magəɗa ana, a da waɗ slam kweɗ kweɗ! Akwar ka wal mewesley da yaŋ meweɗ tata dapa manjah kusetke. 36Anjəkar ya ava matə yaw masa a fəna ta Zaŋ sə, ɓa. Mezlər hay masa ye ŋgec nesey sə, ac mezlər hay masa Papa ta vuwa te meŋgey. Ye ŋgeceŋ, mezlərey ana hay masa ya ŋgiya sə, aca tə yaw da yaŋ yey, ece ŋguzdek Zlav Papaŋ te zlərekiyey. 37Papa, nda mezlərekiyey sə, aŋga may a tə yaw da yaŋ yey. Amaa kwa akwar ka cəna uway tata aabay, kwa akwar ka wala ndey tata aabay, 38ma tata dapa akwar aabay, afa akwar ka kəs ma ta nda masa aŋga te zlərek sə, aabay. 39Akwa vaɗ ma hay masa ac mavinda dapa Ɗelewer mavəna, afa akwa wulak maŋgat mesfen katar ka midakw jaka pa. Ma ana hay ŋgesey sə, aca tə yaw da yaŋ yey. 40Amaa akwa wal medek kad vereyey ka ta ŋgat mesfen katar midakw ana bay. 41Yey sə, ya yah mehehəm vara ndana hay aabay. 42Amaa akwar sə, ya sənakwar. Akwa wal Zlav bay. 43Yey sə, ye dek eve mezel ta Papa, akwar sə, akwa gwam ka kəsiyey bay. Amaa daha ndana mekele e dek ta yaŋ tata sə, nda ana ŋgesey, akwa kəsiya. 44Akwar da kəs ma aɗaw ana sə, meemey, akwar masa akwa wal makəs mahahəm vaw takwar elehey, amaa akwa wal makəs mehehəm masa e dek da vara Zlav pal amta bay? 45Akwar ta wulakiya, ya ta jawakwar ava ma hay fa yam te ndey ta Papa bay. Ma ta jawakwar ava ma hay sə, Muyiz masa akwar ka paɗ mawulak yaŋ takwar fətiya. 46Efes daha akwar ka kəs ma ta Muyiz sə, akwa kəsa ma aɗaw avəda may, afa Muyiz ana, e vindek sə, labara da yaŋ yey. 47Daha akwar ka kəs ma masa aŋga ta vindiya aabay sə, naa akwar da kəs ma masa ye gweɗ nesey sə, memey?»
موجودہ انتخاب:
Zaŋ 5: CUVnt
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL
