PITUNBEE 13
13
Nyɛʔɛlɛ li Nyìli lí ma Baranabasi nì Sɔli tun we
1Nyɛʔɛlɛ leyoo pèè ní krɛʔɛfɛɛ pèè dá bo wa sɛrigo hɛɛn bee ni pe dá bo wa Ancɔsi kàʔà ni ge. Pé bee: Baranabasi nì, ní Simenyo nì ŋa pe dáa yeri Lewɔɔ ge, ní Lusyusi nì ŋa Sirɛne kàʔà woo we, ní Manahɛnni nì ŋa wiì nì klo fɔlɔ Erɔde nì we pe dá pimi hanri teme na wa klo fɔlɔ go ni ge, ní Sɔli nì we. 2Nyiŋi ga na pe dáa wò fɔlɔ kpɔʔɔ we ná su cun we, Nyɛʔɛlɛ li Nyìli à li bâ pe po: «Mí ma Baranabasi nì Sɔli yeri we tunŋu ga na ge, ye pe fàrà na kân pe da ki tunŋu ko ge.» 3Ki nyiŋi na, pe gâ su co we mâ nyɛri Nyɛʔɛlɛ ma le kɔ ge, à pe pe kyɛrɛ̀ pa de pe na mà pe yaʔa pe da sye.
Baranabasi nì Sɔli nì Sipre klo ni
4Nyɛʔɛlɛ li Nyìli pa li dá bo lí ma Baranabasi nì Sɔli tun we, à pe jɛ mà kɛri Selusi kàʔà ni ge mà yâ je wa nyumu kɔrɔ kà ni mà kɛri Sipre klo ni le. 5Pe yâ je Salamini kàʔà ni ge, à pe na Nyɛʔɛlɛ li kayoro jari de wa Juwifiyee pe sɛrigoro ni de. Jan Marike wi dáa pe hari.
6Sipre klo li dá bo nyumu nulala ni. Pe gâ lì bɛfu pari mâ li kon kɔ ge, à pe yâ no wa Pafɔsi kàʔà ni ge mà lekpɔ wà nya wa pe dáa wi yeri Barijesu. Wi dá bo Juwifiyee woo mà na hɛɛn fanla be mà yo wí nyɛ Nyɛʔɛlɛ leyoo. 7Wɔ̀ɔ na kori wa ki klo fɔlɔ tanla we, ŋa pe dáa yeri Sɛrijusi Pɔlusi ge. Ki klo fɔlɔ wi dá bo hɛnticliŋi. Wɔ̀ɔ yo pe Baranabasi nì Sɔli yeri we, mɛjɛn wi dá jori bì Nyɛʔɛlɛ li kayoro loʔo de. 8Di ki lekpɔ Barijesu we pe dáa wi yeri Elimasi Grɛki hɛnrɛ ni de. Wi dáa kakara wa pé ni naʔa ca bì klo fɔlɔ fanla we, jango wò ga ba Nyɛʔɛlɛ li kayoro na de. 9Di Sɔli ŋa pe dáa yeri nɛ Pɔli ge, wɔ̀ɔ nyi Nyɛʔɛlɛ li Nyìli ní le mà nyɛʔɛ kán ge wí na, mà yo: 10«Mo ŋa má nyɛ nyìŋì hɛɛn fanlaʔa ní namara tyɛnʔɛ kè bɛfu ní ge, Sotanri ŋa yele cɔʔɔfɔlɔ we wi pyɔ wi má ni. Ga kí nyɛ sinŋi ge, mo má nyɛ kì bɛfu ki bɛnfɔlɔ. Mɛ ìn bì laʔa wò fɔlɔ wi kosinri ti wagrɛʔɛmɛ na me yo?
11Ki tɔ na ge, wò fɔlɔ wí bi ma kmo, pa ma fyon. Mɛ ìn bì da yaa nyaʔa ge bì nyiŋi kà kɔ.» Ki nyidege na ge, wɔ̀ɔ deʔe nya kí ma wɔ mà krɛʔɛ wi na yebliʔi. Wɔ̀ɔ na tali na hɔlɔ naʔa ca hɛn wà buú co kyɛʔɛ na ge wi kɛri wí ni. 12Ki nyiŋi na, klo fɔlɔ wi gâ ga nya kí ma hanri ge, wɔ̀ɔ pa wò fɔlɔ na we. Wi krɛʔɛmɛ à muu fo ceŋge.
Pɔli nì Baranabasi nì pe jeme Pisidi klo Ancɔsi ni
13Pɔliyee à pe je nyumu kɔrɔ kà ni wa Pafɔsi kàʔà ni mà kɛri Pɛrije kàʔà ni wa Panfili klo ni le. Jan Marike wɔ̀ɔ yâ pe yaʔa wa mà hru mà kɛri Jerusalɛmu kàʔà ni ge. 14Pee à pe jɛ be Pɛrije kàʔà ni ge mà kɛri mà yâ no wa Pisidi klo Ancɔsi kàʔà ni ge. À pe yâ je wa Juwifiyee pe sɛrigo ni fyonriwlɛʔɛ na mà klɛn wa. 15Pe gâ Mowisi wi sɛbɛ ní, ní leyoo pe sɛbɛɛ yo be kɔ, Juwifiyee pe sɛrigo lagwɔɔ à pe hɛn wà tun Pɔliyee ma be mà yo: «Wò woolo, nàʔa po kayoro tà nyɛ ye ma da tí bi hɛɛn kan be dihon nì ge, ye ti yo.» 16Pɔli wɔ̀ɔ jɛ mà kyɛʔɛ wa pé ma mà yo:
«Yèé Israyɛli klo woo, ní yèé bee ní yé na Nyɛʔɛlɛ fyaʔa le ge, ye da nurú. 17Israyɛli hɛɛn pe Nyɛʔɛlɛ li dá wò tee fara be mà pe nyɛʔɛ, nyiŋi ga na pe dá bo wa Ejipite klo ni nabonmoo ge. Ki kruʔu ma, à li pé yrigi wa li fangbɔʔɔ ní ge.#13:17 ma wèle wa Nyi 1:7; 12:51 ni wè.
18À li na lagunmu cun pé ni wa sinbriʔi ni ge yɛʔɛ́ too syɛn kpafoʔo ni.#13:18 ma wèle wa Ton 14:34; Lado 1:31 ni wè.
19Li gâ klɛnmɛ nasyɛn jaabu wa Kana klo ni le, à li ki tra yɛ de pe kân krɔʔɔ.#13:19 ma wèle wa Lado 1:7; Jos 14:1 ni wè.
20Ki kaʔala ke dá hanri mà yɛʔɛ́ saa syɛn ní too syɛn ní kprɔʔɔ nyoʔo kɔ ge.
Ki kruʔu ma, à li na báa pe kanʔa kiti konfɛɛ ní fɔ mà bâ no li leyoo Samyɛli wi nyiŋi na ge.#13:20 ma wèle wa Syɔ 2:16; 1Sam 3:20 ni wè. 21Ki nyiŋi na ge, à pe Samyɛli nyɛri we mà yo wi klo fɔlɔ wà fara pe kân. Nyɛʔɛlɛ à li pé kan Sɔli nì we, ŋa wi dá bo Kisi pyɔ we mâ po Bɛnjamɛ wi kluʔu woo we. Wɔ̀ɔ po pe klo fɔlɔ fɔ mà ta yɛʔɛ́ too syɛn.#13:21 ma wèle wa 1Sam 8:5; 10:21 ni wè. 22Nyɛʔɛlɛ li gɔ́ɔ̀ jrɛʔɛ ge, à li Dafide tɛnŋɛ we wi po pe klo fɔlɔ. À li yo wi kala na le mà yo: ‹Má maʔa nya, Dafide, ŋa Isayi wi pyɔ we, hɛn wà wi wí na na glanʔa. Wí bi ba na nadanma kaʔa kè bɛfu hanri.›#13:22 ma wèle wa 1Sam 13:14; 16:12; Ŋuʔu 89:21 ni wè.
23Jesu wi dá bo Dafide wi kluʔu pyɔ wà wi. Nyɛʔɛlɛ à luu po Israyɛli woo pe Syɔfɔlɔ, nɛ pa li dá nofele la kon pé ma pomo ma na ge. 24Sanni wí bi wi tunŋu hli ge, Jan wɔ̀ɔ klu màʔa yo Israyɛli hɛɛn pè bɛfu ma mà yo pe kruʔu wa pe kapere ma de pe pè kân jango pe pe batise.#13:24 ma wèle wa Mar 1:4; Luk 3:3 ni wè. 25Nyiŋi ga na Jan wi dá wi tunŋu tanʔa ge, wɔ̀ɔ naʔa nyu mà yo: ‹Yé naʔa honri mà yo han wi ná ni? Yé na honri ŋa na, wiì ban ŋa mì ni we. Di ki woo wí na pan wa na kruʔu ma ge. Do mì we ho já gban bì wi sabara haʔala de wa wi cyeʔe na ge.›#13:25 ma wèle wa Mat 3:11; Mar 1:7; Luk 3:16; Jan 1:20,27 ni wè.
26Na woolo, yèé bee yé nyɛ Abrahamu wi kluʔu pii be ge, ní bee ní ye ni pé na Nyɛʔɛlɛ fyaʔa le, ki syɔmo kayoʔo ga ge ki da droʔó naʔa wòó ma. 27Mɛjɛn bee pe dá bo wa Jerusalɛmu kàʔà ni, ní pe lagwɔɔ ní be pe ìn dàʔa cɛn han ŋa wi Jesu we. Pe ìn dà Nyɛʔɛlɛ leyoo pe kayoro ti kɔ̀rɔ́ cɛn we kpo, da pe dáa nyu pé kan fyonriwlɛʔɛ kì bɛfu na ge. Di nyiŋi ga na pe dá kiti kon wí na ge, àʔa po pé ma ki kayoro funŋu de. 28Pe ìn dà kùʔù kala là nya Jesu na we. Kiì nì kì bɛfu ní à pe Pilate nyɛri we mà yo wuu kan poo kpo.#13:28 ma wèle wa Mat 27:22; Mar 15:13-14; Luk 23:21-23; Jan 19:15 ni wè. 29Ga ki da nyoŋó wi kala na le, pa pe da gâ kì bɛfu hanri máʔà funŋu ge, à poo trigi tipraʔa na ge mà yɔ́ɔ̀ le fanʔa ni.#13:29 ma wèle wa Mat 27:57-61; Mar 15:42-47; Luk 23:50-56; Jan 19:38-42 ni wè. 30Di Nyɛʔɛlɛ à luu nyɛ mòo yrígi kuu ni be. 31Wlɛfafaʔara na wi dá wì tyɛʔɛ hɛɛn bee na pe da blɛ́n wí ni mâ jɛ wa Galile klo ni le mâ kɛri Jerusalɛmu kàʔà ni ge. Ŋaŋa ni ge, ki woo pé nyɛ wi kayoʔo ki jarifɛɛ hɛɛn ma be.#13:31 ma wèle wa Pit 1:3 ni wè. 32Wòó wó na kayotanʔa nyu ge ye kan mà yo nofele la Nyɛʔɛlɛ li da gón wò tee ma be ge, 33li bâ ki fwɔʔɔ ton ge wòó bee ma wó nyɛ pe kluʔu pii be mâ Jesu nyɛ we móò yrígi kuu ni be ge, nɛ pa kí nyɛ wa nyoŋoʔo kpo Ŋuʔu syɛnwoʔo nî ge mâ yo:
‹Mo we na pyɔ wi má ni.
Mì mí ma ma he alaʔa nî ge.›#13:33 ma wèle wa Ŋuʔu 2:7 ni wè.
34Ga Nyɛʔɛlɛ li dɔɔ nyɛ́ móò yrígi kuu ni be wò ga fonʔo ge, kiì gi li dá yo mâ yo:
‹Nofegmaʔa gee mi da gón Dafide ma we,
mí bi ke fwɔʔɔ ton ge ye ma.›#13:34 ma wèle wa Esa 55:3 ni wè.
35Ki kala na le, kí naʔa nyu wa nɛ ŋuʔu kà ni kì yɛ mà yo:
‹Mɛ ìn biʔi ta ma Hɛnkmaa wi fònʔó.›#13:35 ma wèle wa Ŋuʔu 16:10 ni wè.
36Àʔa hín bo Dafide wiì wì tala wi nyiŋi na ge, wi da gâ Nyɛʔɛlɛ li nadanma hanri me kɔ ge, wɔ̀ɔ ku. À pe yɔ́ɔ̀ le wi tee tanla be. 37Wɔ̀ɔ fonʔo. Di ŋa Nyɛʔɛlɛ li da nyɛ́ móò yrígi ge, ki woo wi ìn dà fonʔo. 38-39Ki tɔ na ge, na woolo, yeʔe cɛn ye yo Jesu wi yele na le, kapere ti yaʔama kayoro tí na jari ye ma. Hɛn o hɛn ŋa wí bi yere wí na ge, ki woo pɔɔ tanʔa ta kaʔa kè bɛfu gee ni ye ìn dì bî gban bí tanʔa ta Mowisi wi kayoro ní de. 40Ki kala na le, ye da yè kɔrɔsi ga Nyɛʔɛlɛ li dá yo wa li leyoo pe sɛbɛɛ ni be kò gá ye ta mâ yo:
41‹Yè wèlé,
yèé bee yé na na faʔara ge,
ki woʔo ga ge ki ye fo,
ye kù.
Mɛjɛn mí bi kala là hanri
yè nyiŋi na ge.
Nà wà bí ja ki kala nyɛli le
ye kan kmaʔa ge,
yoo yereʔe na fyeu.› »#13:41 ma wèle wa Abak 1:5 ni wè.
42Pɔli nì Baranabasi nì pe gáa nyini wa sɛrigo ni ge, hɛɛn à pe na pe fɛn mà yo fyonriwlɛʔɛ ga kí na pan ge pe ga ban, pe ba ki kaʔa kèè yo pé kan nɛ. 43Hɛɛn pe gâ janmu kɔ ge, Juwifiyee ní pe kloʔò ki jefɛɛ bee ní pe dáa Nyɛʔɛlɛ kpɔʔɔ le ge, ki woo pèè da bá Pɔli nì Baranabasi na we fafaʔabaa. Ki pitunbee syɛn à pe yo ki hɛɛn ní be mà yo pò ga laʔa Nyɛʔɛlɛ li glanʔama na me.
44Ki fyonriwlɛʔɛ ki tɔ ki gâ no ge, kàʔà hɛɛn pe fafaʔa ma bâ gboʔolo bì Nyɛʔɛlɛ li kayoro loʔo de. 45Di Juwifiyee pa pe gâ ki janma nya me ge, yejaʔa àʔa jɛ pé ma. À pe na kakara wa kaʔa gee ní Pɔli wi dáa nyu ge mà noo teri. 46Pɔli nì Baranabasi nì we, à pe horo màʔa yo pé ma mà yo: «Ki dí yala Nyɛʔɛlɛ li kayoro ti klù ti yo yèé ma kpɛn. Di yèé pa ye gâ ti ce mâ na kiti kon yè na mâ yo ye ìn yala nyuwyeʔe bajegɔ ní we, wó bi yɛʔɛ̀ kan klòʔo ke tɔɔ ke hɛɛn ma be. 47Mɛjɛn wò fɔlɔ wi daʔá yo wo ma ban mà yo:
‹Mí ma ma tɛnŋɛ ma po
klòʔo ke tɔɔ ke kpɛnmɛ,
ma po syɔmo kloʔó
drunya wì bɛfu kan.› »#13:47 ma wèle wa Esa 42:6; 49:6 ni wè.
48Klòʔo ke tɔɔ ke hɛɛn pe gáʔà loʔo ge, pe lama à mi fiʔi. À pe na wò fɔlɔ wi kayoro kpɔʔɔ de. Bee Nyɛʔɛlɛ li dá fara mâ yo nyuwyeʔe bajegɔ wi klɛ́n pé kan ge, ki woo à pe paʔa na.
49Wò fɔlɔ wi kayoro à ti na jari wa ki klo lì bɛfu ni. 50Di cɛɛ bee pe dá bo ná Nyɛʔɛlɛ kpɔʔɔ le mâ po yegbɔʔɔlɔ fɛɛ be, Juwifiyee à pe na ki cɛɛ ní ki kàʔà ki hɛnkpangbanmaa pri be na pe wa Pɔli nì Baranabasi na we, mà cɔlɔʔɔ wa ki pitunbee syɛn na we mà pe prɔ mà pe yrígi wa pe klo ni le. 51Ki pitunbee syɛn pe gâ pe cyeʔe taplɔʔɔ kori ge máʔà wa pé na ge, à pe kɛri Ikonyomu kàʔà ni ge.#13:51 ma wèle wa Mat 10:14; Mar 6:11; Luk 9:5; 10:11 ni wè. 52Sɛrifɛɛ pe lama à mi fiʔi. À pe po nyìbee Nyɛʔɛlɛ li Nyìli ní le.
موجودہ انتخاب:
PITUNBEE 13: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire