ሉቃ̈ሳ 7

ዬሱ̈ሲ ማታላቃ ኣሽካ̇ራ ፋዴ

ማ̈ቶ̈ሳ 8፡5-13

1ዬሱ̈ሲ ዪኖ̇ ዎይ ዎርዣ̈ቦ ሶ̈ሊ ዉርሲኖፖ̇ ዓኒ ቂፊርና̈ሆ̈ም ሉኪ̇ዴ። 2ኢና ፔቲ̇ ማታላቃ ዎዶ̈ን ኢ ዎይሊን ካዝ ኣይላ ማር ዓይቃ̇ንድ ዎቲ̈ርዶ̈ን፥ 3ኢያሬ ዬሱ̈ሲ ኢንታ̇ክ ሉኪ̇ኖን ሲስካ̇ሪ ፌ ኣይላ ዬ̈ር ፋምፔ̈ን ጌሾ ጋ̈ሪ ኣይሁድ ጪጛሻን ጋርታ̇ፖ̇ ፔታ̇ን ፔታ̇ናን ኢ̈ክ ሚሺዴ። 4-5ኢንታ̇ሬ ዬሱ̈ሳክ ዬ̈ሪ “ዓ ና̈ሳ ኑ ዎርዣ ካ̈ሬ፤ ኑ ዎ̈ሳ ኬ̈ንዳሬ ኬ̈ጺ̇ኖ ኢያ፤ ዪ̈ኮታ̇ቦ ዪኖ̇ ኔ ኢ̈ብ ዎታንዳብ ኮሻ̇̈ሬ” ጋ̈ሪ ኮሺንቻ̇ር ጌሺዴ። 6ኢያር ኢንታ̇ባር ሉኪ̇ዴ።

ኢ ዬ̈ር ኣ̈ሊን ዬላ̇ንዳብ ዎታምባራ ማታላቃ̈ዲ ፌ ላጋ̇ን ኢ̈ክ ሚሻሪ “ጎዶ! ኔ ታ ኣ̈ል ኬ̈ ጌላንዳ̇ቦ ቤይሲኖ ኣስ ጊዳካ̇ዮኮታ̇ቦ ኔ ዳ̈ቡራፔ። 7ቴ ቴ ቆሚ̇ንዳ̇ር ኔ̈ክ ኡካ̇ንዳቦ ቤይሲኖ ኣስ ጊዳካ̇ዬ። ኔ̈ኒ ፔቲ̇ ቃ̈ላሙታ̇ ሶ̈ሌጌይን ቴ ኣይላ ፋጺ̈ሬ። 8ታ̈ፖ̇ ሾክ ጌይኖ ታ̈ና ኪ̈ቲ̇ዝ ኣላቃ ታ̈ብ ዎ። ማ ታ̈ፖ̇ ጻና ቴ ኪ̈ቲ̇ዝ ዎታ̇ዳራን ዎ። ዪዚ ቴ ፔታ̇ና̈ኮ ‘ሉካ̇ቤ’ ጌይን ሉኪ̇̈ሬ ማ ሜላ̈ዳ ‘ዓይ ዬ̈ቤ’ ጌይን ዬይሬ። ቴ ኣይላ̈ኮ ‘ዓኖ̇ ዎታቤ’ ጋ̈ር ኪ̈ቲ̇ኖን ኦ̈̈ሬ” ጌይዴ።

9ዬሱ̈ሳሬ ዪኖ̇ ሲስኪ̇ ጋራ̇ሚንታር ፌ ዎሃ ዬይዝ ዎርዣ̈ኮ ቢሪንታ̇ር ጌዪ “ቴ ዪንታ̇ብ ሶ̈ሎ፥ ዓ̈ ፌ̈ኖ ጴች ኣማ̇ና ዎ ኣሲ ሜላ ኣቲ̇ን ኢስሬ̈ላ ጋዳ̇ፖ̇ ቴ ዲጛካ̇ዬ” ጌይዴ። 10ኪ̈ቲንታ̇ር ሉኪ̇ኖ ኣሳን ማ̈ቃ̇ር ኣ̈ል ዬ̈ምባራ ማኖ ናሳ̈ዲ ፋጺንዶ̈ን ቤቂ̇ዴ።

ዬሱ̈ሲ ኣስኒ ኣይቂ̇ኖ ኣሲን ናኣ ዓይቃፖ̇ ዲንዴ

11ዪኒ̇ፖ ዓኒ ዬሱ̈ሲ ዎይሊን ጋምኣካ̇ይዶ̈ሪ ናይን ጋ̈ዝ ካታሚን ጋርታ̇ ሉኪ̇ዴ። ኢ ታማ̈ራንኬ ዎይሊን ዎርዣሬ ኢባር ዎልኣ ኢና ሉኪ̇ዴ። 12ኢንቲ̇ ቢርት ካታሚን ጋርታ̇ ጌላንድ ዎታምባራ ኣሳን ፔቲ̇ ኣሲ ዓይቂ̇ን ኣሂን ቶ̈ካ̇ር ካታ̇ሚን ጋርታ̇ፖ̇ ኬስ̇ኪ̇ዴ። ዪ ዓይቂ̇ኖ ናኣዲ ፌ ኢንዲ̇ምቦ̇ ፔታ̇ና ኢያ ሙታ̇፤ ኢንዲ̇ምባሬ ኢዝ ኣስና ዓይቂ̇ኔ። ካታሚን ጋርታ̇ፓ̇ሬ ዎይሊን ዎርዦ ኢዝባር ዱ̈ፊ ኬስኪ̇ኔ። 13ጎዳ̈ዳር ኢዞ ቤቂ̇ ሚጪንታ̇ሪ ኢዝኮ “ዓይዞ! ዬ̈ካፔ̇” ጌይዴ።

14ኢ ኢንታ̇ክ ኡካ̇ሪ ዓ̈ሺን ዎ̈ሺን ቶ̈ኪኖ ኣሳን ኤቂ̇ዴ። ኢያሬ “ኣ̈ን ና̈ራ̈ዶ! ዲንዳ̇ቤ” ጌይዴ። 15ዓይቂ̇ኖ ና̈ራ̈ዲ ሾክ ጌዪ ዶኣሪ ሶ̈ሊንቲ̇ ኤ̈̇ዴ። ዬሱ̈ሳር ኢያ ኢ ኢንዲ̇ምቦ ኢሚ̇ዴ።

16ዎይን ኢ̈ችባራ ጾ̈ሳ̇̇ ጋላቲ ሙታ̇ዶ̈ሪ “ጴች ናቢ ኑ ጊዳ̇ ኬስኪ̇ኔ፤ ጾ̈ሲ̇ ፌ ዎርዣ ፋንዳ̇ብ ዬይኔ” ጌይዴ። 17ዪ ዬሱ̈ሳ ኦ̈ሳዲ ዪሁዳ ጋዳ̇ ዎይኬ ኢና ቡጊድባር ዎ ጋዳን ጋርታ̇ ዎይ ሲስኪ̇ንቲ̇ዴ።

ዬሱ̈ሳኬ ጻማ̇ቂዛ ዋ̈ኒ̇ሳክ

ማ̈ቶ̈ሳ 11፡2-19

18ጻማ̇ቂዛ ዋ̈ኒ̇ሳ ታማ̈ራንሬ ዪኖ̇ ዎይን ዋ̈ኒ̇ሳብ ሶ̈ሊዴ። ኢያሬ ኢንታ ጋርታ̇ፖ̇ ናምኣን ጼይጋሪ፥ 19ኢንታኮ “ዪንቲ̇ ጎዳ̈ኮ ሉካ̇ሪ ‘ዬይሬ ጌይኖ ክርስቶ̈ሲ ኔ̈ናቤ ዎይ ሜል ኣስ ኑ ና̈ጋኔ?’ ጌይኔ ጌብቴ̇” ጋ̈ር ኪ̈ቲ̇ ሚሺዴ።

20ኣሳንሬ ዬሱ̈ሳክ ዬ̈ሪ “ጻማ̇ቂዛ ዋ̈ኒ̇ሲ ‘ዬይሬ ጌይኖ ኔ̈ናቤ ዎይ ኑ ሜል ኣስ ና̈ጋኔ’ ጋ̈ር ኦይጫ̇ምፔ̈ኒ ኑ̈ና ኔ̈ክ ሚሺኔ” ጌይዴ።

21ዪና̇ ኢዝባራ ዬሱ̈ሲ ዎይሊን ኣስ ዱማ ዱማ ዓርጋፖ̇ ፋ፣ ኢ̈ታ ኣያ̇ናር ኢንታ̇ ጋልዳፖ̇ ኬሲ̇፣ ዎይሊን ኣ̈ፊ ዎቢ̇ኖ ኣሳንሬ ቤቃ̇ምፔ̈ን ዎቲዴ። 22ዬሱ̈ሲ ዋ̈ኒ̇ሲ ኢንታ̇ ኪ̈ታ̇ር ኢ̈ክ ሚሺኖንኮ “ዪንቲ̇ ሉካ̇ር ዪንታ̇ ኣ̈ፍባር ቤቂ̇ኖንዲኬ ዪንታ̇ ዋይንባር ሲስኪ̇ኖን ዋ̈ኒ̇ሳብ ሶ̈ሊብቴ̇። ኣ̈ፊ ዎባ̇ን ቤቂ̇ኔ፤ ቶሂ ዎባ̇ን ዬ̇ኔ፤ ሹያ ዓርጋባር ማኖን ፋጺኔ፤ ዱላ̇ን ሲስኪ̇ኔ፤ ዓይቂ̇ኖን ዓይቃ ጋርታ̇ፖ̇ ዲንዲኔ፤ ዎርባያንቦ ዎጛላ ሳባ̇ኪንቲ̇ኔ። 23ታ̈ና ሲባ̈ሶ ኣሲ ኣንጂንቲ̇ኖ̈ዳ” ጌይዴ። 24ዋ̈ኒ̇ሲ ኢንታ ኪ̈ታ̇ር ሚሺኖ ኣሳን ማ̈ቂ̇ ሉኪ̇ኖፖ ዓኒ ዬሱ̈ሲ ዎርዣ̈ቦ ዋ̈ኒ̇ሳባዝ ሶ̈ሊ ኤ̈̇ዴ። ዪንቲ̇ ዚቃንታ̇ ባራሃ ጋርታ̇ ዋ̈ኒ̇ሳክ ኣብዝ ቤቃ̇ንዳ̇ ጌዪ ሉኪ̇ና? ኣይጊ ኤንኢሳዝ ሾምባቂ̇ንዲፌ̈ኖ ጌዳክ ዓኒክ ጌይዝ ኣስ ቤቃ̇ንዳብ ሉኪ̇ና? 25ዓት ዪ̈ዲኮ ኣብዝ ቤቃ̇ንዳ̇ብ ሉኪ̇ቴ? ቆይሲዝ ኣፊላ ማኢኖ ኣስ ቤቃ̇ንዳቤ̇? ቆይሲዝ ኣፊላ ማኣር ዶባርቅ ዶባርቅ ጌዪ ኦቲራባራ ዶኢዛን ካ̈ታ̈ል ዎ። 26ዓት ዪ̈ዶኮ ኣብዝ ቤቃ̇ንዳብ ሉኪ̇ቴ? ናባ ቤቃ̇ንዲያ? ኣ̈፥ ቴ ዪንታ̇ብ ሶ̈ሎ! ዪንቲ̇ ኢያ ቤቃ̇ንዳ ጋ̈ሪ ሉኪ̇ኖ ና̈ሳ̈ዲ ኢ ናቢፓ̇ር ሺ̈ሬ።

27“ ‘ኔ ጎይሚን ኔ ቲ̈ን ኮሺንቺ̇ዛ ቴ ኪ̈ታ ኣስ

ኔ̈ፖ̇ ቲ̈ኒታ̈ራ ሚሻንዳ’ ዪዝ ጌዪ ጌ̈ሻ̇ ማጻ̈ፋ ጋልዳ ጻ̈ፊንቲ̇ኖዲ ኢባዝ ጻ̈ፊንቲ̇ኔ።

28ቴ ዪንታ̇ክ ጋ̈ዚንዳ ሳ̈ዝ ጋልዳ̇ ዬሊንቲ̇ኖ ኣሲ ዎይ ጋርታ̇ፖ̇ ዋ̈ኒ̇ሳፖ̇ ሺዛ ባዬ̇። ዎቲናካሬ፥ ጾ̈ሳ̇̇ ካ̈ቲቲ ጋርታ̇ ዎይ̈ፖ̇ ጉ̈ጺዛ̈ዲ ኢ̈ፖ ሺ̈ሬ” ጌይዴ። 29ሜላ ኣቲ̇ን ቃራጻ ቃጺሲዛንሬ ኣታካ̇ይዶ̈ር ዪኖ̇ ዬሱ̈ሲ ሶ̈ሊኖ ቃ̈ሊን ሲስኪ̇ኖን ዎይ ዋ̈ኒ̇ሳ ኩሽታ̇ ጻማ̇ቂንቲ̇ ጾ̈ሳ̇̇̈ቦ ማ̈ቃ̇ዝ ቦንቺ̇ን ኢሚ̇ዴ። 30ፋራሳ̈ዋንኬ ሙ̈ሳ ሂጋ̇ ታማ̈ርሲዛን ዋ̈ኒ̇ሳ ኩሽታ̇ ጻማ̇ቂንታ̇ካ̇ይ ኣታ̇ሪ ጾ̈ሲ̇ ኢንታ̇ብ ኮሽ ባዝ ኦ̈ንዳ̇ ቆፒ̇ኖን ኤካ̇ብዳ ጌዪ ኢጺ̇ዴ።

31ኢናፖ̇ ዬሱ̈ሲ ኢንታኮ “ዪዚ ቴ ዓታ̇ባሮ ኣሳን ዓን ኣብዝባር ማይጺሳኖ? ኢንቲ̇ ኣብዝ ማይጺ̈ራ? 32ኢንቲ̇ ጋቢ ጋልዳ̇ ዶኣሪ ዎልዎልኣ ጼይጊ ሙታ̇ዶ̈ሪ፥

“ ‘ኑ ዪንታ̇ብ ዚምቢ ፉጊ̇ን፥

ዪንቲ̇ ዶ̈ጛካ̇ይ ኣቲ̇ዴ፤

ኑ ዪንታ̇ብ ሳን፥

ዪንቲ̇ ዬ̈ካካ̇ይ ኣቲ̇ዴ’ ዪዝ ጌይዝ ናኣን ማይጺ̈ሬ።

33ኣባ ጌዬጌይንዶ ጻማ̇ቂዛ ዋ̈ኒ̇ሲ ጾ̈ሚ ሙታ̇ ፊ̈ሺ ሞ̈ካ̇ይኬ ዎይና ጃ ኡሽካካ̇ይ ዬይን ዪንቲ ‘ኢ ጋልዳ̇ ኢ̈ታ ኣያ̇ና ዎ’ ጌይዴ። 34ታ ኣሳ ናኣ̈ዲ ሙያሙታ̇ኬ ኡሽካ̇ሙታ ዬይን ዪንቲ̇ ‘ዓ ሙንትኬ ኡሽኬ ዶሲዝ ዣጫ፥ ቃራጻ ቃጺሲዛንብኬ ናጋራንቻ̇ንቦ ላጋ̇̈ዳባያ?’ ጌይዴ። 35ዪዚ ጾ̈ሳ̇̇ ኤሪቲን ኪን ማ̈ቂ̇ኖን ኤሪንታ̇ዚንዳ̇ ኢዝባራ ዬ̇ዝ ኣሳንባራ” ጌይዴ።

ፔቲ̇ ማጫ̇ዶ̈ር ዬሱ̈ሳ ሺ̈ታ̇ ቆቲሳዴ

ማ̈ቶ̈ሳ 26፡6-13፤ ማ̈ርቆ̈ሳ 14፡3-9፤ ዋ̈ኒ̇ሳ 12፡1-8

36ኢናፖ̇ ፋራሳ̈ዋን ጋርታ̇ፖ̇ ፔታ̇ና̈ዲ ፌባር ዎልኣ ቡና ኡሽካ̇ምፔ̈ኒ ዬሱ̈ሳ ጼይጊዴ። ኢያሬ ና̈ሳ ኣ̈ል ጌላሪ ቡና ኡሽካ̇ንዳ̇ብ ዶኢንዶ̈ን፥ 37ኢና ካታሚን ጋርታ̇ ዎ ፔቲ̇ ማጫ̇ ናጋራንቻ̇ዶራ̇ ዬሱ̈ሲ ፋራሳ̈ዋ ኣ̈ል ጌላር ቡና ኡሽካ̇ንዳብ ዶኢኖን ሲስካ̇ራ ኣልባስጢሮ̈ሳ ጌይዝ ሹችባር ኦ̈ሲንቲኖ ፔቲ̇ ቢልቃ̈ጻ ኩም ሺታ̇ ኤካ̇ር ዬ̈ዴ። 38ኢዛ ዬሱ̈ሳክ ጋስ ጎይ ዬ̈ራ ኢ ቶሂን ላፍ ኤቃ̇ር ዬ̈ካ̇ ኣብጻ̇ዚምባራ ኢዝ ኣብን ኢ ቶሂን ጋልዳ ጾኪ̇ን ፌ ቆሚ̇ን ኢሲንንባር ቁቻ̇ር ካሊ̇ሳዴ። ኢናፖ̇ ኢ ቶሂን ዬርቃ̇ ሙታ̇ ሺታ̇ ቆቲሳዴ።

39ኢያ ጼይጋር ፌ ኣ̈ል ጌልሲ̇ኖ ፋራሳ̈ዋ̈ዲ ዪኖ̇ ኣሲን ዎቲኖን ቤቃ̇ሪ “ዓ ና̈ሳ ናቢኮ ኢያ ኤ̈̇ኖ ኣሲን ኢዛ ኦ̈ናኮ፥ ማ ኢዛ ዎዛርፌ̈ኖ ናጋራንቻ̇ ኣስኮ ኤሪ̈ርዶ̈ን” ጋ̈ሪ ፌ ቡ̈ዳ ጋርታ̇ ቆፒ̇ዴ።

40ዬሱ̈ሲ “ሲሞ̈ኖ! ቴ ኔ̈ቦ ሶ̈ሊዝ ባዚ ዎ” ጌይን፥ ኢያሬ “ኣስታማ̈ራ̈ዶ! ዓት ዪዲኮ ኔ ሶ̈ላቤ” ጌይዴ።

41ዬሱ̈ሳር ኢ̈ኮ “ፔቲ̇ ኣስ ጋልዳፖ̇ ሚ̈ሺ̇ ታልቃ̇ር ኤኪ̇ኖ ናምኢ ኣሳን ዎ። ና̈ሳ ፔታ̇ና̈ዲ ኢሺ̇ን ጼ̈ታ ዲና̈ራ፣ ናምኢዲ ኢሺ̇ን ታጳ̇ ታልቂ̇ ኤኪ̇ኔ። 42ታልቂ̇ኖ ኣሳን ጪጊ̇ዝ ባዚ ዪን ና̈ሳ ሚ̈ሻ̇ ላ̈̈ዲ ኢንታ ኣጪን ኢንታ̇ብ ማ̈ሪዴ። ዪን ናምኢ ኣሳን ጋርታ̇ፖ̇ ኢንታ̇ብ ታልቂ̇ኖ ና̈ሳ ሺ ካዛ ዎ̈ዳ?” ጌይን፥ 43ሲሞ̈ኒ ኢ̈ኮ “ዎይሊን ኣጫ̇ ጋልዳ̇ፖ̇ ማ̈ሪንቲ̇ኖ ና̈ሳ ታ̈ክ ማይጺ̈ሬ” ጋ̈ር ማሂን ዬሱ̈ሳሬ “ኣ̈ ኔ ሶ̈ሊኖን ኪን” ጌይዴ። 44ኢናፖ̇ ዓኒ ዬሱ̈ሲ ኣሲንኮ̇ ቢሪንታ̇ሪ ሲሞ̈ናኮ “ዓና̇ ኣሲን ኔ ቤቃ̇̈ራ? ቴ ኔ ኣ̈ል ጌሊን ኔ ታ̈ብ ቶህ ዋ̈ ኢማ̇ካ̇ዬ። ኢዛ ፌ ኣብንባራ ቴ ቶሂን ሻኢንቻ̇ራ ፌ ቆሚ̇ንባር ቁቻ̇ዴ። 45ኔ ታ̈ና ዉርሲ ዬርቃ̇ካ̇ዬ፤ ኢዛ ቴ ዓንዳ̇ ጌሊኖንምፖ̇ ኤ̈̇ራ ቴ ቶሂን ዬርቃዚን ኣሻ̇ካ̇ዬ። 46ኔ̈ኒ ሜላ ኣቲ̇ን ቴ ቆሚ̇ን ዛይታ ቆቲሳካ̇ዬ። ኢዛ ቴ ቶሂን ሺታ̇ ቆቲሳዴ። 47ዪ̈ኮታ̇ቦ ቴ ኔ̈ክ ጋዚንዳ̇፥ ኢዛ ታ̈ና ዎይሊን ካኖኮታ̇ቦ ኢዝኮ ዎይሊን ናጋራ̈ዲ ኢዝቦ ኣቶ̇ ጌዪንቲ̇ኔ፤ ጊላ̇ ኢ̈ብ ኣቶ̇ ጌዪንቲ̇ዝ ና̈ሳ̈ዲ ኢ ጊላ̇ ካ̈ሬ” ጌይዴ።

48ዬሱ̈ሳር ኣሲንኮ̇ “ኔ ናጋራ ኔ̈ብ ኣቶ̇ ጌዪንቲ̇ኔ” ጌይዴ። 49ኢባር ዎልኣ ዶኣር ቡና ኡሽኪ̇ዝ ዛቃ̇ንሬ “ዓ ኣሳ ናጋራ ኣሳብ ኣቶ̇ ጋ̈ንዳ̇ብ ዳንዳኢዛ ኢ ኦ̈ኖ?” ጋ̈ሪ ፌ ቡ̈ዳባር ቆፒ̇ዴ። 50ዬሱ̈ሳሬ ኣሲንኮ̇ “ኔ ኣማ̇ኒን ኔ̈ና ፋኔ፤ ሳሮ ሉካ̇ቤ” ጌይዴ።

موجودہ انتخاب:

ሉቃ̈ሳ 7: ኦጫ̈ቃማ

سرخی

شئیر

کاپی