PITUNBEE 14
14
Pɔli nì Baranabasi nì Ikonyomu kàʔà ni
1Ki dá hanri wa Ikonyomu kàʔà ni ge nɛ paʔa dá hanri wa Ancɔsi kàʔà ni pomo ma na ge. Pɔli nì Baranabasi nì we à pe yâ je wa Juwifiyee pe sɛrigo ni ge mà yo pé ni pomo ma na fɔ Juwifiyee ní, ní klòʔo ke tɔɔ hɛɛn ní be à pe fafaʔa ma yere Jesu na we. 2Di Juwifiyee bee pe ìn dà yere Jesu na we, à pe basɛriyee pri be mà pe wa sɛrifɛɛ na be. 3Pɔli nì Baranabasi nì à pe nyiŋi fafaʔa kɔ wa Ikonyomu kàʔà ni ge mà horo na nyu wò fɔlɔ wi fanŋa nì ge. Ga pe dáa nyu wi glanʔama na me ge, wɔ̀ɔ naʔa teri hɛɛn na be jɛnʔɛlɛ ní kakpɔʔɔ ní ge gee wi dáa ganʔa ki pitunbee syɛn ma we, á pe na hanri ge, jango hɛɛn peʔe cɛ́n pé yo kí nyɛ kayocɛnŋɛ ge. 4Kàʔà hɛɛn à pe pè yɛ syɛn. À pèè ma po Juwifiyee ní. Pe tɔɔ à pe po pitunbee ní.
5Klòʔo ke tɔɔ ke hɛɛn ní, Juwifiyee ní, ní pe lagwɔɔ ní be à pe naʔa ca pé bì tipeʔe hanri pitunbee na be bì pe wa ŋglɛnrɛ ní bì pe kpo. 6Pɔli nì Baranabasi nì we pe gáʔà cɛn ge, à pe fɛ mà kɛri Likahɔni klo ni le mà yâ je wa Lisitre kàʔà ni ní Dɛribe kàʔà nì ge, ní kyɛ̀rɛ̀ da nì ti dá bo wa tì tanla ge, 7mà na kayotanʔa nyu ge wa.
Pɔli nì Baranabasi nì Lisitre kàʔà ni
8Naŋa wà dà bo wa Lisitre kàʔà ni ge klɛnhaʔa cyeflanʔa ní. Pe dɔɔ́ he, wɔ̀ɔ po lemloʔoŋo. Wí in jé gban bì danʔa kpɛn. 9Ga Pɔli wi dáa nyu ge, ki naŋa wɔ̀ɔ naʔa nuru. Pɔli wɔ̀ɔ nyɛʔɛ kan ge wí na mòo nya pama nyɛ wí ma wi gbàn wi pwɔʔɔ. 10Pɔli wɔ̀ɔ kí yo wí ma gbanʔa mà yo: «Jɛ̀, ma yèré ma sìn ma cyeʔe na ge. Wɔ̀ɔ ye mà jɛ na tanri.» 11Janma mi gâ ga nya Pɔli wi dá hanri ge, à mi taʔara gbanʔa màʔa yo Likahɔni klo hɛnrɛ ni de mà yo: «Nyɛʔɛŋɛɛ ké ma krɛʔɛ nɛbo hɛɛn bɛ mà trigi naʔa wo ma.» 12À pe na Baranabasi yeri we Susi, na Pɔli yeri we Ɛrɛmɛsi,#14:12 Ɛrɛmɛsi Grɛkiyee pe nyɛʔɛlɛ la li dá bo pe ma á pe na li cun pe nyɛʔɛŋɛɛ ke pitunŋu wí ge. mɛjɛn wiì wi wi dáa nyu ge.
13Pe nyɛʔɛlɛ Susi, la li go ki dá bo wa kàʔà ki yɛʔɛ̀ ma ge, li sràʔá farafɔlɔ wɔ̀ɔ pan kàʔà goyɛrɛ na de nupyaʔa ní, ní tiri wofyɛmɛ ní ba pe dá bwɔ mâ le ké na ge. Wiì nì janma ní me à pe cori bì sraʔá fara pé ma. 14Pitunbee be Baranabasi nì Pɔli nì we pe gáʔà loʔo ge, à pe pe dretara hlugu de mà fɛ mà je wa janma ni me na taʔara, mà yo: 15«Wò woolo, nyaʔa ma po wa, á ye na ki woʔo ga hanri ge? Wòó fanna wó nyɛ hɛnwyee nɛ pa yèé nyɛ be. Wó ma pan bì ba kayotanʔa yo ge ye kan bì yo ye kruʔu wa ki tonro fun kaʔa ma ge, ye yɛʔɛ̀ kan Nyɛʔɛlɛ ma le, la wyele le, la li dá namuru hanri de, ní tra ní de, ní nyugbɔmo nì me, ní pi lama yrɛbɛ pì bɛfu ní ge.#14:15 ma wèle wa Nyi 20:11; Ŋuʔu 146:6 ni wè.
16Fanfan hɛɛn pe nyiŋi na ge, li dá klòʔo ke tɔɔ ke hɛɛn yaʔa be pe da pe nadanma kloro tanri. 17Di kiì nì kì bɛfu ní, à li na lì teri hɛɛn na be su kakmaʔa ní gee lí na hanri ge. Mɛjɛn lí na ye kanʔa hɔrɔ nì de da tí na jrɛʔɛ wa namuru ni de, ní akaba pi sɛnyiri nì de mà na ye kanʔa à ye na tinni akaba na be na yè lama firi me ye na.» 18Nàʔa po pe ìn dà ki kayoʔo yo ge gbanʔa, ki dá go cɛnri hɛɛn pe dá bì sraʔá fara pé ma.
19Ki kruʔu ma ge, à Juwifiyee pèè ma jɛ wa Ancɔsi kàʔà ni ní Ikonyomu kàʔà nì ge mà pan mà bâ hɛɛn pri mà pe wa pé na. Hɛɛn à pe Pɔli wa we ŋglɛnrɛ ní mòo flolo mòo yrígi wa kàʔà kruʔu ma ge, mɛjɛn pe dá bo naʔa honri mà yo wí ma ku. 20Di sɛrifɛɛ pe gâ yere móò kɛli ge, wɔ̀ɔ jɛ mà je wa kàʔa ge. Ki kpɛntoʔo na, wiì nì Baranabasi nì we à pe nyini mà kɛri Dɛribe kàʔà ni ge.
Pɔli nì Baranabasi nì pe kɛri Siri klo Ancɔsi ni
21Pe gâ kayotanʔa yo ge wa ki kàʔà ni ge mâ hɛnfafaʔabaa krɛʔɛ sɛrifɛɛ ge, à pe hru mà kɛri Lisitre kàʔà ni, Ikonyomu kàʔà nì, ní Ancɔsi kàʔà nì ge, 22mà yáa sɛrifɛɛ fɛn be mà yo pe dihon ta, pò ga laʔá pama na me mà pe po: «Kí ma yala cɔlɔʔɔ fafaʔa bí wo ta wo nà jé wa Nyɛʔɛlɛ li masaʔa ni ge.» 23À pe lagwɔɔ tɛnŋɛ tɛnŋɛ sɛrifɛɛ kan be wa sɛrigoro tì bɛfu ti yuru na de. Pe gâ su co we mâ Nyɛʔɛlɛ nyɛri le kɔ ge, à pe sɛrifɛɛ le be wò fɔlɔ wi kyɛrɛ̀ ni de, pe da yeré wiì ŋa na ge. 24Ki kruʔu ma, à pe yâ Pisidi klo pari le mà li kon mà kɛri Panfili klo ni le. 25Pe gâ Nyɛʔɛlɛ li kayoro yo de wa Pɛrije kàʔà ni ge, a pe kɛri Atali kàʔà ni. 26À pe jɛ be ki deʔe na ge mà je nyumu kɔrɔ kà ni mà kɛri Ancɔsi kàʔà ni ge. Ki kàʔà kiì gi ga pe da pé le Nyɛʔɛlɛ li kyɛrɛ̀ ni de ní li haʔama nì me pé ki tunŋu ga kɔ, pé ma funŋu ŋaŋa ni ge.
27Pa pe da gâ no wa ge, à pe yâ sɛrigo kpoʔolo ge. Tunŋu kì bɛfu ga Nyɛʔɛlɛ li da gɔ́ wa pe kyɛrɛ̀ ni de, ní pama kloʔó ki nyɛʔɛmɛ pomo ní me klòʔo ke tɔɔ ke hɛɛn ma be ge, à pe ki woʔo kì bɛfu yo pé kan. 28À pe wlɛfafaʔara kɔ wa sɛrifɛɛ ní be.
موجودہ انتخاب:
PITUNBEE 14: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire