Génesis 3
3
Adam dawak Eva karakPapang yulni lalawi
1Papang witing Dawan kidika yaklauwi di minikratni balna yamna kidika bitik pasyakat bil#Rib 12:9; 20:2. kidika tanit kulnin sirihni dai, bahang witing yaklauwi yal yakat kalyulwi dakana:
—¿Kaput bahang, Papang yaklauwi manayulnayah, itiklana paskau pan balna bangkidika kaupak minik kasnamna-awas?
2Yal yaklauwi nangnitlana:
—Yangna sipyangna kasnikna pan balna minik kidika, angdik angdik, 3kaunah itiklana papus kau pan as sakkidika minik laih sip-awas yangna kasnikna. Papang yaklauwi yanayulna kidika panan minik kasnikna awaski, dawak laihnikna bik awaski, bahang yangna yamtanaki kat dautanaki.
4Kaunah bil yaklauwi yal yakat kalyulna:
—Kidika laih rahm awaski. Manna dautas-awanama. 5Papang yamni amanglawi manna kidika panan minik kastanama kat amanglatanama di yamni dawak di dutni kidika bik, bahang Papang kapat awanama.
6Dawak yal kidika talna panan minik kidika nuhni yamni dai, dawak witing kaskih kalana, kaput bik di balna kidika bik amanglanin. Dawak kaput laih witing pan minik kidika dakwi kasna. Usnit dawak alni yakat bik kalawak kasna.#Rom 5:12. 7Bahang kidika minitni yakat witingna miniknapa uluhna, dawak albupak amanglalana witingna wahdis rau kidika. Kaput laih witingna ani damni basni kau biwi kalmumukna.
8Al kidika yalni karak dakakana Papang witing Dawan kidika yaklau itiklana pasyak likkidika masan awarni wingni wauhwa yakat, bahang witing kiri uiwi pan balna daklana paskau bangkidika pining yakat yakmamaldana Papang muhni kaupak. 9Kaunah Papang witing Dawan kidika yaklauwi al yakat kalyulwi dakana:
—¿Angkat sakmahn?
10Bahang al kidika biri nangnitlana:
—Itiklana pasyak likman kidika dakanayang dawak yamadunayang, kat wahdisyang bahang, kidika yulni maldanayang.
11Kaput laih Papang yulwi dakana:
—¿Wais yaklauwi mayulnayah man wahdisman kidika? ¿Pan minik kasnin-awas mayulnayang kidika kasnaman katpah?
12Al kidika biri kalyulna:
—Yal yang karak atnin yanaman kidika yaklauwi pan minik kidika yāna, dawak yang kasnayang.
13Dawak Papang witing Dawan kidika yaklauwi yal yakat kalyulwi dakana:
—¿Ais yamta kaput yamnamanh?
Biriwi kalyulna:
—Bil yaklauwi alas yāyulna,#2 Kor 11:3; 1 Tim 2:14. kidika bahang panan minik kidika kasnayang.
14Dawak Papang witing Dawan kidika yaklauwi bil yak kalyulna:
—Man adika yamnaman kidika, di dauh balna bitik pasyakat dutni awama, Warmani kaupak pasmakau kau murta likawama, dawak bik sau kasma. 15Yamtingkat man dawak muih yal kidika karak waihla awama, sulama balna tilahkau kaiwarang bik.#Rib 12:17. Witing sulani balna kidika man tunama atakwi lababanwarang, dawak man lawa witing kalnitung yak kasma.
16Dawak yal yakat laih aput kalyulna:
—Walabis yaknin dalani balna kidika baisa minit kau laktik māki, dawak dalani karak walabis yakta āwama. Kaunah dukihni mawa kidika laih alma kauh dunakarang, dawak bik man mamatyak parasni duwa karang.
17Al yak laih aput kalyulna:
—Man yalma yulni daka pan minik kasnin-awas mayulnayang dai kidika kasnaman bahang, man dutma yulni sau adika dutni kalkulna karang; man wark parasni yamta kasnam balna yakma sangmaka bitik yakat. 18Sau kidika pan wakalni duwa#Rom 8:20; Hib 6:8. balna bik kalawak ukusna karang, dawak asangpas kau pan balna ukuswa kidika balna kasma. 19Muhma walahni yakta kau plawar busna kasma, man laih sau kau mayamna bahang watta nawatta sau yakat yawama kat, sauman bahang sau kalma.
20Al kidika yaklauwi yalni yak Eva#3.20 Hibru kau Eva kidika tanka laih sangka sihm kapat paruh kiwi. pakna ayangni, kat sau akat sangninaka duduwa balna kidika bitik nanangnina kidika laih witing. 21Papang witing Dawan kidika yaklauwi di unitak kau asninana balna yamna, kaput laih al dawak yal yakarak praknina kāna atnin, 22dawak aput yulna: “Waralaih muih al kidika mayang apat kalna, kat witing amanglawi di yamni dawak di dutni bik. Sangka atnin panan#Rib 22:14. minik kidika duwi kaswi ban dauwas sangka atnin-awaski.”
23Kidika bahang Papang witing Dawan kidika yaklauwi al kidika Edén itiklana kaupak yakna, dawak sau yakat kalana, kat kidika sauni kau witing kidika kalyamna bahang. 24Bahang al kidika yakna usnit kat, itiklana kidika masar niningyak di lawani duyang balna āna, dawak isparah dahlwa as kidika yakat awaihwādai, sangka atnin panan yakat muih as bik kiunin-awas yulni.
موجودہ انتخاب:
Génesis 3: SUMU
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia Sumo
Texto © Sociedad Bíblica de Nicaragua 1998