TAUNET 32
32
Kochobegei Jakobo kotuiyo ak Esau
1Kiwa anyun Jakobo bandanyi, ak kituiyo ak malaikaisiekab Kamuktaindet. 2Ak ye kingogeer Jakobo, kole, Lugetab Kamuktaindet ni: ak kiguure kainetab yoto Maanaim.
3Ak kiiyokto Jakobo bik kondoe inendet koba ole mi ng’etab kamet Esau agoi emetab Seir, noto ko koretab Edom. 4Ak king’at ichek kolenji, Omwachi kiptaiyandennyu Esau ko u ni; olenji, Kamwa otwogindeng’ung’ Jakobo ko u ni, Kiatoondenji Laban ak kiatebe oloto agoi rani: 5ak atinye eik, ak sigirok ak akwotisiek che bo nego, ak otwogik che murenik, ak otwogik che tibik, ak kaayogu nyo kemwaun inye, kiptaiyandennyu, si kobiit anyor chamet eng’ taing’ung’. 6Ak kiweekyigei Jakobo che kiga kiyokto, nyo kole, Kogeit ole mi ng’etab komet Esau, ak nyonei agine kotorogun, nyonei koboto bik bogol ang’wan. 7Kiiywei Jakobo mising’ anyun, ak kiarogen: ak kipchei bik che kimi tugul, ak nego, ak tuga, ak tambesik, kopcheune aeng’; 8ak kile, Ngo tuiyo Esau ak che bo tai, ak kobar, komuchi kochililso che bo let. 9Ak kile Jakobo, Ee, Kamuktaindet ne bo baba Abraham, ak Kamuktaindet ne bo baba Isak, Ee Jehovah ne kiimwawa ilenja, Iweekyige emeng’ung’, oldab tilionutiguk, ak ayaun ne mie: 10Manyoljina anyor rireneng’ung’ ne bo ge tugul, ak imanit tugul, ne kiiborji otwogindeng’ung’; amu kialandae ainoni bo Jordan ak kiroktanyu kityo; ak nguno, ko kapcheunege aeng’. 11Asain ale, isorua eng’ eutab tupchennyu Esau: amu aiywei inendet, ale nyonei nyo kobara, koboto kamet ak lagok. 12Ak kiimwa ile, Ayaun ne mie iman, ak ayae iyoteng’ung’ kochang’ait ko u ng’aniekab nyanjet che maiitoksei amu chang’.
13Ak kiru yoto lagatunato; ak kichob kagochinet eng’ tugukyik che kitinyei si kogochi ng’etab kamet Esau; 14iyuogik bogol aeng’ che bo ng’ororek koboto kwesik tiptem, ak iyuogik bogol aeng’ che bo kechirek, koboto mengichik tiptem, 15tambesik che abaen sosom koboto moekwak, ak tuga iyuogik artam koboto kirugik taman, ak iyuogik tiptem che bo sigirok ak moek taman che bo sigirok. 16Ak kiigochi otwogikyik kokweri akwet age tugul inegei; ak kilenji otwogikyik, Oba olande ondoena, among’ korikyi akwet age akwet age. 17Ak king’at ne bo tai, kolenji, Ye tuiyenen Esau tupchennyu, ak koteebenen kole, I bo ng’o? Ak iwendi ano? Ak bo ng’o chu mi taing’ung’? 18Ilenji anyun, Bo otwogindeng’ung’ Jakobo; kagochinet ne kiyokyin kiptaiyandennyu Esau: ak nyonei inendet eng’ let. 19Ak king’at ne bo aeng’ agine, ak ne bo somok, ak tugul che isubi akwotisiek, kolenji, Ye otuiye ak Esau, omwachi ko u ni, olenji, 20Keero, nyonei eng’ let otwogindeng’ung’ Jakobo. Amu kile, Amuchi agaigai eng’ kagochinet ne wendi eng’ tainnyu; ye ibata amuchi ageer togennyi; tamangab kocham kotaacha. 21Kiindo anyun kagochinet kolanda: ak kiru inendet lagatunato koboto bik.
Kokwetegei Jakobo ak malaikaiyat
22Ak king’eet lagatunato, komut osotikyik tuwai, ak otwogikyik tuwai che tibik, ak lagokyik taman ak agenge, agoi koyoiyo tabartab Jabok. 23Ak kiimut koba kolandae kererunoto, koboto tugukyik che kitinyei. 24Ak king’eet Jakobo inegei: ak kibiit chito ne kikwetgei tuwai agoi koeech. 25Kingogeer kole mata komuch koterter, kotwa ole tuiyechin kowekab ngoroet; ak king’uliel kubestab Jakobo, ye kikwetegei ak inendet. 26Ak kile, Unda awo, amu machei koeech. Ak kilenji, Maundoin ama iberura. 27Ak kiteebe, kolenji, Ng’o kaineng’ung’? Ak kilenji, Kiguurena Jakobo. 28Ak kilenji, Ma keguurenen Jakobo agoi, ago kagiguurenen Israel: amu kaobelgei ak Kamuktaindet ak bik agichek, ak kaiterter. 29Ak kiteebe Jakobo kolenji, Asain ale, mwawa kaineng’ung’. Ak kilenji, Amu nee si iteebena kainennyu? Ak kiiberur eng’ yoto. 30Kiguure anyun Jakobo kainetab yoto Peniel: amu kaager togetab Kamuktaindet kimni, ak kota asobe. 31Ak kichor asista ye kilandae Penuel, ak kiing’walati amu kubestanyi. 32Maamei bikab Israel tigitiotab ngoroet koboch yoto, agoi kora, amu noto: amu kitwa ole tuiyechin kowekab ngoroetab Jakobo eng’ tigitiotab ngoroet.
موجودہ انتخاب:
TAUNET 32: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020