TAUNET 31
31
Komwee Jakobo Laban eng’ ung’ot
1Ak kigas Jakobo ng’alekab werikab Laban, kolen, Kigokweri Jakobo tugul che bo kwandanyo: ak kigonyor magornatoni te ni eng’ tugukab kwandanyo. 2Ak kigeer Jakobo togetab Laban kole, ogeero, ma ko u atkinye tai. 3Ak kilenji Jehovah Jakobo, Ketitege, ui emetab kwanisieguk ole kigisikyinin; ak ami koboten. 4Ak kiiyokto Jakobo chito kwo kewanin ole mi akwennyi koguur Rael ak Lea, 5nyo kolenji, Ageere ale ma ko u togetab kwandang’wong’ atkinye tai; ago kigotebi Kamuktaindet ne bo baba kobota. 6Ak ongen ole kiaot kwandang’wong’ eng’ kimnatennyu tugul. 7Ak kigoberbera kwandang’wong’ ak kigowal melektanyu konyil taman; ago ma chamji Kamuktaindet koyaiywa ne ya. 8Ye kingomwa kole, Egu melektang’ung’ che ibisionen, ko kiiyo anyun tugul che ibisionen: ak ye kingomwa kole, Egu melektang’ung’ che keronen, ko kiiyo anyun tugul che keronen. 9U noto anyun kigetune Kamuktaindet kwandang’wong’ akwet si kogona. 10Ak ye kingomachei korisyo nego, ageer eng’ karuotitoet, kwesik che lanyei nego ko ki keronen, ak che ibisionen ak che mologonen. 11Ak kiguura malaikaiyatab Kamuktaindet eng’ karuotitoet, kole, Jakobo: ak kiale, Ami yu. 12Ak kile, Keerote, si inai ile, keronen ak ko ibisionen ak ko mologonen kwesik tugul, che lanyei nego: amu kaageer choto tugul che yaun Laban. 13Ane Kamuktaindet ne bo Betel, ole kiirong’jine mwaita toloita ole kiiyosieunena: ng’eet anyun, ui eng’ emoni, iweekyige ole kigisikyinin. 14Kiwolji anyun Rael ak Lea kolenji, Tos mitei kebeberta anan kiy ne kinyoru eng’ gotab kwandanyo? 15Tos magiitech kele ki bo or age? Amu kigoaldech ak kigoamenech tuguk. 16Amu nenyo ak lagokyok magornatoni kigetune Kamuktaindet kwandanyo: ara anyun yai kiy age tugul ne kagomwaun Kamuktaindet.
17King’eet anyun Jakobo, ak kichob lagokyik ak osotikyik kolany tambesik. 18Ak kikweri akwotisiekyik tugul, ak tugukyik tugul che kiga koyum, agot akwotisiek che kiga konyor, che kiga koyum eng’ Padan-aram, si kobiit kouto anyun koba emetab Kanan, oldab kwandanyi Isak. 19Ak kichor Rael kanamonikab kwandanyi Laban, amu kigawa Laban kotil kororikab kechirekyik. 20King’al Jakobo Laban Suriaindet, amu ma mwachi kolenji, amache awo; kiung’ategi. 21Kimweito anyun tuguk tugul che kitinyei; ak king’eet kolandae ainet, kwo kotokyigei tulwetab Gilead.
22Ak betut ne bo somok kemwachi Laban kelenji, Kogomwei Jakobo. 23Kiimut tupchosiekyik, koba koboto inendet kosub betusiek tisab; ak kinyorji tulwetab Gilead. 24Kinyonji Kamuktaindet Laban Suriaindet kemoi eng’ karuotitoet, kolenji, Ripge, amemwachi Jakobo ng’olyo ne mie anan ne ya. 25Ak kiit Laban ole mi Jakobo. Ak kiga teech Jakobo emainnyi eng’ tulwet. Ki inyo koteech Laban ak tupchosiekyik agichek tulwetab Gilead. 26Kolenji Laban Jakobo, Kiiyai nee kot ing’ala ak iung’anugei, ak imutu tibikyuk ko u luulenik che kiginame rotwetab chok? 27Kilya si imweu iung’anugei, ing’ala, ama imwawa, si kobiit aunden iwe eng’ boiboiyet ak tienwogik, ak sugutit ne ming’in ak ketubet; 28ak ma igang’wa ang’utut werikyuk ak tibikyuk? Kiiyai eng’ berberindo. 29Atinye kimnatet ayaiywok ne ya: ago kong’alalwa Kamuktaindet ne bo kwandang’wong’ amut lagat, kolenja, Ripgei, si memwachi Jakobo kiy ne mie anan ne ya. 30Ago angen ale koitau banda, amu amin emo agobo gotab kwandang’ung’, ago kilya si ichorena kanomonikyuk? 31Kowolji Jakobo Laban kolenji, Amu kiaiyweisie, ale, abere imuchi irebena tibiguk eng’ kimnatet. 32Meei age tugul ne koi inyorjini kanamoniguk: inyit eng’ taitab tupchosiekyok kiy age tugul neng’ung’ ne atinye, si iib. Amu kima nai Jakobo kole kichor Rael tuguchoto.
33Kimanda anyun Laban emait ne bo Jakobo, ak emaitab Lea, ak emaitab otwogik aeng’ che tibik; ago manyor kanamonichoto. Yeityo komong’ eng’ emait ne bo Lea, komanda ne bo Rael. 34Ki Rael ne kiga ib kanamonichoto, kwo konde tuguk orit che kiitoe tambesik; yeityo kotebe. Ak kiisiach Laban ola tugul kosapsabat eng’ emait ago manyor. 35Ak kilenji Rael kwandanyi, Amat konerekya kiptaiyandennyu, amu mamuchi ang’eet eng’ taing’ung’; amu kanama atebetab kwonyik. Ak kicheng’ kot, ak kima nyor kanamonik.
36Ak kinerech Jakobo, kobolyo ak Laban: ak kiwolji Jakobo Laban kolenji, Nee lelutiennyu? Nee chalwoktanyu, kot isubwa ko u ni eng’ neregek? 37Ak kaisiach isapsabate tugukyuk tugul, nee ne bo tugukab gong’ung’ ne kenyoru? Nde yu, taitab tupchosiekyuk ak tupchosieguk, si kobiit kobesiewech achek tuwai. 38Kiatebi koboten eng’ kenyisiechu tiptem; ma oos kechireguk ak ng’ororeguk, ama aam mengichikab akweng’ung’. 39Ak kima aibun ne kibar tiondo kotonaton; kiageerunenen nenyu; kiimagena noto, ngo ne kigichor bet anan ngo ne kichor kemoi. 40Kiatebi ko u noto; kibira kiptoret bet, ak kibara kaititiet kemoi; ak kima kota anuuchi. 41Kiatebe gong’ung’ eng’ kenyisiechu tiptem; kiaotin kenyisiek taman ak ang’wan agobo tibiguk aeng’, ak kiaotin kenyisiek lo agobo akwotisieguk: ak kiiwal melektanyu konyil taman. 42Ak nda kima komi kobota Kamuktaindet ne bo baba, Kamuktaindet ne bo Abraham, ak Inendet ne iywei Isak, ko kiteona awo buch. Kogogeer Kamuktaindet nyalildanyu ak boisietab eunekguk, sk kogerin kong’ lagat anyun amu noto.
43Ak kiwolji Laban Jakobo kolenji, Tipchu ko tibikyuk, ak lagochu ko lagokyuk, ak akwotisiechu ko akwotisiekyuk, ak tukchu tugul igeere ko chechuk: ara alyonjini anyun tipchuchuk rani, ak lagokwak che kigosich? 44Ara anyun, nyo kiyosiechige, inye ak ane; si koek baornatet eng’ kwenunnyo, inye ak ane. 45Ak kinam Jakobo koita kolumda koek toloita. 46Ak kolenji Jakobo tupchosiekyik, Oyum koik; ak kiiyum koik, yeityo koruruch: ak kiamis eng’ ye negite karurugutionoto bo koik. 47Ak kiguure Laban yoto Jegar- saduta: ago kiguure Jakobo Galed. 48Ak kile Laban, Karurugutioni kobaornatet eng’ kwenunnyo, inye ak ane ra. Kigiguure anyun kainetab yoto Galed amu noto: 49ak kigiguure kogeny Mispa, amu kile, Ingoek Jehova ribindet eng’ kwenunnyo, inye ak ane, ye magigeerege. 50Ngot ko tun ius tibikyuk, anan ngot ko tun itun osotik alak isione tibikyuk, ko mami chi kwenunnyo; keero, baoriat Kamuktaindet eng’ kwenunnyo, inye ak ane. 51Ak kilenji Laban Jakobo, Keer karurugutioni, keer toloi, ne kaalumde eng’ kwenunnyo, inye ak ane. 52Baoriat karurugutioni, ak baoriat toloi, ale si masiiru karurugutioni nyo ayaun kiy ne ya, ak si mesiiru aginye karurugutioni ak toloi, inyo iyaiywa kiy ne ya. 53Ingoruokseiywech Kamuktaindet ne bo Abraham, ak Kamuktaindet ne bo Nahor, Kamuktaindet ne bo kwandanywa. Ak kiiyosio Jakobo agobo Inendet ne iywei Isak kwandanyi. 54Ak kiigoito Jakobo tiseiywot eng’ tulwet, yeityo koguur tupchosiekyik kobwa koamis: ak kiamis, ak kiruiyo tulwonoto eng’ lagatunato. 55Ak king’eet Laban karon mising’, kong’utut werikyik ak tibikyik, ak kiiberur: kiwa anyun Laban koweektagei oldanyi.
موجودہ انتخاب:
TAUNET 31: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020