Mateu 23
23
Isus at Famararang sabaliwa Takamaningan
Mk 12:38-39; Lk 20:45-46
1Ay Isus nafoyung sa sangay taw anggan sat ngay tagadal te, 2“Ngay tagfoyung Muisis at Faugali ay ngay taw Fariseu, kanya wan tagfayamag Muisis at Faugali. 3Ay nu katanya, faningi fagayu at longan ayu. Ay lag gfaning at ugali, aroro kanya gfoyung way lang ay wa gfaning at foyungan. 4Kanya fagayu nafamut sik ngay suguan takata sik mabyat fag ngay famubaun at yud kamad, ay nafafasanan sa sangay taw. Ay wa kaylat ggubuk nusdi nanlangbud sumyu.
5“Ay kafag ngay taw gfalagan way lang, laman ngay taw gdama anya. Kanya nafabia fagsuadan Dius at Longan sit alfuyu,#23:5 fagsuadan… alfuyu: ngay fagsuadan sirut, sanya at bilug ngay afud Dius at Longan, ngay taw Udyu at fagsiukun sit alfuyu ay sit take. ay nafaba at farangfangan sit fungfung lanbung.#23:5 lanbung: ngay taw Udyu gina gdarangin, gfasat alfuyu takata sik umut at ke farangfangan sit fungfung. 6Ay gina e ngay fagmafulun, at fakaylatun sa tua at masine fag ngay faglunggungan, ay anggan sa sangay bale fakafulan. 7Ay gina sis wabilug furuan, kaylat ngay taw nu gseg anya, ay nu glong sa anya te, ‘Takamoyung.’
8“Ay am, lag am kaylat ay iba nu glong sa ayu te, ‘Takamoyung.’ Sadi yakman ay Takamoyung. Aroro fagayu am duksayan am. 9Ay lag glong sas nusnga sinu ste swa daga te, ‘Mama,’ bunway ay mama. Aroro ay Mama sadi way tagsi tuas banwa fag Mama. 10Ay lag am kaylat ay iba nu glong sa ayu te, ‘Em Fun,’ aroro ay Fun sadi way, au tua Dius at nafili fag Fun.#23:10 Dius at nafili fag Fun: sas Griegu, Kristu. 11Ay nusnga sinu tiba tungud si ayu, katai way sik fagsuguan. 12Ay nusnga sinu takamatungudun, abandi ban Dius gfababa anya, ay takamababaun, Dius ban gfabat tua anya.
Isus Gagras taw Udyu at ngay Tagfangguna
13“Ida, am fag ngay tagfoyung Muisis at Faugali ay am fag ngay taw Fariseu, ngay takamaningan wayam! Gsalag am fagayu taw laman ban wa manangatap sas Dius at fagfagtainanan. Ay anggan ban am, wam manangatap, aroro gsalag am takaylat nangatap.
14“Ida, am fag ngay tagfoyung Muisis at Faugali ay am fag ngay taw Fariseu, ngay takamaningan wayam! Aroro gfamin am ngay fagbubayun at ramraman. Ay kamatungudun am siginan nu gdarangin am tangaba. Nu katanya way ay fakamulun, kaugat yay ban nu gafaurianan am.
15“Ida, am fag ngay tagfoyung Muisis at Faugali ay am fag ngay taw Fariseu, ngay takamaningan wayam! Glo am sas dagat ay sas fagdaul daga, laman dewa sadik taw gafanud sa ayu. Ay kafag sadik taw nu nafanud sa ayu, gtungud yay ban ayu nu gafaurianan sas afuy daul.
16“Ida, am takata at yud glag fag ngay taw tagtabanan ay iba. Ay longan te, ‘Nusnga sinu tagfatuyan at longan sas Dius at bale, kanya fag longan we tungkul. Ay nusnga sinu tagfatuyan at longan nu sa tuas ramraman tagsis Dius at bale, kanya fag longan e tungkul tua.’ 17Kata wayam at yud glag ay at yud mamatanganan fag ngay taw! Inday nu gamatangan am, kanya fag dua at ke tungkul, Dius at bale at ramraman ay Dius at bale tagfasine kafag ramraman? 18Ay nalong yangay am te, ‘Nusnga sinu tagfatuyan at longan nu sa way baliwa at fagirugan fanggalangun, kanya fag longan we tungkul. Ay nusnga sinu tagfatuyan at longan nu sa tua baliwa at fanggalangun, kanya fag longan e tungkul tua.’ 19Kata wayam sik ngay taw at yud glag! Inday nu gamatangan am, kanya fag dua at ke tungkul, at fanggalangun, ay at fagirugan tagfasine kafag fanggalangun? 20Aroro katanya, sik taw tagfatuyan at longan nu sa way baliwas fagirugan, at masuad kanya gfatuyan way sas fagirugan ay anggan fagayu tagsanya. 21Ay nusnga sinu tagfatuyan at longan nu sa way baliwa Dius at bale, at masuad kanya gfatuyan sas Dius at bale ay anggan sas Dius, aroro kanya gbanwan sanya. 22Ay nusnga sinu tagfatuyan at longan nu sa ways banwa, at masuad kanya gfatuyan at longan sabaliwa Dius at faglunggungan ay anggan at malunggung sanya.
23“Ida, am fag ngay tagfoyung Muisis at Faugali ay am fag ngay taw Fariseu, ngay takamaningan wayam! Dewa am gfon at fasafuluk afud sas Dius siginan ay famaenamnam fakonun, kata balanuy ay banglad, nalyam wayam gfakamulun at mafanud fag ngay suguan sis Muisis at Faugali, kata nu gfakamulun at matuyan sa ay iba, ay nu kafanyu am ay iba, ay nu matuyan ay longan sa ay iba. Nu ddi am nalyam at mafanud fag ngay suguan, dangay kalyam anggan talay fag ngay suguan. 24Kata wayam at yud glag fag ngay taw tagtabanan ay iba. Gfae famalabag am takalimus si ay fanginum laman di e bangyus, ay dewa katanya ay fagngvpun sik kamelyu tua.
25“Ida, am fag ngay tagfoyung Muisis at Faugali ay am fag ngay taw Fariseu, ngay takamaningan wayam! Dewa am nafegus ay faginuman ay ay fagfangonan fag ngay taya at guyuy, at bilug mapnu way fagfangalabianun ay fagfangagoun. 26Am fag ngay taw Fariseu, kata wayam sik ngay taw at yud glag! Fegusi tua taguna ay taya ay ay fagfangonan at basad, laman anggan at guyuy mafegusan tua.
27“Ida, am fag ngay tagfoyung Muisis at Faugali ay am fag ngay taw Fariseu, ngay takamaningan wayam! Kata wayam sik ngay fagfolian at mafasinean sday guyuy, ay masine nu kalag. Ay dewa katanya, sad basad mapnu way at ngay kinbul at ngay bini ay fagbadanun. 28Katanya yangay am. Ngay taw nu glag ayu, matuyan tuam. Ay dewa katanya, sa ay basad mapnu way fakamaninganun ay fagmauriun.
Ngay Takamaningan nu Gafaurianan
29“Ida, am fag ngay tagfoyung Muisis at Faugali ay am fag ngay taw Fariseu, ngay takamaningan wayam! Kawat am ngay fagfolian laman sas Dius at ngay taglong, ay gfasine yangay am ngay fagfolian laman sat matuyan fag ngay taw. 30Ay glong am te, ‘Nu gleleg di mi gina em ngay mangaguyang gleleg wa romi ggubuk gfabul Dius at ngay taglong.’ 31Nu katanya way ay longan, glong wam te, ‘Takamabul ami fag ngay taw at ngay kasugfunanan.’ 32Nu katanya, fatabui wan ay ngay mangaguyang at nafasigad!
33“Kata wayam tagfandaya fag ngay ule at maganga! Wa ban am masaruy faurianan sa ayu sas afuy daul. 34Nu katanya, sumugu kban sa ayu sik ngay taglong, ay sik ngay mamatanganan, ay sik ngay takamoyung. Ay tiba ban gfabul am, ay tiba ban tumuktuk am sas fasulungan kayu, ay tiba ban gfalang am sa ay ngay bale fakafulan, ay tiba ban gfafalo am sa sangay furuan laman namauri am anya. 35Sumugu kban kafag ngay taw sa ayu, laman Dius at nafalganan fag faurianan sas fagayu at nafabul at matuyan fag ngay taw kadasug yangay ban fia sa ayu, siginan ebi at faurianan sat nafabul Abel, sitsigon at nafabul Sakaryas, Barakyas at baguama. Kanya ebi ay nafabul gina sisad wabilug Dius at bale ay at fagirugan fanggalangun. 36Ay matuyan nu glong au ayu te, umfasludan ban takatanya sa ayu fagayu.
Isus nu Kesug ngay Taw Erusalem
Lk 13:34-35
37“Erusalem, Erusalem, o wan tagfana gang ay tagfabul Dius at nasugu sa emu fag ngay taglong. Ngayu ginan koma namaful fagayu am taw, kata sik fanginan nu gfaful at ngay riangan sat daga fakfak ay wo kaylat. 38Dungugani! Wa ban e gbanwan ya si emu. 39Ay glong au emu te, wa ban o lumag angku yakmay ban o lumong te, ‘Segi takadasug sa tam Fun at ngayan.’ ”#23:39 Alubad 118:26.
موجودہ انتخاب:
Mateu 23: OCCT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright © 2021 by OMF International, Philippines
