Yoa 7
7
Yesũ na Ana-a-inyia make
1Ĩtina wa ũu Yesũ angangĩlaa Kalilii; ndendaa kwanganga Yutia nũndũ atongoi ma Ayuti kũu nĩmendaa kũmũaa. 2#Ali 23.34; Kũt 16.13 Mboka ya Ayuti ya kwĩkala tũsũmbanĩ twa matũ yaĩ vakuvĩ, na 3kwoou ana-a-inyia ma Yesũ mamwĩa atĩĩ, “Uma vaa ũthi Yutia nĩ kana amanyĩw'a maku matonye kwona maũndũ ala ũkwĩka. 4Vai mũndũ wĩkaa maũndũ evithĩte ethĩwa eenda kũmanyĩka nĩ andũ. Yu nũndũ we nũkwĩka maũndũ aa, ĩyumĩlye kwa andũ onthe makũmanye.” 5Ana-a-inyia make o namo mayaamũĩkĩĩa.
6Yesũ nake amea atĩĩ, “Ĩvinda yĩla yaĩlu kwakwa yĩinamba kũvika, ĩndĩ inyw'ĩ vai ĩvinda yĩte yaĩlu kwenyu. 7Nthĩ ndĩtonya kũmũmena, ĩndĩ nyie nĩmenete, nũndũ nyie nĩtindĩaa kũweta kana meko mayo nĩ mathũku. 8Inyw'ĩ endai mbokanĩ; nyie ndithi mbokanĩ ĩsu nũndũ ĩvinda yĩla yaĩlu kwakwa yĩinamba kũvika.” 9Aneena ũu, nĩwaendeeie kwĩkala Kalilii.
Yesũ e Mbokanĩ ya Ayuti ya Kwĩkala Tũsũmbanĩ twa Matũ
10Ana-a-inyia ma Yesũ mamina kũthi mbokanĩ, o nake nĩwaendie kw'o, ĩndĩ evithĩte atekwĩyumĩlya andũnĩ. 11Atongoi ma Ayuti nĩmamũmanthaa kũu mbokanĩ maikũlya atĩĩ, “Aĩva mũndũ ũsu?”
12Andũ aingĩ ĩkomanonĩ yĩu nĩmaneenanasya na kĩwe ĩũlũ wa Yesũ. Amwe maasya, “Nĩ mũndũ mũseo.” Ĩndĩ angĩ mayasya, “Aiee, aendee kũtuma andũ matia nzĩa.” 13Ĩndĩ ũu wĩ o vo, vai mũndũ waaĩtĩkĩla kũneena ĩũlũ wake eyumĩlĩtye, nũndũ wa kũkĩa atongoi ma Ayuti.
14Mboka ĩsu yĩ katĩ, Yesũ nĩwaendie Ĩkalũnĩ na ambĩĩa kũmanyĩsya. 15Atongoi ma Ayuti nĩmaseng'iw'e mũno nĩwe na makũlany'a atĩĩ, “Mũndũ ũũ amanyangĩte maũndũ maingĩvĩte ũu ata na ndaasoma?”
16Yesũ amasũngĩa amea atĩĩ, “Maũmanyĩsyo ala nyie ngũmanyĩsya ti makwa, ĩndĩ nĩ ma ũla ũndũmĩte. 17Ethĩwa mũndũ o na wĩva endaa kwĩka kwenda kwa Ngai, akamanya ethĩwa momanyĩsyo makwa maumĩte kwa Ngai, kana nyie nĩneena na ũkũmũ wakwa mwene. 18Mũndũ ũla ũneenaa na ũkũmũ wake, ethĩawa aimantha nguma yake mwene, ĩndĩ ũla ũmanthĩaa ũla ũmũtũmĩte nguma, ũsu aneenaa ũla w'o na ndesaa kũkengana. 19Mwose ndamũnengie Mĩao? Ĩndĩ vai ũmwe wenyu ũkwataa mĩao ĩsu. Mwĩenda kũmbũaa nĩkĩ?”
20Andũ mamũsũngĩa mamwĩa atĩĩ, “Wĩna maimũ we! Nũũ ũla ũkwenda ũkũaa?”
21Yesũ amasũngĩa amea, “Ve ũndũ ũmwe nĩneekie na wamũseng'ya mũno inyw'onthe. 22#Mwa 17.10; Ali 12.3 Mwose nĩwamũnengie mwĩao wa kwaĩkaa, o na kau mwĩao ũsu ndwaa ambĩĩa na Mwose; wambĩĩie na aaũmae menyu, na kwoou nĩmwaĩkaa o na mũthenya wa Savato. 23#Yoa 5.9 Ethĩwa nĩmũtonya kwaĩka mũndũ o na mũthenyanĩ wa Savato, nĩ kana mwĩao wa Mwose ndũkatũlwe, nĩkĩ mũũmbĩw'ĩa woo navosya mũndũ mũthenyanĩ wa Savato ethĩwe e mũima? 24Ekaai kũsilĩla ũndũ kwa kũwona, ĩndĩ umasyai sila kwĩanana na ũla w'o.”
Andũ Maikũlany'a kana Yesũ nĩwe Klĩsto
25Andũ amwe ma kũu Yelũsalemu nĩmambĩĩie kũkũlany'a atĩĩ, “Ũũ we ti ũla mũndũ ũkũmanthwa nĩ atongoi mamũae? 26Mbona nũũ vaa ũkũneena ũtheinĩ na vai ũndũ meũmwĩa! No kwĩthĩwa atongoi mesĩ kwa w'o kana ũũ nĩwe Klĩsto? 27Ĩndĩ ithyĩ nĩtwĩsĩ vala mũndũ ũũ wumĩte, na yĩla Klĩsto wĩũka, vai mũndũ ũkamanya vala wumĩte.”
28Nĩvo ĩndĩ Yesũ o aendee kũmanyĩsya Ĩkalũnĩ waneenie na wasya mũnene akũlya atĩĩ, “Atĩ inyw'ĩ nĩmũmbĩsĩ na mũkamanya vala numĩte? Nyie ndyũkĩte na ũkũmũ wakwa mwene; ũla ũndũmĩte nĩwe wa kũĩkĩĩwa, nenyu mũimwĩsĩ. 29Nyie nĩnĩmwĩsĩ nũndũ numĩte kwake na nĩwe ũndũmĩte.”
30Nĩvo ĩndĩ andũ amwe mendie kũmũkwata Yesũ, ĩndĩ vai mũndũ waamũkiita nũndũ saa wake ndwaĩ ũnamba kũvika. 31Ĩndĩ ũu wĩ o vo, andũ aingĩ ĩkomanonĩ yĩu nĩmamũĩkĩĩie na makũlya atĩĩ, “Yĩla Klĩsto wĩũka akeeka syama ivĩtũkĩte ila mũndũ ũũ wĩkĩte?”
Asikalĩ Maitũmwa Makamũkwate Yesũ
32Avalisi nĩmeewie andũ maineena na kĩwe maũndũ asu ĩũlũ wa Yesũ, na kwoou mo vamwe na athembi anene matũma asikalĩ ma Ĩkalũ makamũkwate. 33Nĩvo ĩndĩ Yesũ wameie atĩĩ, “Vatiele ĩvinda ĩnini nĩ vamwe nenyu, na ĩndĩ ngĩthi kwa ũla ũndũmĩte. 34Inyw'ĩ mũkamantha ĩndĩ mũikambona, na vala ngethĩwa mũitonya kũvika.”
35Atongoi ma Ayuti makũlany'a atĩĩ, “Mũndũ ũũ eenda kũthi va wĩthĩe tũimwona? Ko ũkwenda kũthi kwa Ayuti ala manyaĩĩkĩe kwa Akiliki akamanyĩsye Akiliki? 36Kana eweta kyaũ yĩla ũkwasya, ‘Mũkamantha na mũikambona, na vala ngethĩwa mũitonya kũvika?’ ”
Mbũsĩ sya Kĩw'ũ kĩla Kĩetae Thayũ
37 #
Ali 23.36
Mũthenyanĩ wa mũthya wa mboka ĩsu naw'o nĩw'o mũthenya mũnene, Yesũ nĩwaũngamie na aneena na wasya mũnene asya atĩĩ, “Ethĩwa ve mũndũ wĩ na waũni nĩoke kwakwa akwate kyaũnyw'a. 38#Esek 47.1; Nzek 14.8 Mũndũ ũla ũndĩkĩaa, o tondũ Maandĩko Matheu maĩtye, ‘Mbũsĩ sya kĩw'ũ kĩetae thayũ ikauma ngoonĩ yake.’ ” 39Vau Yesũ aneenaa ĩũlũ wa Veva Mũtheu, ũla ala mamwĩtĩkĩlĩte Yesũ makosa. Ĩvinda yĩu Veva Mũtheu ndaĩ anamba kũnenganwe, nũndũ Yesũ ndaĩ anamba kwambatw'a ũkumyonĩ wake.
Ũtilĩkangano katĩ wa Andũ nũndũ wa Yesũ
40Andũ meew'a ndeto isu sya Yesũ, amwe moo nĩmaisye atĩĩ, “Mũndũ ũũ kwa w'o nĩ ũla mwathani.” 41Namo angĩ masya, “Ũu nĩ Klĩsto!” Ĩndĩ angĩ makũlya, “Klĩsto nũtonya kuma Kalilii?” 42#2Sam 7.12; Mika 5.2 Maandĩko Matheu maĩtye kana Klĩsto akeethĩwa e nzyawa ya Ndeviti, na akauma Mbetheleemu nayo nĩ ndũa ĩla Ndeviti watwĩe. 43Kwoou veethĩwa na ũtilĩkangano katĩ wa andũ ĩũlũ wa Yesũ. 44Andũ amwe nĩmendie kũmũkwata ĩndĩ vai ũmwe waamũkiita.
Kũlea Kũĩkĩĩa kwa Atongoi ma Ayuti
45Ala asikalĩ nĩmasyokie kwa athembi anene na Avalisi namo mamakũlya atĩĩ, “Mwalea kũete mũndũ ũsu vaa nĩkĩ?” 46Asikalĩ mamasũngĩa mamea, “Vai mũndũ waaneena ũndũ mũndũ ũsu waneena!”
47Avalisi mamakũlya atĩĩ, “Inyw'ĩ o nenyu nĩmwatiĩthw'a nzĩa? 48Mũneeĩw'a ũmwe wa atongoi ma Ayuti kana ũmwe wa Avalisi ũmũĩkĩĩe? 49Ĩndĩ ĩkomano yĩĩ yĩtesĩ Mĩao ya Mwose nĩyĩumanĩe nĩ Ngai!”
50 #
Yoa 3.1-2
Nikotemo ũla waendete kwa Yesũ na vau mbeenĩ, na waĩ ũmwe wa atongoi asu nĩweeie asu angĩ atĩĩ, 51“Kwĩanana na Mĩao yaitũ tũitonya kũtw'ĩĩa mũndũ ĩvĩtyo tũtambĩte kũmwĩthukĩĩsya tũkamanya ekĩte ata.” 52Namo mamũsũngĩa mamwĩa atĩĩ, “We nũndũ o naku wumĩte Kalilii? Soma Maandĩko Matheu na nũkwĩthĩa kana vai mwathani ũkauma Kalilii.”
Mũndũ Mũka Wakwatiwe Akĩlaalaa
[ 53Andũ nĩmaendie menũka kĩla mũndũ mũsyĩ kwake.
موجودہ انتخاب:
Yoa 7: KAMBA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
BIBLE SOCIETY OF KENYA © 2011
