YOHANA 8
8
Mukhali Wakumilwa Naheeyanga
[ 1Khulwa yako, shia mundu wosi yasimukha natsia ingo wewe; navutswa Yesu yasimukha natsia khu Shikulu shia Misayituni.#8:1 Mahandiko manyishi nende likalukhanyinya liakhale kavula 8:1-11; kandi kali natsio inyuma wa Yohana 21:4; kandi khandi kali natsio inyuma wa Luka 21:38. Mahandiko kandi kali natsio inyuma wa Yohana 7:36. 2Khulitukhu lialondakhu nu kushili mu mavwevwe, Yesu yakalukha mu Litempeli. Vandu voosi vivunjelitsa havundu ha yali nali, niyikhala hasi khuveechitsa. 3Vechitsi va Malako nende Vafarisayo vitsa nu mukhali wakumilwa naheeyanga. Vamusinjilitsa hakari ha vandu voosi; 4nivavoolela Yesu, “Mwechitsi, mukhali uyu umali khukumilwa naheeyanga. 5Khulondokhana khu Malako keru, Musa yavoola mukhali khuli uyu khutukha aleswi na machina khutukha lwakhutsa. Khulwa yako, ni shina shiunyala khuvoolakhu khulondokhana khuye?” 6Vareeva Yesu lireevo lienelo khumureeka, khu vanyole shivune shiu khumuyaala. Navutswa Yesu yinama hasi, naraanga khuhandika mu lukuushi ni shitere shieshie.
7Lwa vatsililila khureeva Yesu mareevo, yasinjila navavoolela, “Niiva mundu alikhu mu munyi ushili khukholakhu vwoni, nu vulahi naraanji khulesa mukhali uyu ni lichina.” 8Khulwa yako, Yesu yinama hasi khandi nahandika mulukuushi ni shitere shieshie. 9Navutswa lwa vahulila ndio, vandu voosi varulaho, shia mulala, khuraanjila khu vahindila vene. Yesu yarikala hawenaho wonyene, nu mukhali mwenoyo nashisinjiliho. 10Yesu yamuheenza namureeva, “Mukhali yivi, ni hena ha vandu venavo vali? Mundu alikhuho khuvo ukhukhalachili khwiirwa?”
11Mukhali mwenoyo yavoola, “Mwami, mundu avulakhuho.” Yesu yavoola, “Khali inzi shinyala khukhukhalachila khwiirwa tawe; navutswa rula hanu utsi. Ukhakalushila khukhola vwoni tawe.”]
Yesu neye Vulavu vu mu Shivala
12Yesu yalomoloma khandi khu Vafarisayo. Yavavoolela, “Ninzi vulavu vu mu shivala. Mundu unondanga, shialiitsa khuchenda mu shisuundi tawe; navutswa aliitsa khunyola vulavu vuhaananga vulamu.”
13Nalwo lwa Vafarisayo vavoolela Yesu, “Yivi mwene wihaanilanga vushiahidi khulondokhana khu yivi; navutswa makhuva ka uvoolanga shikali katoto tawe.”
14Yesu yavoola, “Khali niiva inzi mwene nihaanilanga vushiahidi khulondokhana khwinzi, makhuva kambolanga ni katoto, shichila namanya wa narula khandi wa nzitsanga. Navutswa munyi muvulakhu shia mwamanyakhu khulondokhana khu wa narula inoho wa nzitsanga. 15Mukhalachilanga vandu khulondokhana khuli vandu vakanakananga vutswa; navutswa inzi shikhalachilanga mundu tawe. 16Khali ndio, niiva khalachilanga vandu, likhalaka lianje ni liatoto, shichila shikali ninzi wonyene ukhalachilanga vandu tawe; nikhali khali Tata wanje wanduma neye uvakhalachilanga. 17Kahandikwa mu Malako kenyu vene ndi lwa vashiahidi vavili vahuchilitsananga, khu ka vavoolanga ni kilikali. 18Inzi mwene mbananga vushiahidi khulondokhana khwinzi; khandi Tata wanduma neye uhaananga vushiahidi vundi khulondokhana khwinzi.”
19Khulwa yako, vamureeva, “Ni hena wa Tata wowo amenyanga?”
Yesu yachipa, “Shiumwamanyakhu inzi inoho Tata wanje tawe. Niiva munyala khuva mwamanya, mwakhamanyi khandi Tata wanje.”
20Yesu yavoola makhuva kenako koosi, lwa yechitsanga vandu mu Litempeli, havundu ha vavikhanga masanduku ki vihanwa. Mundu avulakhuho wamukumila, shichila isaa yeye yali nishili khutukha.
Shiumunyala Khutsia Wanzitsanga Tawe
21Yesu yavavoolela khandi, “Narulaho; muliitsa khukhava inzi, navutswa muliitsa khukhutsa shichila vwoni vwenyu vwa mukholanga. Shiumunyala khwitsa wanzitsanga tawe.”
22Nalwo lwa vimilili va Vayahudi vareeva, “Anyala khwiyiira mwene, lwa avoolanga, ‘Shiumunyala khwitsa wanzitsanga tawe.’ ”
23Yesu yavachipa, “Munyi muli vandu vu khulilova khunu; navutswa inzi narula mwikulu. Muli vandu vu khulilova khunu, navutswa shindi mundu wu khulilova khunu tawe. 24Nashio shivune shichilanga nimuvoolela muliitsa khukhutsa shichila vwoni vwenyu vwa mukholanga, muliitsa khukhutsa shichila vwoni vwenyu niiva mulambakhana khusuuvila ninzi Ye.”
25Vareeva Yesu, “Uli viina?” Yesu yavachipa, “Mbele nimuvoolele khurula muliraanga. 26Ndi na makhuva manyishi ku khumuvoolela, khandi kanyala khuchila mukhalachilwi. Woyo wanduma nu watoto; khandi ka yambolela, nako kambolelanga vandu vu mu shivala shinu.”
27Khali shivamanyakhu ndi Yesu yalomolomanga khulondokhana khu Tata wewe tawe. 28Yesu yavavoolela, “Lwa muliitsa khuva nu mwakhavamba Mwana wu Mundu khu musalaba, nalwo lwa muliitsa khumanya ‘Ninzi Ye’; khandi ndi mbulakhu shindu shianyala khukhola khuvirila khu vunyali vwanje mwene; navutswa mbolanga ka Tata anzechitsanga mbole. 29Woyo wanduma ali ninzi; shikali wanzivalakhu wonyene tawe; shichila kholanga shia khase khosi ka muyaanzitsanga.”
30Vandu vanyishi vasuuvila mu Yesu, lwa vahulila navoolanga ndio.
Katoto Kaliitsa khumukhola Vavoholole
31Yesu yavoolela Vayahudi vali nivasuuvila muye, “Niiva mulatsililila khulonda mechitso kaanje, katoto muli veechi vaanje. 32Nalwo lwa muliitsa khumanya katoto, khandi katoto kaliitsa khumukhola khuva vavoholole.”
33Vamuchipa, “Khutsi khuli vitsukhulu va Aburahamu; khandi mundu ashili khukhukholakhu varukwa veve. Ni shina shiumanyinyanga luvoolanga, ‘Khulakholwa khuva vavoholole’?”
34Yesu yavavoolela, “Muvoolelanga toto ndi shia mundu wu kholanga vwoni, nu murukwa wu vwoni. 35Murukwa shianyala khutsililila khuva mulala khu vandu vi inzu khumatukhu koosi tawe; navutswa mwana atsilililanga khuva mulala khu vandu vi inzu yeneyo mihika ni mihika. 36Niiva Mwana wa Nyasaye aliitsa khumukhola khuva vavoholole, katoto mulakholwa khuva vavoholole. 37Manyi ndi muli vitsukhulu va Aburahamu; navutswa khali ndio, muchelitsanga khunziira, shichila likhuva lianje shilili mu mioyo chienyu tawe. 38Muvoolelanga ka nalola Tata wanje nakholanga; navutswa munyi mukholanga ka tata wenyu yamuvoolela mukhole.”
39Vachipa Yesu, “Aburahamu neye tata weru.”
Yesu yavavoolela, “Niiva ni kilikali, mwakhavele vitsukhulu va Aburahamu, mwakhakholi vindu via Aburahamu yakholanga; 40navutswa nunundi muchelitsanga khuli munyala khunziira, shichila muvoolele katoto ka nahulila khurula khu Nyasaye. Aburahamu shiyakholakhu vindu khuli vienevo tawe. 41Mukholanga vindu via tata wenyu mwene akholanga.” Vamuhinjitsa nivavoola, “Shiukhuli vaana vuluswa tawe; navutswa Nyasaye neye Tata weru wa khuli naye wonyene.”
42Yesu yavavoolela, “Niiva toto Nyasaye yakhavele Tata wenyu, mwakhanyanzi, shichila narula khu Nyasaye khandi ndi hanu nunundi. Shikali niitsa khulondokhana khu vunyali vwanje mwene tawe; navutswa Tata wanje neye wanduma. 43Khulwa yako, shichila shina mukhahulilanga vwangu kambolanga tawe? Kanyala khuva mukhayilwi khuhulila likhuva lianje. 44Muli vaana va Ibilisi, nali tata wenyu; khandi mukholanga ka tata wenyu akholanga. Yali mwiiri khurula muliraanga, niyambakhana khulonda katoto; shichila katoto kavula muye. Lwa avehanga, alomolomanga lulomolomo lwa mwene amanyi, shichila nu muvehi khandi ni tata wa vavehi voosi. 45Navutswa khali ndio, shichila mbolanga katoto, shiumunyala khusuuvila mwinzi tawe. 46Ni viina khu munyi unyala khumanyinya ndi inzi nu mwoni? Niiva mbolanga katoto, shichila shina mwambakhananga khusuuvila mwinzi? 47Mundu warula khu Nyasaye, ahulilanga makhuva ka Nyasaye avoolanga. Shivune shichilanga numuvula khuhulila shili ndi shiumuli vandu va Nyasaye tawe.”
Yesu nende Aburahamu
48Vandu venavo vareeva Yesu, “Khunyala khuva khuvoolanga vuvehi lwa khuvoolanga uli Musamaria, khandi litimoni lili mu yivi?”
49Yesu yavavoolela, “Litimoni shikali lili mwinzi tawe; navutswa mbetsanga Tata wanje luyali; na munyi mwambakhananga khumba luyali. 50Khali ndio, shikali khavanga vukhumi vwanje mwene tawe; navutswa khuliho nu mulala wenyanga khuheelwa vukhumi, khandi neye mukhalachi. 51Muvoolelanga toto ndi niiva mundu alalonda makhuva kaanje, shianyala khukhutsa tawe.”
52Vayahudi vamuvoolela, “Khwakhamanya nunundi ndi litimoni lili mu yivi! Aburahamu yakhutsa, khali vaprofeti nivakhutsa; nikhali uvoolanga, ‘Niiva mundu alalonda makhuva kaanje, shianyala khukhutsa tawe.’ 53Unyala khuva wavira kuuka weru Aburahamu wakhutsa khale? Khali vaprofeti vakhutsa. Ulolanga uli viina?”
54Yesu yachipa, “Niiva nyala khwihaanila vukhumi mwene, vukhumi vwanje vuvula vukhonyi vwosi. Tata wanje, wamulaanganga Nyasaye wenyu, neye ukhuminyanga. 55Munyi mwakorwa Tata wanje, navutswa inzi namumanya. Niiva nakhavooli namukorwa, nyala khuva muvehi khuli munyi. Navutswa namumanya khandi nondanga likhuva lielie. 56Kuuka wenyu Aburahamu yikhoya, lwa yahulila litukhu liu khwitsa khwanje; yalilola nasangala.”
57Vayahudi vareeva Yesu, “Ushili khali khutukha mihika makhomi karanu! Uvoolanga walolakhu Aburahamu?”
58Yesu yachipa, “Muvoolelanga toto ndi Aburahamu nashili khwivulwa, ‘Nali nindiho.’ ”
59Khulwa yako, vatola machina nivenya khulesa Yesu; navutswa Yesu yivisa narula mu Litempeli lienelo.
موجودہ انتخاب:
YOHANA 8: LLLCATHOLIC
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© The Bible Society of Kenya, 2013
