YOHANA 9
9
Yesu Yahonyinya Mundu Wivulwa Niyavekhula
1Lwa Yesu yali nachendanga, yalola mundu wali niyivulwa niyavekhula. 2Veechi veve vamureeva, “Mwechitsi! Ni viina wakhola vwoni vwachila mundu uyu niyivulwa niyavekhula? Vwoni vwevwe mwene inoho vwoni vwa vivuli veve vali nivakhola?”
3Yesu yachipa, “Mundu uyu shikali yivulwa niyavekhula shichila vwoni vwevwe inoho vwoni vwa vivuli veve vali nivakhola tawe; navutswa kikholekha kario, khu tsingulu tsia Nyasaye tsiloleshe tsikholanga muhinzilu khuvirila muye. 4Lwa kuvetsanga nu kushili mbasu, khutukha khukhole muhinzilu kwa woyo wanduma. Vutukhu vwitsanga lwa mundu alekhanga khukhola muhinzilu kwosi. 5Khumatukhu koosi kashili mu shivala, ninzi vulavu vwa vandu mu shivala.”
6Lwa Yesu yali namali khuvoola makhuva kenako, yasutsa maree hasi, natsukanyinya maree kenako na malova, nikakwa matohi; navekha mu tsimoni tsiu mundu wali niyivulwa niyavekhula; 7ma Yesu namuvoolela, “Rula hanu utsi usave mu tsimoni tsiotsio mu Litavalia lia Silohamu.” (Lira Silohamu livoolanga “Khurumwa”). Khulwa yako, mundu mwenoyo yarulaho natsia khusava mu tsimoni tsietsie, nakalukha nalolanga.
8Vareende vu mundu mwenoyo nende vandu vali nivamenya nivalolanga nasavasavanga vindu vareevana nivavoola, “Uyu shiali neye mundu wa khwali nu khwamenya nu khulolanga niyikhale nasava savanga vindu?”
9Valala khu vandu venavo vavoola, “Neye mundu mwenoyo.” Navutswa vandi nivavoola, “Shiali ye tawe; navutswa asasanga khuli ye.” Mundu mwenoyo yavavoolela, “Ninzi ye.”
10Vamureeva, “Tsimoni tsiotsio tsiaraanga ndina khulola?”
11Mundu mwenoyo yavachipa, “Mundu ulaangwangwa Yesu alombi matohi, alakavekha mu tsimoni tsianje. Ambolele nzi Silohamu khusava mu tsimoni tsianje. Narula ninzia Silohamu, nisava mu tsimoni tsianje, nindanga khulola.”
12Vamureeva, “Ni hena ha mundu mwenoyo ali?” Yavavoolela, “Shinyala khumanyakhu wali tawe.”
Vafarisayo Varunishitsa Khuli Yahonyinywa
13Vandu vahila mundu wali niyavekhula khu Vafarisayo. 14Litukhu lia Yesu yalomba matohi, nahonyinya mundu wali niyivulwa niyavekhula liali litukhu li Lisabato. 15Khulwa yako, Vafarisayo vareeva khandi mundu mwenoyo khuli lwa yali nahonyinywi tsimoni. Yavavoolela, “Yavekha matohi mu tsimoni tsianje. Nasava mu tsimoni tsienetso, nindanga khulola.”
16Valala khu Vafarisayo vavoola, “Mundu ukholi ndio, shianyala khuva warula khu Nyasaye tawe; shichila shialondanga malako ki litukhu li Lisabato tawe.”
Navutswa vandi nivavoola, “Mundu mwoni anyala khukhola munjila shina viloleshitsu khuli vienevo?” Liavukhana liali muvo.
17Vafarisayo vareeva khandi mundu wali nahonyinywi mwenoyo, “Ni shina shianuvoole khulondokhana khu mundu wakhuhonyinya vuvekhu vwovwo?” Yavachipa, “Nu muprofeti.”
18Vimilili va Vayahudi shivasuuvila ndi mundu mwenoyo yivulwa niyavekhula khandi nunundi alolanga nivashili khulaanga vivuli veve tawe. 19Vareeva vivuli venavo, “Uyu nu mwana wenyu? Neye wamuvoolanga yivulwa niyavekhula? Kanyala khuva ndina alolanga nunundi?”
20Vivuli veve venavo vachipa, “Khwamanya ndi ye nu mwana weru, khandi khwamanya ndi yivulwa niyavekhula. 21Navutswa shiukhunyala khumanyakhu shimukholi nalola, inoho mundu wamuhonyinya tsimoni tsietsie tawe. Mureevi mwene; nu muhindila, anyala khuvoola mwene!” 22Vivuli veve vavoola ndio, shichila varia vimilili va Vayahudi; lwa Vayahudi vali vahuchilitsane ndi mundu usuuvilanga Yesu neye Masiha akhunjwi khurula mu lisinagogi. 23Nashio shivune shiachila vivuli veve nivavoola, “Nu muhindila; mureevi mwene!”
24Valaanga mundu mwenoyo lwa khavili; nivamuvoolela, “Khuvoolele katoto imbeli wa Nyasaye! Khwamanya ndi mundu wakhuhonyinya woyo nu mwoni.”
25Mundu mwenoyo yachipa, “Khali nali mundu mwoni, shinyala khumanya tawe. Navutswa ni shindu shilala shianyala khuva nimanyi: Nali navekhula, navutswa nunundi nakhalola.”
26Vamureeva, “Ni shina shia yakhukhola? Yakhuhonyinya ndina vuvekhu vwovwo?”
27Mundu mwenoyo yachipa, “Mbele nimuvoolele khale, navutswa munyi shiumuhulishitsi tawe. Shichila shina mwenyanga khuhulila khandi? Khali munyi mwenyanga khuva veechi veve?”
28Vanyekanyinya mundu mwenoyo nivavoola, “Uli mwechi wu mundu woyo; navutswa khutsi ni veechi va Musa. 29Khwamanya ndi Nyasaye yalomoloma khu Musa; navutswa shiukhumanyi shindu shiosi khali wa mundu woyo arulanga tawe!”
30Mundu mwenoyo yachipa, “Ni shindu shiu khuchenyinya! Shiumunyala khumanya wa mundu woyo arulanga tawe; navutswa umbonyinyi vuvekhu vwanje! 31Khwamanya ndi Nyasaye shianyala khuhulishitsa vandu vooni tawe; navutswa ahulishitsanga mundu usaalanga khuye nakhola ka yenyanga kakholwi. 32Khurula shivala nishiloongwa, vandu vashili khuhulilakhu mundu wivulwa niyavekhula wahonyinywa. 33Niiva mundu uyu shiyarula khu Nyasaye, shiyakhakholi shindu shiosi tawe.”
34Vamuchipa, “Yivi wivulwa khandi nuvilushila mu vwoni. Uchelitsanga khukhwechitsa?” Vamukhunga khurula mu lisinagogi.
Livekhula liu Muroho
35Lwa Yesu yahulila ndi vakhunji mundu mwenoyo khurula mu lisinagogi; yamunyola namureeva, “Uli ni lisuuvila mu Mwana wu Mundu?”
36Mundu mwenoyo yamureeva, “Mwami, mbolela Mwana wu Mundu ni viina, suuvili muye?”
37Yesu yamuvoolela, “Umali khumulola nunundi; khandi katoto neye ulomolomanga nivi.”
38Mundu mwenoyo yavoola, “Mwami, suuvili;” nasaala khu Yesu.
39Yesu yavoola, “Niitsa mu shivala shinu khukhalachila vandu, khu vandu vavekhula valole; khandi yavo valolanga vakwi vavekhu.”
40Valala khu Vafarisayo vali nivali na Yesu, vahulila makhuva kenako; nivamureeva, “Ni shina? Khali khutsi khwavekhula?”
41Yesu yavavoolela, “Muva nu mwavekhula, khani shiumuli nu vutamanu vu khukhola vwoni tawe. Navutswa nunundi lwa mwikholanga mulolanga, vutamanu vwenyu vushiliho.”
موجودہ انتخاب:
YOHANA 9: LLLCATHOLIC
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© The Bible Society of Kenya, 2013
