Epacerero 22
22
Yooveleela ya Abrahaamu
1Vano eviraka mahuku makina, Muluku aamoota murima Abrahaamu amweerelaka: “Abrahaamu!” Owo aamwaakhula: “Miyo kiri va!” 2Vanonto Muluku aamweerela: “Munkuxe mwaninyu mmoharu, Isaki yoowo nyuwo munimusivelaanyu, ni murowe elapo ya oMoriya. Mwampake yooveleela yoohisa mwaako yoowo Miyo kineeraaka koothoonyereni.” 3Vano oxaawaya Abrahaamu aahiireherera, anatthukelela murindaawe vabuuruni. Vamoha ni yoowo aahaakuxa eeli a arumeiyaawe nitho mwanawe, Isaki. Vahoolo wa othikila ikhuuni wa yooveleela, aavenya arowaka mpatta ole Muluku aamuthoonyenraawe. 4Nihuku nanaararu na mukwaahaawe, Abrahaamu aaweha, anoona ottaiwene nipuro nne. 5Vanonto owo aaweerela arumeiyaawe: “Muhaleke vaava ni buuru ola. Miyo ni mmiravo ninrowa mpaka iwe. Vahoolo wa omulapa Muluku, nimmoophwanyani.” 6Abrahaamu aakuxa ikhuuni sa yooveleela, anamuthateliha mwanawe. Owo muneenaawe aakuxa mooro ni mwaalo. Erowaka vamoha ooweeli ale, 7Isaki aamweerela Abrahaamu: “Tiithi?” Ni owo aamwaakhula: “Okileele mwanaka.” Isaki aamukoha: “Hiyo va, mooro nookuxa, ikhuuni nookuxa, vano eputtiputthi ya yooveleela eri woowi?” 8Abrahaamu aamwaakhula: “Mwanaka, Muluku muneenaawe onooruuha eputtiputthi ya yooveleela.” Yaapwaherera ooweeli weetta ni mukwaahaaya. 9Ephiyakaru vanipuroni Muluku aamuthoonyenraawe, Abrahaamu aahaateka altaari*. Aahuukela ikhuuni vasuluwaya, anamutthuka mwanawe Isaki, anamwiikaathi vasulu ikhuuni wa altaari*. 10Vano aahookola moonowaawe, anakuxa mwaalo weera amwiive mwanawe. 11Vanonto, ndyelo a Yave aamwiitthana wiirimu: “Abrahaamu! Abrahaamu!” Owo aamwaakhula: “Miyo kiri va!” 12Ndyelo eenre: “Muhimutave mmiravo owo! Muhimpake etthu. Vano koosuwela weera nyuwo munnimoova Muluku, niwoko khamukikhoottihenre mwaninyu mmoharu.” 13Abrahaamu aattukhula maitho, anoona eputtiputthi yooneneva yaangihiweene manyaka muniphuwani. Vano aarowa, anakuxa, anapaka yooveleela vanipuroni na mwanawe. 14Abrahaamu aatteha nipuro nne Nsina na “Yave anaavahe.” Tivawo mpaka olelo eneeriwaaya: “Vamwaakoni wa Yave, eniivahiwe” 15Vanonto, emaara yanaaveeli ndyelo a Yave aamwiitthana Abrahaamu wiirimu, aneera: 16“Kiniilipela Miyo muneenaaka: Mweenre mpakaka yeeyo, muhikikhoottiheraka mwaninyu mmoharu, 17vano vekhaikhai Miyo nkooreeliheni. Ekhapiraanyu eniikhale yoowaattaxa ntoko ithenyeeri sa wiirimu ni muhaava wa mukerekhere wa ephareiya. Aani, ekhapiraanyu eniiwine isidade seiyo sineera siittane ni yeeyo. 18Vano mwaha wa yeeyo miloko sootheene sa elapo ya vathi nsireelihiwe niwoko nyuwo mookiiwelela.” 19Abrahaamu aahokoleela wa arumeiyaawe, anarowa vamoha ni yaawo oBerxeba mwa weiwo aamankaawe.
Anamwane a Nahori
20Eviraka ehuhu ekina, aaheereliwa Abrahaamu weera Milka aamvaha anamwane asilopwana munneiye Nahori: 21Uzi, mutokweenexa, munneiye Buzi, Kemuweli tiithaawe Arami, 22Kesedi, Hazo, Pilidaxi, Yidelafi ni Betuweli, 23atithawe Rebeka. Ala yaari anamwane athannaararu Milka aamuyarannaawe Nahori, munneiye Abrahaamu. 24Vano ekuxowaawe yaari epottha yiitthaniwa Rehuma, aakhalano anamwane ala: Teba, Gahami, Tahaxi ni Mahaka.
موجودہ انتخاب:
Epacerero 22: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.