Luuka 18
18
Yoolikanyiha ya naamukhweli avekelaka ni ovilela
1Vano Yeesu aahaathalihera oohuseraawe yoolikanyiha emoha, atthunaka owoonihera weera ontthuneya ovekela mahuku ootheene ehikhulumuwaka. 2Owo aaweerela: “Musidadeni emoha aakhala mphuki ahaamoova Muluku, hata khaahelelaxa atthu. 3Aakhalatho musidadeni ele naamukhweli muthiyana mmoha annarowa imaara sincipale wa yoowo, amudyoonttelelaka: ‘Mukuulumele mulattwaaka ni mwiittanaka.’ 4Owo aakhootta vamahukuni makina. Ommaleloni owo aahiixeerela: ‘Naari kihimoovaka Muluku, hata kihaapwatthaka atthu, 5naamukhweli ole onnakiphweela. Vano, kinoomuulumela mulattwaawe weera ahitepaxe orwa wa miyo.’” 6Apwiya yaapwaherera: “Mwiiwe yeeyo mphuki oonanara oneeraawe. 7Weeraka Muluku khanrowa owuulumela mulattwaaya oothanliwaawe, animdyoonttelela ohiyu ni othana? Anaapwaherere waawehereriha vancipale? 8Miyo kinooleelani: Owo anaawuulumele mulattwaaya woowaakuveya. Wa soothesene, aawaaka Mwaana a mutthu, anaaphwanye nroromelo mweelaponimu?”
Yoolikanyiha ya muFarisi* ni namaliviha a musoko
9Yeesu aahaathalihera yoolikanyiha ela akina yaale aniixuupuwela weera ari oowaakhuleliwa ni Muluku, yaaramusaka akina: 10‘Atthu eeli yaarowa Mpaani mwa Muluku weera yavekele. Mmoha aari muFarisi*, ni mukina namaliviha a musoko. 11muFarisi*, eemenleene, aahiivekelela muneenaawe: ‘Muluku, kinootthapelani niwoko miyo nkihiyono ntoko atthu akina: anamwiiya, ootakhala, anamararuwa, hata ntoko namaliviha a musoko ola. 12Miyo kinnatthuka imaara piili vasimanani, ni kinnavaha yanaamuloko wa sootheene kingwinaaka.’ 13Namaliviha a musokotho aaheemela ottaiwene. Khaatthuna oweha osulu, mene amanaka ekakasa, aaheera: ‘Muluku, mukimorele ikharari, miyo kiri namattheka.’ 14Miyo kinooleelani weera mulopwana ola, omuhiya muFarisi*, aarowa owaani aakhuleliweene ni Muluku. Vano, ootheene aniivuwiha, eniikhale ooyevihiwa, ni ootheene aniiyeviha, eniikhale oovuwihiwa.
Yeesu ni anamwane
15Muloko wa atthu waamuruuhelatho Yeesu anamwane weera aatave. Yoonaka yeeyo, oohusera yaahaahiiha yaawo yaaruuhale anamwane. 16Yeesutho aahiixiitthanela anamwane, eeraka: “Mwaahiyeke anamwane eweeke wa Miyo, ni muhiwooceelihe, niwoko omwene wa Muluku ori wa yaale anlikana ni yaawo. 17Miyo kinooleelani ekhaikhai: Yoowo ohinaakhela omwene wa Muluku ntoko mwaana mmoha, khanrowa ovolowa moomweneni.”
Yeesu ni namapuha
18Mutthu mmoha oottittimiheyaxa aamukoha: “Muhusiha ooreera, kipakeke eheeni weera kiphwanye okumi woohimala?” 19Yeesu aamwaakhula: “Heeni munkiitthanaanyu ooreera? Khaawo ooreera, ahikhanle Muluku paahi. 20Nyuwo moosuwela malamulo: ‘Muhiraruwe, muhiive, muhiiye, muhoothe, mwaattittimihe atithinyu ni amayinyu.’” 21Owo aaheera: “Sootheene iya kohiiwelela okhuma enamwanaaka.” 22Iiwaka yeeyo, Yeesu aamweerela: “Yohoohaleelani etthu emoha. Mwathumihe sootheene murinaanyu ni mwaavahe musurukhu oohaawa, ni mmwikhaleno muhakhu wiirimu. Vahoolowaya, ngwe ni mukitthare.” 23Iiwalaawe yeeyo, aathanana, niwoko aakhalano mihakhu sincipale. 24Amoonaka oothananeene, Yeesu aaheera: “Moota orikanxaaya ovolowa namapuha moomweneni wa Muluku! 25Mwa yeeyo, ti wookhweya ekamelu* ovira vamwiitheni wa singano, ohikhanle namapuha ovolowa moomweneni wa Muluku.” 26Yaawo yiiwale yeeyo yaakoha: “Vamwaheene ola, taani ongwera ovuluxiwa?” 27Yeesu aawaakhula: “Yeeyo eri yoohiwereya wa atthu, ti yoowereya wa Muluku.” 28Pedru aamweerela: “Hiyo noohiya sootheene naakhalannaahu weera nootthareni.” 29Yeesu aamwaakhula: “Miyo kinooleelani ekhaikhai: Khula mutthu ohiyale empaawe, mwaariye, axunneiye, atithawe, hoye hoye anamwanaawe mwaha wa omwene wa Muluku, 30anaakhele mweehuhuni ela imaara sincipale seiyo ohiyalaawe, ni mweehuhuni ya muhoolo anaakheletho okumi woohimala.”
Yeesu onuuluma veeli sa okhwawawe ni ovenyererawawe
31Yeesu aawiitthana oohusera muloko neeli vakhwipi ni aaweerela: “Ninrowa oYerusaleemu. Sootheene silempwale ni maprofeeti mwaha wa Mwaana a mutthu, sinookwaniheriwa. 32Owo anaavahereriwe wa amalapo. Awo eniimutheiye, eniimuruwane, eniimusenyele, 33eniimuwaxule ni eniimwiive. Vanihukuni nanaararu Owo anaavenyerere.” 34Oohusera khayiiwexenxe hata etthu emoha ya seiyo. Etaphulelo ya masu ale yaahiipithiheiya wa yaawo, ni awo khayaasuwenle yeeyo Owo uulummaawe.
Namavekela oohoona onnoonatho
35Akhuveelaka Yeesu oYeriko, mulopwana oohoona akilaantheene mukerekhere wa musewe eera avekelaka samahala. 36Aawiiwalaawe atthu ancipale eviraka, owo aakoha etthu heeni yeereiya. 37Awo yaamweerela: “Yeesu muNasarete onoovira.” 38Vano owo aakhuwela: “Yeesu, mwaana a Davide, mukimoreleke ikharari!” 39Yaawo yaahoonle yaamuhiiha weera amaale, mene owo aatepa okhuwela: “Yeesu, mwaana a Davide, mukimoreleke ikharari!” 40Yeesu aaheemela ni aahaalamulela weera mutthu ole aruuheliwe. Owo amwaattamelaka, Yeesu aamukoha: 41“Muntthuna eheeni weera Miyo koopakeeni?” Owo aamwaakhula: “Apwiya, kintthuna woona.” 42Yeesu aamweerela: “Moone, nroromelonanyu nohoolamihani.” 43Woowaakuveya owo aahoona, ni aamutthara Yeesu amvuwihaka Muluku. Muloko wa atthu wootheene, woonaka yeeyo, waamuttottopela Muluku.
موجودہ انتخاب:
Luuka 18: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.
