Mateu 24
24
Isus Nafoyung sabaliwa at Fakatabuan fag ngay Menit
Mk 13:1-13; Lk 12:5-19
1Ay Isus naduksun siginan Dius at bale ay kaduge glao, at ngay tagadal ankakbang sa anya laman namalag sa anya Dius at bale ay tiba yak afud bale. 2Ay Isus nalong sat ngay tagadal te, “O glag am in fag ngay afud bale? Matuyan nu glong au ayu te, abandi ban we gang ya gtudtungudan. Fagayu ban umrasras wan.”
3Ay gina Isus malunggung sis Buksul Ulibu, at ngay tagadal ankakbang sa anya gina yud sanya tibak taw ay glong anya te, “Foyungi emi te, seduge ban nu kafasludan takatanya, ay setain ban nu saful ami te, gakadasugun wo, ay nu kadasug at fakatabuan fag ngay menit?”
4Ay Isus nabalus te, “Mataganani tua laman diam gadayan nusnga sinu. 5Aroro ngayu bank taw kadasug ay glong te, ‘Au wan Dius at nafili fag Fun,’#24:5 Dius at nafili fag Fun: sas Griegu, Kristu. Anggan t.23-24. ay gdaya ban ngayuk taw. 6Ay dewa ban am nadungug ngay awayan at munakbang si ayu, ay e dungganan am te, e gawayan ngayayu, lag kalimu. Matuyan, umfasludan ban takatanya, dewa katanya, bunya kanya at fakatabuan fag ngay menit. 7Aroro tibak talun ban at ngay taw at fagfawayanun tiba yangayk talun at ngay taw. Ay sik fun at ngay taw gfawayan yangay ban sik fun at ngay taw, ay sa ban tibak talun maksvn nu malunus ay nu e faleleg. 8Takatanya fagayu famasigad takadasug fag ngay fagidapun, kata sik mangena nu gidapan gina gafasalugun.
9“Ginanya ban e ggamat ayu ay gtaban sat mauri fag ngay taw, laman gfauri ay namabul ayu. Fagayu talun ban at ngay taw kauri yangay ayu, aroro gafanud am sa angku. 10Ay ginanya ban ngayuk taw gubun at fagafanudun. Ay kanya ban fagayu gfoyung at ngay iba sat mauri fag ngay taw ay kadkaurian. 11Ay ngayu ban takadasug ay kamuagan te, ‘Au wan Dius at taglong at sadi,’ ay nandaya ban ngayuk taw. 12Ay ngayu bank taw wa kesug ya angku, aroro umkayu ban at fagmauriun. 13Ay dewa katanya at namabakvd sat fagafanudun sitsigons fakatabuan, umlangfe tua ban. 14Ay e gfoyung ban sas fagdaul daga at Masine fag Barita sabaliwas Dius nu gfagtainan, laman sas fagayu talun at ngay taw sumaful. Ay sanya ginan, kadasug wan at fakatabuan.
Tagfayud e Masuad Dius at Bale
Mk 13:14-23; Lk 21:20-24
15“Ay lumag ban am at maksvn fag mauri tagfayud e masuad Dius at bale. Dius at taglong Daniel nalong sabaliwa takatanya. (Nusnga sinu tagtap tuy fag longan, atogdungugi.) 16Ginanya ban, fagayu taw tagsis talun Udea lagyui sa sangay buksul. 17Ay sik taw tagsit tungud bale, nu natustus, lag gsakbo ya sat bale laman namul nusnge wain. 18Ay sik taw tagsit gamasun, lag guli ya sat bale laman namul at lanbung. 19Ay ginanya ban fag ngay menit, afanyuan ngay tagfafion ay anggan at ke fagfasusuun. 20Darangini te, nu glagyu am bunwa sis abagat, ay anggan sis Famiangalay fag Menit. 21Aroro ginanya ban fag ngay menit, maksvn takadasug fag faurianan, gtungud yay fagayu faurianan siginan Dius nu kawat fagdaul daga dasug katsi, ay wa ban e gtungud ya. 22Dius ban nu dway ban nafagud kanya fag buknga, wa ban e gleleg ya. Ay dewa katanya, aroro kesug tua at nafili fag ngay taw, gfagud way ban ginanya fag buknga.
23“Ay ginanya ban, dewa e nalong ayu te, ‘Iste wan Dius at nafili fag Fun,’ ay dewa e nalong te, ‘Sanya wan,’ lag gafanud. 24E kadasug ban ay kamuag te, ‘Au wan Dius at nafili fag Fun,’ ay ‘Au wan Dius at taglong at sadi.’ Ay kanya ban namalag at madulo ay at mabalyanan fag ngay fakamulun, laman nanfamaskudan nanfandaya anggan Dius at nafili fag ngay taw. 25Amatangi, nafoyung kwan sa ayu takadasug ban.
26“Nu katanya, dewa tibak taw glong ayu te, ‘Sanya wan Dius at nafili fag Fun sis talun at yud e taw,’ lag am sanya. Ay dewa e glong ayu te, ‘Sanya wan siwa sad bale,’ lag am gafanud. 27Aroro au, Taw at Baguama, nu kadasug au, kata sik limbad nu gdamlag siginans fakamenitan ay kadasug sas fakayabian. 28Kata sik faydayuanan te, ‘Nusnga nday ke mabulan, ugak nangaful sanya.’
Taw at Baguama nu Kadasug Ban
Mk 13:24-27; Lk 21:25-28
29“Ay nu nlangfe wan kafag faurianan, ‘menit ban umdulum, ay magdanun wa gyamag ya, ay anggan ban ngay galeme katong siginans banwa, ay fagayu ke fagmabalyananun sis banwa muigan.’#24:29 Isayas 13:10. 30Ay sanya ginan umsure Taw at Baguama at fakatoglagan sis banwa. Ay ginanya, fagayu taw sas fagdaul daga kabalu. Ay kanya ban fagayu lumag angku Taw at Baguama nu kadasug au sis linyabu sis banwa, ay e fagmabalyananun au ay e fagmasineun au daul. 31Ay gina ban e gbudyung daul gsugu kban ku ngay tagbarita, laman namaful ku nafili fag ngay taw siginans fagayu talun ay dewa ndaginan fag fungfung daga.
Isus at Faydayuanan sabaliwas Malagu
Mk 13:28-31; Lk 21:29-33
32“Amatangani ku faydayuanan sabaliwas malagu. At sanga nu maragbuk wan, ay at don nu karabas wan, saful wam te, gakamanguneun wan. 33Katanya yangay nu lumag ban am ku longan aro nu kafasludan, sumaful wam te, au, Taw at Baguama, gakadasugun kwan. 34Matuyan nu glong au ayu te, katsi fag ngay taw tiba ya kabul yakmay ban anfasludan fagayu ku longan. 35Banwa ay daga kalyam way ban, dewa katanya, ku longan ban sanya tua gugat kabavn.
We Taw Saful te, Ginain Ban Taw at Baguama nu Kadasug
Mk 13:32; Lk 17:26-27,34-35
36“We taw nasaful te, ginanya ban fag menit ay fag buknga nu kafoli au. Anggan Dius at ngay tagbarita sis banwa wa yangay nasaful. Ay au oma, Dius at Baguama, kwa nasaful. Ku Mama way lang tagsaful. 37Au, Taw at Baguama, nu kadasug kban, ngay taw at fakamulun kata ebi gina Nui at buknga. 38Ginanya, gina lino daul gakadasugun, ngay taw mabayan way fia gfangon ay ginum ay gdaddadwaan, yakmay Nui nasakbo sas sakayan lino. 39Ay kafag ngay taw wa nasaful takafasludan, yakmay kafag lino daul andasug ay nafapnut anya fagayu. Ay katanya yangay ban nu kadasug au, Taw at Baguama. 40Ginanya ban fag menit e sik duama sis gamasun. Ay e nabul wan at sadi, ay at usama anfamato way. 41Ay e sik duena glubuk, ay e nabul wan at sadi, ay at usena anfamato way. 42Nu katanya, mafalganani tua gugat, aroro wam nasaful te, ginain ay Fun nu kadasug. 43Amatangani te, sik taw nu nasaful di te, ginanya ro tagfangkamul nu kadasug sat bale, kanya ro mafalganan tua, ay wa ro gfabayan nu gsakbo sat bale. 44Nu katanya, anggan am mafalganani tua. Aroro nu kadasug au, Taw at Baguama, gina way ban am yud gamatangan te, kadasug kwan.
At Matuyan ay at Mauri fag Fagsuguan
Lk 12:41-46
45“Katatuy at matuyan ay at mamatanganan fag fagsuguan. At tagfayafun nasugu anya te, ‘Alagai ku ngay fagsuguan ay fafangoni tua anya fagayu galay fanfangonan.’ 46Mauseganan kafag fagsuguan, gina at tagfayafun kadasug, nu gfakamulun tua fia at fakamulun. 47Matuyan nu glong au ayu te, at tagfayafun namatigwanan sanya fag fagsuguan fagayu at fagagbilugun. 48Ay sik fagsuguan nu mauri way, kanya gamatangan way te, ‘Glugo yay ban ku tagfayafun nu guli,’ 49ay gfasigad gfalang at ngay iba, ay gfangon ay ginum gfasfuan ngay kinnanad glanguan. 50At tagfayafun umdasug gina kanya fag fagsuguan yud mafalganan fag menit ay fag buknga, 51ay namaurianan anya maksvn, ay namalo sa sangay takamaningan. Ay kanya ban gwayway gugat sanya ay gfaringgit at bagang.
موجودہ انتخاب:
Mateu 24: OCCT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright © 2021 by OMF International, Philippines
