Epacerero 23
23
Okhwa wa Sara
1Saara aakhala ni okumi iyaakha ncira ni miloko miili niithannapiili. 2Aakhwenle oKiriyate-Arba, ori oHeberoni, elapo ya oKanaani ni Abrahaamu aarowa olalamika ni omwiinlela yoowo. 3Vahoolowaya Abrahaamu aahiya muttembo wa mwaariye, anarowa wuuluma ni aHiti aweerelaka: 4“Miyo kiri paahi namarwa variyariwanyu. Mukithumihere nipuro weera kipake nihiye weera kimvithe mwaaraka.” 5Vano aHiti yaamwaakhula Abrahaamu: 6“Muniiwe apwiya, nyuwo ti mutokweene mmoha a Muluku variyariwahu. Mumvithe mwaarinyu variyari wa mahiyaahu, muthanlaka nipuro muntthunaanyu. Khawowo hata mutthu mmoha aneera ookhoottiheni omvitha mwaarinyu.” 7Abrahaamu aaheemela, anaarukunuwela atthu a elapo ele ya aHiti. 8Vanonto aaweerela: “Vano mwakitthunihera omvitha mwaaraka, mumvekele Efroni mwaana a Zowari, 9weera akivahe nikhuku na Makipela, nri nawawe, nimphwanyaneya mukerekhere wa emattaawe. Miyo kinooliva muneeraanyu mukilamule. Hiiho nkikhale muneene a nihiye nimoha mweelaponimwanyu.” 10Vano Efroni, muHiti, eera akilaantheene variyari wa mulokwaawe ni aamwaakhula Abrahaamu, iiwiwaka ni aHiti ootheene yaawo yaavira vamulako wa esidade: 11“Hoye, apwiya, mukiiwe. Miyo kinoovahani ematta, nitho nikhuku nri mwemmo. Kinoovahani vamaithoni wa mulokwaaka, mwaavitheke amwaarinyu.” 12Emaara yanaaveelitho Abrahaamu aarukunuwela muloko wa elapo ele. 13Aamweerela Efroni iiwiwaka ni atthu ootheene: “Dyoontte, mukiiwe. Nkilive hiiho muntthunelaanyu. Mwaakhulele, weera kivithe muttembo wa amwaaraka.” 14Vano Efroni aamwaakhula Abrahaamu: 15“Mukiiwe, apwiyaaka: Mpatta wa etthaya ele, omphwanela othumihiwa ixekeli* macira maxexe. Yoopwattheleya eheeni variyariwahu? Mwaavithe amwaarinyu.” 16Vano Abrahaamu aahaakhulela oliva yeeyo Efroni aalamunlaawe, anamvaha vamaithoni wa atthu ootheene ixekeli* macira maxexe, yeeyo yaahimalaaya anamathumiha. 17Hiiho ematta ya Efroni eri oMakipela ohoolo wa oMamre, nitho nikhuku ni nyiri sootheene saarimo aathumiheriwa Abrahaamu. 18Aavahiwa Abrahaamu okhala sawawe vamaithoni wa aHiti ootheene yaarwiiye vamulako wa esidade. 19Vahoolowaya Abrahaamu aamvitha mwaariye Sara munikhukuni mwa ematta ya oMakipela, vakhiviru wa oMamre, ori oHeberoni, elapo ya oKanaani. 20Hiiho ematta ni nikhuku na mwemmwe aavahiwa Abrahaamu ni aHiti, weera mwemmo aavitheke atthwaawe yaakhwaaka.
موجودہ انتخاب:
Epacerero 23: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.