Luuka 19
19
Namaliviha a musoko Zakaiyo
1Aavolowaawe oYeriko, Yeesu aavira musidadeni. 2Aakhala weiwo mutthu mmoha iitthaniwa Zakaiyo, aari namapuha, mutokweene a anamaliviha a musoko. 3Owo aatthuna omoona taani Yeesu, mene areene ookhuveya, aahooceela niwoko na atthu ancipale. 4Hiiho aatthimakela ohoolo ni aawela mmwirini wa efiigu weera amoone, niwoko Yeesu eera avire vaavaale. 5Aaphiyalaawe Yeesu nipuro nne, aaweha musulu ni aamweerela: “Zakaiyo, mukhuruwe woowaakuveya. Ontthuneya weera olelo Miyo kikhale owannyinyu.” 6Vano, aakhuruwa woowaakuveya ni aamwaakhela Yeesu ni ohakalalaxa. 7Muloko wa atthu wootheene waahoona yeeyo ni waapacera ottaandawula: “Owo onoophiyera vaate wa namattheka!” 8Zakaiyo aavenya ni aaweerela Apwiya: “Moone, Apwiya, kinimwaavaha atthu oohaawa eriyari ya sooreelasaka, ni kaamwiiyenre mutthu etthu emoha, kinoomuhokoloxera imaara ixexetho.” 9Yeesu aamweerela: “Olelo woophiya ovuluwa wa empa ela, niwoko mulopwana ola oritho mwaana a Abrahaamu. 10Vano, Mwaana a mutthu aaweenle owaasaasa ni waavuluxa yaale yaariheiye.”
Yoolikanyiha ya makhoobiri muloko
11Awo emwiiwaka Yeesu, Owo aahaathalihera yoolikanyiha emoha, niwoko aari vakhiviru wa oYerusaleemu ni muloko wa atthu wuupuwela weera omwene wa Muluku waarowa wooniheriwa woowaakuveya. 12Owo aaheera: “Mutthu mmoha oottittimiheya aarowa elapo yoorakamela weera avariwe omwene ni vahoolo ahokolowe. 13Vano aawiitthana arumeiyaawe muloko ni aahaavaha makhoobiri muloko. Owo aaweerela: ‘Mumpakele nakoso musurukhu ola mpaka miyo kineeraaka kihokolowe.’ 14Arumeiyaawetho yaamuthanya, ni yaahaarumiha atthu oovaanela ottuliwawe yeeraka: ‘Khanintthuna weera mulopwana ola akhale mwenaahu.’ 15Wa soothesene, aavariwa omwene ni aahokolowa. Vano aarumiha owiitthana arumeiyi aavanghaawe musurukhu weera asuwele misurukhu mihayi yaawinnaaya. 16Oopacera aahoowa ni aaweerela: ‘Apwiya, nikhoobirinanyu noowina makina muloko.’ 17Apwiyaawe yaamwaakhula: ‘Ti wooreera, murumeiyaaka ooreera! Hapo waari oororomeleya wa vakhaani, olamuleke isidade muloko.’ 18Anaaveeli aahoowa ni aaweerela: ‘Apwiya, nikhoobirinanyu noowina makina mathanu.’ 19Apwiyaawe yaamwaakhula: ‘Weyotho, olamuleke isidade ithanu.’ 20Vano aahoowa murumeiyi mukina ni aaweerela: ‘Apwiya, nikhoobirinanyu nri va. Miyo koothokorora kaatthunkaka vakuwoni. 21Kaangwoovani, niwoko nyuwo muri oottaruxa. Mumvenxa yeeyo mwahiikaathiyaanyu ni munghepha yeeyo muhaanlaanyu.’ 22Apwiyaawe yaamwaakhula: ‘Miyo kinimoothoriha ni maswaawo muneenaawo, murumeiyi oonanara! Waasuwela weera miyo oottaruxa, kivenxaka yeeyo kihihenlaaka ni kihephaka yeeyo kihaanlaaka. 23Vano, heeni waahaavaherenraawo musurukhwaaka atthu oothokorora musurukhu? Hiiho, miyo kihokolowaka, saano kaakhenleene musurukhu ni owina vakhaani.’ 24Vanonto, aaweerela yaawo yaari weiwe: ‘Mmwaakhe nikhoobirinawe, ni mumvahe yoowo orino muloko.’ 25Awo yaamweerela: ‘Apwiya, owo ookhalano muloko!’ 26Awo yaawaakhula: ‘Miyo kinooleelani weera wa yoowo okhalanne, anaavahiwetho, mene wa yoowo ohikhalanne, mpaka yeeyo vakhaani orinaawe, eniivenxiwe. 27Mwaha wa amwiittanaaka, yaale yahaatthuna weera miyo kaalamule, mwaaruuhe va ni ngwiive vamaithoniwaka.’”
Ovolowa oYerusaleemu
28Amalihaka wuuluma yeeyo, Yeesu aapwahera ohoolo, arowaka oYerusaleemu. 29Yaakhuveelaaya oBetefage ni oBetaniya, vakhiviru wa mwaako oniitthaniwa Sooliveira, aahaarumiha eeli a oohuseraawe aweerelaka: 30“Murowe mmuttettheni ori ohoolowanyu. Mwaavolowakaru, munoomphwanya buuru mwaaxaana atthukiweene, mwa yoowo khaawo otonke ongwela. Mwamutaphule ni mukiwiihere va. 31Mukina ookohani: ‘Munimutaphulela heeni?’ mwamuleele: ‘Apwiya anoomutthuna yoowo.’ 32Yaarumihiwe yaarowa ni yaaphwanya enama ntoko aaleenlaawe. 33Emutaphulaka buuru muxaana, asineene a buuru yaahaakoha: “Munimutaphulela heeni buuru?” 34Awo yaawaakhula:“Apwiya anoomutthuna ola.” 35Yaamuronghela buuru Yeesu, yaamvonyera mikaandyosaya vabuuruni ni yaangweliha Yeesu. 36Eettaka hiiho Yeesu, muloko wa atthu waahaatala mikaandyosaya mphironi. 37Akhuveelaka omukhuruweloni wa mwaako wa Sooliveira, atthu ancipale ootheene a oohusera yaapacera omvuwiha Muluku, ekhuwelaka ni ohakalalaxa niwoko na sootikhiniha sootheene yoonaaya. Yaakhuwela: 38“Ooreelihiwa ti Mwene ongwa mwa Nsina na Apwiya! Murettele wiirimu ni ovuwa musulusulu.” 39Akina a aFarisi* yaari variyari wa atthu ancipale yaamweerela Yeesu: “Muhusiha, mwaahiihe oohuseraanyu!” 40Owo aawaakhula: “Miyo kinooleelani: awo yamaala, maluku eniikhuwele.”
Olalamika niwoko na oYerusaleemu
41Aakhuveelaawe ni oonaka esidade, Yeesu aahiinlela yeele 42eeraka: “Weera weyotho olelo wiiwexexe yeeyo entthuneya oruuha murettele! Eyotho ti yoovitheya vamaithoniwawo. 43Eniiwe mahuku amwiittanaawo eniyoothipele malitti matokotoko, eniyoorukureere nitho eniiwaamelelihe weyo mipatta sootheene. 44Eniyoovonyere vatthayani ni eniiwiive anamwanaawo ari mpuwa mwa exiraawo. Kheerwa ehiya nluku vanluku, niwoko weyo khawiisuwenle ehuhu Muluku aarwaawe wooxekurera.”
Yeesu ontteeliha Empa ya Muluku
45Vano aavolowa Mpaani mwa Muluku ni aapacera owoomola yaawo yaathumiha. 46Aaweerela: “Yoolempwa: ‘Empaaka eniikhale Empa ya mavekelo,’ mene nyuwo mootatuxa ela nikhuku na anamwiiya!” 47Mahuku ootheene owo annaxuttiha Mpaani mwa Muluku. Ahooleli a asaserdotitho* vamoha ni anamawera a nlamulo* ni asitokweene a muloko yannaasaasa moota woomwiiva. 48Wa soothesene, khayaawera moota woopaka yeeyo, niwoko muloko wa atthu wootheene waatikhina ni maswaawe.
موجودہ انتخاب:
Luuka 19: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.
