Génesis 4
4
Caín dawak Abel
1Al kidika yalni karak kalpakna kat, Eva kidika muih duna, dawak walanbis Caín#4.1 Hibru kau Caín kidika tanka laih duna atnin, sihm kapat paruh yulwi. kidika yakna, dawak aput yulna: “Uman walakibis al as dunayang. Dawan yaklauwi yana.” 2Kidika usnit kat walanibis ūk duna kidika laih Abel, Caín wirah. Abel laih witing wark yamna tinglau sahnin, dawak Caín laih yamak warkni yamna.
3Ma balna bayakna, dawak ma as kat Caín witing Dawan yakat minitdis kalanin dini as duwi kiuna, yanimak minik balna bahna kidika kaupak. 4Dawak Abel bik duwi kiuna sīpni balna walanibis tatuna yakna yayamni kidika. Kaput laih Dawan witing yamni talna Abel witing minitdis dini#Hib 11:4. duwi kiwa kidika, 5kaunah Caín yakat laih kaput yamni talwasdai, dawak minitdis dini balna duwi kiuna yakat bik, kidika yulni Caín kasak kulnin daukalna, dawak muhni bik dutni yamna. 6Kaput laih Dawan yaklauwi kalyulna: “¿Ais yamta kulnam daukalta dawak muhma bik dutni yamta manh? 7Man yamni yamma kat, sipman muhma maluih dulaunam; kaunah kaput yamtasman bahang, dutni kidika tahawasakki mamat bayakna atnin. Kaput kaunah man sipman minit bayakna atnin.”
8Ma as kat, Caín yaklauwi wirahni Abel yakat kalyulna, witingna awaihna uina atnin,#4.8 Witingna awaihna uina atnin: sara kau ulna balna yakat kaput yulwi. Hibru kau laih kidika yulni kalahwas ki. dawak witingna albulah dadawak, Caín yaklauwi wirahni Abel yakat īna.#Mt 23:35; Lc 11:51; 1 Jn 3:12. 9Bahang Dawan yaklauwi Caín yak yulwi dakana:
—¿Man wirahma Abel kidika angkat sakyah?
Caín yaklauwi nangnitlana biri:
—Amanglatasyang. ¿Witing maintalnik kidika yang warkki katpah?
10Dawan biri kalyulna:
—¿Ais yamta kaput yamnamanh? Man wirahma āni sau yak utuhnaman kidika parasni sarahwi yayulwi yang akat, lani kidika barangni yamnik.#Hib 12:24. 11Kidika bahang, la matuhna karang, man wirahma ani dina sauni kidika kaupak mayakpamna karang, man lawa īna man kidika. 12Sau yakat di dahma bik watwi minik yakwas karang. Pini sau yakat awaihma sip man wingmata puhtas awama.
13Kaput dawak Caín yaklauwi biri Dawan yakat kalyulna:
—Yang kaput wah nuhni kidika sip wauhtasyang. 14Warmani adika sauni kaupak yakangta yaktaman, bahang pini awaihtik lik-awaki sau yakat man muhma kaupak naikau, wattik sip yamni urupdas awaki. Kaput laih wais yatalwarang kat yaīwarang.
15Kaunah Dawan yaklauwi nangnitlana:
—Angdika muihni maiwarang kat witing wat tiaskaubu wah duna karang.
Kaput laih Dawan yaklauwi Caín yak sain as kalana, kaput laih wais karak kalpakwarang bik īnin awas yulni. 16Caín witing mahka kiuna Dawan karak yulbauwa sakdai kidika kaupak, bahang Nod#4.16 Hibru kau Nod kidika yulni tanka laih pini awaihnin, sihm kapat paruh yulwi. pāni yakat kiwi yalahna dai, Edén kaupak makilwa niningyakat.
Caín sulani balna
17Caín witing yalni karak kalpapakna, dawak muih duna, kaput laih witing muihbin as yakna ayangni laih Enoc. Kidika usnit kat Caín witing tawan nuhni as yamna bahang ayangni laih Enoc paknadai walanbis ayangni kaput. 18Enoc kidika Irad papangni dai, dawak Irad kidika Mehujael papangni, dawak Mehujael papangni laih Metusael, dawak Metusael papangni laih Lamec. 19Dawak Lamec laih yal bu duna, as kidika ayangni Ada dawak ūk kidika Zila. 20Ada walanibis as duna kidika laih Jabal, bahang kidika sulani balna kuduh ū lababanni kau manah yalalahwa kidika dawak bik witingna tinglau sasahwi. 21Jabal witing wirahni al as duwadai ayangni laih Jubal, bahang witing sulani balna kuduh pasnin dini pasyang balna dawak bik bara puhyang balna kidika. 22Dawak Zila laih walanibis as yakna ayangni Tubal-caín, bahang witing kidika laih ayan kau diyamyang dai, bahang bras kau dawak ayan kau bik di manas yamwadai. Tubal-caín witing wirahni yal as dai ayangni Naama.
23Ma as kat Lamec yaklauwi yalni balna Ada dawak Zila yakat diyulna:
“Manayultayang kidika yamni dakanauh:
muih as īnayang yatuswakat,
dawak wahmabin bik as īnayang yabauwak.
24Bahang Caín yakat wat tiaskaububiri kalyayamna karang kat,
kaunah yang laih biriwi yayayamna karangwat muihasluih bās minitkau salap minitkau tiaskaubu.”
Adam dawak Eva karak walaninabisbāswa kidika yakat
25Adam#4.25 Talah 2:7 yakat. wat yalni karak kalpapakna kat walaninabis al as duna, ayangni pakna Set,#4.25 Hibru kau, Set kidika yulni tanka laih, witing yaklauwi kalana, sihm kapat paruh yulwi. pakna, dawak yulna: “Papang yang akat watwi walakibis al ūk as Abel pāni yakat, Caín yaklauwi īna kidika.”
26Dawak Set bik walanbis al as duna, bahang ayangni pakna Enós. Kidika kaupak dawak Dawan ayangni yulwi minitna yuyulna.
موجودہ انتخاب:
Génesis 4: SUMU
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia Sumo
Texto © Sociedad Bíblica de Nicaragua 1998