Epacerero 21
21
Oyariwa wa Isaki
1Vano Yave aamuxekura Sara ni aampakela ntoko aamuroromelinghaawe. 2Sara aarupala, anamuyarela mwaana mulopwana Abrahaamu ngwuuluvalanimwawe, mweehuhuni aahimalaawe Muluku. 3Abrahaamu aamutteha nsinanawe Isaki, mwaana aamuyarenlaawe Sara. 4Isaki aarinaawe mahuku mathannamararu a oyariwawawe, Abrahaamu aamwiinela ntoko Muluku aamulamulenlaawe. 5Amuyaraka Isaki, Abrahaamu eera akhalanneene iyaakha ncira. 6Vano Sara aaheera: “Muluku ookisariha ni otheya, ni ootheene asuwenle yeeyo anootheya vamoha ni miyo.” 7Vano aaheera: “Taani aahovela wa Abrahaamu weera Sara anaamwaamwihe mwaana? Wa soothesene, miyo koomuyarela mwaana mulopwana orookhalaru oowuuluvaleene.”
Abrahaamu ommoomola Hagari ni Iximayeli.
8Vano mwaana ole aahunnuwa, anahiihiwa waamwa. Ni nihuku aahiihiwaawe waamwa, Abrahaamu aapaka efesta etokotoko. 9Wa soothesene, Sara aahoona weera mwaana a Hagari, ngwExipitu, aamuyarenlaawe Abrahaamu aamutthebwa Isaki. 10Vano aarowa wuuluma ni Abrahaamu: “Moomole epottha ela vamoha ni mwanaya. Nkintthuna weera mwanaya akhale namahiyeriwa vamoha ni mwanaka, Isaki.” 11Vano Abrahaamu khaahakalalenle masu ale, niwoko aahimmwa mwanawe. 12Vano Muluku aamweerela Abrahaamu: “Muhithanane mwaha wa mwaana ni epottha. Mwaakhuleleke yeeyo oovekenlaaweni Sara, niwoko epuumbaanyu eniyaalikeleliwe mwa Isaki yoowo. 13Vano mwaana a epottha kinoomukhalihatho muloko, niwoko owotho mwaninyu.” 14Oxaawaya Abrahaamu aakuxa yooca ni ekacikhi yoosareya maahi, anamvaha Hagari. Vano, amuthatelihakaru mmakhatani, aamulaxera vamoha ni mwaana. Owo aapacera weetta amakamakaka munikareni na oBerxeba. 15Vano emalakaru maahi aahenlaawe mukacikhini, aamuhiya mwaana vaniphuwani. 16Vano aarowa okilaathi ottai vakhaani, moota onkotaaya wuumpha wa muupa, niwoko uupuwela: “Nkintthuna omoona mwaana akhwaaka.” Akilaathiyeene vathi aahiinla vancipale. 17Vano Muluku aamwiiwa mwaana iinlaka, ni ndyelo a Yave aamwiitthana Hagari wiirimu eeraka: “Enoothananiha eheeni Hagari? Ohoove, niwoko Muluku ohiiwa nsu na mwaana weiwo weyo omuhiyalaawo. 18Ovenye, omukuxe mwaana omvareleke ni ntata, niwoko mwa yoowo kinookhaliha muloko mutokotoko.” 19Muluku aamoonihera Hagari ehime. Aarowawo, anasariha maahi mukacikhini, anamvaha owura mwaana. 20Muluku aamukhavihera mwaana ole ni owo aahunnuwa. Aamanke munikareni ni aathatuwa namawera olatha ni muupa. 21Aakhala munikareni na oParani ni amayawe yaamutheliha muthiyana a wExipitu.
Wiiraana variyari wa Abrahaamu ni Abimeleki
22Vano wa ehuhuweene yeele Abimeleki ahooliwaka ni Pikoli, mutokweene a anakhottwaawe, aamweerela Abrahaamu: “Muluku ori mpattaawo mwa sootheene seiye ompakaawo. 23Vano kinoovekela weera vaanaanova omulipele Muluku weera khoorwa onilokottha hata miyo, naari anamwanaaka mpaka ekhapiraaka yootheene. Opwatthe muloko owaakhelenle ntoko namarwa ni oreerawene murima weiwo miyo koonihenraaka.” 24Abrahaamu aamwaakhula: “Miyo kinoolipela!” 25Wa soothesene, Abrahaamu aahuuluma ni Abimeleki sa ehime arumeiyaawe Abimeleki yaakamenlaaya. 26Vano Abimeleki aamwaakhula: “Nkaasuwenle taani yaapanke yeeyo. Khoonatoko okileela etthu. Olelonto kimmweera osuwela.” 27Vano Abrahaamu aaruuha ikhondoolo ni imombe, anamvaha Abimeleki, ni ooweeli awo yaahiiraana. 28Abrahaamu aamwalamwaliha ikhondoolo ithannapiili ithiyana sa muhuwaawe. 29Vano Abimeleki aamukoha: “Entaphulela eheeni ikhondoolo ithannapiili ithiyana omwalamwanxaawo ni iyo sikina?” 30Vano owo aamwaakhula: “Mwaakhelele ikhondoolo iya ithannapiili ithiyana sawaka ntoko onamoona weera musuwele weera ti miyo kaathimpe ehime ele.” 31Tivawo nipuro nne niitthaniwaaya oBerxeba, niwoko iwe ooweeli yaahiiraana. 32Vano yaakhulelaka wiiraana iwe oBerxeba, Abimeleki ni Pikoli, mutokweene a anakhottwaawe, yaahokoleela elapo ya aFilisti. 33Abrahaamu aaphatteya oBerxeba tamargira*, aniitthana Nsina na Yave, Muluku oohimala. 34Vano, Abrahaamu aamaka elapo ya aFilisti mweehuhuni yincipale.
موجودہ انتخاب:
Epacerero 21: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.